Bai pa asuntu

Bai pa lista di asuntus

Trabadja ku Jeová tudu dia

Trabadja ku Jeová tudu dia

‘Nos é kolaboradoris di Deus.’ — 1 CORÍNTIOS 3:9.

KÁNTIKUS: 64, 111

1. Di ki maneras nu pode trabadja ku Jeová?

DIPÔS ki Jeová faze umanus, el krê pa es trabadjaba ku el. Nbóra oji umanus é inperfetu, kes algen ki é fiel inda pode trabadja ku Jeová tudu dia. Pur izénplu, nos é ‘kolaboradoris di Deus’ óras ki nu ta prega notísia sábi di se Reinu i faze disiplus. (1 Cor. 3:5-9) Kel-li é un priviléjiu grandi! Nos Kriador skodje-nu pa nu faze un trabadju txeu inportanti. Má é ka sô na pregason ki nu pode trabadja ku Jeová. Na kel studu li, nu sta ben prende alguns manera ki nu pode trabadja ku Jeová: Óras ki nu ta djuda nos família, irmons na kongregason, óras ki nu ta resebe otus, óras ki nu ta djuda na trabadju ki organizason sta ta faze na mundu interu i óras ki nu ta faze más na sirvisu di Jeová. — Col. 3:23.

2. Pamodi ki nunka nu ka debe konpara kuza ki nu ta faze ku kel ki otus ta faze?

2 Sima nu ta ba ta studa es artigu inportanti, nu lenbra ma nos é diferenti di kunpanheru. Nos idadi, saúdi, situason i kapasidadi é diferenti. Pur isu, ka bu konpara kuzê ki bu pode faze pa Jeová ku kel ki otus pode faze. Apóstlu Polu fla: ‘Má kada un, debe djobe pa kel ki el ta faze,  asi el ta ten motivu di fika kontenti sô ku se kabésa, sen konpara ku otus algen.’ — Gál. 6:4.

DJUDA BU FAMÍLIA I IRMONS NA KONGREGASON

3. Pamodi ki nu pode fla ma tudu kenha ki ta kuida di se família sta trabadja ku Deus?

3 Jeová ta spéra ma nu ta kuida di nos família. Pur izénplu, talvês bu meste trabadja pa sustenta bu família. Txeu mudjer ta fika na kaza pa es pode kuida di ses fidju. I óras ki nos pai ku nos mai ka sta pode kuida di ses kabésa, nu ten ki kuida di es. Kes-li é kuzas ki nu ten ki faze. Bíblia ta fla: ‘Si un algen ka ta kuida di kes ki é di sel, pa el da-s kel ki es meste, prinsipalmenti kes algen di se família, el sta ta nega fé i el é piór di ki algen sen fé.’ (1 Tim. 5:8) Si bu ten alguns di kes responsabilidadi li, talvês bu ta xinti ma bu ka ta konsigi faze más pa Jeová sima bu ta kreba. Má ka bu dizanima! Jeová ta fika kontenti óras ki bu ta kuida di bu família. — 1 Cor. 10:31.

4. Modi ki pai ku mai pode trabadja ku Jeová i kal ki é rezultadu?

4 Pai ku mai pode trabadja ku Jeová óras ki es ta djuda ses fidju ten obijetivus na sirvisu di Jeová. Txeu pai ku mai faze kel-li. Pur isu, es odja ses fidju ta sirbi Jeová pa ténpu interu, mésmu lonji di kaza. Alguns é misionárius, otus é pioneru undi ten más nisisidadi i inda ten otus ki ta sirbi na Betel. É klaru ki óras ki fidjus ta sta lonji di kaza, pai ku mai ka ta pasa ténpu ku es sima es ta gostaba. Má es ta da ses fidju koraji pa es kontinua ta sirbi Jeová, ka ta nporta undi ki es sta. Pamodi? Pamodi es ta fika txeu kontenti di odja ma ses fidju poi Jeová na primeru lugar na ses vida. (3 João 4 ) Txeu di kes pai ku mai ta xinti sima Ana, ki fla ma el ‘nprista’ Jeová se fidju Samuel. Kes pai ku mai ta xinti ma é un priviléjiu grandi trabadja ku Jeová di kel manera li. — 1 Sam. 1:28, nóta di rodapé.

