Bai pa asuntu

Instrusons pa runion Nos vida i nos trabadju di pregason

Instrusons pa runion Nos vida i nos trabadju di pregason

Lista di asuntus

1. Runion Nos vida i nos trabadju di pregason debe fazedu sima orientasons di Folhetu di studu pa runion Nos vida i nos trabadju di pregason i sima kes instruson li. Tudu publikador debe konvidadu pa da nómi pa faze diziginason di studanti. Otus algen ki ta sisti runion sénpri, tanbê pode faze diziginason si es ta konkorda ku kuzas ki Bíblia ta inxina i si es ta vive sima es prende na Bíblia. — be -T p. 282.

KOMENTÁRIUS PA KUMESA RUNION

 2. Un minutu. Tudu simana, dipôs di kántiku i orason, prizidenti di runion Vida i pregason ta poi algen ku vontadi di obi kuzê ki sta ta ba papiadu na runion. Prizidenti debe distaka kes pontu ki más ta djuda kongregason.

TIZORUS DI PALAVRA DI DEUS

  3. Diskursu: Dés minutu. Folhetu di studu pa runion Vida i pregason ten téma i dôs ô três pontu prinsipal di diskursu. Un ansion ô un ajudanti di kongregason kualifikadu debe faze kel diskursu li.  Óras ki prugrama di leitura di Bíblia di simana ta kumesa ku un livru novu di Bíblia, ta mostradu un vídiu ku informasons sobri el. Kel irmon ki sta faze diskursu pode mostra kuzê ki vídiu ten aver ku téma. Má, el debe pâpia di kes pontu ki sta na folhetu di studu pa runion. Tanbê, konfórmi ténpu da, el debe uza kes dizenhu ô fotus i pontus di Bíblia ki priparadu pa djuda kubri matéria.

 4. Djobe jóias ki sta na Bíblia: Dés minutu. Kel-li é un párti ku perguntas i respóstas sen intruduson nen konkluzon. Un ansion ô un ajudanti di kongregason kualifikadu debe faze kel párti li. Kel irmon ki sta faze kel párti li pode dividi ténpu di kes três pergunta di akordu ku kes pontu ki más ta aplika na kongregason. Má el debe faze tudu pergunta pa kes algen ki sta ta sisti runion. Tanbê el pode disidi si meste lé ô nau tudu kes versíklu ki sta na kes dôs primeru pergunta. Kes algen ki sta responde debe da komentáriu di 30 sugundu ô ménus.

  5. Leitura di Bíblia: Kuatu minutu ô ménus. É un irmon ki debe faze kel diziginason di studanti li. Kel irmon debe lé kel párti di Bíblia sen faze intruduson nen konkluzon. Prizidenti di runion debe djuda kes studanti lé sima sta skrebedu, di manera ki algen ta ntende, sen tranka, distaka palavras i frazis ki ta djuda algen ntende más faxi, faze mudansa di vós, uza pauza dretu i lé sima na un konbérsu normal. Dja ki alguns diziginason di leitura di Bíblia é más kunpridu i otus é más kurtu, enkaregadu di runion Vida i pregason debe pensa na kapasidadi di kada studanti óras ki el ta da diziginason.

FAZE BU MIDJÓR NA PREGASON

 6. Kinzi minutu ô ménus. Kel párti di runion li priparadu pa da tudu algen xansi di trena pa pregason, i midjora ses manera di prega i inxina. Kes studanti debe uza ideias pa pâpia sobri Bíblia ki ta sta na pájina un di Folhetu di studu pa runion Vida i pregason na ses diziginason di tistimunhu i di primeru i sugundu revizita. Publikadoris pode disidi si es ta oferese un publikason ô nau, ô mostra un vídiu ki ta faze párti di nos feraméntas prinsipal pa inxina. Pa djuda na pregason, ideias pa pâpia sobri Bíblia na folhetu di studu pa runion ten párti “Na ki feraméntas prinsipal pa inxina bu ta atxa kel testu li”. Studantis pode disidi si es krê ô nau uza kel párti li na ses diziginasons. Folhetu di studu pa runion Vida i pregason ta mostra kantu minutu kada diziginason di studanti debe dura, i alvês el pode da más instruson sobri kes diziginason. Studanti ka debe poi otu matéria sô pa ténpu ka resta. Alguns dimonstrason ki sta ben priparadu pode tirmina un minutu ô más antis di ténpu. Si ten nisisidadi, ansions pode resebe diziginason di studanti.

 7. Vídius di ideias pa pâpia sobri Bíblia: Na kada mês ta mostradu vídius di ideias pa pâpia sobri Bíblia i ta fazedu perguntas sobri es. Kes vídiu ta mostra modi ki ta fazedu tistimunhu i revizitas. Prizidenti di runion Vida i pregason ta faze kel párti li.

