Roma mba 7:1-25
7 Koobiya, ɛzɩ pɩpɩzɩɣ nɛ pɩla se ɩɩsɩŋ se Paɣtʋ wɛnɩ ɖoŋ ɛyʋ yɔɔ alɩwaatʋ ndʋ ɛkpɛndɩ ɛwɛ wezuu yɔ? (Mbʋ pʋyɔɔ yɔ mba pasɩm paɣtʋ yɔ, mba menɖiɣni yɔɔdɩnʋʋ.)
2 Halʋ weyi ɛwalaa yɔ, paɣtʋ hɔkɩ-ɩ nɛ ɛ-walʋ alɩwaatʋ ndʋ ɛlɛ wɛ wezuu yɔ; ɛlɛ ye ɛ-walʋ ɛsɩba yɔ, ɛlɩ ɛ-walʋ paɣtʋ tɛɛ.+
3 Ye mbʋ, alɩwaatʋ ndʋ ɛ-walʋ wɛ wezuu yɔ, ye ɛwalɩ abalʋ lɛlʋ yɔ, payaɣ-ɩ se acɛyɛ tʋ.+ Ɛlɛ ye ɛ-walʋ ɛsɩba yɔ, ɛlɩ ɛ-paɣtʋ tɛɛ; nɛ ye ɛwalɩ abalʋ lɛlʋ yɔ, ɛtɩkɛ acɛyɛ tʋ.+
4 Ye mbʋ mon-koobiya, Krɩstʋ tomnaɣ yɔɔ lɛ, mɩ ɖɔɖɔ ɩsɩbɩ Paɣtʋ hɔɔlʋʋ taa, se ɩpɩzɩ nɛ ɩpɩsɩ ɛyʋ lɛlʋ pʋyʋ,+ ɛnʋ weyi pefezi-i nɛ sɩɖaa taa yɔ,+ se pɩsa nɛ ɖɩlʋlɩ pee Ɛsɔ.+
5 Mbʋ pʋyɔɔ yɔ alɩwaatʋ ndʋ ɖɩcakaɣ wezuu tomnaɣ yɔɔ yɔ, kɩwɛɛkɩm kɔɖɛyɩ ŋgʋ Paɣtʋ lɩzaa nɛ tɩwɩlɩ yɔ, kɩlakaɣ tʋmɩyɛ ɖo-tomnasɩ* taa se pɩlʋlɩ pee wena awokini sɩm taa yɔ.+
6 Ɛlɛ lɛɛlɛɛyɔ lɛ, poholi-ɖʋ Paɣtʋ tɛɛ,+ mbʋ pʋyɔɔ yɔ ɖɩsɩbɩ mbʋ pɩɖɩkaɣ-ɖʋ nʋmɔʋ yɔ pɩ-hɔɔlʋʋ taa, se pitaayele nɛ ɖɩkɛ yomaa se mbʋ pʋyɔɔ yɔ paɣtʋ ɖiyiɣ-ɖʋ,+ ɛlɛ ɖɩkɛɣ yomaa mbʋ pʋyɔɔ yɔ fezuu ɖiyiɣni-ɖʋ.+
7 Ye mbʋ, ɖɩyɔɔdɩ suwe yɔ? Paɣtʋ kɛ kɩwɛɛkɩm na? Aayɩ! Toovenim taa lɛ, ye pɩtaakɛ Paɣtʋ yɔɔ yɔ, mantaatɩlɩ kɩwɛɛkɩm.+ Ye Paɣtʋ ɛtaatɔ se: «Taaɖʋ ɛsɩyɛ» yɔ,+ mantaatɩlɩ mbʋ ɛsɩyɛ ɖʋʋ kɛnaa yɔ.
8 Ɛlɛ paɣtʋ yɔɔ lɛ, kɩwɛɛkɩm hiɣ waɖɛ nɛ pɩlʋlɩ ɛsɩyɛ ɖʋʋ wondu tɩŋa yɔɔ man-taa, mbʋ pʋyɔɔ yɔ alɩwaatʋ ndʋ paɣtʋ taawɛɛ yɔ, kɩwɛɛkɩm kaasɩba.+