5. Di ki maneras bu pode djuda irmons na kongregason? (Odja fotu na komésu di studu.)

5 Si bu ka ten txeu responsabilidadi na família, bu ta pode djuda irmons ki sta duenti, ki dja sta grandi ô otus algen ki meste? Ô bu ta pode djuda kes algen ki sta kuida di ses família ki dja sta grandi? Djobe na kongregason kes algen ki meste di ajuda. Pur izénplu, talvês un irman sta ta kuida di se pai ku se mai ki dja sta grandi. Bu ta pode ba fika ku se pai ku se mai pa el pode faze otus kuza? Ô tanbê pode ten algun algen na bu kongregason ki meste di ajuda pa bai runion, pa faze kónpra ô vizita un algen na ospital. Óras ki bu faze si, bu sta ta trabadja ku Jeová i el sta uza-u pa responde orason di algun irmon. — 1 Coríntios 10:24.

RESEBE OTUS

6. Modi ki nu pode ser un algen ki gosta di resebe otus?

6 Sérvus di Deus é konxedu pa algen ki gosta di resebe otus. Na Skrituras gregu palavra ki traduzidu pa ‘resebe otus’ ta siginifika ‘faze bondadi pa un algen ki bu ka konxe’. (Heb. 13:2; nóta di rodapé) Na Bíblia nu ta atxa txeu izénplu ki ta inxina-nu modi ki nu pode resebe dretu un algen. (Gén. 18:1-5) Tudu xansi ki nu atxa nu pode  i nu debe djuda otus, ka ta nporta si es é nos ‘família na fé’ ô nau. — Gál. 6:10.

7. Kuzê ki nu ta ganha óras ki nu ta resebe kes algen ki ta sirbi Jeová pa ténpu interu?

7 Un otu manera ki nu pode trabadja ku Jeová é óras ki nu ta resebe otus irmon ki ta sirbi Jeová pa ténpu interu. (Lé 3 João 5, 8.) Óras ki nu faze si, nu ta ‘nkoraja kunpanheru’. (Rom. 1:11, 12) Odja kuzê ki kontise ku Olaf. Kantu el éra jóven, un irmon solteru ki éra enkaregadu di grupu di kongregason, bai vizita se kongregason i el mesteba di un lugar pa fika. Má ningen na kongregason ka ta konsigi resebeba el. Nton, Olaf pidi se pai ku se mai, ki ka éra Tistimunhas di Jeová, pa dexa kel irmon fika ku es na ses kaza. Es seta, má es fla Olaf ma el tinha ki durmiba na sufá. Olaf ka rapende di faze kel-li. El fla: “N pasa un simana rei di sábi.” Tudu dia sédu palmanhan, na óra ki es ta tomaba kafé, es ta papiaba di txeu kuza inportanti. Kel enkaregadu di grupu di kongregason, nkoraja Olaf txeu, ki el disidi kumesa ta sirbi Jeová pa ténpu interu. Olaf dja ten más di 40 anu ta sirbi kómu misionáriu na monti país.

8. Pamodi ki nu debe mostra bondadi pa otus algen sikrê ta parse ma es ka da valor? Da un izénplu.

8 Ten monti manera di nu mostra bondadi pa algen ki nu ka konxe, sikrê na komésu es ka da valor pa kuzas ki nu faze. Pur izénplu, un irman na Spanha studa Bíblia ku un mudjer di Ekuador ki txoma Yesica. Un dia na meiu di studu Yesica kumesa ta txora. Nton kel irman pergunta-l pamodi ki el sta txora. Yesica fla-l ma antis di el baba pa Spanha, el éra txeu póbri. Un dia, el ka tinha nada pa da se fidju-fémia pa kume, el tinha sô agu. Timenti Yesica staba ta nina se fidju-fémia pa durmi, el ba ta ora. Lógu dipôs txiga dôs Tistimunhas di Jeová i es da-l un revista. Má el trata-s mal i el ratxa kel revista ki kes irman da-l. El fla-s: “É kel-li ki é kumida ki nhos krê pa N da nha fidju pa kume?” Kes irman tenta konsola-l ma Yesica ka obi-s. Más tardi, kes irman torna bai la i es poi un bólsa di kumida na se pórta. Kantu el lenbra di kel ki kontiseba, Yesica kumesa ta txora pamodi el da kónta ma el ka da valor pa manera ki Jeová responde se orason. Má gósi Yesica sta disididu na sirbi Jeová. Nu ka ten dúvida ma bondadi di kes dôs irman da bons rezultadu. — Ecl. 11:1, 6.

