Bai pa asuntu

Bai pa lista di asuntus

Juan Batista é un izénplu na mante alegria

Juan Batista é un izénplu na mante alegria

TEN algun diziginason na bu kongregason ki bu ta gostaba di ten, má ki gósi bu ka ta pode? Pode ser un responsabilidadi ki otu irmon ten. Ô talvês un diziginason ô priviléjiu ki dja bu tinha antis, má ki bu tevi ki dexa pamodi idadi, prublémas di saúdi ô prublémas di dinheru. Ô tanbê, un responsabilidadi ki bu tevi pa txeu ténpu, má ki bu tevi ki dexa pamodi mudansas na organizason. Ka ta nporta kal ki é motivu, talvês bu ta atxa ma bu ka sta ta faze tudu kel ki bu ta gostaba na sirvisu di Deus. Na kes tipu di situason li, bu pode xinti diziludidu, dizanimadu i ti maguadu. Má, kuzê ki bu pode faze pa bu ka dexa kes sentimentu la kria raís na bu korason? Modi ki bu pode kontinua ku bu alegria?

Nu pode prende un kuza inportanti ku izénplu di Juan Batista. Juan tevi grandi priviléjiu na se sirvisu pa Jeová. Má talvês, se vida ka bai sima el sta speraba. El ka ta imajinaba ma el ta pasaba más ténpu na kadia di ki na pregason. Má el ka perde se alegria, el kontinua ku se atitudi ti fin di se vida. Kuzê ki djuda Juan? I modi ki nu pode kontinua ku nos alegria sikrê nu sta diziludidu?

UN DIZIGINASON KI TRAZE-L ALEGRIA

Pa vólta di abril di anu 29, Juan kumesa se trabadju ki Jeová da-l di pripara pesoas ma Misías sta ta binha. El fla: ‘Nhos rapende, pamodi Reinu di Séu sta kuazi ta txiga.’ (Mat. 3:2; Luc. 1:12-17) Txeu algen obi se mensaji. Na verdadi, un monti di algen di lugaris diferenti ta binha di lonji pa obiba mensaji di Juan, i txeu rapende di ses pekadu i es batiza. Juan tanbê ku koraji el ta avizaba kes xéfi di relijion ki ta atxaba ma es éra justu, di ses julgamentu si es ka mudaba di konportamentu. (Mat. 3:5-12) Juan faze kel trabadju más inportanti di se pregason, kantu el batiza Jizus pa vólta di otubru di anu 29. Désdi kel dia, Juan ta flaba pesoas pa es sigiba Jizus, kel Misías ki staba ta binha. — João 1:32-37.

Trabadju ki Juan faze éra spesial. É pur isu ki Jizus fla: ‘Entri kes ki nase di mudjeris, ka parse ningen más grandi di ki  Juan Batista’. (Mat. 11:11) Bu pode ten sertéza ma Juan fika kontenti ku kes benson ki el resebe. Sima Juan, txeu irmon oji resebe txeu benson di Jeová. Odja izénplu di un irmon ki txoma Terry. El ku se mudjer Sandra, dja es ten más di 50 anu na sirvisu pa ténpu interu. Terry fla: “N tevi txeu priviléjiu sábi. Dja N sirbi di pioneru, betelita, pioneru spesial, enkaregadu di grupu di kongregason, i gósi mi é pioneru spesial otu bês.” Ten priviléjiu na organizason di Jeová é un kuza ki ta da txeu alegria. Má sima nu prende ku izénplu di Juan Batista, kontinua ku alegria ta iziji sforsu óras ki nos situason ta muda.

KONTINUA TA DA VALOR

Un di kes kuza ki djuda Juan Batista pa nunka ka perde alegria éra pamodi el kontinua ta da valor pa priviléjius ki el tinha. Pur izénplu, lógu dipôs ki Jizus batiza, trabadju di Juan kumesa ta bira más poku, má trabadju di Jizus kumesa ta bira más txeu. Disiplus di Juan fika preokupadu ku kel-li, pur isu es fla-l: ‘Kel ómi ki bu da tistimunhu di el, sta ta batiza, i tudu algen sta ta bai na el.’ (João 3:26 ) Juan responde: ‘Kenha ki ten noiva é noivu. Má, óras ki amigu di noivu sta pértu i el obi noivu, el ta xinti txeu alegria pamodi vós di noivu. Pur isu, nha alegria fika konplétu.(João 3:29 ) Juan ka fika ta konpiti ku Jizus nen el ka ta atxaba ma priviléjiu ki el tinha perde valor sô pamodi trabadju di Jizus éra más inportanti. Envês di kel-la, Juan kontinua ku se alegria pamodi el ta daba valor pa se priviléjiu di ser ‘amigu di noivu’.

Manera di ser di Juan djuda-l kontinua kontenti sikrê se diziginason ka éra fásil. Pur izénplu, Juan éra nazireu désdi ki el nase i pur isu el ka podia bebeba vinhu. (Luc. 1:15) Sobri vida sinplis di Juan, Jizus fla: ‘Juan ben ka ta kume ka ta bebe’. Má, Jizus ku se disiplus ka staba dibaxu di kel lei li i es tinha un vida normal. (Mat. 11:18, 19) Tanbê, Juan ka faze ninhun milagri. Má el sabia ma disiplus di Jizus i ti alguns ki éra se disiplus, ta podia resebeba kel puder di faze milagri. (Mat. 10:1; João 10:41 ) Envês di el dexa kes diferénsa li distrai-l, Juan kontinua ta kunpri se diziginason ki Jeová da-l ku zelu.

