Bai pa asuntu

Bai pa lista di asuntus

Sirbi Jeová ki é Deus di liberdadi

Sirbi Jeová ki é Deus di liberdadi

‘Undi spritu di Jeová sta, la ten liberdadi.’ — 2 CORÍNTIOS 3:17.

KÁNTIKUS: 49, 73

1, 2. (a) Pamodi ki pesoas na ténpu di Polu staba preokupadu ku skravidon i liberdadi? (b) Kenha ki Polu fla ma é fonti di liberdadi di verdadi?

KES primeru sigidor di Kristu ta viveba na meiu di romanus. I kes romanu ta atxaba ma es éra kes midjór na difendeba lei, justisa i liberdadi. Má, un bon párti di puder i glória ki Inpériu di Roma tinha, éra na kusta di skravus. Txiga un pontu ki 30 pursentu di populason éra skravu. Pur isu, tudu romanus, ti kes kriston, ta papiaba txeu di skravidon i liberdadi.

2 Kartas ki apóstlu Polu skrebe ta pâpia txeu sobri liberdadi. Má, obijetivu di se pregason é ka éra mudaba sosiadadi ô pulítika, nbóra éra kel-li ki povu kreba. Má, envês di spéra ma algun governanti umanu ta trazeba liberdadi, Polu ku kes otu kriston trabadja txeu pa djuda otus prende di notísias sábi sobri Reinu di Deus. Tanbê, el djuda-s ntende valor di sakrifisiu di resgati di Jizus Kristu. Polu orienta kes kriston pa buska kel fonti  di liberdadi di verdadi. Pur izénplu, na se sugundu karta pa kristons na Korintu, el skrebe: ‘Jeová é Spritu, i undi spritu di Jeová sta, la ten liberdadi.’ — 2 Cor. 3:17.

3, 4. (a) Kuzê ki poi Polu skrebe kel ki sta na 2 Coríntios 3:17 ? (b) Kuzê ki nu ten ki faze pa ten kel liberdadi ki ta ben di Jeová?

3 Na alguns versíklu antis, na kel karta ki el skrebe pa kes algen na Korintu, Polu pâpia di glória di Muizes kantu el dixi di Monti Sinai, dipôs di sta na frenti di un anju di Jeová. Kantu ki povu odja Muizes es fika ku medu i Muizes kubri róstu ku un véu. (Êx. 34:29, 30, 33; 2 Cor. 3:7, 13) ‘Má’ , Polu splika: ‘Óras ki un algen ta volta pa Jeová, kel véu ta tradu.’ (2 Cor. 3:16) Kuzê ki Polu krê flaba?

4 Sima nu prende na kel primeru studu, Jeová é Kriador di tudu kuza i el é úniku algen ki se liberdadi ka ten limiti. É pur isu, ki na prezénsa di Jeová i ‘undi spritu di Jeová sta’, la ten liberdadi. Má si nu krê ten es liberdadi, nu meste ‘volta pa Jeová’ ô ten un amizadi fórti ku el. Israelitas na dizértu ka konsigi odja liberdadi spritual ki Jeová da-s. Ses korason staba duru i ses menti staba tapadu i es konsentra sô na kuzas ki es tinha na Ijitu. — Heb. 3:8-10.

5. (a) Spritu di Jeová ta liberta-nu di kuzê? (b) Modi ki nu sabe ma mésmu un algen prézu ô un skravu pode xinti liberdadi ki Jeová ta da? (c) Ki perguntas nu ta ben responde?

5 Liberdadi ki spritu di Jeová ta da é mutu más midjór ki dexa di trabadja sima skravu. Spritu di Jeová ta liberta-nu di ser skravu di pekadu i mórti. Tanbê el ta liberta-nu di ser skravu di adorason falsu i ses kustumu. Kel liberdadi li ningen ka ta pode da-nu. (Rom. 6:23; 8:2) Kel-li é un grandi liberdadi! Un algen pode ten es liberdadi, sikrê el sta prézu ô ta trabadja sima skravu. (Gén. 39:20-23) Kel-li kontise ku irman Nancy Yuen i irmon Harold King. Es dôs fika txeu ténpu na kadiâ pamodi es éra Tistimunhas di Jeová. Bu pode odja i obi ses spiriénsa na JW Broadcasting. (Bai na ENTREVISTAS E EXPERIÊNCIAS > ENFRENTAR DIFICULDADES.) Nu sta ben responde kes pergunta li: Modi ki nu ta mostra ma nu ta da valor pa nos liberdadi? Kuzê ki nu pode faze pa nu uza dretu nos liberdadi?

DA VALOR PA LIBERDADI KI DEUS TA DA-NU

6. Modi ki israelitas mostra ma es ka ta daba valor pa liberdadi ki Jeová da-s?

6 Óras ki nu resebe un prezenti karu i di txeu valor, nu ta xinti gana di agradise kel algen ki da-nu el. Israelitas ka da valor pa liberdadi ki Jeová da-s, kantu el liberta-s di skravidon na Ijitu. Alguns mês dipôs, es kumesa ta xinti sodadi di kumida i bebida ki es tinha na Ijitu. Es reklama di kumida ki Jeová da-s i ti es krê voltaba pa Ijitu. Imajina, es kreba ‘pexi, pipinu, balansia, adju-poró, sabóla i adju’, envês di ten liberdadi pa adora Jeová, ki é Deus di verdadi. Jeová tinha tudu razon pa staba  txeu xatiadu ku es. (Núm. 11:5, 6, 10; 14:3, 4) Kuzê ki nu ta prende ku kel-li?

