Bai pa asuntu

Bai pa lista di asuntus

 STUDU 3

Modi ki bu pode proteje bu korason?

Modi ki bu pode proteje bu korason?

‘Más di ki kalker otu kuza ki bu debe guarda, proteje bu korason’. — PROVÉRBIOS 4:23.

KÁNTIKU 36 Nu proteje nos korason

KUZÊ KI NU STA BEN STUDA *

1-3. (a) Pamodi ki Jeová gostaba txeu di Salumon i ki bensons Salumon resebe? (b) Ki perguntas nu ta ben responde na kel studu li?

SALUMON bira rei di Israel kantu inda el éra jóven. Lógu na komésu di se govérnu, Jeová parse pa el na un sonhu i el fla: ‘Pidi-m kuzê ki bu ta gostaba pa N daba bo.’ Salumon responde: ‘Ami é un jóven inda ki ka ten spiriénsa. Pur isu, da bu sérvu un korason obidienti pa julga bu povu’. (1 Reis 3:5-10 ) Kantu el pidi un ‘korason obidienti’ el mostra ma el staba sienti di se limitason. Kel-li ta djuda-nu ntende pamodi ki Jeová gostaba txeu di Salumon. (2 Sam. 12:24) Nos Deus fika txeu kontenti ku kel ki Salumon pidi, ki el da-l un ‘korason ki ten sabedoria i ntendimentu’. — 1 Reis 3:12.

2 Duránti tudu kel ténpu ki Salumon kontinua fiel pa Jeová, el resebe txeu benson. El tevi priviléjiu di faze un ténplu ‘pa nómi di Jeová, kel Deus di Israel’. (1 Reis 8:20 ) El bira famozu pamodi Deus da-l sabedoria. Tanbê Jeová uza-l pa el skrebe três livru di Bíblia. Un di es é livru di Provérbios.

3 Palavra korason ta parse kuazi 100 bês na livru di Provérbios. Pur izénplu, Provérbios 4:23 ta fla: ‘Más di ki kalker otu kuza ki bu debe guarda, proteje bu korason’. Kuzê ki siginifika palavra ‘korason’ na kel versíklu li? Nu ta ben responde es pergunta na kel studu li. Tanbê nu ta ben responde más dôs pergunta: Modi ki Satanás ta tenta prujudika nos korason? I kuzê ki nu pode faze pa nu proteje nos korason? Nu meste ntende respóstas pa kes  pergunta inportanti li, pa nu pode kontinua lial pa Deus.

KUZÊ KI É ‘KORASON’?

4-5. (a) Modi ki Salmo 51:6, ta djuda-nu ntende kuzê ki siginifika palavra ‘korason’? (b) Ki izénplu sobri saúdi ta djuda-nu ntende ma nu meste kuida di nos ‘korason’?

4 Kel palavra ‘korason’ ki ta parse na Provérbios 4:23, uzadu pa pâpia di ‘kel algen ki nos é di pa déntu’ ô ‘kel párti di nos ki ka ta odjadu’. (Lé Salmo 51:6 i nóta di rodapé.) Kel-li krê fla ma palavra ‘korason’ ta reprizenta kes kuza ki nu ta pensa, ki nu ta xinti, nos intenson i nos dizejus. Na verdadi, ‘korason’ é ka sô kel ki nu ta parse di pa fóra, má é kel algen ki nos é di pa déntu.

5 É rei di inportanti nu kuida di kel algen ki nos é di pa déntu. Pur izénplu, pensa na saúdi di bu korpu. Primeru, pa nos korpu kontinua ku un bon saúdi, nu meste skodje kumida ki é bon pa saúdi i sénpri nu meste faze izersísiu. Di mésmu manera, pa nu kontinua ta ten un bon saúdi spritual, nu meste lé Bíblia tudu dia, publikasons i mostra ma nu ten fé na Jeová. Nu ta mostra fé na Jeová óras ki nu ta faze sima nu prende i nu ta pâpia ku otus sobri nos fé. (Rom. 10:8-10; Tia. 2:26) Sugundu, alvês nos korpu pode mostra ma nu sta ku un bon saúdi, má pa déntu nu pode sta duenti. Di mésmu manera, nu pode atxa ma nu tene un fé fórti pamodi nu ta bai tudu runion i nu ta sai na pregason. Má, dizejus mariadu pode sta ta kria na nos. (1 Cor. 10:12; Tia. 1:14, 15) Nu ka debe skese ma Satanás ta krê pô-nu pensa sima el. Modi ki el ta faze kel-li? I modi ki nu pode proteje nos kabésa?

MODI KI SATANÁS TA TENTA STRAGA NOS KORASON?

