Bai pa asuntu

Bai pa lista di asuntus

Kuzê ki Reinu di Deus ta ben faze?

Kuzê ki Reinu di Deus ta ben faze?

Jizus inxina se disiplus pa ora ta pidi pa Reinu di Deus ben. El sabeba ma kuzas gravi ki sta kontise na Téra é ka di vontadi di Deus i ma é sô Reinu di Deus ki ta ben rezolve tudu kes prubléma. Kuzê ki Reinu di Deus ta ben faze?

KUZÊ KI REINU DI DEUS DJA FAZE?

Na kel artigu ki pasa, nu pâpia di kel sinal ki Jizus da. Kel sinal é un próva klaru ma Reinu di Deus kumesa ta governa na Séu i ma Jizus Kristu é Rei di kel Reinu.

Bíblia ta splika ma kantu Jizus bira Rei, el tra Satanás ku se dimónis di Séu. Gósi es ta pode prujudika sô kuzas ki ta kontise li na Téra. Kel-li é un di kes razon ki poi kuzas na Téra ta fika más piór désdi anu di 1914. — Apocalipse 12:7, 9.

Sikrê ku situason difísil li na Téra, Jizus, ki é Rei di Reinu di Deus, sta ta faze kuzas pa djuda pesoas na mundu interu. Jizus dja flaba ma ta tinha un prugrama di inxina Bíblia na mundu interu, undi ki txeu algen sta ta prende i sta ta sigi kes orientason di Bíblia na ses vida. (Isaías 2:2-4 ) Milhons di algen dja prende modi ki es ta ten un família filís i ka dexa trabadju ô kuzas material bira más inportanti na ses vida. Kes algen sta ta prende modi ki es ta ten un vida más midjór gósi i ser kel tipu di algen ki Deus krê pa sta na Téra na futuru.

 KUZÊ KI REINU DI DEUS TA BEN FAZE NA FUTURU?

Nbóra Jizus sta ta governa na Séu, ómis inda sta ta governa Téra. Má, Deus fla Jizus: ‘Manda na meiu di bus inimigu.’ (Salmo 110:2 ) Ka ta dura Jizus ta ben kaba ku tudu se inimigus i el ta ben rezolve prublémas di tudu kes algen ki ta obi ku Deus di livri vontadi.

Na kel ténpu, Reinu di Deus ta ben aji pa:

  • Kaba ku relijion falsu. Kes relijion ki ta inxina mintiras sobri Deus i ki ta konplika vida di pesoas, ta ben kabadu ku es. Bíblia ta fla ma relijion falsu é sima un prostituta. Txeu algen ta ben fika spantadu óras ki el distruídu. — Apocalipse 17:15, 16.

  • Kaba ku govérnus di ómi. Reinu di Deus ta ben aji pa kaba ku tudu govérnus di ómi. — Apocalipse 19:15, 17, 18.

  • Kaba ku algen mau. Kuzê ki ta ben kontise ku kes algen ki krê kontinua ta faze kes kuza mariadu i ki ka krê obi ku Deus? ‘Kes algen mau, ta ben kabadu ku es di Téra’. — Provérbios 2:22.

  • Kaba ku Satanás i dimónis. Satanás ku dimónis ka ta ben konsigi ‘ngana kes nason más’. — Apocalipse 20:3, 10.

Kuzê ki Reinu di Deus ta ben faze pa kes algen ki ta obi ku el?

 KUZÊ KI REINU DI DEUS TA BEN FAZE PA TUDU ALGEN?

Jizus ki é Rei na Séu, ta ben faze kuzas ki ninhun govérnu di ómi ka konsigi faze. El ta ben ten ajuda di 144 mil algen ki skodjedu li na Téra pa ba governa ku el. (Apocalipse 5:9, 10; 14:1, 3 ) El ta ben toma medida pa vontadi di Deus fazedu li na Téra. Kuzê ki Reinu di Deus ta ben faze pa kes algen ki ta vive na Téra?

  • El ta ben kaba ku tudu duénsa i mórti. ‘Ningen ki ta mora la ka ta fla: “N sta duenti”’ i ‘ka ta ten más mórti’. — Isaías 33:24; Apocalipse 21:4.

  • El ta ben traze pas di verdadi i suguransa. ‘Pas di bus fidju ta ben ser txeu’ i ‘kada un di es ta ben xinta baxu di se pé di uva i baxu di se pé di figu, i ka ta ten ningen pa pô-s ta xinti medu’. — Isaías 54:13; Miqueias 4:4.

  • El ta ben da trabadju ki bale péna. ‘Kes ki N skodje ta ba goza rezultadu di trabadju di ses mô. Es ka ta ben trabadja duru sen rezultadu’. — Isaías 65:22, 23.

  • El ta ben rezolve prublémas di anbienti. ‘Dizértu i téra séku ta ben fika kontenti, lugar planu di dizértu ta ben grita ku txeu alegria i el ta ben da flor sima asafron.’ — Isaías 35:1.

  • El ta ben inxina pesoas kuzê ki es meste faze pa es pode vive pa tudu ténpu. ‘Vida pa tudu ténpu é kel-li: pa es konxe-u abo, úniku Deus verdaderu, i kel ki bu manda, Jizus Kristu.’ — João 17:3.

Deus krê pa bu ten kes benson li. (Isaías 48:18 ) Kel otu artigu ta ben splika kuzê ki bu pode faze gósi pa bu ten kel futuru rei di sábi.