7. Modi ki nu pode sigi konsedju di Polu na 2 Coríntios 6:1?

7 Apóstlu Polu fla tudu kristons pa ka ser ingratu ku liberdadi ki Jeová ta da-nu, através di se Fidju Jizus Kristu. (Lé 2 Coríntios 6:1.) Lenbra di tristéza i dór di konsénsia ki Polu sufri, pamodi el xinti skravu di pekadu i mórti. Má simé el fla: ‘N ta agradise Deus, através di Jizus Kristu, nos Sinhor!’ Pamodi? El splika: ‘Pamodi kel lei di spritu ki da vida através di Kristu Jizus liberta-nu di lei di pekadu i di mórti.’ (Rom. 7:24, 25; 8:2) Sima Polu, sénpri nu debe agradise Jeová pamodi el liberta-nu di ser skravu di pekadu i di mórti. Pamodi resgati, nu pode sirbi nos Deus ku un konsénsia linpu i ku alegria. — Sal. 40:8.

Bu sta uza bu liberdadi pa faze más na pregason ô bu sta uza-l pa faze kel ki bu krê? (Odja parágrafus 8 ti 10.)

8, 9. (a) Ki avizu apóstlu Pedru da sobri uza nos liberdadi? (b) Ki preson nu ta pasa pa el oji?

8 Pa nu kontinua ta mostra gratidon nu debe toma kuidadu pa nu ka uza nos liberdadi di manera mariadu. Apóstlu Pedru aviza pa nu ka uza nos liberdadi kómu diskulpa pa nu faze nos dizeju. (Lé 1 Pedro 2:16.) Kel avizu ka ta lenbra-u di kuzê ki kontise ku israelitas na Ijitu? I es avizu é más inportanti pa nos oji. Satanás i se mundu ta oferese txeu kuza, sima ropa, kumida, bebida, diverson i monti otus kuza. Kes publisidadi ki ta fazedu ta mostra kuzas bunitu, pa pô-nu kunpra kuzas ki nen nu ka meste. É faxi nu kai na kel tentason li i uza mariadu nos liberdadi.

9 Konsedju di apóstlu Pedru tanbê ta aplika inda más na otus ária di nos vida. Sima kursu ki nu ta skodje, trabadju ô sigi un karera. Pur izénplu, oji un jóven ki sta na skóla ta pasa pa txeu preson di ser midjór i di entra na un di kes midjór universidadi. Es ta kridita ma faze kursu ta da-s xansi di ten un bon trabadju i di ganha txeu dinheru. Es ta uza piskiza ki fazedu pa prova ma ken ki ten kursu supirior ta ganha mutu más txeu di ken ki faze kursu médiu. Pur isu, jóvens ta atxa ma kel-li é un bon disizon, pamodi el ta ba muda ses vida interu. Má, di kuzê ki kes jóven i ses pai ku ses mai debe lenbra?

10. Di kuzê ki nu debe lenbra óras ki nu ta uza nos liberdadi pa toma disizons?

10 Alguns algen ta atxa ma kel-li é un asuntu ki kada un debe disidi. Es é livri pa skodje kuzê ki es krê, désdi ki ses konsénsia sta trankilu. Talvês es ta pensa na kuzê ki apóstlu Polu skrebe pa kes kriston na Korintu sobri kumida: ‘Pamodi ki nha liberdadi debe ser julgadu pa konsénsia di otu?’ (1 Cor. 10:29) É verdadi ki nu ten liberdadi pa nu skodje ki kursu nu ta faze i ki karera nu ta sigi. Má nu debe lenbra ma nos liberdadi ten limiti i tudu disizon ki nu ta toma ten un rezultadu. Pur isu, Polu fla: ‘Nu pode faze tudu kuza, má nen tudu kuza ten vantaji. Nu pode faze tudu kuza, má nen tudu kuza ta djuda.’ (1 Cor. 10:23) Kel-li ta djuda-nu odja  ma, nbóra nu ten liberdadi pa toma disizons na nos vida, kuza más inportanti é ka faze kel ki nu krê.

UZA BU LIBERDADI PA SIRBI DEUS

11. Pamodi ki Jeová liberta-nu?

11 Kantu Pedru aviza sobri uza nos liberdadi mariadu, tanbê el fla modi ki nu debe uza-l. El fla pa nu uza nos liberdadi pa ser ‘skravus di Deus’. Má razon prinsipal ki poi Jeová uza Jizus pa liberta-nu di pekadu i mórti é pa nu uza nos vida pa sirbi-l.

