Bai pa asuntu

Bai pa lista di asuntus

Pamodi ki nu debe fla mantenha?

Pamodi ki nu debe fla mantenha?

“É MODI? Tudu dretu?”

Talvês, é si ki bu ta fla un algen mantenha. Pode ser ki bu ta da-l un abrasu ô un mozada. Na kada país ta fladu mantenha di manera diferenti, má na tudu lugar pesoas ta fla mantenha. Si un algen ka ta fla mantenha ô el ka ta responde otu algen ki fla-l mantenha, el pode txomadu di mal idukadu i ta mostra ma el ka ta preokupa ku otus.

Má ten algen ki ta atxa difísil fla mantenha. Alguns ten txeu vergónha ô es ka ten kunfiansa na ses kabésa. Otus ka gosta di kunprimenta pesoas ki é di otu rasa, kultura ô formason diferenti. Má fla mantenha, mésmu ki é di un manera sinplis, pode ten txeu forsa.

Pergunta bu kabésa: ‘Modi ki fla mantenha pode djuda un algen? Kuzê ki Bíblia ta inxina-m sobri fla otus mantenha?’

FLA ‘TUDU TIPU’ DI ALGEN MANTENHA

Kantu apóstlu Pedru resebe Kornéliu, ki ka éra judeu, na kongregason, el fla: ‘Deus ka ta faze skodjénsa’. (Atus 10:34, BPK ) Un ténpu dipôs, Pedru skrebe ma Deus ‘krê pa tudu’ algen salva. (2 Ped. 3:9) Na komésu, nu pode atxa ma kes testu ta sirbi sô pa kes algen ki sta kumesa ta prende verdadi. Má Pedru fla kristons: ‘Nhos onra ómis di tudu tipu, nhos ten amor pa irmons di mundu interu’. (1 Ped. 2:17) Si nu krê onra i mostra amor pa pesoas, éra bon nu fla tudu algen mantenha, ka ta nporta ses rasa, kultura ô kalker otu kuza.

Apóstlu Polu fla: ‘Nhos resebe kunpanheru, sima Kristu tanbê resebe nhos’. (Rom. 15:7) Na otu situason, Polu fla ma irmons é un ‘fonti di txeu konsolu’ pa el. Oji nu meste mutu más inda di koraji pa nu pode konsigi lida ku atakis ki Satanás ta faze kóntra povu di Deus. — Col. 4:11, nóta di rodapé; Apo. 12:12, 17.

Izénplus ki sta na Bíblia ta mostra ma fla mantenha pode ser mutu más di ki sô resebe un algen dretu.

MODI KI FLA MANTENHA PODE DJUDA

Antis di Jizus ben pa Téra, Jeová manda un anju pa ba pâpia ku Maria. Anju fla Maria: ‘Fika kontenti, abo é filís i Deus sta ku bo!’ Maria fika ‘trapadjadu’ di odja ma un anju sta ta papiaba ku el. Nton anju fla-l: ‘Maria, ka bu xinti medu, pamodi bo é filís dianti di Deus!’ El splika ma éra di vontadi di Deus pa el ser mai di Misías. Envês di kontinua preokupadu, Maria responde: ‘Ami é sérva di Sinhor. Pa kontise ku mi, sima bu fla.’ — Lúkas 1:26-38, BPK.

Pa kel anju, éra un priviléjiu grandi ser mensajeru di Jeová. El ka ta atxaba ma pâpia ku un umanu é ka éra un diziginason pa el. Kel anju fla Maria mantenha antis di el kumesa ta pâpia ku el. Kuzê ki nu ta prende ku se izénplu? Nu debe sénpri fla mantenha i nkoraja pesoas. Nu ka meste fla txeu kuza pa nu mostra otus algen ma es ta faze párti di povu di Deus.

