Bai pa asuntu

Bai pa lista di asuntus

 LISON 11

Modi ki prinsípius di Bíblia ta djuda-nu?

Modi ki prinsípius di Bíblia ta djuda-nu?

1. Pamodi ki nu meste orientason?

Modi ki prinsípius di Bíblia pode leba-nu toma medidas di suguransa? — SALMO 36:9.

Nos Kriador sabe más ki nos. Sima un Pai xeiu di amor, el ta kuida di nos. Deus ka faze-nu pa nu vive sen el. (Jeremias 10:23 ) Sima un kriansa meste di orientason di se pai ku se mai, nos tanbê nu meste orientason di Deus. (Isaías 48:17, 18 ) Orientason ki prinsípius di Bíblia ta da-nu é prezenti di Deus. — 2 Timóteo 3:16.

Leis ku prinsípius di Jeová, ta inxina-nu midjór manera di vive gósi i ta mostra-nu modi ki Deus ta bênsua-nu pa tudu ténpu na futuru. Nu debe da valor pa tudu orientason di Deus pamodi é el ki faze-nu. — Salmo 19:7, 11; Apocalipse 4:11.

2. Kuzê ki é prinsípius di Bíblia?

Prinsípius di Bíblia é kes verdadi prinsipal ki ta mostra-nu kuzê ki Deus krê pa nu faze na txeu situason. Má lei pode fazedu pa un sértu situason. (Deuteronómio 22:8) Nu meste uza nos kapasidadi di pensa pa nu ntende modi ki un prinsípiu ta uzadu na un sértu situason. (Provérbios 2:10-12 ) Pur izénplu, Bíblia ta fla ma vida é un prezenti di Deus. Es verdadi prinsipal pode djuda-nu na trabadju, na kaza i óras ki nu ta viaja. Kel-la ta leba-nu toma medidas di suguransa. — Atos 17:28.

3. Kal ki é dôs prinsípiu más inportanti?

Jizus pâpia di dôs prinsípiu di grandi inportánsia. Kel primeru ta mostra kal ki é obijetivu prinsipal di vida, ki é konxe Deus, ama-l i faze se vontadi. Na tudu kuza ki nu ta faze nu debe sigi es prinsípiu li.  (Provérbios 3:6 ) Kes algen ki ta sigi es prinsípiu di verdadi, ta ganha amizadi ku Deus, ta ser filís i ta ben ten vida pa tudu ténpu. — Mateus 22:36-38.

Kel sugundu prinsípiu ta djuda-nu da dretu ku kunpanheru. (1 Coríntios 13:4-7 ) Pa sigi es prinsípiu nu ten ki trata algen sima Deus ta trata-nu. — Mateus 7:12; 22:39, 40.

4. Modi ki prinsípius di Bíblia ta djuda-nu?

Prinsípius di Bíblia ta inxina famílias sta unidu ku amor. (Colossenses 3:12-14 ) Palavra di Deus tanbê ta proteje famílias pamodi el ta inxina-s otu prinsípiu ki ta orienta-s: ma kazamentu debe ser pa tudu ténpu. — Génesis 2:24.

Sigi prinsípius di Bíblia pode djuda-nu na trabadju i ta da-nu pas na korason. Pur izénplu, txeu patron ta krê npregadus sériu i trabadjador sima prinsípius di Bíblia ta fla. (Provérbios 10:4, 26; Hebreus 13:18 ) Palavra di Deus tanbê ta inxina-nu sta kontenti ku kuzas ki nu ta meste na dia-dia i da nos amizadi ku Deus más valor ki nos trabadju. — Mateus 6:24, 25, 33; 1 Timóteo 6:8-10.

Sigi prinsípius di Bíblia pode djuda-nu ten más saúdi. (Provérbios 14:30; 22:24, 25 ) Pur izénplu, si nu obi ku lei di Deus ki ta fla ma nu ka debe bebe dimás, nu ta libra di asidentis i di duénsas ki ta mata. (Provérbios 23:20 ) Jeová ka ta kondena bebe désdi ki é na limiti. (Salmo 104:15; 1 Coríntios 6:10 ) Prinsípius di Deus ta djuda-nu pamodi es ta inxina-nu toma kuidadu ku kuzê ki nu ta faze i ku kuzas ki nu ta pensa na el. (Salmos 119:97-100 ) Má kristons di verdadi ka ta ruspeta kuzê ki Deus ta fla sô pamodi el ta djuda-s. Es ta faze-l pa da Jeová ónra. — Mateus 5:14-16.