TƆM PƆZƲƲ 3
Ɛzɩma manpɩzɩɣ nɛ mɔyɔɔdɩnɩ ma-lʋlɩyaa?
YE PƖƖKƐ ÑA, ƐZƖMA ŊŊLABA?
Maɣzɩ tɔm tʋnɛ tɩ-yɔɔ: Ðɩwɛ cɩla ɖanaɣ yɔɔ. Geoff tɛm ɛ-tʋma labʋ. Lɛɛlɛɛyɔ lɛ, ɛcaɣ se ɛmʋ helim pazɩ. Pʋyɔɔ ewobi nɛ ɛtʋlɩ teelee nɛ etii ɛcaɣ kpelaɣ taa fɛɛɛ nɛ ɛcɔŋna.
Alɩwaatʋ ndʋ tɩ-taa ɖeyi ɖeyi lɛ, ɛ-caa kɔɔ ɛsɩŋ nɔnɔɔ yɔɔ; nɛ ɛ-ɛzɩdaa wɛtʋ wɩlɩɣ se ɛ-taa fɛyɩ leleŋ.
“Geoff! Ŋkɔm ŋcaɣ nɛ ŋcɔŋnɩ teelee, yaa we? Mbʋ ɛzɩ ŋkpaɣ alɩwaatʋ nɛ ŋsɩnɩ ñe-neu nɛ ɛla tʋma wena paɖʋ-ɩ sukuli taa yɔ lɛ, ŋkɔɔ ŋcaɣ nɛ ŋcɔŋnɩ teelee fɛɛɛ? Ŋwɛʋ nɛ ñe-feendu ndʋ yɔ!”
Peeɖe Geoff paɣzɩ e-liu tɛɛ miduu se: “Pɩɖaɣnɩ paɣzʋʋ kɛlɛ.”
Peeɖe lɛ ɛ-caa ɖaɣnɩ ɛ-yɔɔ pɩsɩnʋʋ se: “Ŋkpeziɣ suwe?”
Geoff tisi fezuu, ɛkɛzɩ ɛ-ñʋʋ nɛ hɔɔlʋʋ nɛ ecosi se: “Mantɩyɔɔdɩ!”
Ɛyɔɔdɩ mbʋ lɛ, ɛ-caa hɔyɛ huu nɛ ɛyɔɔdɩnɩ pana se: “Mɔyɔɔdʋʋ nɛ ŋcosuu yɔ, ña-ɖaɣʋ kɛnɩ-m?”
Ɛbɛ pɩɩwɛɛ se Geoff ɛla nɛ ñaɖʋʋ ɛtaakɔɔ? Ye pɩɩkɛ ña, ɛzɩma ŋŋlaba?
KPAƔ ALƖWAATƲ NƐ ŊMAƔZƖ!
Alɩwaatʋ ndʋ ña nɛ ña-lʋlɩyaa ɩwɛɛ nɛ ɩyɔɔdʋʋ tɔm natʋyʋ yɔ, pɩwɛ ɛzɩ lɔɔɖɩyɛ ŋɖiɣni saʋ yɔ. Ye ŋtalɩ ɖoli nɛ paɖɩɣ habɩyɛ yɔ, ŋpɩzɩɣ ŋñɩnɩ nʋmɔʋ kɩfalʋʋ.
Kɩɖaʋ:
Halɩbɩɣa ŋga payaɣ se Leeya yɔ kɔyɔɔdaa se: “Pɩwɛ-kaɖɛ se ma nɛ man-caa ɖɩla faawɩyɛ. Nabʋyʋ taa mowoki se meheyiɣ-i tɔm natʋyʋ lɛ eewelisiɣni-m camɩyɛ; mɔyɔɔdʋʋ tɔm camm lɛ, pɩkɛdɩɣ lɛ ɛpɩsɩnɩ-m se: ‘Mentendi-ŋ ŋwɛɛ ŋyɔɔdʋʋnɩ-m kɛ?’”
LEEYA PƖZƖƔ ƐKPAƔ LƖMAƔZA NAADOZO.
-
Ɛpɩzɩɣ eholini ɛ-caa.
