Yoonaa 4:1-11
4 Ɛlɛ pɩtaakɛdɩnɩ Yoonaa paa ññɩɩ, nɛ ɛkɔ pana siŋŋ.
2 Pʋyɔɔ ɛtɩmnɩ Yehowa se: «Hayɩ Yehowa, pɩtɩkɛ ndʋ mamaɣzaɣ alɩwaatʋ ndʋ maawɛ mɛ-ɛjaɖɛ taa lɛ lɛ? Pʋyɔɔ maacalɩ seu se mowolo Tarɩsiisi;+ mbʋ pʋyɔɔ yɔ, maanawa se ŋkɛ Ɛsɔ weyi ɛnɩɣ ɛyaa wɩzasɩ yɔ, nɛ ŋkɛ pʋtɔdɩyɛ nayʋ, ŋŋkɔʋ pana lɛɛ lɛɛ, nɛ ñɔ-sɔɔlɩm siɣsiɣ ñɩmbʋ ɖɔ pɩdɩɩfɛyɩ,+ nɛ pɩɩkɛdɩɣnɩ-ŋ se ŋkɔnɩ kʋñɔŋ kɩwɛɛkɩm laɖaa yɔɔ.
3 Lɛɛlɛɛyɔ, hayɩ Yehowa, mentendi-ŋ lɩzɩ me-wezuu,* mbʋ pʋyɔɔ yɔ pɩwɛ-m ɖeu se mansɩ nɛ pɩkɩlɩ se mancaɣ wezuu.»+
4 Yehowa pɔzɩ-ɩ se: «Ɛzɩ ŋwɛnɩ toovenim se ŋkɔ pana siŋŋ mbʋ?»
5 Ðɩnɛ ɛlɛ Yoonaa lɩɩ tɛtʋ taa nɛ ewolo ɛcaɣ tɩ-wɩsɩ ɖɩlɩyɛ taa kiŋ. Nɛ esiɣ ɛ-tɩ kizinziku nakʋyʋ peeɖe nɛ ɛcaɣ ki-kuzotuu taa se ɛna mbʋ pɩkaɣ talʋʋ tɛtʋ ndʋ yɔ.+
6 Nɛ Ɛsɔ Yehowa la nɛ loyuu nakʋyʋ* ñɔ nɛ kɩpaɣlɩ se pɩsa nɛ ki-kuzotuu huuzi Yoonaa ñʋʋ yɔɔ, nɛ pɩhɛzɩ ɛ-kʋñɔŋ. Nɛ Yoonaa taa la leleŋ siŋŋ nɛ loyuu ŋgʋ.
7 Ɛlɛ tɛʋ fem tɛbɩyɛ tɛɛ lɛ, Ɛsɔ toovenim tʋ tiyi sonzooye naɖɩyɛ nɛ ɖɩtɔɔ loyuu ŋgʋ nɛ kɩwɩlɩ.
8 Wɩsɩ paɣzɩ kpaʋ lɛ, Ɛsɔ tiyi ɖɔɖɔ wɩsɩ ɖɩlɩyɛ taa helim miŋ ñɩmbʋ nabʋyʋ, nɛ wɩsɩ ñaɣ Yoonaa ñʋʋ, nɛ pɩɩkazɩ pazɩ se efiɣni. Nɛ ɛwɛɛ ɛñɩnɩɣ sɩm* nɛ ɛyɔɔdʋʋ se: «Pɩwɛ-m ɖeu se mansɩ nɛ pɩkɩlɩ se mancaɣ wezuu.»+
9 Ɛsɔ pɔzɩ Yoonaa se: «Ɛzɩ ŋwɛnɩ toovenim se ŋkɔ pana siŋŋ loyuu ŋgʋ kɩ-yɔɔ mbʋ?»+
Ðɩnɛ ɛlɛ Yoonaa cosi se: «Mɛwɛnɩ toovenim se mɔnkɔ pana, ɛɛɛ, se mɔnkɔ pana siŋŋ nɛ halɩ mañɩnɩ sɩm.»
10 Ɛlɛ Yehowa heyi-i se: «Ŋna loyuu pʋtɔdɩyɛ, ŋgʋ ŋtɩla kɩ-yɔɔ tʋmɩyɛ naɖɩyɛ, nɛ pɩtɩkɛ ñeyebina ɖɔɖɔ nɛ kɩpaɣlɩ; kɩpaɣlɩ ɖoo kʋɖʋma taa nɛ kɩwɩlɩ ɖɔɖɔ ɖoo kʋɖʋma taa.
11 Ɛzɩ pɩtɩmʋna se ma ɖɔɖɔ mana tɛtʋ sɔsɔtʋ Niniivi+ pʋtɔdɩyɛ na, tɛtʋ ndʋ tɩ-taa ɛyaa cɛzɩ 120 000 nɛ paasɩŋ kɩbam nɛ kɩdɛkɛdɩm yɔ,* nɛ pa-kpɩna sakɩyɛ wɛ tɩ-taa yɔ?»+
Pɩ-tɛɛ tɔm
^ Yaa «man-kalɩzaɣ.»
^ Pɩpɩzɩɣ pɩkɛ, «nɛ riisɛɛ (ricin) tɩʋ.»
^ Yaa «ɛpɔzʋʋ se ɛ-kalɩzaɣ ɛsɩ.»
^ Yaa «paasɩŋ tʋkaɣ ŋga kɛwɛ pa-nɩwaŋ nɛ pa-nɩmɩyɛ pɛ-hɛkʋ taa yɔ.»