OFERESE PA TRABADJA

9, 10. (a) Kal ki éra alguns xansi ki israelitas tinha pa oferese pa trabadja? (b) Oji di ki maneras irmons pode djuda na kongregason?

9 Na ténpu antigu, israelitas tinha txeu xansi di oferese pa trabadja. (Êxo. 36:2; 1 Crón. 29:5; Nee. 11:2) Oji tanbê, nu ten txeu xansi di uza nos ténpu, kuzas ki nu ten i nos kapasidadi pa djuda nos irmons. Óras ki nu faze si, nu ta ser filís i nu ta ten txeu benson.

10 Palavra di Deus ta nkoraja ómis na kongregason pa trabadja ku Jeová. Es ta faze kel-li óras ki es é ansions ô ajudantis di kongregason. (1 Tim. 3:1, 8, 9; 1 Ped. 5:2, 3) Kes irmon li krê djuda otus na kuza ki es meste i na ses amizadi ku Jeová. (Atos 6:1-4 ) Ansions pode pidi-u pa bu djuda resebe  kes algen ki ta bai runion i mostra-s undi ki es ta xinta, na distribui publikasons, na kuida di kartons di tiritóriu, na konpo i kuida di Salon di Reinu ô faze otus kuza. Irmons ki ta djuda na faze kes trabadju li, es é txeu filís.

Bu ten xansi di faze novus amigu óras ki bu ta trabadja na konstruson (Odja parágrafu 11.)

11. Ki ajuda un irman resebe di amigus ki el faze kantu el staba na konstruson?

11 Kes ki ta oferese di korason pa trabadja na konstruson, txeu bês es ta faze monti amigu. Odja izénplu di un irman ki txoma Margie, un irman ki trabadja 18 anu na faze Salons di Reinu. Duránti tudu kes ténpu, el gostaba di trena irmans más jóven. El fla ma kes trabadju la da-l xansi di es nkoraja kunpanheru. (Rom. 1:12) Margie pasa pa alguns momentu difísil na se vida, má é kes amigu ki el faze kantu el ta trabadjaba na konstruson, ki djuda-l. Dja bu kustuma oferese pa trabadja na algun konstruson? Bu pode oferese, sikrê bu ta atxa ma bu ka sabe faze kel trabadju.

12. Modi ki bu pode djuda dipôs ki kontise un dizastri na naturéza?

12 Un otu manera di nu trabadja ku Jeová é óras ki nu ta djuda nos irmons ki sta sufri dipôs di un dizastri na naturéza. Pur izénplu, nu pode faze kontribuison. (João 13:34, 35; Atos 11:27-30 ) Tanbê nu pode djuda linpa i torna faze kaza di kes algen. Nu ben odja izénplu di Gabriela, ki é un irman di Pulónia. Un txuba fórti ku txeia ronba-l se kaza. Má irmons ku vizinhus djuda-l faze se kaza otu bês. Gabriela fla: “Ka ta nporta kuzê ki N perde. É sô kuza material. Más inportanti é kel ki N ganha, ki é faze párti di un kongregason na mundu interu. I kel-li é un kuza ki ta da-m txeu alegria.” Txeu di kes algen ki djudadu dipôs di un dizastri, es fla ma es xinti mésmu kuza. I kes ki ta trabadja ku Jeová pa djuda ses irmon, tanbê es ta xinti sábi i txeu alegria. — Atos 20:35; 2 Coríntios 9:6, 7.

