ƐSƆ KAƔ ÐƖZƲƲ ƐYAA KOMINAWAA

Ɛsɔ kaɣ tɩŋnʋʋ you ŋgʋ Bibl yaɣ se Armaagedɔɔ a yɔ kɩ-yɔɔ nɛ ɛɖɩzɩ ɛyaa kominawaa. (Natʋ 16:16) Alɩwaatʋ ndʋ tɩ-taa lɛ, «tɛtʋ kpeekpe yɔɔ awiya» kaɣ kpeɣluu se ala «Ɛsɔ Ðoŋ Tɩŋa Tʋ tɛ kɩyakʋ sɔsɔʋ you.» (Natʋ 16:14) Armaagedɔɔ kɛ you ŋgʋ Ɛsɔ tɩŋɩɣnɩ kɩ-yɔɔ se eyele nɛ yoŋ tɩŋa sɩɩ tɩnaɣ yɔ.

Ɛsɔ kaɣ lɛɣzʋʋ ɛyaa kominawaa lone taa e-Kewiyaɣ yaa e-komina; kɩkaɣ wɛʋ ɛsɔdaa nɛ kʋtɔɔ kewiyitu tɛtʋ yɔɔ nɛ paakaɣ-kʋ ɖɩzʋʋ kpa. (Danɩyɛɛlɩ 2:44) Ɛsɔ lɩzɩ ɛ-Pɩyalʋ Yesu Krɩstʋ se ɛkɛ komina ŋgʋ ki-Wiyaʋ. (Izaayii 9:​6, 7; Maatiyee 28:18) Komina ŋgʋ kɩkɛnɩ Kewiyaɣ b ŋga kɔ-tɔm Yesu kaaheyi ɛ-wayɩ tɩŋɩyaa se patɩmɩ se kɔkɔɔ yɔ. (Maatiyee 6:​9, 10) Ɛyaa tɩŋa kaɣ wɛʋ nɔɔ kʋɖʋmaɣ taa komina kʋɖʋmʋʋ tɛɛ nɛ Yesu kɛ pe-Ðiyiyu.

 Yesu wɛ ndɩ nɛ ɛjaɖɛ yɔɔ ñʋndɩnaa, alɩwaatʋ ndʋ ɛkaɣ ɖiyuu ɛyaa yɔ, ɛɛkaɣ ñɩnʋʋ ɛ-maɣmaɣ ɛ-kɛzɛsɩ. Yesu wɛ siɣsiɣ nɛ ɛɛtʋkʋʋ ɛyaa taa, pʋyɔɔ lɛ nɔɔyʋ ɛɛkaɣ seu sɔɔndʋ se e-tomnaɣ tɔlɩm, ɛ-ɛjaɖɛ yaa ɛ-kʋnʋŋ yɔɔ lɛ, paakaɣ cɔnʋʋ e-ɖeɖe. (Izaayii 11:​3, 4) Nɛ pɩɩkaɣ tasʋʋ pɔzʋʋ se ɛyaa ɩlʋ pa-wala yɔɔ. Ɛbɛ yɔɔ? Mbʋ pʋyɔɔ yɔ Yesu kaɣ cɔnʋʋ paa ɛyʋ weyi lɛ ɛ-kɩcɛyɩm ɖeɖe camɩyɛ. «Ɛkaɣ holuu kʋñɔndʋ weyi ekou se pasɩnɩ-ɩ yɔ, nɛ ɛkaɣ holuu ɖɔɖɔ ɛjam nɛ weyi ɛfɛyɩnɩ sɩnɩyʋ nɔɔyʋ yɔ. . . . Ɛkaɣ-wɛ holuu nazɩm nɛ puuyaɣ lakasɩ taa.»—Keɣa 72:​12-14.

Ɛsɔ Kewiyaɣ kaɣ ɖɩzʋʋ you wondu tɩŋa tɛtʋ yɔɔ. (Mikee 4:3) Kakaɣ ɖɩzʋʋ ɖɔɖɔ ɛyaa mba pekiziɣ se paayeki you labʋ yɔ nɛ mba palakɩ ɛyaa lalaa kɩdɛkɛdɩm yɔ. (Keɣa 37:​9, 10) Paa abalʋ weyi, paa halʋ weyi nɛ paa pɩɣa ŋga lɛ, pa-taa paa weyi kaɣ wobu ɖenɖe ɛsɔɔlaa yɔ nɛ sɔɔndʋ ɛɛkpaɣ-ɩ.—Ezekɩyɛɛlɩ 34:28.

