Bai pa asuntu

Bai pa lista di asuntus

 LISON 39

Primeru rei di Israel

Primeru rei di Israel

Jeová daba israelitas juizis pa orientaba es, má simé es kreba un rei. Es fla Samuel: ‘Tudu nasons ten reis. Nos tanbê nu krê un rei.’ Samuel xinti ma kel-la ka staba dretu, pur isu el ora Jeová. Jeová fla-l: ‘É ka bo ki povu sta ta nega. É mi ki es sta ta nega. Fla-s ma es pode ten un rei, má kel rei ta ben iziji txeu kuza di es.’ Simé povu fla: ‘Nu ka meste sabe. Nu krê un rei!’

Jeová fla Samuel ma un ómi ki txomaba Saul ta sérba primeru rei. Kantu Saul bai vizita Samuel na un lugar ki txomaba Ramá, Samuel pô-l ólhu na kabésa pa mostra ma el skodjedu pa ser rei.

Dipôs Samuel txoma tudu israelitas pa mostra-s novu rei. Es djobe Saul má es ka atxa-l na ninhun lugar. Bu sabe pamodi? Pamodi el staba sukundidu na meiu di se bagájen. Kantu ki es atxa Saul, es traze-l i es pô-l na meiu di povu. Saul éra más altu ki tudu kes algen i el éra rei di bunitu. Samuel fla: ‘Nhos odja kenha ki Jeová skodje.’ Povu grita: ‘Vida kunpridu pa nos rei!’

Na komésu Rei Saul ta obiba ku Samuel i ku Jeová. Má dipôs el muda. Pur izénplu, rei ka pode ofereseba sakrifisiu. Un dia Samuel fla Saul pa spera-l, sô ki Samuel dura ki bai. Nton Saul disidi oferese sakrifisiu el mê. Modi ki Samuel fika? El fla-l: ‘Bu ka obi ku Jeová. Bu ka devia fazeba kel-la.’ Má Saul prende ku se éru?

Dipôs, kantu Saul bai géra kóntra amalekitas, Samuel fla Saul pa ka dexa ningen fika bibu. Má Saul disidi ka mata Rei Agagi. Jeová fla Samuel: ‘Saul bandona-m i el ka obi ku mi.’ Samuel fika txeu tristi i el fla Saul: ‘Dja ki bu ka obi ku Jeová, el sta ben skodje otu rei.’ Kantu Samuel da pa bai, Saul pega-l na ropa i se ropa ratxa. Nton Samuel fla Saul: ‘Jeová dja tra reinu di bo.’  Jeová ta ben daba reinu pa un algen ki ta ama-l i ki ta obi ku el.

‘Obedise é midjór ki un sakrifisiu.’ — 1 Samuel 15:22