Bai pa asuntu

Bai pa lista di asuntus

“Nu ta odja na Paraízu!”

“Nu ta odja na Paraízu!”

‘Bu ta ben sta ku mi na Paraízu.’ — LUCAS 23:43.

KÁNTIKUS: 145, 139

1, 2. Ki ideias diferenti pesoas ten sobri paraízu?

TXEU irmon ku irmans di país diferenti bai kongrésu na sidadi di Seoul, na Korea. Na fin di kongrésu, kes irmon djunta pa dispidi di kunpanheru. Éra bunitu odja-s ta sana kunpanheru i ta fla: “Nu ta odja na Paraízu!” Ki paraízu bu ta atxa ma es staba ta pâpia di el?

2 Oji pesoas ten ideias diferenti sobri kuzê ki é paraízu. Alguns ta fla ma paraízu é sô un sonhu. Otus ta fla ma paraízu é kalker lugar ki es ta xinti sábi. Pa un ómi ki tene fómi dimás, sta xintadu ku txeu kumida na se frenti é un paraízu. Un algen ta odja un lugar bunitu xeiu di flor, talvês el ta fla: “Uau, kel-li é un paraízu!” I pa bo, kuzê ki é un paraízu? Bu ta kridita ma un dia Téra ta ben bira un paraízu?

3. Kuzê ki Bíblia ta fla sobri Paraízu?

3 Bíblia ta pâpia di un paraízu ki dja izistiba i tanbê di un paraízu ki ta ben ten na futuru. Primeru bês ki Bíblia ta pâpia di Paraízu é na Génesis 2:8, ki ta fla: ‘Jeová Deus planta un jardin na Éden, na lésti, i la el poi kel ómi ki dja el fazeba.’ Na língua ebraiku, palavra Éden siginifika ‘xinti sábi’. I jardin di Éden éra un lugar rei di sábi. Éra un lugar bunitu, ku txeu kumida i ómi ku animal ta viveba na pas. — Gén. 1:29-31.

4. Pamodi ki nu pode fla ma jardin di Éden éra un paraízu?

 4 Kantu livru di Génesis traduzidu di ebraiku pa gregu, palavra na língua gregu ki uzadu pa ‘jardin’ éra parádeisos. Di akordu ku un ensiklopédia * óras ki un algen gregu ta obiba palavra parádeisos el ta imajinaba un lugar grandi, bunitu i tudu serkadu pa inpidi kalker kuza di straga-l. Un lugar ku txeu tipu di arvis i frutas, ku txeu agu ta kóre, i ku ribanhu di ovelhas i otus tipu di animal ta anda na el. Kel-li ta djuda-nu odja ma jardin di Éden éra un paraízu. — Konpara ku Génesis 2:15, 16.

5, 6. Pamodi ki Adon ku Eva ka kontinua ta vive na Paraízu? I ki pergunta alguns algen pode faze?

5 Deus poi Adon ku Eva na kel tipu di jardin li, ki éra un paraízu. Má es ka kontinua la. Pamodi? Es ka obi ku Jeová, pur isu es perde xansi di vive na paraízu i ses fidjus tanbê. (Gén. 3:23, 24) Jardin di Éden fika sen ningen i el dexa di izisti na ténpu di Nué, kantu Dilúviu ben.

6 Talvês alguns algen pode pergunta: ‘Algun dia Téra ta ben bira un Paraízu otu bês?’ Ki próvas nu ten? Kuzê ki ta da-u sertéza ma bu ta ben vive na Paraízu djuntu ku kes algen ki bu ta ama? Bu ta konsigi splika pamodi ki nu ten sertéza ma Téra ta ben bira un Paraízu?

KI PRÓVAS NU TEN MA TÉRA TA BEN BIRA UN PARAÍZU?

7, 8. (a) Ki promésa Deus faze Abraon? (b) Kantu Jeová faze Abraon kel promésa, kuzê ki el ntende?

7 Midjór lugar pa nu atxa respóstas pa perguntas sobri Paraízu é na Bíblia. Pamodi kel livru li ben di Jeová, kel ki kria Paraízu. Repara kuzê ki el flaba se amigu Abraon. Deus flaba el ma se disendenti ta biraba txeu sima ‘areia na bera-mar’. Dipôs, Jeová faze Abraon un promésa inportanti: ‘Tudu nasons na Téra ta ben resebe un benson pa es através di bu disendenti, pamodi bu obi nha vós.’ (Gén. 22:17, 18) Ku ténpu, Deus ripiti kel mésmu promésa pa fidju di Abraon i tanbê pa se nétu. — Génesis 26:4; 28:14.