Anos tanbê, si nu da valor pa kel ki nu sta ta faze gósi na sirvisu di Jeová, nu ta proteje nos alegria. Terry, ki dja nu papiaba di el antis, fla: “N konsentra na kada un di kes diziginason ki N dadu.” Óras ki el ta pensa modi ki éra se vida na sirvisu pa ténpu interu, el ta fla: “N ka ten ninhun rapendimentu, má sô bons lenbransa.”

Otu kuza tanbê ki pode omenta nos alegria é óras ki nu ta pensa txeu sobri kuzê ki ta faze kalker diziginason ô responsabilidadi ten valor: Ki é priviléjiu di nu ser ‘kolaboradoris di Deus.’ (1 Cor. 3:9) Sima un kuza di valor ta kontinua bunitu si sénpri nu kuida di el, di mésmu manera pensa txeu na kel priviléjiu grandi ki nu ten di sirbi Deus ka ta dexa pensamentus mariadu tra-nu nos alegria. Nu ka ta fika ta konpara sforsu ki nu ta faze ku kel ki otus ta faze, nen nu ka ta atxa ma nos priviléjiu ten ménus valor di ki priviléjius ki otus dadu. — Gál. 6:4.

KONSENTRA NA KUZÊ KI É INPORTANTI PA JEOVÁ

Talvês Juan Batista dja sabia ma se trabadju ka ta ba duraba txeu ténpu, má talvês el ka ta speraba ma el ta tirminaba di kel manera la. (João 3:30 ) Na anu 30, uns 6 mês dipôs ki Jizus batiza, Rei Eródis poi Juan na kadia. Má simé, Juan faze tudu kel ki el pode pa kontinua ta inxina kel ki é dretu. (Mar. 6:17-20) Kuzê ki djuda Juan kontinua ku alegria sikrê ku kes mudansa? El konsentra na kes kuza ki é más inportanti pa Jeová.

Timenti Juan staba na kadia, el resebe notísias sobri kuzas ki Jizus staba ta faze. (Mat. 11:2; Luc. 7:18) Juan tinha sertéza ma Jizus éra Misías, má talvês el ta perguntaba modi ki Jizus ta kunpriba tudu kel  ki Skrituras fla ma Misías ta fazeba. Dja ki Misías ta sérba Rei, se govérnu ta kumesaba lógu? Jizus ta traba el di kadia? Juan staba ku gana di sabe más sobri kuzê ki Jizus sta ba fazeba. Pur isu, el manda dôs disiplu pa pergunta Jizus: ‘Abo é Misías ki profétas flaba ma ta binha, ô nu debe spéra otu algen?’ (Lúkas 7:19, BPK ) Kantu es vólta, Juan obi-s ku txeu atenson timenti es ta kontaba sobri milagris ki Jizus faze i kuzê ki Jizus manda fla-l: ‘Ségus sta ta odja, mankus sta ta anda, leprozus kuradu, surdus bira ta obi, kes ki móre torna vive, i ma gentis póbri sta ta obi notísias sábi.’ — Lúkas 7:20-22, BPK.

Di sertéza, Juan Batista xinti nkorajadu ku kuzas ki kes disiplu fla-l. El odja ma Jizus staba ta kunpri kes profesia sobri Misías. Nbóra Jizus ka staba ta ba tra-l di kadia, Juan sabia ma trabadju ki el faze ka foi atoa. Sikrê na kadia, el tinha razon pa staba kontenti.

Konsentra na rilatórius sobri pregason na mundu interu pode djuda-nu kontinua ku nos alegria

Sima Juan, si nu konsentra na sirbi Jeová, nu ta konsigi kontinua ku nos alegria i paxénxa. (Col. 1:9-11) Pa nu pode aguenta firmi, nu meste lé Bíblia i pensa txeu na el. Kel-li ta djuda-nu lenbra ma kalker kuza ki nu ta faze pa Jeová ten valor. (1 Cor. 15:58) Sandra fla: “Un kuza ki ta djuda-m mante nha amizadi ku Jeová é lé un kapítlu di Bíblia tudu dia. Kel-li ta pô-m ta konsentra na Jeová, envês di konsentra na mi.” Tanbê otu kuza ki nu pode faze é konsentra na rilatórius sobri trabadju di pregason. Es ta djuda-nu ka pensa sô na nos kabésa i konsentra na kuzas ki Jeová sta ta faze. Sandra fla: “Kes prugrama ki ta sai tudu mês na JW Broadcasting® ta faze-nu xinti más pértu di organizason di Jeová i ta djuda-nu ka perde alegria na nos diziginason.”

Duránti trabadju di pregason di Juan ki dura poku ténpu, el prega ku ‘spritu i puder di Elias’. I sima Elias el ‘éra un ómi ku sentimentus sima di nos’. (Luc. 1:17; Tia. 5:17) Si nu imita se izénplu di gratidon i nu konsentra na kes kuza ki é más inportanti pa Jeová, nu ta kontinua tanbê ku alegria na sirvisu di Jeová, ka ta nporta kuzê ki kontise ku nos.