6. Kuzê ki Satanás ta krê i modi ki el ta tenta konsigi se obijetivu?

6 Satanás krê pa nu bira sima el. Pa nu ser rebéldi, pa nu ka ruspeta leis di Jeová i pa nu pensa sô na nos kabésa. Satanás ka ta pode obriga-nu pensa i aji sima el. Pur isu, el ta tenta konsigi se obijetivus di otus manera. Pur izénplu, el  ta serka-nu di pesoas ki dja el kontamina pa es straga-nu. (1 João 5:19 ) El ta spéra ma nu ta pasa ténpu djuntu ku es, sikrê nu sabe ma kolega ku algen mariadu ta ‘straga’ nos manera di pensa i di aji. (1 Cor. 15:33; nóta di rodapé) Rei Salumon kai na kel armadilha li. El kaza ku txeu mudjer ki ka ta adoraba Jeová. I ‘es bira un influénsia fórti pa el’ i ‘poku-poku es disvia se korason’ di Jeová. — 1 Reis 11:3; nóta di rodapé.

Modi ki bu pode proteje bu korason kóntra pensamentus di Satanás? (Odja parágrafu 7.) *

7. Kuzê más ki Satanás ta uza pa spadja se manera di pensa i pamodi ki nu debe toma kuidadu ku kel-li?

7 Satanás tanbê ta uza filmis i prugramas di tilivizon pa el spadja se manera di pensa. El sabe ma stórias ki ta kontadu, é ka sô pa divirti-nu. Tanbê es ta inxina-nu modi ki nu ta pensa, xinti i aji. Jizus éra bon na konta stória pa inxina kuzas inportanti. Pur izénplu, stória di kel bon samaritanu i di kel fidju ki perde. (Mat. 13:34; Luc. 10:29-37; 15:11-32) Má kes algen ki sta influensiadu pa Satanás ta uza stórias pa tenta prujudika-nu. É klaru ki nen tudu filmis i prugramas di tilivizon é ka mariadu. Es pode divirti-nu i inxina-nu sen prujudika nos manera di pensa. Má nu meste toma kuidadu. Óras ki nu ta skodje diverson é bon nu pergunta nos kabésa: ‘Kel filmi li ô prugrama di tilivizon ta inxina-m ma é normal faze dizejus di karni?’ (Gál. 5:19-21; Efé. 2:1-3) Kuzê ki bu debe faze si bu da kónta ma un prugrama di tilivizon sta ta spadja manera di pensa di Satanás? Fika lonji di el, sima bu ta fujiba di un algen ki tene un duénsa ki ta pega!

8. Modi ki mai ku pai pode djuda ses fidjus proteje ses korason?

8 Mai ku Pai, nhos ten un responsabilidadi inportanti. Nhos meste proteje nhos fidju, pamodi Satanás krê straga ses korason. Di sertéza, nhos sta faze di  tudu pa nhos proteje nhos fidju pa es ka panha duénsa. Nhos ta mante kaza linpu i nhos ta bota kalker kuza ki pode duense nhos ô nhos fidju. Di mésmu manera, nhos meste proteje nhos fidjus di filmis, prugramas di tilivizon, djogus di konputador i sites ki pode sta kontaminadu ku pensamentus di Satanás. Jeová da nhos responsabilidadi di djuda nhos fidjus bira Se amigus. (Prov. 1:8; Efé. 6:1, 4) Pur isu, ka bu xinti medu di poi bu família régras ku bazi na Bíblia. Nhos fla nhos fidjus kuzê ki es pode odja i kuzê ki es ka pode odja. I djuda-s ntende pamodi ki nhos toma kes disizon. (Mat. 5:37) Sima nhos fidjus ta ba ta kria, nhos djuda-s ntende leis di Jeová. Asi es ta konsigi sabe kuzê é dretu i kuzê ki é mariadu. (Heb. 5:14) Tanbê nhos fidjus ta prende txeu ku kel ki nhos ta fla. Má nhos lenbra, ma es ta prende mutu más txeu ku kel ki nhos ta faze. — Deut. 6:6, 7; Rom. 2:21.

9. Kal ki é un di kes ideia ki Satanás ta spadja i pamodi ki el é prigozu?

9 Satanás ta uza otu manera pa el straga nos korason. El krê pa nu kúnfia na sabedoria di ómi envês di kúnfia na Jeová. (Col. 2:8) Repara un di kes ideia ki Satanás ta spadja. El krê pa nu pensa ma rikéza debe ser kuza más inportanti na nos vida. Alguns algen ki ta pensa si pode bira riku ô nau. Kes algen ki ten kel obijetivu li sta na prigu. Pamodi? Pamodi es pode fika ta pensa sô na ganha dinheru, i kel-la pode prujudika ses saúdi, ses família i ti ses amizadi ku Deus. (1 Tim. 6:10) Nu ta fika kontenti pamodi nos Pai na Séu ten sabedoria, i el ta djuda-nu ka pensa sô na dinheru. — Ecl. 7:12; Luc. 12:15.

