N nase na abril di 1951, na Nairobi, na Kénia. Nha mai ku nha pai éra di Índia i es éra di relijion Sike. Pamodi nha pai kaza ku se kunhada ki éra viúva, el fika ku dôs mudjer. Nha mai, ki éra se primeru mudjer, ka ta pode fazeba nada na kel asuntu li. Nha mai i nha madrasta alvês ta tinha fidju omésmu ténpu. N kria ku txeu irmon pa ladu mai ku pai i otus sô pa ladu pai i tanbê djuntu ku un primu. Pa tudu nos éra 7. Na anu di 1964, kantu N tinha 13 anu, nha pai móre.

N staba ta djobe justisa

 Timenti N staba ta kria N odja txeu diskutison i ma pesoas ta fazeba diferénsa di algen. Dipôs kantu N studa Bíblia N da kónta ma nos família éra sima kel stória di Lia ku Rakel ki sta na Bíblia. N da kónta ma pesoas di nha família ta maltrataba nos inpregadus, ki éra di Kénia i es inxina-nu ma nos é más midjór di ki es. Nha pai kreba pa nu fazeba amizadi ku nos vizinhu, ki éra di Europa i el fla ma nu pode prendeba ku es. Má el fla pa nu ivita sta djuntu ku kes algen di Áfrika pamodi nu ka ta prende nada ku es. Tanbê el fla-nu pa nu ka faze amizadi ku pesoas di Pakiston i ma nu debe trata-s sima si es é nos inimigu. Sénpri N tinha vontadi di odja pesoas ta tratadu ku justisa i N ka ta konkordaba ku manera ki nha pai ta pensaba.

 Relijion Sike fundadu pa vólta di anu 1500 pa Guru Nānak. N seta kes ensinu di Nānak, i kel-li ta inklui kel ideia ma ten sô un Deus verdaderu. Má N odja ma pesoas di relijion Sike ta trataba kunpanheru di manera injustu i kel-li pô-m ta pensa ma tinha algun prubléma ku kel relijion li.

 É ka éra sô kel-li ki ta poba mi preokupadu. Dja ki relijion Sike tinha sô uns 500 anu ki el pasa ta izisti, txeu bês N ta perguntaba: ‘Kuzê ki tinha antis di el? Kal ki éra kel primeru manera di adorason ki Deus ta aprovaba?’ Nos família tinha kalendárius ku dizenhus di 10 guru ki ta faze párti di stória di relijion Sike. Má N ta perguntaba: ‘Modi ki nu sabe modi ki es éra? Pamodi ki algen debe inbaxa dianti di kes imajen di guru, sima nha família i otus algen ta faze, si kes guru ta fla ma nu debe adora sô un Deus verdaderu?’

 Na anu di 1965, kantu N tinha 14 anu, nos família muda pa Índia. Vida la éra difísil pamodi nu tinha poku dinheru. Más ô ménus un anu dipôs, nu kumesa ta muda poku-poku pa Inglatéra. Nu fika ta muda dôs-dôs di kada bês i nu ba mora na Leicester.

 Kantu N tinha 16 anu, N kumesa ta faze txeu trabadju i ta sisti aula di noti pa N pode kontinuaba nha skóla pamodi dja N tinha algun ténpu ki N paraba di bai skóla. Má N repara ma alguns algen ki ta trabadjaba djuntu ku mi éra tratadu di manera injustu. Pur izénplu, kes trabadjador di Inglatéra ta resebeba midjór di ki kes algen ki éra imigranti. Nha dizeju di odja justisa ta fazedu pô-m ta organiza un grupu di mudjeris, ki éra imigranti, pa es para di trabadja ti ki es bira ta pagadu kel mésmu valor ki kes trabadjador di Inglatéra. N kreba pa mundu ser un lugar ki ten justisa.

N atxa respósta

 N konxe Tistimunhas di Jeová pa primeru bês na anu di 1968 kantu dôs ómi ki éra Tistimunhas di Jeová konko na nha pórta. Kel promésa ma óras ki Reinu di Deus ben governa tudu algen ta ben tratadu di manera igual lógu mexe ku mi. Un di kes Tistimunha di Jeová volta ku se mudjer. N kumesa ta studa Bíblia djuntu ku nha irman Jaswinder i Chani, ki é nha irman sô pa ladu pai. Dipôs ki nu studa sô 6 kapitlu, nu fika konvensidu ma Jeová é Deus verdaderu, ma Bíblia é se Palavra i ma sô Reinu pode traze justisa di verdadi pa tudu algen.