Polu konxeba txeu irmon na Ázia i na Europa. Na kes karta ki el skrebe, Polu ta kunprimentaba irmons pa ses nómi i el ta papiaba di kuzas dretu di kes irmon. Un izénplu di kel-li é kel ki nu ta atxa na Romanos kapítlu 16. El pâpia di Febi, ‘nos irman’ i el pidi kongregason pa ‘resebe-l na Sinhor di un manera dretu sima santus i pa djuda-l na tudu kuza ki el mesteba’. Polu kunprimenta Priska ku Ákila i el fla ma el i tudu kes kongregason di nasons, staba gratu pa es. Tanbê el kunprimenta irmons ki oji nu ka sabe nada sobri es: ‘Epénitu ki nu ta ama txeu’ i ‘Trifena ku Trifoza, mudjeris ki trabadja duru na Sinhor.’ Polu ta staba sénpri prontu pa kunprimentaba se irmons. — Rom. 16:1-16.

Imajina modi ki kes irmon fika kontenti! Es ta xintiba ma Polu ta lenbraba di es ku amor. Nton, amor ki es tinha pa Polu i pa kunpanheru fika más fórti inda. Kes mantenha talvês nkoraja otus kriston i sirbi pa djuda-s kontinua firmi na fé. Fla mantenha di korason ta djuda-nu ser más amigu di kunpanheru i fika más unidu.

Kantu Polu staba ta sai di kais di Putéulu pa ba Roma, irmons di Roma bai nkontra ku el na kaminhu. Sô di odja irmons ta txiga, Polu ‘agradise Deus i el xinti nkorajadu.’ (Atus 28:13-15, BPK ) Na alguns situason, tudu ki nu pode faze é da un sorizu ô sana di lonji. Má simé kel-li pode djuda un algen, ki pode sta dizanimadu ô tristi.

FLA MANTENHA É TXEU INPORTANTI

Disiplu Tiagu tinha konsedjus klaru pa el daba kristons. Es staba ta faze amizadi ku mundu. (Tia. 4:4) Má repara modi ki Tiagu kumesa se karta:

‘Tiagu, skravu di Deus i di Sinhor Jizus Kristu, pa kes 12 tribu ki sta spadjadu: Mantenhas!’ (Tia. 1:1) Na se kunprimentu, Tiagu mostra ma el éra ‘skravu’ di Deus, sima kes ki sta ba leba se karta. Di sertéza kel-li djuda kes irmon seta konsedju ki el da-s. Ser umildi óras ki nu ta kunprimenta otus algen pode djuda-nu pâpia ku es di asuntus más sériu.

Pa nos mantenha nkoraja otus, el debe ser di korason i nu debe faze-l ku amor di verdadi, mésmu ki nu atxa ma kel algen ka liga nos mantenha. (Mat. 22:39) Un bês, un irman na Irlanda txiga runion na óra ki sta ba kumesaba. Kantu ki el entra ku présa na Salon, un irmon ri ku el i fla-l: “Oi! N fika kontenti di odja-u!” Má kel irman pasa i el ba xinta.

Alguns simana dipôs, el bai pâpia ku kel irmon i el konta-l ma dja tinha txeu ténpu ta lida ku un situason difísil na kaza. Kel irman fla-l: “N staba txeu tristi na kel dia ki nen N ka sta pensaba bai runion. N ka ta lenbra dretu di kuzê ki fladu na runion, má N ta lenbra ma bu fla-m mantenha. N xinti sabe ku kel mantenha. Obrigadu!”

Kel irmon nen ka ta imajinaba ma kel mantenha ki el fla poi kel irman ta xinti sábi. Kel irmon fla: “Kantu el fla-m ma kes poku kuza ki N fla-l pô-l ta xinti dretu, N odja ma bale péna kel sforsu ki N faze pa N fla-l mantenha. Ami tanbê N xinti sábi.”

Salumon skrebe: ‘Bota bu pon riba di agu, pamodi dipôs di txeu dia bu ta bai atxa-l otu bês.’ (Ecl. 11:1) Óras ki sénpri nu ta fla otus algen mantenha, prinsipalmenti nos irmons na fé, nu sta pô-s ta xinti sábi i nos tanbê nu ta xinti sima es. Pur isu, nunka ka nu skese ma fla mantenha é txeu inportanti!