MODI KI NU PODE PROTEJE NOS KORASON?

Sima kes guarda i porterus di ténpu antigu, mante sienti i ka bu dexa kuzas mariadu entra na bu korason (Odja parágrafus 10 i 11.) *

10-11. (a) Kuzê ki nu debe faze pa nu proteje nos kabésa? (b) Kuzê ki kes guarda na ténpu antigu ta fazeba i modi ki nos konsénsia pode ser sima un guarda?

10 Si nu krê proteje nos korason, nu meste konxe kes prigu i aji lógu pa nu proteje nos kabésa. Palavra ki traduzidu pa ‘proteje’ na Provérbios 4:23 , ta lenbra-nu di un trabadju ki un guarda ta fazeba na ténpu antigu. Na ténpu di Rei Salumon, kes guarda ta fikaba sakédu na paredis di sidadi. Si el odjaba un prigu ta binha el ta avizaba. Kel izénplu li, ta djuda-nu ntende kuzê ki nu ten ki faze pa nu ka dexa Satanás straga nos manera di pensa.

11 Alén di guardas, tanbê tinha porterus. Es ta trabadjaba djuntu pa protejeba sidadi. (2 Sam. 18:24-26) Si porterus odjaba inimigus ta binha, es ta djobeba si portons di sidadi staba fitxadu. (Nee. 7:1-3) Nos konsénsia * é sima un guarda. Si nu trena-l ku bazi na Bíblia el pode guarda nos korason. I el pode aviza-nu óras ki Satanás tenta invadi nos korason. Kel-li ta kontise óras ki el ta tenta muda nos pensamentus, sentimentus, intensons ô dizejus. Pur isu, óras ki nos konsénsia da-nu un avizu nu debe obi i fitxa porton di nos korason.

12-13. Ki tentason nu pode pasa pa el i kuzê ki nu debe faze?

12 Pensa na un otu izénplu ki ta djuda-nu proteje nos kabésa kóntra influénsia  di Satanás. Jeová ta inxina-nu ma ‘konportamentu seksual mariadu ku tudu tipu di sujidadi i ganánsia, ka debe nen limiadu na nos meiu’. (Efé. 5:3) Má kuzê ki nu ta faze si un koléga di skóla ô di trabadju kumesa ta pâpia sobri asuntus ki ten aver ku séksu? Nu sabe ma nu debe ‘nega kuzas mariadu i dizejus mariadu’. (Tito 2:12 ) Nos konsénsia ki é nos guarda, pode aviza-nu di prigu. (Rom. 2:15) Má nu ta obi ku el? Talvês nu pode fika ku gana di obi konbérsu di nos koléga ô odja algun imaji ki es krê mostra-nu. Má kel-li é óra di fitxa porton di sidadi ô di nos korason. Nu pode muda konbérsu ô sai di la.

13 Nu ten ki ten koraji pa nu lida ku preson di kolégas. Nu pode ten sertéza ma Jeová ta odja sforsu ki nu ta faze. El ta da-nu forsa i sabedoria pa nu luta kóntra pensamentus di Satanás. (2 Cró. 16:9; Isa. 40:29; Tia. 1:5) Má, kuzê más ki nu ten ki faze pa nu proteje nos korason?

MANTE SIENTE

14-15. (a) Pa kuzê ki nu ten ki abri nos korason i modi ki nu pode faze-l? (b) Modi ki Provérbios 4:20-22 , ta djuda-nu tra más pruvetu na nos leitura di Bíblia? (Djobe tanbê kuadru “ Perguntas ki ta djuda-u pensa”.)

14 Pa nu proteje nos korason, nu debe fitxa-l pa kuzas mariadu ka entra na el. Má tanbê, nu debe abri-l pa kuzas dretu entra na el. Pensa otu bês na trabadju ki porterus ta fazeba na sidadi. Un porteru ta fitxaba portons di sidadi pa inimigus ka invadi. Má, el ta abriba portons pa dexaba kumida i otus kuza entra. Si es ka abriba portons di sidadi, kes algen ta moreba di fómi. Di mésmu manera, nu ten ki abri nos korason sénpri pa nu pode dexa pensamentus di Deus kontinua ta muda-nu.