 Má nos família faze-nu txeu opozison pamodi nu staba ta studa Bíblia. Dipôs ki nha pai móre, nha irmon sô pa ladu pai bira xéfi di família. Nha madrasta pô-l ta faze-nu opozison. El ta sotaba nhas irman más pikinoti Jaswinder i Chani, i el ta xutaba es ku bóta ki tinha pónta di asu. El sabia ma dja ki N tinha 18 anu, el ka ta pode fazeba nada ku mi, má nhas irman el pode fazeba kuzê ki el kreba. Un bês, el panha un Bíblia, el abri-l, el poi lumi na el i el pô-l dianti di ses kara i el fla-s: “Nhos pidi nhos Deus Jeová pa paga es lumi!” Na kel ténpu, nu ta sistiba alguns runion sukundidu. Má nu tinha txeu vontadi di sirbi sô kel Deus verdaderu, Jeová. Má pamodi nos situason, kel-li ta parseba inposível. Pur isu, nu kumesa ta faze planu pa fuji di kaza i bai pa un lugar suguru. Modi ki nu ta fazeba kel-la?

 Di manera sukundidu nu kumesa ta djunta dinheru di nos almosu i pasajen di autokaru alén di un párti di kel dinheru di rénda ki nu ta daba nha madrasta. Nu kunpra três maléta i poku-poku nu intxi-s ku nos ropa i nu sukundi-s na un otu lugar fóra di nos kaza. Na maiu di 1972, kantu Jaswinder tinha kuazi 18 anu i nu tinha 100 libra (260 dóla), nu panha konboiu pa bai pa Penzance ki ta fika na sudésti di Inglatéra. Dipôs ki nu txiga na Penzance, nu txoma pa kes Tistimunha di Jeová di kel lugar di un kabini di tilifóni. Irmons resebe-nu dretu. Nu atxa txeu trabadju, kel-li ta inklui konpo péxi asi pa nu pode tinha dinheru pa nu renda un lugar i fikaba la.

 Nu kontinua nos studu di Bíblia ku un kazal di idadi, ki txomaba Harry i Betty Briggs. Na setenbru di anu di 1972, inda sukundidu, nu batizadu na un pisina pikinoti ki ta fikaba dibaxu di palku di Salon di Reinu di Truro. Chani kumesa sirvisu di pioneru, i mi ku Jaswinder nu ta djudaba el ku dinheru.

Nu ba sirbi na undi tinha más nisisidadi

 Enbóra Harry i Betty, tinha 80 i tal anu, sénpri es ta ba pregaba na ilhas Scilly, ki ta fika pértu di kósta di Inglatéra. Ses izénplu pô-nu ku dizeju di faze mésmu kuza. Sima N fla na komésu di kel artigu li, na anu di 1973, dipôs di nos konbérsu ku irmon Skinner, dja nu sabia kuzê ki nu ta fazeba.

 Na janeru di anu 1974, nu kunpra pasajen sô di bai pa Nova Délhi, na Índia, i irmon Dick Cotterill dexa-nu fika na lar misionáriu. Chani staba pioneru fiksu i mi ku Jaswinder nu kumesa ta pasa mutu más ténpu na pregason.

 Ku ténpu nu bai pa Punjab, ki é un stadu ki ta fika na noroésti di Índia, i nu fika na sidadi di Chandigarh na lar misionáriu i dipôs nu renda un apartamentu. N kumesa sirvisu di pioneru fiksu na setenbru di 1974 i N konvidadu pa ser pioneru spesial na anu di 1975. Pregason djuda-m odja ma tinha un grandi nisisidadi di publikason na punjabi, asi pa más algen prende sobri amor i justisa di Jeová. Na anu di 1976, filial di Índia konvida três di nos pa bai djuda na traduzi publikasons pa punjabi. Nu ka tinha mákina di skrebe ô konputador pur isu kel-li ta izijiba txeu trabadju. Nu tinha ki skrebeba kel testu na mô, djobe si el staba dretu i faze revizon. Dipôs nu ta inprimiba na un lugar di faze inpreson ki tinha mákinas antigu, i dipôs nu ta uzaba un inpresora antigu pa nu skrebe kel testu létra pa létra.

N kontinua ku alegria sikrê ku prublémas di saúdi

 Nos situason muda faxi dimás. Jaswinder konxe un irmon i el kaza ku el i es muda pa Kanadá. Chani kaza ku un irmon di Alimanha ki ba vizita Mérka i es muda pa la. N fika txeu duenti i N volta pa Inglatéra na otubru di 1976. Nha mai i nha irmon, ki ka éra kóntra verdadi, ta moraba na Leicester i ku bondadi es dexa-m mora ku es. N atxadu ku un duénsa ki ka mutu konxedu, ki ta straga sélulas di sangi i pur isu N tevi ki faze txeu tratamentu, ti mésmu N tevi ki tra un orgon ki txoma basu. Pur isu N para sirvisu di pioneru.