8 Ka ten nada na Bíblia ki ta mostra ma Abraon ta atxaba ma rekonpénsa ki umanus ta ben resebeba era un paraízu na Séu. Pur isu, kantu Deus promete ma tudu nasons di Téra ta sérba abensuadu, Abraon ntende ma kes benson ta sérba na Téra. Má kel-li é ka úniku próva na Bíblia ki ta mostra ma Paraízu é na Téra.

9, 10. Ki otus promésa ta da-nu sertéza ma Téra ta ben bira un paraízu?

9 Davidi ki éra disendenti di Abraon, pâpia di un ténpu na futuru undi ki ‘kes algen mau ta ben dexaba di izisti’. (Sal. 37:1, 2, 10) Óras ki kel ténpu txiga, ‘kes algen mansu ta ben toma kónta di Téra i es ta ben ten txeu alegria ku txeu pas.’ Tanbê Jeová uza Davidi pa skrebe kel promésa li: ‘Téra ta ben ser di kes algen justu i es ta ben vive na el pa tudu ténpu.’ (Sal. 37:11, 29; 2 Sam. 23:2) Kes promésa li ta djudaba kes algen ki ta fazeba vontadi di Deus tinha sertéza ma un dia Téra ta ten sô algen justu ta vive na el. Tanbê ma Téra ta ben biraba un paraízu, sima éra na jardin di Éden.

10 Ku ténpu, txeu israelita bandona Jeová i adorason verdaderu. Pur isu, Deus dexa nason di Babilónia toma Judá, kaba ku país i leba alguns sima skravu. (2 Cró. 36:15-21; Jer. 4:22-27) Má, profétas di Deus dja flaba ma dipôs  di 70 anu, israelitas ta voltaba pa ses téra. Kes profesia li dja kunpri, má tanbê es é inportanti pa nos oji. Nu ta ben studa alguns di es, pa nu odja modi ki es ta da-nu motivu pa nu kridita ma Téra ta ben bira un Paraízu.

11. Modi ki kel primeru párti di Isaías 11:6-9 kunpri i kel-li ta pô-nu faze ki pergunta?

11 Isaías 11:6-9. Através di proféta Izaías, Deus dja flaba ma israelitas ta voltaba pa ses téra i es ka meste preokupaba ku ninhun prigu. Es ka mesteba xinti medu di animal brabu i nen di pesoas ki pode atakaba es. Jóvens ku algen di idadi ta xintiba suguru. Kel-li ta lenbra-nu di kel pas ki ta izistiba na jardin di Éden. (Isa. 51:3) Proféta Izaías dja flaba ma nason di Israel, i tanbê Téra interu ‘ta fikaba xeiu di konhisimentu di Jeová sima agu ta kubri mar.’ Kel-li ta pô-nu ta faze un pergunta: ‘Ki ténpu ki kel-li ta ben kontise?’

12. (a) Ki bensons ki kes israelita ki voltaba di Babilónia ta resebeba? (b) Kuzê ki ta mostra ma Isaías 35:5-10 ta ben kunpriba na futuru?

12 Isaías 35:5-10. Izaías tanbê torna fla ma israelitas ki voltaba di Babilónia ka ta sérba atakadu nen pa ómis nen pa animal. Ses téra ta daba txeu kumida pamodi es ta tinha txeu agu sima tinha na jardin di Éden. (Gén. 2:10-14; Jer. 31:12) Má, kel profesia li kunpri sô na kel ténpu? Kel profesia li ta flaba ma algen ségu, surdu i manku ta sérba kuradu. Má, ka ten nada ki ta mostra ma kes kuza li kontise kantu israelitas volta di Babilónia. Pur isu, Deus staba ta mostra ma kes kuza li ta ben kontiseba na futuru.

13, 14. Modi ki Isaías 65:21-23 kunpri, kantu israelitas volta di Babilónia i ki párti di profesia falta pa kunpri? (Odja dizenhu na komésu di studu.)

13 Isaías 65:21-23. Kes judeu ki volta di Babilónia ka atxa kaza sábi di mora, nen pé di uva i txon prontu pa faze kodjéta. Má, ku bensons di Deus ses situason muda. Imajina modi ki es fika kontenti di mora na kazas ki é es mê ki faze i kume fruta di arvis ki es planta!