 Alɩwaatʋ ndʋ Ɛsɔ komina kaɣ ɖiyuu tɛtʋ yɔ, ɛyaa tɩŋa kaɣ caɣʋ wezuu kɩbaŋʋ ŋgʋ kɩ-wayɩ fɛyɩ yɔ. Kɩkaɣ yebu nɛ kala wena ayeki nɛ ɛyaa lakɩ you yɔ asɩɩ tɩnaɣ; a-taa naayɛ lɛ kʋñɔndʋtʋ, ñɔɔsɩ nɛ ɖɩzʋyɛ kɩɩwɛʋ. Paa weyi ɛkaɣ wɛnʋʋ tɔɔnasɩ kɩbanzɩ sakɩyɛ nɛ ɛkaɣ wɛnʋʋ ɖɩzʋyɛ kɩbanɖɛ.—Keɣa 72:16; Izaayii 65:​21-23.

Kʋñɔmɩŋ weyi you kɔnaa yɔ ɩɩkaɣ tasʋʋ wɛʋ Ɛsɔ Kewiyaɣ tɛɛ. Kʋñɔmɩŋ ɛnɩ ɩ-taa nɩɩyɩ lɛ wɩzasɩ nzɩ you yeba nɛ ɛyaa nɩɣ tomnaɣ yɔɔ nɛ lɩmaɣza taa yɔ; wɩzasɩ nzɩ sɩkaɣ sɩʋ tɩnaɣ. Halɩ ɛyaa mba pasɩba yɔ, pakaɣ-wɛ fezuu nɛ paɖaɣnɩ caɣʋ wezuu. (Izaayii 25:8; 26:19; 35:​5, 6) Hɔŋ ɖaɣnʋʋ kpɛndʋʋ nɛ ɩwɛɛ, nɛ ɛyaa ɩɩkaɣ tasʋʋ tɔzʋʋ wɛtʋ kɩdɛkɛdɩtʋ ndʋ tɩɩtalɩ-wɛ yɔ tɩ-yɔɔ, mbʋ pʋyɔɔ yɔ «wondu kɩbɩndʋ mʋwaa.»—Natʋ 21:4.

ƐSƆ KAƔ ÐƖZƲƲ KƖWƐƐKƖM

Ɛsɔ Kewiyaɣ kaɣ yebu nɛ ɛyaa kpɛndɩ nɛ pɛsɛɛ Ɛsɔ toovenim tʋ kʋɖʋm Yehowa c weyi ɛkɛ «sɔɔlɩm nɛ laŋhɛzɩyɛ tɛ Ɛsɔ» yɔ. (2 Kɔrɛntɩ mba 13:11) Ɛyaa kaɣ kpɛlɩkʋʋ ɛzɩma pɛwɛɛ ɖama cɔlɔ laŋhɛzɩyɛ taa yɔ. (Izaayii 2:​3, 4; 11:9) Mba payɩ pɔɖɔŋ tɔm ndʋ pɛkpɛlɩkɩɣ yɔ tɩ-yɔɔ yɔ, kɩwɛɛkɩm ɛɛkaɣ tasʋʋ wɛnʋʋ ɖoŋ pɔ-yɔɔ.—Roma mba 8:​20, 21.

ƐSƆ KAƔ ÐƖZƲƲ SATAŊ NƐ Ɛ-ALEEWAA

Ɛsɔ Kewiyaɣ kaɣ ɖɩzʋʋ Sataŋ nɛ ɛ-aleewaa, pɔ-cɔlɔ yoŋ lɩɣna. (Natʋ 20:​1-3, 10) Alɩwaatʋ ndʋ paakaɣ wɛnʋʋ ɖoŋ ɛyaa yɔɔ yɔ, «laŋhɛzɩyɛ kaɣ tɔyʋʋ.»—Keɣa 72:7.

Ða-taa pɩzɩɣ nɛ pɩtɛ se tamaɣ ŋga Ɛsɔ laba se eyeki nɛ yoŋ nɛ puuyaɣ lakasɩ pasɩɩ tɩnaɣ yɔ kakaɣ labʋ. Ɛwɛnɩ ɖoŋ nɛ ɛtɛ ɛsɔɔlɩ se eyele nɛ yoŋ sɩɩ tɩnaɣ.

• Ɛsɔ wɛnɩ lɔŋsɩnɖɛ nɛ ɖoŋ weyi pɩpɔzʋʋ yɔ se ɛsɩnzɩ yoŋ nɛ puuyaɣ lakasɩ. (Yɔɔb 9:4) Nabʋyʋ fɛyɩ se ɛɛpɩzɩɣ pɩ-labʋ.—Yɔɔb 42:2.

•   Ɛsɔ naɣ ɛyaa lakɩ kʋñɔŋ lɛ pɩɩkɛdɩɣnɩ-ɩ. (Izaayii 63:9) Pɩtasɩ lɛ, «ɛpaɖɩɣ mba payɩ pɔsɔɔlɩ puuyaɣ lakasɩ yɔ.»—Keɣa 11:5.

• Ɛsɔ ɖɔŋ ɛ-tɔm yɔɔ paa ɛzɩmtaa; ɛɛpɩzɩɣ nɛ ɛcɛtɩ.—Izaayii 55:​10, 11; Tiiti 1:2.