“Paaba, pɩtɩkɛ aleɣya tɔm mɔyɔɔdʋʋ; pɩwɛɛ se ŋwelisini-m!”
-
Ɛpɩzɩɣ nɛ eyele ɛ-caa yɔɔdɩnʋʋ.
Leeya suŋ yem ɛzɩ natʋyʋ fɛyɩ yɔ nɛ ɛɛtasɩɣ ɛ-caa heyuu tɩlasɩ nzɩ ɛkatɩɣ yɔ sɩ-tɔm.
-
Ɛpɩzɩɣ ɛñɩnɩ alɩwaatʋ lɛɛtʋ.
Leeya yeki nɛ pʋwayɩ lɛ ɛɖaɣnɩ ɛ-caa cɔlɔ pɩsʋʋ yaa ɛma-ɩ takayaɣ nɛ ɛtʋʋzɩ-ɩ tɩlasɩ nzɩ ɛkatɩɣ yɔ.
Ye ñaawɛnɩ Leeya lone taa, ɛbɛ ŋŋlaba?
Maɣzɩ tɔm tʋnɛ tɩ-yɔɔ: Leeya caa lɩmaɣza fɛyɩ ɖoli kʋɖʋm nɛ ɛtɩna ɖɔɖɔ se Leeya mʋ pana. Pɩwɩlɩɣ se ye Leeya ɛkpaɣ hɔɔlʋʋ A taa lɩmaɣza nɛ eholini ɛ-caa yɔ, ɛɛkaɣ naʋ mbʋ pʋyɔɔ ɛ-pɛlɛ paɣzɩ-ɩ holinuu yɔ. Ye Leeya ɛlabɩ mbʋ yɔ, pɩwɛɣ kaɖɛ ɖɔɖɔ se ɛ-caa ewelisini-i. Pɩtasɩ ɖɔɖɔ lɛ, pɩkɛɣnɩ kaañamtʋ nɛ pɩɩɖʋʋ ɛ-caa hɩɖɛ. (Efɛɛzɩ 6:2) Ye mbʋ, pɩɩwɛɣ ɖeu kpa se ɛla mbʋ.
Ye ŋwoki ɖoli nɛ ŋna paɖɩɣ nʋmɔʋ yɔ, ŋñɩnɩɣ kɩfalʋʋ; mbʋ ɖɔɖɔ ŋpɩzɩɣ ŋñɩnɩ nʋmɔʋ kɩfalʋʋ nɛ ña nɛ ña-lʋlɩyaa ɩnɩɩnɩ ɖama
Paa hɔɔlʋʋ B taa lɩmaɣza kpaɣʋ ɛwɛ kɛlɛʋ yɔ, pɩtɩkɛ lɔŋsɩnɖɛ lakasɩ. Ɛbɛ yɔɔ? Mbʋ pʋyɔɔ yɔ, pɩpɔzʋʋ se Leeya eheyi ɛ-caa tɩlasɩ nzɩ ɛkatɩɣ yɔ, sɩ-tɔm pʋcɔ nɛ ɛ-caa pɩzɩ ɛsɩnɩ-ɩ. Ye esum tamɩyɛ yɔ, paapɩzɩɣ nɛ pasɩnɩ-ɩ.
Ye Leeya ɛkpaɣ hɔɔlʋʋ C taa lɩmaɣza yɔ, pɩwɩlɩɣ se paa paɖɩɣ nʋmɔʋ yɔ, ɛñɩnɩ lɛɛkʋ se ɛtalɩ ɖenɖe ewokaɣ yɔ. Pʋyɔɔ ɛñɩnɩ alɩwaatʋ kɩbandʋ se ɛɖaɣnɩ tɔm ndʋ tɩ-yɔɔ pɩsʋʋ. Halɩ ye ɛkpaɣ lɩmaɣza se ɛmaɣ ɛ-caa takayaɣ yɔ, ɛ-pana pɩzɩɣ nɛ ahɛɛ kpaagbaa.