14 Repara ma kel profesia ta flaba ma ténpu di vida di un algen ‘ta sérba sima ténpu di un arvi.’ Alguns arvi ta vive milharis di anu. Pa nu vive tudu kes anu li, nu ten ki ten bon saúdi. I si nu vive na kel mundu di pas i bunitu sima Izaías dja flaba, kel-la ta ser un paraízu! Kel profesia li ta ben kunpri.

Modi ki promésa ki Jizus faze sobri Paraízu ta ben kunpri? (Odja parágrafus 15 i 16.)

15. Ki bensons ki Izaías dja flaba, ta mostra ma Téra ta ben bira un paraízu?

15 Pensa modi ki kes promésa ki nu odja ta mostra ma Téra ta ben bira un paraízu. Téra interu ta ben sta xeiu di pesoas ki ten bensons di Deus. Ningen ka ta ten medu di animal i nen di pesoas violéntu. Kes algen ki é ségu, surdu i manku ta kuradu. Pesoas ta ben faze ses própi kaza i es ta símia ses própi kumida. Es ta ben vive mutu más txeu anu ki arvis. Tudu kel-li ta mostra ma nu ta ben vive na un paraízu. Má alguns algen ta fla ma nu ta splika kel profesia li di un manera ki ka é verdadi. Modi ki bu ta respondeba si es fla-u si? Ki motivu bu ten pa bu spéra ma Téra ta ben bira un Paraízu? Kel maior ómi ki dja vive, ki é Jizus, da-nu un bon próva.

BU TA BEN STA NA PARAÍZU!

16, 17. Na ki situason Jizus pâpia di paraízu?

16 Jizus ka tinha kulpa, má simé es kondena-l i es pô-l na staka. El fika na meiu di dôs ómi kriminozu. Antis di el móre, un di kes kriminozu da kónta ma Jizus éra un rei i el pidi-l: ‘Jizus, lenbra di mi óras ki bu entra na bu Reinu.’  (Lucas 23:39-42 ) Respósta ki Jizus da-l ten txeu aver ku nos futuru. El sta na Lucas 23:43. Pa traduzi kel versíklu li, alguns studiozu di Bíblia poi dôs pontu antis di palavra ‘oji’. Nton kel versíklu fika si: ‘Ku tudu sertéza N ta fla-u: Oji bu ta sta ku mi na Paraízu.’ Má undi ki kes dôs pontu debe fikaba? Kuzê ki Jizus krê flaba?

17 Na txeu língua ki ta papiadu gósi, es ta uza pontuason pa frazis pode fika más klaru. Na língua gregu antigu, é ka sénpri ki es ta fazeba kel-la. Pur isu, talvês nu ta pergunta: Jizus krê flaba: ‘N ta fla-u: Oji bu ta sta ku mi na paraízu’? Ô el krê flaba: ‘N ta fla-u oji: Bu ta sta ku mi na paraízu’? Txeu tradutor ta poi kes dôs pontu antis ô dipôs di palavra ‘oji’, di akordu ku kel ki es ntende ma Jizus krê flaba. I na txeu traduson ki ta fazedu oji, bu ta atxa tudu kes dôs manera di traduzi li.

18, 19. Kuzê ki ta djuda-nu ntende kuzê ki Jizus krê flaba?

18 Má, lenbra kuzê ki Jizus dja flaba se disiplus antis: ‘Fidju di Ómi ta ben sta três dia ku três noti na korason di téra.’ Tanbê el fla: ‘Kel Fidju di Ómi ta ntregadu na mô di ómis, i es ta mata-l, i na tirseru dia, el ta labantadu.’ (Mat. 12:40; 16:21; 17:22, 23; Mar. 10:34) Apóstlu Pedru odja tudu kes kuza ki kontise ku Jizus. (Atos 10:39, 40 ) Kel-li ta mostra ma Jizus ku kel kriminozu ka bai pa Paraízu na kel dia ki es móre. Jizus fika na ‘Sipultura’ i na tirseru dia el resusitadu. — Atos 2:31, 32. *

19 Kel-li ta djuda-nu ntende ma antis di Jizus faze kel promésa pa kel kriminozu, el fla-l: ‘Oji N ta fla-u ku tudu sertéza’. Kel-li éra un manera di pâpia ki es ta uzaba txeu na ténpu di Muizes. Un bês, Muizes fla: ‘Kes palavra ki N sta ta fla-u oji, debe sta na bu korason’. — Deut. 6:6; 7:11; 8:1, 19; 30:15.

