Bai pa asuntu

Bai pa lista di asuntus

 STÓRIA DI VIDA

Un eransa ki N resebe djuda-m kontinua ta sirbi Jeová

Un eransa ki N resebe djuda-m kontinua ta sirbi Jeová

NA MEIU di noti, nu staba frenti di Riu Níjer. El ten korenti fórti i más di 1,6 km di largura. Nijéria staba na meiu di un Géra Sivil, pur isu éra prigozu tenta pasaba na Riu Níjer. Má simé nu tinha ki riskaba, i nu faze kel-li más di ki un bês. Modi ki N txiga na kel situason li? Antis di N konta nhos, nu volta pa tras, na kel ténpu antis di N nase.

Nha pai, John Mills, batiza na anu 1913, na sidadi di Nova York, kantu el tinha 25 anu. Éra irmon Russel ki fazeba diskursu di batismu. Poku ténpu dipôs, nha pai muda pa Trinidad, undi ki el kaza ku Constance Farmer, un Studanti di Bíblia zeloza. Nha pai ta djudaba se amigu William Roland Brown mostra “Fotodrama da Criação”. Es kontinua ta faze kel-li ti ki irmon Brown diziginadu pa Áfrika Osidental na anu 1923. Nha pai ku nha mai, ki tinha speransa di ba vive na Séu, kontinua na Trinidad.

NOS PAI KU NOS MAI TA AMABA NOS

Nha pai ku nha mai tevi 9 fidju. Kel primeru, es pô-l nómi Rutherford, pamodi kel prizidenti di Sociedade Torre de Vigia na kel ténpu. Ami N nase dia 30 di dizénbru di anu 1922. Kel nómi ki N podu é pamodi Clayton James Woodworth ki éra responsável pa priparason di artigus di revista Idade de Ouro (ki oji ta txomadu Despertai! ). Nos pai ku nos mai pô-nu nos tudu na skóla, má es ta insentivaba nos prinsipalmenti pa nu fazeba más pa Jeová. Nha mai tinha grandi kapasidadi di uza Bíblia di manera ki ta konvenseba otus algen. Nos pai gosta di kontaba nos stórias di Bíblia, el ta fazeba jéstu ku tudu se korpu pa stória fikaba ku más vida.

Ses sforsu da bon rezultadu. Mi ku más dôs di nhas irmon nu forma na Skóla di Jiliádi i três di nhas irman bira pionera pa txeu ténpu na Trinidad i na Tobago. Tudu kuza ki nos pai ku nos mai inxina-nu i ses izénplu, djuda-nu fika ‘plantadu na kaza di Jeová’ i ‘ta kria flor na pátiu di nos Deus.’ — Sal. 92:13.

Éra na nos kaza ki irmons ta nkontraba pa saíba na pregason. Pionerus ta djuntaba la, i es ta papiaba txeu di irmon George Young. El éra un misionáriu kanadianu ki dja kustuma vizitaba Trinidad. Nha pai ku nha mai ta staba kontenti óras ki es ta papiaba di ses  kunpanheru di pregason, irmon Brown ku se mudjer, ki na kel ténpu staba ta sirbi na Áfrika Osidental. Tudu kes kuza li motiva-m pa N kumesa ta sai na pregason kantu N tinha 10 anu.

KES PRIMERU TRABADJU KI N TA FAZEBA

Na kel ténpu, nos revista ta papiaba klaru sobri finjimentu na relijions falsu, di ganánsia na kumérsiu i di kuzas mariadu ki ta kontise na pulítika. Pamodi kel-li, na anu 1936, kes xéfi di relijion na Trinidad, konsigi konvense kel governador di kel lugar pa proíbi tudu publikasons di Torre de Vigia. Nu sukundi kes publikason ki nu tinha i nu kontinua ta uza-s ti ki es kaba. Pa nu pregaba, nu ta fazeba marxa ku kartás na rua, nu ta poba kartás na bisikléta i nu ta daba konvitis. Tanbê nu ta djuntaba ku grupu di Tunapuna, i nu ta uzaba karu di son pa nu pode pregaba ti na kes lugar más lonji di Trinidad. Éra un trabadju rei di sábi! Staba na kel tipu di anbienti li motiva-m pa N batiza kantu N tinha 16 anu.