9 Toovenim taa lɛ, ɖooo paɣtʋ taawɛɛ lɛ, maawɛ wezuu. Ɛlɛ paɣtʋ talaa lɛ, kɩwɛɛkɩm ɖaɣnɩ fem, nɛ mansɩ.+
10 Nɛ paɣtʋ ndʋ pɩɩwɛɛ se tiwokini wezuu taa yɔ,+ ma lɛ, manaɣ-tʋ se tiwokini sɩm taa.
11 Mbʋ pʋyɔɔ yɔ paɣtʋ yɔɔ lɛ, kɩwɛɛkɩm hiɣ waɖɛ nɛ pipeɣzi-m nɛ pɩtɩŋnɩ tɩ-yɔɔ nɛ pɩkʋ-m.
12 Ye mbʋ, Paɣtʋ maɣmaɣ kɛ kiɖeɖetu, nɛ tɔm ndʋ pɔyɔɔdɩ paɣtʋ taa yɔ tɩkɛ kiɖeɖetu nɛ tɩwɛɛ siɣsiɣ nɛ tɩwɛɛ ɖeu.+
13 Ye mbʋ, mbʋ pɩwɛ ɖeu yɔ, mbʋ kɔŋnɩnɩ-m sɩm na? Aayɩ kpa! Ɛlɛ kɩwɛɛkɩm kɔŋnɩnɩ-m sɩm, se pɩna se kɩwɛɛkɩm tɩŋɩɣnɩnɩ mbʋ pɩwɛ ɖeu yɔ pɩ-yɔɔ nɛ pɩkɔŋnɩ-m sɩm,+ se pɩsa nɛ paɣtʋ yɔɔ lɛ, kɩwɛɛkɩm pɩsɩ kɩwɛɛkɩm nɛ pɩkɩlɩ.+
14 Mbʋ pʋyɔɔ yɔ ɖɩnawa se Paɣtʋ kɛ fezuu taa pʋyʋ; ɛlɛ ma lɛ, mɛnkɛ tomnaɣ taa ɛyʋ; pɛpɛdɩ-m nɛ kɩwɛɛkɩm.+
15 Mbʋ pʋyɔɔ yɔ maanɩɣ mbʋ menɖiɣni labʋ yɔ pɩ-taa. Mbʋ pʋyɔɔ yɔ maalakɩ mbʋ mɔnsɔɔlaa yɔ, ɛlɛ mbʋ manpaɖɩɣ yɔ, mbʋ malakɩ.
16 Ɛlɛ ye mbʋ mantɩsɔɔlɩ yɔ, mbʋ malakɩ yɔ, mentisiɣ se Paɣtʋ wɛ ɖeu.
17 Ɛlɛ lɛɛlɛɛyɔ lɛ, mantɩtasɩ kɛʋ weyi ɛlakɩ-pʋ yɔ; ɛlɛ kɩwɛɛkɩm mbʋ pɩwɛ man-taa yɔ mbʋ lakɩnɩ-pʋ.+
18 Mbʋ pʋyɔɔ yɔ mansɩm mbʋ se man-taa lɛ, pʋ-tɔbʋʋ se mon-tomnaɣ taa lɛ, pʋyʋ kɩbanʋ nɔɔyʋ fɛyɩ; mbʋ pʋyɔɔ yɔ me-liu wɛɛ se mala mbʋ pɩwɛ ɖeu yɔ, ɛlɛ maapɩzɩɣ pɩ-labʋ.+
19 Mbʋ pʋyɔɔ yɔ maalakɩ kɩbandʋ ndʋ mɔnsɔɔlaa yɔ, ɛlɛ kɩdɛkɛdɩm mbʋ mantɩsɔɔlɩ yɔ mbʋ malakɩ.
20 Ye mbʋ, ye mbʋ mantɩsɔɔlɩ yɔ mbʋ malakɩ yɔ, pɩtɩtasɩ kɛʋ malakɩnɩ-pʋ; ɛlɛ kɩwɛɛkɩm mbʋ pɩwɛ man-taa yɔ mbʋ lakɩnɩ-pʋ.
21 Pʋyɔɔ lɛ, manaɣ paɣtʋ tʋnɛ mɔ-hɔɔlʋʋ taa: Alɩwaatʋ ndʋ mancaɣ se mala mbʋ pɩtʋʋzaa yɔ lɛ, mbʋ pɩfɛyɩ ɖeu yɔ, pɩwɛ mɔn-cɔlɔ.+
22 Man-taa lakɩ leleŋ siŋŋ nɛ Ɛsɔ paɣtʋ ma-laŋɩyɛ taa,+
23 ɛlɛ manaɣ mon-tomnaɣ* taa paɣtʋ lɛɛtʋ nɛ tiyouni ma-maɣzɩm paɣtʋ+ nɛ tiwokini-m kɩwɛɛkɩm paɣtʋ ndʋ tɩwɛ mon-tomnaɣ* taa yɔ ti-yomiye taa.+
24 Mancaɣ pʋtɔdɩyɛ kpem! Akaɣ-m holuu tomnaɣ ŋga kowokini-m sɩm pʋnɛ pɩ-taa yɔ ke-nesi tɛɛ?
25 Mɛnsɛɣ Ɛsɔ se ɛlabaɣ lɛ, pɩtɩŋnɩ ɖa-Kɩbaɣlʋ Yesu Krɩstʋ yɔɔ! Ye mbʋ, ma-maɣzɩm taa lɛ, ma-maɣmaɣ mɛnkɛ Ɛsɔ paɣtʋ yom; ɛlɛ mon-tomnaɣ taa lɛ, mɛnkɛ kɩwɛɛkɩm paɣtʋ yom.+
