Wolo ɖenɖe tɔm wɛɛ yɔ

Wolo menuwaa cikpema ɖeɖe

Wolo tɔm ñʋŋ ɖeɖe

Yehowa Aseɣɖe Tɩnaa

Kabɩyɛ

Bibl kɛdasɩ takayaɣ

Kɛdaɣ 112: Mɛlɛ Yɔkaa

Kɛdaɣ 112: Mɛlɛ Yɔkaa

Cɔnɩ mɛlɛ ŋgʋ yɔ! Kiɖiɣni yɔkʋʋ. Ŋnaɣ mba petibi pamaa lɩm taa yɔ? Ɛyaa nabɛyɛ tɛm talʋʋ lɩm nɔɔ yɔɔ. Pɔɔlɩ wɛ peeɖe na? Yele ɖɩna mbʋ piɖiɣni labʋ yɔ.

Mba paawɛ mɛlɛ taa yɔ, patɩsɩ

Tɔzɩ se paaɖʋ Pɔɔlɩ salaka taa Sezaaree pɩnzɩ naalɛ. Pʋwayɩ lɛ, ɛ nɛ salaka tɩnaa nabɛyɛ pasʋʋ mɛlɛ nɛ pakpaɣ nʋmɔʋ se powoki Room. Mɛlɛ talɩ Krɛɛtɩ lɩm hɛkʋ taa tɛtʋ cɔlɔ lɛ, helim sɔsɔm nabʋyʋ paɣzɩ mabʋ. Mɛlɛ sayaa taatasɩɣ pɩzʋʋ se pasaa mɛlɛ camɩyɛ mbʋ pʋyɔɔ yɔ, helim mbʋ pɩmakaɣ ɖoŋ siŋŋ. Pataapɩzɩɣ se pana wɩsɩ wɩsɩ taa, yaa tɩɩnzɩ ɖoo taa. Pɩlabɩ kɩyakɩŋ sakɩyɛ lɛ, mɛlɛ taa mba paɣzɩ maɣzʋʋ se pɔ-tɔm tɛma.

Peeɖe Pɔɔlɩ kʋyaa nɛ ɛtɔ se: ‘Mɩ-taa nɔɔyʋ ɛɛsɩkɩ. Mɛlɛ yeke yɔkʋʋ na. Mbʋ pʋyɔɔ yɔ, ɖeɖe ɖoo taa Ɛsɔ tiyiyu nɔɔyʋ kɔm nɛ eheyi-m se: “Pɔɔlɩ sɔɔndʋ ɛtaakpa-ŋ. Pʋpɔzʋʋ ŋwolo Roma wiyaʋ sɔsɔ Sezaarɩ ɛzɩdaa. Ɛsɔ yakɩ mba ña nɛ wɛ ɩsʋ mɛlɛ yɔ, mɩ-tɩŋa mɩ-ñʋʋ.”’

Helim sɔsɔm paɣzʋʋ mabʋ yɔ, kɩyakɩŋ 14 kɔyɔ. Kɩyakʋ 14 ŋgʋ wiye ɖoo hɛkʋ taa, mɛlɛ sayaa nawa se lɩm cukaŋ wɛɛ pɩpasɩɣ nɛ pɩpasɩɣ. Mbʋ labɩna nɛ pɔlɔ mɛlɛ kaŋgamasɩ lɩm taa. Sɔɔndʋ kpaɣaɣ-wɛ se mɛlɛ etaawolo nɛ kɩma kaaʋ sɔsɔʋ nakʋyʋ nɛ mɛlɛ yɔkɩ. Tɛʋ fema lɛ, pana kidiiliŋ nakʋyʋ. Papaɣzɩ pana ñaɣʋ se pasaa mɛlɛ nɛ patalɩ peeɖe.