13. Modi ki nos amizadi ku Jeová ta fika más fórti óras ki nu ta oferese pa trabadja ku el? Da un izénplu.

 13 Un irman ki txoma Stephanie i otus publikador xinti alegria di trabadja ku Deus di un otu manera. Es djuda Tistimunhas di Jeová ki fuji di ses país pa Mérka pamodi staba géra na ses país. Es djuda kes rafujiadu atxa kaza i mobílias. Stephanie fla: “Alegria i gratidon di kes irmon pô-nu kontenti. Es ta atxa ma é nos ki djuda-s, má na verdadi é es ki djuda-nu. Nu odja kel amor, union, fé i kunfiansa ki nos irmons ten na Jeová. I kel-la pô-nu ta da más valor pa tudu kuza ki nu ta resebe di organizason.”

FAZE MÁS NA SIRVISU DI JEOVÁ

14, 15. (a) Ki atitudi proféta Izaías mostra? (b) Modi ki nu pode imita atitudi di Izaías?

14 Bu ta gostaba di trabadja más ku Jeová? Bu pode muda pa undi ten más nisisidadi? É klaru ki nu ka meste muda pa lonji pa nu mostra ma nu ta sirbi Jeová. Má ten alguns irmon ki ta pode faze si. Es fla mésmu kuza ki proféta Izaías flaba, kantu Jeová pergunta: ‘Ken ki N ta manda i ken ki ta bai pa nos?’ Izaías responde: ‘Ale-m li! Manda-m bai!’ (Isa. 6:8) I bo? Bu ta pode i bu ten gana di djuda na trabadju ki organizason sta ta faze? Di ki manera bu pode djuda?

15 Kantu Jizus pâpia sobri prega i faze disiplus, el fla: ‘Kodjéta é grandi mê, má trabadjadoris é poku. Pur isu, nhos pidi Sinhor di kodjéta pa manda trabadjadoris pa se kodjéta.’ (Mat. 9:37, 38) Bu ta pode ser pioneru na undi ki ten más nisisidadi? Ô bu pode djuda algun algen faze mésmu kuza? Txeu irmon xinti ma midjór manera di mostra ses amor pa Deus i pa kunpanheru é ser pioneru na undi ki ten más nisisidadi. Bu ta atxa ma ten algun manera ki bu pode faze más na bu sirvisu? Si bu konsigi bu ta ten txeu filisidadi.

16, 17. Kal ki é alguns manera ki bu pode faze más na sirvisu pa Jeová?

16 Bu ta gostaba di sirbi na Betel ô djuda na konstruson, mésmu ki é sô pa algun ténpu ô alguns dia di simana? Organizason di Jeová sénpri ta meste pesoas ki krê faze kalker tipu di trabadju na kalker lugar, ka ta nporta si es ten spiriénsa ô nau. Jeová ta da txeu valor pa kes ki ta faze sakrifisiu pa sirbi undi ki mestedu. — Sal. 110:3.

17 Bu ta gostaba di resebe más trenu pa sirbi Jeová más midjór? Nton bu pode prenxe pitison pa Skóla di Pregadoris di Reinu. Kel skóla li ta trena irmons i irmans maduru, ki ta sirbi Jeová pa ténpu interu i ki krê ser uzadu más midjór. Kes ki prenxe pitison pa sisti kel skóla, sta prontu pa sirbi na undi ki es mandadu. Bu ta gostaba di ten es xansi di sirbi Jeová más midjór? — 1 Cor. 9:23.

18. Kuzê ki nu ta ganha si nu trabadja ku Jeová tudu dia?

18 Nos é povu di Jeová pamodi nu gosta di da, nu ta trata otus ku bondadi i nu ta ama-s. Tudu dia nu ta preokupa ku otus. Faze kes kuza li ta da-nu alegria, pas i filisidadi. (Gál. 5:22, 23) Ka ta nporta nos situason, nu ta ser filís si nu imita Jeová ki é un Deus ki gosta di da i el ta da-nu txeu valor pamodi nu ta trabadja ku el! — Prov. 3:9, 10.