 N faze txeu orason pa Jeová i N fla-l ma si N midjoraba N ta kumesaba sirvisu di pioneru otu bês. I é kel-la ki N faze! Enbóra pamodi nha duénsa, alvês N ka ta staba dretu, N muda pa Wolverhampton na anu di 1978, i N bira pioneru na un lugar ki es ta papiaba língua punjabi. Nu ta fazeba konvitis pa runion ku mô i dipôs nu ta fazeba es kópia. Dipôs, nu ta intregaba kes konviti pa kes algen ki ta pâpia punjabi i nu ta konvidaba es pa diskursu pa públiku. Gósi Gran-Britanha ten sinku kongregason di língua punjabi i três grupu.

 Filial di Gran-Britanha sabia di nha trabadju ki N fazeba na Índia na traduson pa punjabi. Nton, filial pâpia ku mi na final di anus 80. N kumesa ta viaja pa Betel di Londris pa pripara kes dizenhu di létra i kes prugrama di konputador i pa djuda na kria régras ki ta uzadu óras ki nu ta skrebe na língua gurmuki na nos publikason. N tinha un vida txeu okupadu pamodi N ta trabadjaba, N ta kuidaba di nha mai ki ta moraba lonji di mi i N ta viajaba pa Betel. Má éra sábi pode trabadja ku Betel.

 Na setenbru di 1991, N konvidadu pa ser ménbru di família di Betel i pa trabadja na traduson di publikasons ku bazi na Bíblia pa punjabi. N ka staba ta spera ma kel-li ta kontiseba. N ka ta xintiba kualifikadu pa kel-li pamodi N tinha un duénsa i dja N pasaba di idadi ki un algen debe ten pa entra na Betel. Má simé, Jeová da-m es grandi priviléjiu. N staba kontenti ta sirbi na Betel, má nhas prubléma di saúdi kontinua. Txeu bês N fazedu preson pa toma sangi i tanbê N tevi ki faze kimioterapia i otus tratamentu. Nhas dotor fika txeu dimiradu di modi ki N rekupera i es konvida-m pa un palestra ki tinha sérka di 40 dotor na un ospital grandi di Londris. Duránti 10 minutu N pâpia sobri pamodi ki N ka ta toma sangi, i dipôs un irmon ki éra di Dipartamentu di Sirvisu di Informasons pa Ospital faze un párti di perguntas ku respósta.

 Duránti es ténpu difísil, nhas irman Jaswinder i Chani djuda-m ku txeu amor i N ta da txeu valor pa apoiu i bondadi di família di Betel i di otus amigu. Duránti tudu nhas prubléma, Jeová da-m forsa pa N kontinua na nha diziginason. — Salmo 73:26.

Benson di Jeová ta pô-nu ta fika riku

 Kes últimu 33 anu na Betel da-m oportunidadi di ‘sprimenta i odja ma Jeová é bon.’ (Salmo 34:8; Provérbios 10:22) Izénplu di kes irmon fiel i ki dja sta di idadi inkoraja-m. N fika txeu filís di odja txeu di nhas studanti di Bíblia ki ta pâpia punjabi ta bira sérvus lial di Jeová. N ten un bon amizadi ku kes algen di nha família. Nha mai i nha irmon ka é Tistimunhas di Jeová, má nha mai txeu bês ta fla-m: “Bu ta ama Deus própi.” I kantu N fla ma N ta saíba di Betel pa N ba kuida di nos mai ki dja sta algen grandi, nha irmon fla-m: “Bu sta ta faze un bon trabadju. Kontinua la.” Enbóra nha mai ta mora na un lar di idozu ki ta fika lonji di Betel, N ta vizita-l sénpri ki N ta pode.

 Enbóra dja N pasa pa txeu prubléma na vida, N ta fla nha kabésa: ‘Ka bu xinti medu, Kamal. Jeová é un skudu pa bo. Bu rekonpénsa ta ben ser grandi dimás.’ (Jénezis 15:1) N ta agradese Jeová, kel ‘Deus di justisa’, pamodi el repara na mi kantu mi éra jóven i pamodi el da-m un trabadju inportanti pa N faze na vida. (Isaías 30:18) I N sta spera pa kel ténpu ki ‘ningen ka ta fla: “N sta duenti.”’ — Isaías 33:24.