Yozuwee 1:1-18
1 Yehowa lɩmɖʋyʋ Moyizi sɩm wayɩ lɛ, Yehowa heyi Moyizi lɩmɖʋyʋ+ Yozuwee,*+ Nuuni pɩyalʋ se:
2 «Ma-lɩmɖʋyʋ Moyizi sɩba.+ Lɛɛlɛɛyɔ lɛ, kʋyɩ nɛ ŋtɛzɩ Yɔɔrdaŋ pɔɔ, ña nɛ samaɣ kanɛ ke-kpeekpe, nɛ iwolo ɛjaɖɛ nɖɩ mɛncɛlɩɣ-kɛ yɔ ɖɩ-taa, ɛjaɖɛ nɖɩ mɛncɛlɩɣ Izrayɛɛlɩ samaɣ yɔ.+
3 Lona wena a-taa ɩfɛyɩɣ mɩ-nɩŋgbanzɩ yɔ, mankaɣ-mɩ cɛlʋʋ a-tɩŋa, ɛzɩ maalabʋ tamaɣ Moyizi yɔ.+
4 Mi-egeetiye kaɣ paɣzɩnʋʋ kañɩmbusuu taa nɛ pɩɖɛɛ piwolo Libaŋ nɛ pɩtalɩ pɔɔ sɔsɔɔ, Efraatɩ—Hɛɛtɩ mba ɛjaɖɛ kpeekpe+—nɛ piwolo pɩtalɩ Teŋgu Sɔsɔʋ,* wɩsɩ ɖɩɖʋyɛ taa.+
5 Nɔɔyʋ ɛɛkaɣ pɩzʋʋ nɛ ɛkaɖɩnɩ-ŋ ñe-wezuu caɣʋ kɩyakɩŋ kpeekpe taa.+ Ɛzɩ maawɛʋ Moyizi cɔlɔ yɔ, mbʋ ɖɔɖɔ mankaɣ wɛʋ ñɔ-cɔlɔ.+ Maakaɣ-ŋ yebu nɛ maakaɣ-ŋ siɣye haʋ.+
6 Wɛɛ abalɩtʋ nɛ ŋwɛɛ ɖoŋ,+ mbʋ pʋyɔɔ yɔ ñakaɣnɩ ɖɛʋ nɔɔ samaɣ kanɛ nɛ kamʋ ɛjaɖɛ nɖɩ maaɖuuni kɔ-cɔzɔnaa se mɛncɛlɩɣ-wɛ yɔ.+
7 «Ñɩtɩ nɛ ŋwɛɛ abalɩtʋ nɛ ŋwɛɛ ɖoŋ kpem, nɛ ŋɖɔ Paɣtʋ ndʋ ma-lɩmɖʋyʋ Moyizi ɖʋ-ŋ yɔ tɩ-tɩŋa tɩ-yɔɔ camɩyɛ. Taaposini-tʋ nɛ ŋkpilini nɩwaŋ yɔɔ yaa nɩmɩyɛ yɔɔ,+ se pɩsa nɛ paa le ŋwoba yɔ ŋwɛɛ lɛɣtʋ ña-lakasɩ taa.+
8 Pɩfɛyɩ se Paɣtʋ takayaɣ kanɛ koposini ñɔ-nɔɔ,+ nɛ pɩwɛɛ se ŋkalɩɣ-kɛ nɛ ŋmaɣzɩɣ ka-taa tɔm yɔɔ* wɩsɩ nɛ ɖoo, pɩsa nɛ ŋɖɔ tɔm ndʋ pama ka-taa yɔ tɩ-tɩŋa tɩ-yɔɔ camɩyɛ;+ mbʋ pʋyɔɔ yɔ, mbʋ kaɣnɩ yebu nɛ pɩɖɔmnɩ-ŋ camɩyɛ nɛ ŋwɛɛ lɛɣtʋ ña-lakasɩ taa.+
9 Manɖʋ-ŋ paɣtʋ, yaa we? Wɛɛ abalɩtʋ nɛ ŋwɛɛ ɖoŋ. Ña-laŋɩyɛ ɛtaalɩɩ nɛ sɔɔndʋ ɛtaakpa-ŋ, mbʋ pʋyɔɔ yɔ ñɛ-Ɛsɔ Yehowa wɛ ñɔ-cɔlɔ ɖenɖe payɩ ŋwoki yɔ.»+
10 Pʋwayɩ lɛ, Yozuwee ɖʋ paɣtʋ samaɣ ñʋndɩnaa se:
11 «Iwolo samaɣ ɖigbeɣliye kpeekpe taa nɛ ɩɖʋ samaɣ paɣtʋ tʋnɛ: “Ɩñɔɔzɩ mbʋ pɩpɔzʋʋ yɔ nɛ ɩsɩɩ, mbʋ pʋyɔɔ yɔ pɩkazɩ kɩyakɩŋ 3, ɩkaɣ tɛzʋʋ Yɔɔrdaŋ nɛ ɩsʋʋ nɛ ɩmʋ ɛjaɖɛ nɖɩ mɩ-Ɛsɔ Yehowa cɛlɩɣ-mɩ se ɖɩpɩsɩ mɩ-ñɩm yɔ.”»+
12 Nɛ Yozuwee heyi Rubɛɛnɩ mba, Gaadɩ mba, nɛ Manaasee cejewiye hɔɔlʋʋ se:
13 «Ɩtɔzɩ paɣtʋ ndʋ Yehowa lɩmɖʋyʋ Moyizi kaaɖʋ-mɩ yɔ tɩ-yɔɔ:+ “Mɩ-Ɛsɔ Yehowa haɣ-mɩ hɛzʋʋ, nɛ ɛha-mɩ ɛjaɖɛ ɖɩnɛ.
