Wolo ɖenɖe tɔm wɛɛ yɔ

Wolo menuwaa cikpema ɖeɖe

Wolo tɔm ñʋŋ ɖeɖe

Yehowa Aseɣɖe Tɩnaa

Kabɩyɛ

Bibl kɛdasɩ takayaɣ

Kɛdaɣ 77: Pekizi Luŋuu

Kɛdaɣ 77: Pekizi Luŋuu

Ŋtɔzʋʋ evebiya naadozo panɛ pɔ-tɔm na? Ɛɛɛ, Danɩyɛɛlɩ taabalaa mba pekizi tɔɔʋ mbʋ pɩfɛyɩ ɖeu yɔ, mba lɛ. Babilooni mba yaɣaɣ-wɛ se Sadraakɩ, Mesaakɩ nɛ Abɛdɩnego. Ɛlɛ cɔnɩ-wɛ lɛɛlɛɛyɔ. Ɛbɛ yɔɔ paaluŋuu sɩʋ kpeliɣa sɔsaɣ kanɛ kɛ-tɛɛ ɛzɩ lɛlaa yɔ? Yele ɖɩna mbʋ pʋyɔɔ yɔ.

Ŋtɔzʋʋ paɣtʋ ndʋ Yehowa maɣmaɣ kaamawa nɛ payaɣ-tʋ se Paɣtʋ Hiu yɔ, tɩ-yɔɔ? Kajalaɣ ndʋ yɔ: ‘Pɩtɩmʋna se ŋsɛɛ ɛsɔnaa lɛlaa nɛ pɩtasɩnɩ-m’ Paɣtʋ ndʋ evebiya mba pɛwɛɛ pañaŋ mbʋ yɔ, paa pɩtaawɛɛ kɛlɛʋ yɔ.

Babilooni wiyaʋ Nebukadɩnezaarɩ tiyaa nɛ payaa ɛyaa sɔsaa sakɩyɛ se pɔkɔɔ nɛ paɖʋ hɩɖɛ sɩʋ kpeliɣa ŋga ɛmawa yɔ. Pekpeɣla lɛ, eheyi samaɣ se: ‘Ye ɩnɩ hɩlaɣ nɛ cɩmʋʋ wondu lɛɛtʋ taŋ lɛ, iluŋ nɛ ɩsɛɛ sika sɩʋ kpeliɣa kanɛ yɔ. Weyi eeluŋuu nɛ ɛsɛɛ-kɛ yɔ, pɛpɛɖɩɣ-ɩ miŋ momoɖe taa kpaagbaa.’

Nebukadɩnezaarɩ nɩwa se Sadraakɩ, Mesaakɩ nɛ Abɛdɩnego pekizaa se paaluŋuu ɛ-sɩʋ kpeliɣa tɛɛ lɛ, pɩwɩzɩ-ɩ pɩdɩɩfɛyɩ. Peeɖe etiyaa se pɔkɔnɩ-wɛ nɛ eheyi-wɛ se lɛɛlɛɛyɔ ɛɖaɣnɩɣ-wɛ nʋmɔʋ haʋ nɛ poluŋ. Ɛlɛ evebiya mba paata Yehowa liu. Pɩ-yɔɔ peheyi Nebukadɩnezaarɩ se: ‘Đɛ-Ɛsɔ weyi ɖɩsɛɣ yɔ, ɛpɩzɩɣ ɛya ɖa-ñʋʋ. Ɛlɛ paa ɛtɩya ɖa-ñʋʋ yɔ, ɖɩɩkaɣ luŋuu nɛ ɖɩsɛɛ ñe-sika sɩʋ kpeliɣa.’

Sadraakɩ, Mesaakɩ nɛ Abɛdɩnego

Nebukadɩnezaarɩ nɩ mbʋ lɛ, pɩtɛzɩ-ɩ wɩzʋʋ. Miŋ momoɖe naɖɩyɛ kaawɛ pʋ-cɔlɔ peeɖe. Ɛyɔɔdɩ se: ‘Ɛla nɛ miŋ momoɖe soŋ tam lʋbɛ pɩkɩlɩ ɛzɩ ɖooo yɔ.’ Peeɖe etiyi ɛ-sɔɔjanaa taa mba pakɩlɩ ɖoŋ yɔ nɛ pakpa Sadraakɩ, Mesaakɩ nɛ Abɛdɩnego nɛ pɔhɔkɩ-wɛ nɛ pɛpɛɖɩ miŋ momoɖe taa. Miŋ momoɖe soŋaa pɩdɩɩfɛyɩ nɛ halɩ miŋ kʋ ɛyaa ɖoŋ mba mba. Ɛlɛ ɛbɛ pɩtɛmnɩ evebiya naadozo mba pɛpɛɖɩ miŋ momoɖe taa yɔ?