Karu di son di grupu di Tunapuna

Izénplu di nha pai ku nha mai i kes spiriénsa li djuda-m ten más vontadi di ser misionáriu. N kontinua ku kel dizeju ti ki N bai pa Aruba na anu 1944. Kantu N txiga la, N kumesa ta prega djuntu ku irmon Edmund Whitfield Cummings. Nu fika txeu kontenti pamodi nu konsigi djunta 10 algen pa sisti Komemorason di mórti di Jizus na anu 1945. Na kel otu anu formadu primeru kongregason na kel ilha.

Djuntu ku Oris, nha vida muda pa midjór

Poku ténpu dipôs, N da nha koléga di trabadju tistimunhu informal. El txomaba Oris Williams. El tenta uza txeu ideia pa difende ensinus di se relijion. Má Oris kumesa ta studa i el ntende kuzê ki Bíblia ta inxina di verdadi. Dia 5 di janeru di 1947 Oris batiza. Ku ténpu, nu kumesa ta gosta di kunpanheru i nu kaza. El kumesa sirvisu di pioneru na novénbru di 1950. Djuntu ku Oris nha vida muda pa midjór.

NU GOSTA TXEU DI SIRBI NA NIJÉRIA

Na anu 1955, nu konvidadu pa Skóla di Jiliádi. Mi ku Oris nu sai di kel trabadju ki nu tinha, nu bende nos kaza i otus kuza ki nu tinha i nu fla: txau Aruba. Dia 29 di julhu di 1956, nu forma na turma nunbru 27 di Jiliádi i nu mandadu pa Nijéria.

Ku família di Betel na Lagos, na Nijéria, 1957

Ta lenbra di kel ténpu, Oris fla: “Spritu santu di Jeová pode djuda un algen prende lida ku situasons diferenti na vida di misionáriu. Nha maridu krê sérba misionáriu, má ami nunka N ka kreba kel-la. N ta prifiriba tinha nha kaza i nhas fidju. Má kantu N da kónta modi ki trabadju di pregason é urjenti, N muda nha manera di pensa. Na kel ténpu ki nu forma na Jiliádi, N kumesa ta gosta di kel ideia di ser misionáriu. Má kantu ki nu nbarka na naviu Queen Mary, irmon Worth Thornton ki ta trabadjaba na skritóriu di irmon Knorr, dispidi di nos i el fla-nu ma nu sta ba sirbiba na Betel. N fika un bokadinhu tristi. Má na poku ténpu N prende lida ku nha novu diziginason i N kumesa ta gosta di vive na Betel. La N resebe txeu diziginason. Un di kes ki más N gostaba éra trabadja na lugar di resebe algen. N ta ama pesoas i kel trabadju la ta dexaba mi fikaba más pértu di kes irmon nijerianu. Txeu di es ta txigaba la xeiu di puera, kansadu, ku sedi i ku fómi. Pa mi éra un priviléjiu kuidaba di kes irmon, daba es tudu ki es sta ta mesteba. Kel-la éra un sirvisu sagradu pa Jeová i ta dexaba mi kontenti.” Nu ka ten dúvida, ma tudu kes diziginason djuda-nu bira algen mutu más midjór.

Na anu 1961, nha família staba tudu djuntu na Trinidad, i irmon Brown konta alguns spiriénsa sábi ki kontise ku el na Áfrika. Dipôs, N konta modi ki publikadoris staba ta omenta na Nijéria. Irmon Brown da-m un abrasu ku amor, i el fla nha pai: “John, nunka bu ka konsigi bai prega na Áfrika, má Woodworth konsigi!” Dipôs nha pai fla-m: “Kontinua si Woodworth ! Kontinua si!” Resebe nkorajamentu di kes dôs irmon ku txeu spiriénsa omenta nha dizeju di faze nha midjór na trabadju di Jeová.

William “Bíblia” Brown i se mudjer Antónia, nkoraja-nu txeu

Na anu 1962, N tevi priviléjiu di resebe más trenamentu, na turma nunbru 37 na skóla di Jiliádi duránti 10 mês. Irmon Wilfred Gooch,  ki éra enkaregadu di Filial di Nijéria, ki forma na turma nunbru 38 di Jiliádi, mandadu pa Inglatéra. Kantu ki el viaja, N diziginadu pa N fika enkaregadu di Filial di Nijéria. N sigi izénplu di irmon Brown, pur isu N ta viajaba txeu. Kel-la djuda-m konxe i ama irmons di Nijéria. Nbóra es ka tinha kuzas material sima kes algen na kes país más riku, es éra filís i es ta mostraba ma ses vida tinha obijetivu, pamodi ses filisidadi ka ta binha di dinheru ô di kuzas material. Éra bunitu odjaba es linpu i ben bistidu na runions, mésmu ki es ka tinha txeu kuza material. Óras ki es ta baba pa kongrésu, alguns ta baba na kamion ô bolekajas  * (éra un tipu di karu abértu ki es ta uzaba pa faze freti). Normalmenti, na kes karu ta tinha bons frazi. Un di es éra: “É gótas pikinoti di agu ki ta bira un mar grandi.”