20. Ki otus próva nu ten ki ta mostra ma nu ntende dretu kes palavra di Jizus?

20 Un tradutor di Bíblia ki ta viveba na mésmu lugar ki Jizus viveba, splika: “Na kel testu li, nu debe distaka palavra ‘oji’. Kel frazi debe ledu si: ‘Oji N ta fla-u ku tudu sertéza: Bu ta ben sta ku mi na Paraízu.’ Kel promésa ki fazedu na kel dia, ta ben kunpriba dipôs. Kel-li é un manera ki gentis di Orienti ta pâpia, óras ki es faze un promésa na un dia i ki el ta ben kunpri ku tudu sertéza.” É pamodi kel-li ki un dukumentu antigu na língua di Síria, ki fazedu na anus 400, ta traduzi palavras di Jizus di kel manera li: “Amén, N ta fla-u abo oji ma bu ta ben sta ku mi na Jardin di Éden.” Kel-li é un promésa ki ta nkoraja nos tudu.

21. Pamodi ki kel paraízu ki Jizus promete kel kriminozu é ka éra na Séu?

21 Kantu Jizus pâpia ku kel kriminozu di Paraízu, el ka sta papiaba di un paraízu na Séu. Modi ki nu sabe? Un di kes motivu é pamodi kel kriminozu ka sabia di kel kontratu ki Jizus fazeba ku se apóstlus fiel di ba governa ku el na Séu. (Lucas 22:29 ) Tanbê, kel kriminozu é ka éra batizadu. (João 3:3-6, 12 ) Pur isu, kel-li ta mostra ma Jizus staba ta pâpia di un paraízu na Téra. Alguns anu dipôs, apóstlu Polu tevi un vizon di un ómi ki ‘rabatadu pa paraízu’. (2 Cor. 12:1-4) Polu ku kes otu  apóstlus, skodjedu pa bai governa ku Jizus na Séu. Má, na kel testu li, Polu staba ta pâpia di un paraízu na futuru. * Má kel paraízu é na Téra? Bu ta bai sta la?

KUZÊ KI BU PODE SPÉRA

22, 23. Kuzê ki bu pode spéra ma ta ben kontise na futuru?

22 Lenbra ma Davidi pâpia di un ténpu ki ‘Téra ta ben ser di kes algen justu’. (Sal. 37:29; 2 Ped. 3:13) Davidi staba ta pâpia di un ténpu ki tudu algen na Téra ta ben obi ku leis justu di Deus. Profesia di Isaías 65:22 ta fla: ‘Ténpu di nha povu ta ser sima ténpu di un arvi’. Kel-li ta mostra ma pesoas ta ben vive pa milharis di anu. Bu pode spéra ma kel-li ta ben kontise? Sin, di akordu ku Apocalipse 21:1-4 , Deus ta ben volta se atenson pa nos. I un di kes benson ki el ta promete pa kes algen ki ta sirbi-l é ma ‘ka ta ben ten más mórti’ na kel mundu novu.

23 Kuzê ki Bíblia ta inxina sobri Paraízu é klaru. Adon ku Eva perde xansi di vive na Paraízu pa tudu ténpu. Má un dia Téra ta ben bira un Paraízu otu bês. Sima Deus promete, el ta ben abênsua kes algen na Téra. Davidi fla ma kes algen mansu i kes justu ta ben toma kónta di Téra i es ta ben vive na el pa tudu ténpu. I kes profesia na livru di Isaías ta djuda-nu ten un ideia di modi ki vida na paraízu ta ben ser. Ki ténpu ki kel-li ta ben kontise? Óras ki kunpri kel promésa ki Jizus faze pa kel ómi kriminozu. Abo tanbê, bu pode ben sta na Paraízu. Na kel ténpu, ta ben kontise sima kes irmon na kel kongrésu na Korea ki fla kunpanheru: “Nu ta odja na Paraízu!”.

^ par. 4 Cyclopaedia of Biblical, M’Clintock

^ par. 18 Un profesor di Teolojia ki txoma Marvin Pate, skrebe ma txeu algen ta atxa ma kantu Jizus fla ‘oji’, el krê flaba un dia di 24 óra. Kel profesor fla ma pensa si, ta bai kóntra kel ki Bíblia ta inxina. Pur izénplu Bíblia ta inxina ma kantu Jizus móre, primeru el ‘dixi’ pa Sipultura. Sô dipôs ki el subi pa Séu. — Mat. 12:40; Atos 2:31 ; Rom. 10:7.

^ par. 21 Djobe “Perguntas ki leitoris ta faze” na kel revista li.