Pawɩzɩ talʋʋ kidiiliŋ ŋgʋ lɛ, kañɩŋa huuye naɖɩyɛ ɖɩɣ mɛlɛ nʋmɔʋ nɛ mɛlɛ sɩŋ peeɖe. Pɩkɛdaa lɛ, mɛlɛ paɣzɩ yɔkʋʋ hɔɔlasɩ hɔɔlasɩ mbʋ pʋyɔɔ yɔ, lɩm hola kɔŋaɣ nɛ amakɩ mɛlɛ. Peeɖe mɛlɛ taa sɔɔja sɔsɔ ha nʋmɔʋ mba pasɩm lɩm yaʋ yɔ se pacalɩ maʋ lɩm taa, nɛ paya-pʋ nɛ palɩɩ tataa. Piyele lalaa lɛ, pʋpɔzʋʋ pakpa kpoŋgbolonaa yaa mɛlɛ hɔɔlasɩ yɔɔ nɛ palɩɩ tataa. Mbʋ pɩlabɩ nɛ ɛyaa 276 mba paawɛ mɛlɛ taa yɔ papɩzɩ paya pa-ñʋʋ ɛzɩ Ɛsɔ tiyiyu kaayɔɔdʋʋ yɔ.

Lɩm hɛkʋ taa tɛtʋ ndʋ tɩ-yɔɔ palɩwa yɔ, tɩ-hɩɖɛ lɛ Maltɩ. Ɛyaa mba pɛwɛ peeɖe yɔ, pɛwɛ ɖeu pɩdɩɩfɛyɩ. Pɔcɔnɩ mba palɩ mɛlɛ taa yɔ, pɔ-yɔɔ camɩyɛ. Helim sɔsɔm sɩŋaa nɛ ɛjaɖɛ yɔɔ wɛɛ keleŋ lɛ, Pɔɔlɩ sʋʋ mɛlɛ lɛɛkʋ nɛ ewolo Room.

Tʋma 27:1-44; 28:1-14.



Tɔm Pɔzʋʋ

  • Mɛlɛ ŋgʋ Pɔɔlɩ sʋwa yɔ, kɩtalɩ Krɛɛtɩ lɩm hɛkʋ taa tɛtʋ cɔlɔ lɛ, ɛbɛ talɩ-kʋ?
  • Tɔm ndʋ Pɔɔlɩ heyi ɛyaa mba paawɛ mɛlɛ taa yɔ?
  • Ɛbɛ laba nɛ mɛlɛ yɔkɩ hɔɔlasɩ hɔɔlasɩ?
  • Tɔm ndʋ mɛlɛ taa sɔɔja sɔsɔ heyi mɛlɛ taa mba? Nɛ ɛyaa ɛzɩma pɩzaa nɛ palɩɩ tɛtʋ yɔɔ nɛ pa-alaafɩya?
  • Lɩm hɛkʋ taa tɛtʋ ndʋ tɩ-yɔɔ palɩwa yɔ, payaɣ-tʋ suwe? Ɛjaɖɛ yɔɔ labɩ keleŋ lɛ, ɛbɛ Pɔɔlɩ laba?

Tɔm pɔzʋʋ lɛɛtʋ

  • Kalɩ Tʋma Labʋ 27:1-44.

    Tɔm ndʋ pɛkɛdɩ Pɔɔlɩ ɖɔm nʋmɔʋ nɛ ewolo Room yɔɔ yɔ, ɛzɩma tɩwɩlɩɣ se Bibl tɔm kɛ toovenim? (Tʋma 27:16-19, 27-32; Luka 1:3; 2 Tim. 3:16, 17)

  • Kalɩ Tʋma 28:1-14.

    Ye Maltɩ mba mba pɛkɛ sɩɩnaa layaa yɔ, “pamʋ camɩyɛ” Pɔɔlɩ nɛ ɛ-taabalaa nʋmɔɖɔnaa kɔyɔ, ɛbɛ pʋpɔzʋʋ se Krɩstʋ mba ñala? Nɛ kɔzɩ kɔzɩ hɔɔlʋʋ ŋgʋ taa? (Tʋma 28:1, 2; Ebr. 13:1, 2; 1 Pɩy. 4:9)