Kel frazi li é un grandi verdadi! Kel poku sforsu ki kada un di nos ta faze é inportanti. Na 1974, Nijéria foi primeru país alén di Mérka ki txiga 100 mil publikador. Nu odja klaru ma nos trabadju di pregason sta ta daba txeu frutu!

Na meiu di kel omentu li, kumesa Géra Sivil na Nijéria, ki dura di 1967 ti 1970. Duránti alguns mês, nos irmons ki ta moraba na un zóna ki txoma Biafra, pértu di Riu Níjer, fika sen kontatu ku Filial di la. Pur isu, nu tinha ki lebaba es publikasons. Sima N fla na komésu, ku orason i kunfiansa na Jeová, nu konsigi pasa na kel riu txeu bês.

N ta lenbra klaru di kuzê ki nu pasa na kes viaji na riu Níjer. Sénpri nos vida ta staba na prigu pamodi kes trópa di govérnu, duénsas i otus tipu di amiasa. Éra difísil pasa na kes trópa, má inda más piór éra txiga na Biafra, ki staba tudu fitxadu. Un dia di noti, N tevi ki pasa na Riu Níjer na un boti di sidadi di Asaba pa sidadi di Onitsha, pa N ba nkorajaba kes ansion na sidadi di Enugu. Otu viaji ki N faze éra pa nkorajaba ansions di Aba, ki staba proibidu di abri lus déntu kaza pamodi géra. Kantu ki N bai pa Port Harcourt, nu faze orason faxi pa tirmina runion pamodi kes trópa di govérnu konsigi entra na Biafra.

Kes runion éra txeu inportanti pa lenbraba nos irmons ma Jeová ta kuidaba di es ku amor. Tanbê ta sirbiba pa nkorajaba es pa es kontinuaba ku ses lialdadi i unidu ku kunpanheru. Nos irmon di Nijéria konsigi vense kel situason di géra. Es mostra ma ses amor éra más fórti di ki kel ódiu ki tinha entri tribu i es kontinua unidu ku kunpanheru. Foi un grandi priviléjiu sta djuntu ku es na kel momentu difísil!

Na anu 1969, irmon Milton George Henschel éra prizidenti di Asenbleia internasional ku téma “Paz na Terra ”, na Stádiu Yankee, Nova York. Ami éra se ajudanti i N prende txeu ku el. Kel-li foi bon pamodi na 1970 nu organiza un Asenbleia internasional na Lagos, na Nijéria, ku téma: “Homem de boa vontade ”. Kel asenbleia kontise poku ténpu dipôs di kel géra sivil, i el kóre dretu sô pamodi ajuda di Jeová. Foi primeru bês ki nu tevi 17 língua diferenti sô na un asenbleia i 121.128 algen ta sisti. Entri es staba irmon Knorr i Henschel i otus irmon vizitanti ki ben di Mérka i di Inglatéra na uns avion lugadu. Na kel asenbleia la batiza 3.775 novu disiplu! Kel-li é un di kes nunbru más txeu di batismu désdi Pentikósti. Nunka N ka fika txeu okupadu na nha vida sima kel ténpu ki N staba ta djuda organiza kel asenbleia. Na kel ténpu, nunbru di publikadoris omenta faxi i txeu dimás.

Na Asenbleia internasional ku téma “Homem de boa vontade”, sisti 121.128 algen na 17 língua, ki tanbê ta inkluiba língua ibo

Duránti más di 30 anu na Nijéria, N gosta txeu kantu N sirbi alguns bês na Áfrika Osidental kómu enkaregadu di grupu di kongregason i enkaregadu di zóna. Kes misionáriu ta fikaba txeu kontenti óras ki es ta dadu atenson i nkorajamentu! Éra un priviléjiu lenbraba es ma es ka skesedu di es. Kel trabadju li inxina-m ma é inportanti mostra interesi pa kada algen. N prende ma kel-li é segredu pa djuda pesoas omenta ses amizadi ku Jeová i tanbê ta djuda organizason kontinua fórti i unidu.