 8. Tistimunhu: Un irmon ô un irman pode faze kel diziginason di studanti li. Si é un irmon ki sta faze diziginason, se ajudanti debe ser un ómi ô un algen di se família. Má si é un irman ki sta faze diziginason, se ajudanti debe ser un mudjer ô un algen di se família. Studanti i ajudanti pode fika xintadu o sakédu. Studanti debe fla mantenha sima ta fazedu na kel lugar ki el sta faze diziginason. Diziginason debe fazedu ku bazi na ideias pa pâpia sobri Bíblia ki sta na pájina un di Folhetu di studu pa runion Vida i pregason.

 9. Revizita: Un irmon ô un irman pode faze kel diziginason di studanti li. Si é un irmon ki sta faze diziginason, se ajudanti debe ser un ómi. Má si é un irman ki sta faze diziginason, se ajudanti debe ser un mudjer. (km -T 5/97 p. 3) Studanti i ajudanti pode fika xintadu o sakédu. Studanti debe mostra kuzê ki ta fladu óras ki ta fazedu revizita pa un algen ki mostra interesi na tistimunhu. Diziginason debe fazedu ku bazi na ideias pa pâpia sobri Bíblia ki sta na pájina un di Folhetu di studu pa runion Vida i pregason.

  10. Studu di Bíblia: Un irmon ô un irman pode faze kel diziginason di studanti li. Si é un irmon ki sta faze diziginason, se ajudanti debe ser un ómi. Má si é un irman ki sta faze diziginason, se ajudanti debe ser un mudjer. (km -T 5/97 p. 3) Studanti i ajudanti pode fika xintadu ô sakédu. Kel diziginason li debe mostra un párti di un studu di Bíblia ki sta fazedu manenti. El ka meste ten intruduson nen konkluzon, sô si studanti sta trabadja un di kes pontu li. Ka meste ledu tudu matéria diziginadu ku vós altu, nbóra pode ledu. Debe distakadu kes bon manera di inxina.

 11. Diskursu: Un irmon debe faze kel diziginason li. El debe faze un diskursu pa kongregason.

VIVE SIMA UN KRISTON

 12. Dipôs di kántiku, ten un párti di 15 minutu, ki ten un ô dôs párti ki ta djuda ken ki sta ta sisti aplika Palavra di Deus na ses vida. Si ka dadu otu instruson, ansions ô ajudantis di kongregason kualifikadu debe faze kes párti li. Sô ansions ki debe faze párti asuntus pa djuda kongregason.

  13. Studu di Bíblia na kongregason: Trinta minutu ô ménus. Un ansion kualifkadu debe faze kel párti li. (Na undi ki ten poku ansions, si mestedu pode uzadu ajudantis di kongregason ki sta kualifikadu.) Grupu di ansions debe disidi kenha ki sta kualifikadu pa faze Studu di Bíblia na kongregason. Kes ki skodjedu debe aprizenta matéria di manera klaru, kontrola ténpu dretu, distaka testus prinsipal i djuda tudu algen ntende modi ki kel informason ta djuda-s na ses vida. Torna lé kes orientason publikadu sobri modi ki ta fazedu studu di Sentinéla, ta djuda txeu kes irmon ki ta faze Studu di Bíblia na kongregason. Si dja papiadu dretu di matéria pa kel simana, ka meste ranja más informason ô perguntas pa pode dura más ténpu. Si ta da, na kada simana debe uzadu un irmon diferenti pa faze Studu di Bíblia na kongregason i otu pa lé. Si prizidenti di runion Vida i pregason da orientason pa studu fika más kurtu, ken ki sta faze studu ta disidi modi ki el ta faze-l. El pode disidi ka lé alguns parágrafu.

KOMENTÁRIUS PA TIRMINA RUNION

  14. Três minutu ô ménus. Prizidenti di runion Vida i pregason ta faze un rezumu di pontus di runion ki pode djuda txeu. Tanbê el debe pâpia di runion di otu simana, sima faze un pergunta ki ta ba respondedu. Si ténpu da, el pode fla nómi di kes studanti ki ten diziginason na otu simana. Si ka dadu otu instruson, prizidenti debe faze kalker avizu i lé kalker karta ki meste na komentárius pa tirmina runion. Otus informason sima prugrama normal pa pregason i pa linpéza, ka debe avizadu di tribuna, má debe podu na kuadru di avizus. Kes três minutu di komentáriu pa tirmina runion pode ka txiga pa da tudu avizu ki mestedu ô lé tudu karta. Si kel-la kontise, prizidenti pode pidi kes irmon ki ten párti na Vive sima un kriston pa faze ses párti na ténpu más poku. (Djobe  parágrafus 13 i  17.) Runion ta tirmina ku kántiku i orason.