15 Na Bíblia nu ta atxa pensamentus di Jeová. Nton sénpri ki bu lé Bíblia, dexa pensamentus di Jeová muda bu manera di pensa, di xinti i di aji. Kuzê ki nu pode faze pa leitura di Bíblia djuda-nu inda más txeu? Orason é txeu inportanti. Un irman fla: “Antis di N lé Bíblia, N ta faze orason i N ta pidi Jeová pa djuda-m ‘odja klaru kes kuza bunitu’ di se Palavra.” (Sal. 119:18) Tanbê nu meste pensa txeu na kuza ki nu lé. Óras ki nu faze orason, nu lé Bíblia, i nu ta pensa na kuza ki nu lé, Palavra di Deus ta entra ‘fundu na nos korason’. Asi nu ta fika ta gosta di pensamentus di Jeová. — Provérbios 4:20-22; Sal. 119:97.

16. Modi ki prugramas di JW Broadcasting pode djuda-nu? Da un izénplu.

16 Otu manera di nu dexa pensamentus di Deus muda-nu é óras ki nu ta odja vídius na JW Broadcasting®. Un kazal fla: “Jeová uza kes prugrama ki ta sai tudu mês pa responde nos orason! Es ta da-nu forsa i es ta konsola-nu óras ki nu ta xinti tristi ô nos sô. I sénpri nu ta obi kes múzika orijinal na nos kaza. Nu ta pô-s ta toka timenti nu sta ta kuzinha, linpa kaza ô ti óras ki nu ta toma xá.” Kes prugrama ta djuda-nu proteje nos korason. Es ta inxina-nu pensa sima Jeová ta pensa i ka dexa pensamentus di Satanás entra na nos korason.

17-18. (a) Di akordu ku 1 Reis 8:61 , kuzê ki ta kontise óras ki nu faze kel ki é dretu? (b) Kuzê ki nu ta prende ku izénplu di Rei Ezekias? (c) Sima kel orason di Davidi na Salmo 139:23, 24 , sobri kuzê ki nu debe ora?

17 Tudu bês ki nu odja ma faze kel ki é dretu ta djuda-nu, nos fé ta fika más  fórti. (Tia. 1:2, 3) Óras ki nu ta faze kel ki é dretu, Jeová ta xinti orgulhu di txoma-nu di se fidjus. I nu ta fika ku más vontadi di agrada-l. (Prov. 27:11) Sénpri ki nu pasa pa un provason, el ta da-nu xansi di mostra Jeová ma nu ka sta sirbi-l ku un korason divididu. (Sal. 119:113) Má, nu ta prova ma nu ta ama Jeová di tudu nos korason. Kel-li siginifika ma nu sta disididu na obi ku el i faze se vontadi. — 1 Reis 8:61.

18 Nu pode spéra ma nu ta fadja? Sin, pamodi nos é inperfetu. Si nu fadja, nu debe lenbra di izénplu di Rei Ezekias. El fadja tanbê, má el rapende i el kontinua ta sirbi Jeová ku un ‘korason konplétu’. (Isa. 38:3-6; 2 Cró. 29:1, 2; 32:25, 26) Pur isu, ka nu dexa Satanás pô-nu ta pensa sima el. Nu pidi Jeová pa da-nu un ‘korason obidienti’. (1 Reis 3:9; Salmo 139:23, 24.) Nu pode kontinua fiel pa Jeová, si nu proteje nos korason más di ki kalker otu kuza.

KÁNTIKU 54 ‘Kel-li ki é kaminhu’

^ par. 5 Nu ta kontinua fiel pa Jeová ô nu ta dexa Satanás afasta-nu di Deus? Ta dipende. Si nu proteje nos korason, nu pode kontinua lial ka ta nporta ki tipu di provason nu sta pasa pa el. Kuzê ki siginifika palavra “korason”? Modi ki Satanás ta tenta straga nos korason? I modi ki nu pode proteje-l? Nu ta ben sabe respósta di kes pergunta inportanti li na es studu.

^ par. 11 MÁS SPLIKASON: Jeová da-nu konsénsia, ki é kapasidadi di izamina i julga nos pensamentus, sentimentus i kuzas ki nu ta faze. (Rom. 2:15; 9:1) Un konsénsia trenadu pa Bíblia é kel ki ta uza leis i prinsípius di Jeová ki sta na Bíblia, pa julga si kel ki nu ta pensa, ki nu ta faze ô ki nu ta fla é dretu ô mariadu.

^ par. 56 SPLIKASON DI FOTU: Un irmon batizadu sta ta odja tilivizon i parse un imaji mariadu. El ten ki disidi kuzê ki el ta faze.

^ par. 58 SPLIKASON DI DIZENHU: Un guarda na ténpu antigu, sta ta odja prigu fóra di sidadi. El ta aviza porterus i kel óra es ta tranka portons di sidadi pa déntu.