 É sô ku ajuda di Jeová ki nu konsigi lida ku prublémas pamodi géra i duénsas. Sénpri nu ta odjaba klaru bensons di Jeová. Oris fla:

“Nos tudu dôs nu panha malária txeu bês. Un dia Worth txiga na ospital na Lagos dismaiadu. Es fla-m ma el podia moreba, má filismenti el ka móre! Kantu ki el korda ki el ba ta rekupera, el pâpia di Reinu di Deus ku kel infermeru ki sta tomaba kónta di el. Dipôs, mi ku Worth nu ba vizita kel infermeru ki txoma Nwambiwe, pa djuda-l kria interesi na Bíblia. El seta verdadi i dipôs el bira un ansion na sidadi di Aba. Mi tanbê N djuda txeu algen bira sérvus lial di Jeová, i tanbê musulmanus ferénha. Nu fika txeu kontenti di konxe i ama kel povu nijerianu, ses kultura, ses kustumu i ses língua.”

Kel-li é más un kuza ki N prende: Pa nu konsigi tinha bons rezultadu na nos sirvisu na un país stranjeru, nu tevi ki prende ama nos irmons i irmans sikrê ses kultura éra diferenti di kel di nos.

NOVUS DIZIGINASON

Dipôs di sirbi na Betel di Nijéria na anu 1987, nu resebe novu diziginason di misionáriu na un ilha bunitu di Santa Lúcia, na Caribe. Foi un trabadju rei di sábi, má nu tevi otus prubléma. Na Áfrika éra normal un ómi kaza ku un monti mudjer. Sô ki na Santa Lúcia, prubléma éra diferenti pamodi la ómi ku mudjer ta vive djuntu sen sta kazadu. Má puder di Palavra di Deus djuda txeu di nos studantis di Bíblia faze kes mudansa ki es mesteba.

Sénpri N ama Oris na kes 68 anu ki nu pasa djuntu

Sima nu ba ta fika más grandi nos forsa ba ta frakise. Nton, na anu 2005, Grupu Enkaregadu di Óbra mostra amor pa nos kantu es manda-nu pa Brooklyn, New York, na Mérka. Ti inda N ta agradise Jeová tudu dia pa Oris. Na 2015 kel grandi inimigu ki é mórti kaba pa vense Oris. Ka ta da pa splika kel dór ki N ta xinti désdi ki N perde-l. El éra midjór kunpanhera ki N podia tinha. El éra un mudjer ki ta mostraba txeu amor i el tinha bons kualidadi. Sénpri N ama-l na kes 68 anu ki nu pasa djuntu. Nu diskubri ma segredu pa filisidadi na kazamentu i na kongregason é mostra ruspetu pa kes ki dadu responsabilidadi pa kuida di nos, púrdua di korason, kontinua ta mostra umildadi i mostra kes kualidadi ki ta faze párti di frutu di spritu.

Óras ki nu ta xintiba diziludidu ô dizanimadu, nu ta pidiba Jeová pa djudaba nos kontinua ta sirbi-l. I sima nu ta ba ta fazeba nos párti, nu ta odjaba ma kuzas sénpri ta midjoraba. Má kel midjór inda sta pa ben! — Isa. 60:17; 2 Cor. 13:11.

Jeová abênsua trabadju ki nha pai ku nha mai i otus irmon faze na Trinidad i Tobago. Kes últimu rilatóriu ta mostra ma más di 9.892 algen sta ta sirbi Jeová na Trinidad. Kel kongregason ki N ta staba na ilha di Aruba, resebe ajuda di txeu irmon, i gósi la ten 14 kongregason. Sô na Nijéria nunbru di publikadoris omenta pa 381.398. I na ilha di Santa Lúcia, 783 sta ta apoia Reinu di Deus.

Dja N tene más di 90 anu. Salmo 92:14 ta fla di kes ki sta plantadu na kaza di Jeová: ‘Mésmu óras ki es bira bédju, es ta da un monti frutu; es ta kontinua fórti i xeiu di vida’. Ami é txeu gratu pa vida ki N leba na sirvisu di Jeová. Izénplu di nha pai ku nha mai djuda-m faze nha midjór pa Jeová. Pamodi se amor lial, Jeová sta ta dexa-m ‘kria flor na pátiu di nha Deus.’ — Sal. 92:13.

^ par. 18 Djobe revista Despertai! di 8 di setenbru di 1972, pájinas 24-26.