Wiyaʋ kɔma nɛ ɛcɔnɩ miŋ momoɖe taa lɛ, sɔɔndʋ kpa-ɩ pɩdɩɩfɛyɩ. Peeɖe ɛpɔzɩ ɛ-lɩmɖʋyaa se: ‘Pɩtɛkɛ ɛyaa naadozo ɖɩhɔkaa nɛ ɖɩpɛɖɩ miŋ momoɖe taa?’

Pocosi-i se: ‘Mbʋ pɩlaba’

Peeɖe ɛpɩsɩnaa se: ‘Ɛlɛ ɛyaa naanza manaɣ pɛwɛɛ pɔɖɔŋ miŋ taa. Peheɖi-wɛ nɛ miŋ ɩɩñakɩ-wɛ. Naanza tʋ wɛ ɛzɩ Ɛsɔ tiyiyu yɔ.’ Wiyaʋ ñɔtɩnɩ miŋ momoɖe nɔnɔɔ nɛ ekoo nɛ ɛyaa se: ‘Sadraakɩ, Mesaakɩ, Abɛdɩnego, Ɛsɔ Kɩlɩm lɩmɖʋyaa, ɩlɩɩ nɛ ɩkɔɔ!’

Palɩwa lɛ, ɛyaa tɩŋa na se nabʋyʋ tɩlabɩ-wɛ. Peeɖe wiyaʋ yɔɔdaa se: ‘Pasa Sadraakɩ, Mesaakɩ nɛ Abɛdɩnego tɛ Ɛsɔ. Etiyi e-tiyiyu nɛ ɛkɔɔ ɛya pa-ñʋʋ mbʋ pʋyɔɔ yɔ, pekizaa se paaluŋuu nɛ pɛsɛɛ ɛsɔ nɔɔyʋ nɛ pɩtasɩnɩ-ɩ.’

Pɩkɛ siɣ siɣ wɛtʋ kɩɖaʋ kɩbaŋʋ ŋgʋ pɩwɛɛ se ɖɩtɩŋ yɔ, yaa we?

Egipiti liu 20:3; Danɩyɛɛlɩ 3:1-23, 91-97.



Tɔm Pɔzʋʋ

  • Paɣtʋ ndʋ Babilooni wiyaʋ Nebukadɩnezaarɩ ɖʋ samaɣ?
  • Ɛbɛ yɔɔ Danɩyɛɛlɩ taabalaa kizaa se paaluŋuu sika sɩʋ kpeliɣa tɛɛ?
  • Nebukadɩnezaarɩ tasɩ haʋ Ebree evebiya naadozo nʋmɔʋ se poluŋ lɛ, ɛbɛ palaba nɛ pɩwɩlɩ se pataɣ Yehowa liu?
  • Ɛbɛ Nebukadɩnezaarɩ heyi ɛ-ɛyaa se pala Sadraakɩ, Mesaakɩ nɛ Abɛdɩnego?
  • Nebukadɩnezaarɩ cɔnɩ miŋ momoɖe taa lɛ, ɛbɛ ɛnawa?
  • Ɛbɛ yɔɔ wiyaʋ sam Sadraakɩ, Mesaakɩ nɛ Abɛdɩnego tɛ Ɛsɔ? Kɩɖaʋ ŋgʋ paha-ɖʋ?

Tɔm pɔzʋʋ lɛɛtʋ

  • Kalɩ Danɩyɛɛlɩ 3:1-23, 91-97.

    Ebree evebiya naadozo wɛtʋ kɩbandʋ ndʋ pɩwɛɛ se Ɛsɔ sɛyaa tɩŋa ɛmaɣzɩna alɩwaatʋ ndʋ pɩtakɩɣ pa-cɩŋgɩlɩm wɛtʋ yɔ? (Dan. 3:17, 18; Mat. 10:28; Rom. 14:7, 8)

    Ɛzɩma Yehowa Ɛsɔ hɔm Nebukadɩnezaarɩ nɩŋgbaaŋ? (Dan. 3:95, 96; 4:31, 32)