Ye ɛma ɛ-caa takayaɣ yɔ, pɩsɩɣnɩ-ɩ ɖɔɖɔ nɛ ɛlɩzɩ ndʋ tɩwɛ ɛ-laŋɩyɛ taa ɖeyi ɖeyi yɔ nɛ eheyi-i. Leeya caa kalɩɣ takayaɣ lɛ, ɛkaɣ naʋ tɔm ndʋ ɛ-pɛlɛ ñɩnaɣ se eheyi-i yɔ nɛ ɛnɩɩ tɩlasɩ nzɩ ɛkatɩɣ yɔ, sɩ-taa camɩyɛ. Ye Leeya ɛkpaɣ hɔɔlʋʋ C lɩmaɣza yɔ, pɩwazɩɣ ɛ-maɣmaɣ nɛ pɩwazɩ ɛ-caa ɖɔɖɔ. Paa Leeya ɛñɩnɩ alɩwaatʋ nɛ pʋwayɩ ɛpɩsɩ ɛ-caa cɔlɔ yaa ɛma-ɩ takayaɣ yɔ, pɩwɩlɩɣ se ɛɖɔm Bibl lɔŋ tasʋʋ mbʋ pɩtɔŋ se “ɖɩñɩnɩ mbʋ pɩkɔŋnɩ laŋhɛzɩyɛ” yɔ pɩ-yɔɔ.—Roma 14:19.
Lɩmaɣza lɛɛna wena Leeya pɩzaɣ se ɛkpaɣ?
Maɣzɩ nɛ ŋma lɩmaɣza ana a-taa naɖɩyɛ pɩ-tɛɛ cɩnɛ. Pʋwayɩ lɛ ŋma ɖɔɖɔ mbʋ pɩlɩɣ pɩ-taa yɔ.
ÑƆ-TƆM TAA ƐTƲ KPAYƖ KPAYƖ
Taasɔɔ se ŋpɩzɩɣ nɛ ŋyɔɔdɩ tɔm natʋyʋ ɛlɛ ña-lʋlɩyaa ñanɩɩ lɛɛtʋ.
ÐƖKPAƔ KƖÐAƲ:
Ña-lʋlɩyaa pɩzɩɣ pɔpɔzɩ-ŋ se ɛbɛ yɔɔ ñɛ-ɛzɩdaa ñɩŋaa? Nɛ ŋcosi-wɛ se “pɩfɛyɩ-m yɔɔdʋʋ.”
Ɛlɛ ña-lʋlɩyaa ñanɩɩ pɩ-taa se ŋcaɣ ŋyɔɔdɩ se “maataɣ-mɩ liu, maapɩzɩɣ meheyi-mɩ ndʋ tɩwɛ man-taa yɔ. Man-taabalaa wɛɛ, papɩzɩɣ pasɩnɩ-m.”
Kpaɣ se ŋwɛ kaɖɛ naɖɩyɛ taa nɛ ña-caa yaa ño-ɖoo ñɩnɩɣ se ɛsɩnɩ-ŋ. Ɛlɛ ŋcosi-i se: “Taanɩɣzɩ mɔ-yɔɔ; mansɩm mbʋ pɩwɛɛ se mala yɔ.”
-
Ña-lʋlɩyaa pɩzɩɣ panɩɩ pɩ-taa se ŋyɔɔdaa se:
-
Ndʋ pɩɩwɛɛ se ŋcosi nɛ pɩkɩlɩ ɖeu yɔ:
Kalɩ ɖɔɖɔ....
WHAT YOUR PEERS SAY
Ɛzɩma manpɩzɩɣ nɛ mɔyɔɔdɩnɩ ma-lʋlɩyaa?
Pɩpɩzɩɣ nɛ pɩwazɩ-ŋ pɩkɩlɩ ɛzɩma ŋŋmaɣzaa yɔ.
WONDU LƖZƲƲ NƐ NESI VIDEOWAA
Ɛzɩma manpɩzɩɣ nɛ mɔyɔɔdɩnɩ ma-lʋlɩyaa?
Ɛzɩma ŋpɩzɩɣ ŋyɔɔdɩnɩ ña-lʋlɩyaa alɩwaatʋ ndʋ pɩfɛyɩ-ŋ yɔɔdʋʋ yɔ?