14 Mɩ-halaa, mi-piya nɛ mɩ-kpɩna kaɣ caɣʋ ɛjaɖɛ nɖɩ Moyizi ha-mɩ Yɔɔrdaŋ hɔɔlʋʋ* kʋnɛ kɩ-taa yɔ ɖɩ-taa,+ ɛlɛ pɩwɛɛ se mɩ yoyaa ɖoŋ tɩnaa kpeekpe lɛ,+ ɩñɔɔzɩ mɩ-tɩ se ɩla you nɛ ɩɖɛɛ mi-koobiya nɔɔ nɛ ɩtɛzɩ.+ Pɩwɛɛ se ɩsɩnɩ-wɛ
15 nɛ pɩkɔɔ pɩtalɩ alɩwaatʋ ndʋ Yehowa ha hɛzʋʋ mi-koobiya, ɛzɩ ɛhaʋ-mɩ yɔ, nɛ paba ɖɔɖɔ pamʋ ɛjaɖɛ nɖɩ mɩ-Ɛsɔ Yehowa cɛlɩɣ-wɛ yɔ. Pʋwayɩ lɛ, ɩɩpɩsɩ ɛjaɖɛ nɖɩ pɛcɛlɩ-mɩ se ɩcaɣ ɖɩ-taa yɔ ɖɩ-taa nɛ ɖɩpɩsɩ mɩ-ñɩnɖɛ, ɛjaɖɛ nɖɩ Yehowa lɩmɖʋyʋ Moyizi kaaha-mɩ Yɔɔrdaŋ wɩsɩ ɖɩlɩyɛ hɔɔlʋʋ taa yɔ.”»+
16 Pocosi Yozuwee se: «Ðɩkaɣ ɖɔm paɣtʋ ndʋ ŋɖʋwa yɔ tɩ-tɩŋa tɩ-yɔɔ, nɛ paa le ŋtiyi-ɖʋ yɔ ɖɩkaɣ wobu.+
17 Ɛzɩ ɖiiwelisuu tɔm ndʋ Moyizi yɔɔdaa yɔ tɩ-tɩŋa yɔ, mbʋ ɖɔɖɔ ɖɩkaɣ-ŋ welisinuu. Ñɛ-Ɛsɔ Yehowa ɛñɩtɩ nɛ ɛwɛɛ ñɔ-cɔlɔ ɛzɩ ɛɛwɛʋ Moyizi cɔlɔ yɔ.+
18 Weyi ɛkaɖɩɣnɩ ña-paɣtʋ nɛ ɛɛɖɔŋ paɣtʋ ndʋ payɩ ŋɖʋ-ɩ yɔ tɩ-yɔɔ yɔ, pakaɣ-ɩ kʋʋ.+ Ñɩtɩ nɛ ŋwɛɛ abalɩtʋ nɛ ŋwɛɛ ɖoŋ.»+
Pɩ-tɛɛ tɔm
^ Yaa «Yehosuwa,» pʋ-tɔbʋʋ se «Yehowa kɛ ñʋʋ yabʋ.»
^ Pʋ-tɔbʋʋ se Mediiteraanee.
^ Yaa «ŋkalɩɣ-kɛ nɛ nɔɔ ŋga katɩkʋyɩ yɔ.»
^ Pʋ-tɔbʋʋ se wɩsɩ ɖɩlɩyɛ hɔɔlʋʋ.