MIDJORA BU MANERA DI LÉ I INXINA

 15. Kada studanti debe traze bruxura Lé i inxina, na papel ô na formatu dijital, pa runion Vida i pregason. Prizidenti di runion Vida i pregason debe da ilojiu i konsedju ku bazi na es bruxura. Kada studanti debe trabadja kel nunbru di studu ki ta parse déntu paréntize dipôs di diziginason na Folhetu di studu pa runion Vida i pregason. Kel párti “Marka kes studu ki dja bu faze” na bruxura, fazedu pa studanti uza i prizidenti ka debe marka nada na el.

KONSEDJU

  16. Dipôs di kada diziginason di studanti, prizidenti di runion Vida i pregason ten más ô ménus un minutu pa da ilojiu i konsedju ku bazi na bruxura Lé i inxina. Prizidenti ka debe fla kel studu ki studanti sta trabadja antis di diziginason. Má el pode pâpia di el dipôs di diziginason di studanti i dipôs ki el da-l alguns ilojiu. El debe fla pamodi ki studanti faze kel studu dretu ô splika ku bondadi pamodi ki studanti debe torna trabadja kel studu. Tanbê prizidenti pode pâpia di otus kuza ki kontise na diziginason si el ta atxa ma kel-la ta djuda studanti ô ken ki sta sisti. El pode  da studanti más konsedju ku bazi na bruxura Lé i inxina ô na livru Escola do Ministério apárti dipôs di runion ô na otu óra, na kel studu ki el sta trabadja ô na otu studu. — Djobe  parágrafus 17,  22 i  24 pa sabe más informason sobri kuzê ki prizidenti di runion Vida i pregason i irmon ki ta djuda na da konsedju debe faze.

TÉNPU

     17. Ninhun párti ka debe pasa ténpu, nen komentárius di prizidenti di runion Vida i pregason. Diziginason di studanti debe paradu ku jetu óras ki ténpu tirmina. Si na otus párti di runion un irmon pasa ténpu, kel irmon ki ta djuda na da konsedju debe da-l konsedju apárti. (Djobe  parágrafu 24.) Runion interu, ku kántiku i orason debe dura 1 óra i 45 minutu.

VIZITA DI ENKAREGADU DI GRUPU DI KONGREGASON

 18. Óras ki kongregason ten vizita di enkaregadu di grupu, runion debe fazedu sima sta na Folhetu di studu pa runion Vida i pregason, ménus kes kuza li: Studu di Bíblia na kongregason, na párti Vive sima un kriston, ta trokadu pa un diskursu di sirvisu di 30 minutu ki enkaregadu di grupu ta faze. Antis di kel diskursu, prizidenti di runion Vida i pregason ta faze un rezumu di runion, el ta fla alguns asuntu di runion di otu simana, el ta faze kalker avizu, el ta lé kalker karta ki meste, dipôs el ta fla téma di diskursu i konvida enkaregadu di grupu pa bai tribuna. Dipôs di diskursu, enkaregadu di grupu ta tirmina runion ku un kántiku ki el skodje. El pode konvida otu irmon pa faze orason. Ka debe fazedu ninhun párti di studanti na língua di kongregason na kes otu sala na simana di vizita. Un grupu pode ten se runion, mésmu ki enkaregadu di grupu sta ta vizita kel kongregason ki ta kuida di kel grupu. Má grupu debe sisti diskursu di enkaregadu di grupu djuntu ku kongregason ki ta kuida di el.

SIMANA DI ASENBLEIA Ô KONGRÉSU

 19. Ka ten runion na simana di asenbleia ô kongrésu. Kada algen debe studa matéria pa runion di kel simana el sô ô na família.

SIMANA DI KOMEMORASON

 20. Óras ki Komemorason ta kai na dia di simana ka ten runion Vida i pregason. Má si ten runions pa pregason na dia di Komemorason, es debe fazedu.

ENKAREGADU DI RUNION VIDA I PREGASON

 21. Grupu di ansions debe skodje un ansion pa ser enkaregadu di runion Vida i pregason. El é responsável pa garanti ma es runion sta ben organizadu i ma ta sigidu kes instruson li. Tanbê el debe mante un bon kumunikason ku irmon ki ta djuda na da konsedju. Lógu ki Folhetu di runion Vida i pregason di kel mês sai, enkaregadu di runion Vida i pregason debe faze diziginason di studanti pa kel mês. (Djobe  parágrafus 5-11.) Kada diziginason di studanti debe dadu pelo ménus três simana antis di data di diziginason. Enkaregadu di runion Vida i pregason debe uza formuláriu Diziginason pa runion nos Vida i nos trabadju di pregason (S-89).

