Gubungano li no lawula i Bakirisiti ba na lizibo gu pezhugwi be palo shomanana ba no tungamila Bafakazi ba Jehova mu shango yose. Nshingo wabo u ka bili:

•   Ba no lingilila ku kwagwa kwe zwidiyo zwe Baibili ku shingisiwa tshambiso, zwidiyo zwe gubungano, ne zwikwele zwi no diya Bafakazi ba Jehova​—Luka 12:42.

•   Ndibo ba no lawula nshingo we shango yose we Bafakazi ba Jehova ne ku tungamila nshingo we ku rera ne ku bona kuti zwipo zwi no dusiwa ne ku da zo shingisiwa chini.

 Gubungano li no lawula lo tobela ndongoloso ya ka be i shingisiwa ne “baapostolo ne bakugwana ku Jerusalema” mu century ye kutanga, ba ka be be tola thambo dza ka fanila mu bumo gwe gubungano le Bukirisiti. (Mishingo 15:2) Ne zila i no fanana, ba mu gubungano li no lawula ha ba to li tola se labo. Ba no tobela chi no legwa ne Baibili, be ziba kuti Jehova Ndzimu wa ka shalula Jesu Kirisiti se Nsholo we gubungano.​—1 Bakorinta 11:3; Baefeso 5:23.

Ba mu Gubungano li no Lawula ndi boyani?

 Mazina e ba mu Gubungano li no Lawula ndi bo Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, na Jeffrey Winder. Ba no shingila ku ofisi yedu wulu ye shango yose ku Warwick, New York, U.S.A.

Gubungano li no Lawula lo yendisiwa chini?

 Gubungano li no Lawula li na dzikomiti dzi li 6 dzi no lingilila mishingo yedu ya ka siyasiyana, ngono nngwe ne nngwe wabo u no shingila mu komiti i ngompela kene ku pinda.

•   Komiti ye Babatshanyi: I no lingilila zwe chinlayo ne ku batsha ha ku na dzingozi, ne ku batsha Bafakazi ba Jehova ba no dziyidziwa mu na cha ba no duma, ne mu zwithu zwingwe zwi no sheteka ku batsha Bafakazi ba Jehova.

•   Komiti ye Bushingili: I no lingilila ndongoloso ye be nsha we Bethele.

•   Komiti ye ku Tshambisa: I no lingilila ku kwagwa ne ku yendisa tshambiso dze Baibili ne ku baka dziholo dze Bushe ne dziofisi dze ku shandulila, ne dze libabi.

•   Komiti ye ku Shingila: I no lingilila nshingo we ku rera “ndebo mbuya dze Bushe gwe Ndzimu.”​—Matewu 24:14.

•   Komiti ye ku Diya: I no lingilila ku baakanyila kwe zwithu zwe bundzimu ne zwidiyo zwe gubungano, zwikwele zwi no diya Bafakazi ba Jehova, ne ndongoloso ye audio ne vidiyo.

•   Komiti ye ku Kwala: I no lingilila ku baakanyila kwe zwithu zwe bundzimu zwi no kwagwa, ne ku lingilila zwi no shanduligwa ne zwi mu website yedu.

 Pezhugwi kwe nshingo walo Gubungano li no Lawula lo shangana viki ne viki ku bona zwi no sheteka mu gubungano, be shingisa dzikomiti idzedzi. Mu dzimeeting idzedzi, ba mu dzikomiti idzedzo ba no lebesana kuti Hwalo dzo tini, be dumana ne meya dze Ndzimu dza ka yengemala, kuti ba dumane ne meya dzi ngompela.​—Mishingo 15:25.

Babatshi mu Gubungano li no Lawula ndi boyani?

 I Bakirisiti ba no thembeka ba no batsha dzikomiti dze Gubungano li Lawula. (1 Bakorinta 4:2) Ba na bukhoni ne lizibo, mu ku shingila mu dzikomiti dza ba no shingila mu dzili, ngono ba no be po mu dzimeeting dze viki ne viki. Nenguba ba si na gobe mu kuti ku nga togwa thambo ipi, babatshi ba no batsha ne ku dusa mikumbulo ne kuti ku nga shingwa chini, ne ku thama cha dumaniwa ne komiti, ne ku bona zwa khoneka. Kakale ba no shingisiwa ne Gubungano li no Lawula ku shola bazwalani mu shango dza ka siyasiyana ne ku pa ndebo mu mishangano ye gole i nonga ye Gilead graduation.