Tiiti 2:1-15
2 Ɛlɛ ña lɛ, wolo pɩ-yɔɔ nɛ ŋyɔɔdʋʋ tɔm ndʋ tɩlabɩ nɔɔ kʋɖʋmaɣ nɛ wɩlɩtʋ kɩbandʋ yɔ.*+
2 Abalaa mba pasʋtʋyaa yɔ, pataaɖɛlɛsɩ niye pa-lakasɩ taa, pɛkɛ ɛyaa mba pamʋnaa yɔ, pɛkɛ mba pamaɣzɩɣ camɩyɛ yɔ, pɛwɛɛ ɖoŋ tisuu taa, sɔɔlɩm taa, laŋɩyɛ ɖɔkʋʋ taa.
3 Mbʋ ɖɔɖɔ, halaa mba pasʋtʋyaa yɔ, pɔ-ɖɔnɛ ɛmʋnɩ ɛyaa mba pañaŋ Ɛsɔ yɔ, pataakɛ kɔlɔmɔtʋ tɩnaa, pataapɩsɩ sʋlʋm yomaa, pɛkɛ ɛyaa mba pawɩlɩɣ mbʋ pɩwɛ ɖeu yɔ;
4 nɛ papɩzɩ patasɩ asɛyaa lɔŋ* se pɔsɔɔlɩ pa-walaa, pɔsɔɔlɩ pe-piya,
5 pɛkɛ mba pamaɣzɩɣ camɩyɛ yɔ, pɛwɛɛ kele kele, pɛkɛ mba palakɩ tʋmɩyɛ ɖɩɣa yɔ,* pɛkɛ ɛyaa kɩbama, poluzuu pa-tɩ pa-walaa tɛɛ,+ se pɩsa nɛ pataayɔɔdɩ tɔm kɩdɛkɛdɩtʋ Ɛsɔ tɔm yɔɔ.
6 Wolo pɩ-yɔɔ mbʋ ɖɔɖɔ nɛ ŋseɣtiɣ evebiya se sɩkɛ mba pamaɣzɩɣ camɩyɛ yɔ,+
7 ña-maɣmaɣ wɩlɩ se ŋkɛ kɩɖaʋ kɩbaŋʋ tʋma kɩbana labʋ taa paa hɔɔlʋʋ ŋgʋ lɛ kɩ-taa. Wɩlɩ mbʋ pɩwɛ kele kele yɔ,* la mbʋ nɛ kpekpeka,+
8 tɩŋnɩ yɔɔdaɣ kɩbaŋa* ŋga paapɩzɩɣ nɛ pana kawanaɣ nakɛyɛ ka-taa yɔ kɔ-yɔɔ+ nɛ ŋla mbʋ; ɖɩnɛ ɛlɛ fɛyɛ kpaɣ mba pakaɖɩɣnɩ-ɖʋ yɔ nɛ paakaɣ wɛnʋʋ tɔm kɩdɛkɛdɩtʋ natʋyʋ se pɔyɔɔdɩ ɖɔ-yɔɔ.+
9 Yomaa iluzi pa-tɩ pa-ñʋndɩnaa tɛɛ pɩtɩŋa pɩ-taa,+ pañaɣ pana se pɔ-tɔm ɛkɛdɩnɩ pa-ñʋndɩnaa, pataakɛzɩɣ-wɛ tɔm,
10 pataamɩlɩ-wɛ,+ ɛlɛ pawɩlɩ se papɩzɩɣ nɛ pataa-wɛ liu kiya, se pɩsa nɛ pacanɩ ɖa-Ñʋʋ Yaɖʋ Ɛsɔ wɩlɩtʋ paa hɔɔlʋʋ ŋgʋ lɛ kɩ-taa.+
11 Mbʋ pʋyɔɔ yɔ Ɛsɔ lɩzɩ e-lootiye nɛ ɛwɩlɩ, nɛ ɖɩkɔŋnɩ ñʋʋ yabʋ ɛyaa ndɩ ndɩ.*+
12 Ðɩfalɩsɩɣ-ɖʋ se ɖikizi kaañamtʋ wɛnʋʋ Ɛsɔ yɔɔ nɛ ɖikizi ɛjaɖɛ sɔɔlɩm,+ nɛ ɖɩmaɣzɩɣ camɩyɛ ɖe-wezuu caɣʋ taa nɛ ɖɩwɛɛ siɣsiɣ nɛ ɖɩñɔɔnɩ Ɛsɔ ɛjaɖɛ* ɖɩnɛ ɖɩ-taa,+
13 alɩwaatʋ ndʋ ɖɩɖaŋɩɣ taa leleŋ lidaʋ+ nɛ ɖɩɖaŋɩɣ ɖɔɖɔ se Ɛsɔ sɔsɔ nɛ ɖa-Ñʋʋ Yaɖʋ Yesu Krɩstʋ pawɩlɩ pa-tɩ samtʋ taa yɔ,
14 Krɩstʋ weyi ɛcɛlɩ ɛ-tɩ ɖɔ-yɔɔ+ se eholi-ɖʋ*+ paɣtʋ yɔɔ maʋ tɩŋa taa nɛ ɛñalɩ samaɣ nakɛyɛ nɛ kɛkɛ ɛ-pʋyʋ, ɛ-maɣmaɣ e-ŋgee pʋyʋ, samaɣ ŋga kɛwɛ kpekpeka tʋma kɩbana labʋ taa yɔ.+
15 Wɛɛ tɔm ndʋ tɩ-yɔɔdʋʋ yɔɔ nɛ ŋseɣtiɣ ɛyaa* nɛ ŋkiziɣni-wɛ tɔm nɛ ɖoŋ weyi paha-ŋ yɔ pilim.+ Taayele nɛ nɔɔyʋ nimi-ŋ.
Pɩ-tɛɛ tɔm
^ Yaa «wɩlɩtʋ ndʋ tɩwazɩɣ yɔ.»
^ Yaa «papɩzɩ pafalɩsɩ asɛyaa.»
^ Yaa «mba pɔcɔŋnɩ pa-ɖɩsɩ yɔɔ yɔ.»
^ Pɩpɩzɩɣ pɩkɛ, «Wɩlɩ tɔm nɛ kele kele wɛtʋ.»
^ Yaa «yɔɔdaɣ ŋga kawazɩɣ yɔ.»
^ Yaa «ɛyaa tindima tɩŋa.»
^ Yaa «ɛjaɖɛ yɔɔ ɖʋtʋ; pɩnzɩ.» Cɔnɩ Tɔm pee sɔsɔna tɔbʋʋ lɩzʋʋ (Ɛjaɖɛ yɔɔ ɖʋtʋ).
^ Piye piye, «ɛhɛyɩ kɩhɛyʋʋ ɖa-ñʋʋ taa nɛ eholi-ɖʋ; ɛlɩzɩ-ɖʋ.»
^ Yaa «nɛ ŋkpazɩɣ ɛyaa ɖoŋ.»
