MUIZÉS éra israelita, má é kel prinséza di Ijitu ki kria-l sima se fidju ki pô-l nómi. El skodje kel nómi li pamodi el ta siginifika ma el salvadu di agu, i é kel-li própi ki kontise. Kel prinséza talvês ta speraba ma el ta biraba un ómi inportanti na família di Faraó. Di serteza el fika kontenti di odja-l ta resebe un bon idukason. Bíblia ta fla: “Muizés resebe kel midjór idukason ki tinha na Ijitu.”

Kantu el kria, el bira un algen txeu ruspetadu. Bíblia ta fla: “Na verdadi, el éra poderozu na kuzas ki el ta flaba i ki el ta fazeba.” Na Ijitu el pode konsentraba na ten txeu rikéza, puder i na pasa sábi. Má, Muizés sabia ma vive di kel manera li ka ta poba el ta ser amigu di Jeová. Nton, Muizés tinha ki tomaba un disizon. Kuzê ki el ta fazeba ku se vida?

Kantu Muizés tinha 40 anu, el mostra klaru kal ki éra se disizon. Bíblia ta fla: “Pamodi fé, kantu Muizés bira grandi, el ka seta pa el txomadu fidju di fidju-fémia di Faraó. El skodje ser maltratadu djuntu ku povu di Deus envês di goza pa poku ténpu kes sabura di pekadu”. El toma kel disizon sértu, ki mostra se fé i koraji. Má el aji di manera mariadu.

Pa Muizés, kes israelita éra “ses irmon” i el krê djudaba es pamodi es staba ta maltratadu. Un dia, el ba djobe ti ki pontu ki es staba ta sufri. El odja un ómi di Ijitu, ki talvês éra un di kes xéfi di skravu, ta sota un skravu israelita. Muizés grita ta fla kel ómi di Ijitu pa para? Nu ka sabe. Muizés “djobe pa un ladu i pa kel otu,” talvês pa odja si tinha algun algen ki pode protejeba kel skravu. Má el ka odja ningen. Nton el aji. “El mata kel ómi di Ijitu”. Má el krê mataba el? Ô raiba pô-l ta perde kontrolu? Bíblia ka ta fla. Má, Muizés sabia ma si algun algen daba kónta, el ta staba na prigu. Pur isu, el sukundi kel korpu na areia.

Na kel otu dia, el ba djobe kes israelita otu bês. Di es bês, el odja dôs skravu ta briga i el tenta pô-s ta para. Má kel skravu ki ka tinha razon fla un kuza ki poi Muizés ta xinti medu. El fla-l: “Ken ki pô-u nos prínsipi i nos juís? Bu krê mata-m sima bu mata kel ómi di Ijitu?” Muizés da kónta ma pesoas sabia kuzê ki el fazeba. Nton, el xinti ma se vida staba na prigu.

 Kuzas ka staba ta kontise sima Muizés staba ta spera. Kuzê ki el staba ta spera? Bíblia ta fla: “El pensa ma ses irmon ta intendeba ma Deus staba ta uza-l pa salva-s, má es ka intende kel-la.” Ta parse ma Muizés ta atxaba ma Deus skodjeba el pa liberta israelitas, ki éra skravu na Ijitu. Má Muizés ka intendeba ma kel-la inda ka éra kel ténpu ki Jeová skodjeba pa liberta se povu. Tanbê el ta atxaba ma israelitas ta reajiba di manera diferenti. Má es ka kunfia na Muizés, pamodi el éra un israelita ki kriadu na palásiu di Faraó.

Na kel ténpu, Muizés ka daba kónta ma inda el ka staba prontu pa traba povu di Jeová di Ijitu. Deus ta atxaba ma Muizés inda ka staba priparadu. É verdadi ma el tinha koraji, ma el éra fórti i tanbê ma “el éra poderozu na kuzas ki el ta flaba i ki el ta fazeba.” Má simé, el mesteba un otu kualidadi ki Jeová ta da txeu valor, ki é mansidon. Pur izénplu, el aji sen pensa kantu el mata kel ómi di Ijitu.

Poku ténpu dipôs, Faraó da kónta di kuzê ki Muizés faze. I el tenta mata Muizés, sen da-l xansi di splika kuzê ki kontise. Pur isu, Muizés fuji di Ijitu sen sabe kuzê ki pode kontiseba ku el. El dexa pa tras rikéza, un vida sábi i kel autoridadi ki el tinha na Ijitu. Di serteza el meste tinha txeu koraji pa lida ku kes kuza ki staba pa ben. Muizés bai pa Midian, ki éra un téra lonji i séku. El pasa txeu anu la, “sima stranjeru na un téra stranjeru” i el ka pode voltaba pa Ijitu. El ta konsigi tinha kel koraji ki el mesteba pa el mudaba se manera di ser? El ta konsigi biraba un algen mansu i umildi sima Jeová krê pa el biraba? Nu ta ben odja na kel otu kapitlu.

Lé kel stória li na Bíblia:

• Ézudu 2:11-22

• Atus 7:22-29

• Ebreus 11:24-26

Responde kel pergunta li:

Modi ki Muizés mostra koraji?

 Piskiza más

1. 1. Kuzê ki arkiólogus diskubri ki ta prova ma israelitas éra skravu na Ijitu sima Bíblia ta fla? (w20.03 p. 30) Imajen 1

   Bu respósta

   Courtesy Brooklyn Museum, gift of Theodora Wilbour

2. 2. Kuzê ki Muizés prende ku se pai i ku se mai, i kuzê ki el prende kantu el “resebe kel midjór idukason ki tinha na Ijitu”? (Atus 7:22; w02 15/6 p. 10 pars. 2-5-wcgr)

   Bu respósta

3. 3. Modi ki kes algen di Ijitu ta sipultaba ses mortu? Modi ki talvês es xinti kantu Muizés ka sô mata un ómi di Ijitu, má tanbê el sukundi kel korpu? (it “Ijitu, algen di Ijitu” par. 28-wcgr) Imajen 2

   Bu respósta

4. 4. Muizés fuji pa Midian. Kuzê ki midianitas i israelitas tinha ki ta parseba ku kunpanheru? (it “Midian” Nunbru 2 pars. 1-2-wcgr)

   Bu respósta

 Pensa na kuzê ki bu prende

• Kuzê ki izénplu di Muizés pode inxina-u sobri kontrola bu kabésa?

  Bu respósta

• Ku koraji Muizés skodje bons méta. Kuzê ki jóvens pode prende ku se izénplu? Imajen 3

  Bu respósta

• Di ki otus manera bu pode imita koraji di Muizés?

  Bu respósta

Kuzê más ki bu pode pensa na el

• Kuzê ki kel stória li ta inxina-m sobri Jeová?

  Bu respósta

• Modi ki kel stória li sta ligadu ku vontadi di Jeová pa nos i pa téra?

  Bu respósta

• Kuzê ki N krê pergunta Muizés, sobri es párti di se vida, óras ki el resusita?

  Bu respósta