12. Ki izénplu Nué ku se família dexa pa nos?

12 Mundu ta krê pa nu uza nos liberdadi di manera mariadu i pa nu bira se skravu. Midjór manera di nu proteje é uza nos ténpu i forsa pa sirbi Jeová. (Gál. 5:16) Odja izénplu di Nué i se família. Es vive na un mundu xeiu di violénsia i pesoas ta tinha konportamentu seksual mariadu. Má simé, es ka dexa konportamentu di kes algen influensia-s. Modi ki es konsigi? Es mante okupadu na tudu trabadju ki Jeová da-s, sima faze arka, djunta kumida pa es i ses animal i aviza kes algen ma Dilúviu staba ta ben. ‘Nué faze tudu kel ki Deus manda-l. El faze sima el mandadu.’ (Gén. 6:22) Kuzê ki kontise? Nué ku se família skapa kantu kel mundu distruídu. — Heb. 11:7.

13. Ki órdi Jeová da Jizus ki nu debe sigi?

13 Kuzê ki Jeová manda-nu faze oji? Nu konxe dretu kel órdi ki Jeová da pamodi nos é disiplus di Jizus. (Lé Lucas 4:18, 19.) Satanás tene kuazi tudu algen ségu i skravu di relijion, dinheru i pulítika. (2 Cor. 4:4) É un priviléjiu sigi izénplu di Jizus, di djuda pesoas konxe i adora Jeová ki é Deus di liberdadi. (Mat. 28:19, 20) Faze kel trabadju li é ka fásil. Na alguns lugar, pesoas ka  krê sabe di Deus i ti es é kóntra nos pregason. Kada un di nos debe pergunta: ‘N pode uza nha liberdadi pa faze más na trabadju di Reinu?’

14, 15. Kuzê ki txeu sérvu di Jeová disidi faze? (Odja fotu na komésu di studu.)

14 Ta da-nu koraji óras ki nu ta odja ma txeu sérvu di Jeová, sabe ma nu sta vive na ténpu di fin i es ta bira ses vida más sinplis pa pode ser pioneru. (1 Cor. 9:19, 23) Alguns ta sirbi na ses tiritóriu i otus ta muda pa undi ten más nisisidadi. Rilatórius ta mostra ma na últimus sinku anu, más di 250 mil irmon bira pioneru fíksu. Gósi, nu ten un média di más di 1.100.000 pioneru fíksu. Ta da-nu txeu alegria odja ma es sta ta uza dretu ses liberdadi pa sirbi Jeová! — Sal. 110:3.

15 Kuzê ki djuda kes irmon uza dretu ses liberdadi? Odja izénplu di Juan ku Juditi. Na kes últimu 30 anu, es sirbi na txeu país. Es ta lenbra ma na 1977, kantu kumesa Skóla pa pionerus, organizason insentiva pionerus ki krê, pa mudaba pa undi tinha más nisisidadi. Pa el kontinua ku es obijetivu, Juan fla ma txeu bês el muda di trabadju, pa el mante un vida sinplis. Má, kantu es muda pa un otu país, es tevi ki lida ku alguns prubléma, sima prende un otu língua, otu kultura i aguenta klima txeu friu i txeu kenti. Má, sénpri es ora pa Jeová djuda-s lida ku kes prubléma li. Modi ki es xinti dipôs di tudu kes anu di sirvisu? Juan fla: “N xinti ma N staba ta faze midjór trabadju ki ten. Jeová bira más rial pa mi, sima un Pai ki ta ama se fidju. Gósi N ta ntende midjór kuzê ki Tiago 4:8 ta fla: ‘Nhos ser amigu di Deus i el ta ser nhos amigu.’ N tinha sertéza ma N atxa kel ki N staba ta djobe, un vida filís ku obijetivu.”

16. Modi ki txeu irmon uza dretu ses liberdadi, mésmu ku situason difísil?

16 Diferenti di Juan ku Juditi, otus sérvu di Jeová, pamodi ses situason, es ta sirbi pa ténpu interu sô pa poku ténpu. Má txeu ta pruveta xansi pa trabadja na prujétus di konstruson na mundu interu. Pur izénplu, kantu es staba ta faze sédi mundial na Warwick, Nova York, uns 27 mil irmon ku irman ba djuda. Alguns fika pa dôs simana, otus fika pa un anu ô más. Txeu di es, dexa ses vida pa tras pa ba djuda na konstruson. Es da un grandi izénplu di uza ses liberdadi pa lova i onra Jeová ki é Deus di liberdadi!

17. Ki bensons nu ta ben resebe si nu uza dretu nos liberdadi?

17 Nu sta kontenti di konxe Jeová i nu pode ten liberdadi ki adorason verdaderu ta da-nu. Nu pode mostra ma nu ta da valor pa es liberdadi, óras ki nu ta toma bons disizon. Envês di uza-l mariadu, nu krê uza nos liberdadi pa sirbi Jeová di midjór manera ki ten. Si nu faze si, nu pode ten bensons ki Jeová promete-nu óras ki es profesia kunpri: ‘Kriason tanbê ta libertadu di ser skravu di korupson i es ta ben ten liberdadi ku glória di fidjus di Deus.’ — Rom. 8:21.