PRIZIDENTI DI RUNION VIDA I PREGASON

  22. Kada simana un ansion ta ser prizidenti na runion Vida i pregason. (Na kongregasons ki ten poku ansions, si mestedu pode uzadu ajudantis di kongregason ki sta kualifikadu.) Prizidenti debe pripara komentárius pa kumesa i pa tirmina runion, analiza kes vídiu di ideias pa pâpia sobri Bíblia i kes vídiu ki ta pâpia di un studu novu di bruxura Lé i inxina. Tanbê el debe fla téma di tudu párti i kenha ki sta ba faze-l. Si ten poku ansions, el pode faze otus párti na runion. Kes komentáriu na meiu di kes párti debe ser kurtu. Grupu di ansions ta skodje ansions ki sta kualifikadu pa ser prizidenti. Kada simana ta skodjedu un di kes ansion ki sta kualifikadu pa ser prizidenti. Má, di akordu ku nisisidadi di kongregason enkaregadu di runion Vida i pregason pode skodjedu pa ser prizidenti más txeu bês ki kes otu ansion kualifikadu. Si un ansion sta kualifikadu pa  faze Studu di Bíblia na kongregason, nton el debe sta kualifikadu pa ser prizidenti di runion. Favor, lenbra ma ansion ki ta ser prizidenti debe da ilojiu i konsedju ku amor ki ta djuda kes ki ten diziginason di studanti. Prizidenti é responsável pa garanti ma runion ta tirmina na óra. (Djobe  parágrafus 14 i  17.) Si prizidenti krê i si ten spasu, el pode uza un mikrofóni na tripé na palku. Asi óras ki el fla téma di kada párti i kenha ki sta ba faze-l, kel irmon pode bai pa tribuna i pripara pa kumesa. Prizidenti pode fika xintadu na un méza na palku duránti diziginason di leitura di Bíblia i párti Faze bu midjór na pregason. Kel-li pode popa ténpu.

KORDENADOR DI GRUPU DI ANSIONS

 23. Kordenador di grupu di ansions ô un ansion ki ta djuda-l ta faze diziginason di tudu párti di runion, ménus diziginasons di studanti. Kel-li ta inklui skodje prizidenti di runion di kada simana na kes irmon ki grupu di ansions skodje. Ku ajuda di enkaregadu di runion Vida i pregason, kordenador di grupu di ansions debe konfirma ma ta podu un prugrama di runion interu na kuadru di avizus.

IRMON KI TA DJUDA NA DA KONSEDJU

   24. Sénpri ki ta da, debe skodjedu un ansion ki ten spiriénsa na faze diskursu pa djuda na da konsedju. El debe da konsedju apárti, pa ansions i ajudantis di kongregason óras ki mestedu, pa kalker diziginason ki es faze, sima pártis na runion Vida i pregason, diskursu pa públiku, lé ô faze studu di Sentinéla ô studu di Bíblia na kongregason. (Djobe  parágrafu 17.) Si ten txeu ansion ki ten spiriénsa na faze diskursu i na inxina, nton kada anu, un di es ta djuda na da konsedju. El ka meste da konsedju tudu bês ki un irmon faze diziginason.

OTUS SALA

 25. Di akordu ku nunbru di studanti, kongregason pode ten otus sala pa diziginasons di studanti. Kada un di kes sala debe ten un irmon ku spiriénsa pa da konsedju ki, si ta da, debe ser un ansion. Na undi ki ten nisisidadi, pode skodjedu un ajudanti di kongregason kualifikadu pa da konsedju. Grupu di ansions debe disidi ken ki ta skodjedu i si kada simana é un algen diferenti ki ta faze-l. Kel irmon ki skodjedu debe sigi kes instruson di  parágrafu 16. Studantis debe konvidadu pa bai otu sala dipôs di párti Djobe jóias ki sta na Bíblia, na Tizorus di Palavra di Deus. Es debe volta pa sala prinsipal, lógu ki párti Faze bu midjór na pregason tirmina. Óras ki analizadu un vídiu, kes ki sta na otu sala debe sisti ô obi na sala undi ki es sta, si ta da. Má si ka ta da pa faze kel-li, kel irmon ki sta ta da konsedju na kel sala debe mostra vídiu na un telemóvel ô na un tablet.

VÍDIUS

 26. Ta mostradu vídius na runion. Vídius pa runion na meiu di simana ta sta na JW Library® i es pode uzadu na txeu aparelhu. Dipôs ki dja odjadu kes vídiu di ideias pa pâpia sobri Bíblia na runion Vida i pregason, es pode mostradu na runion pa pregason.