Roma mba 6:1-23
6 Ye mbʋ, ɖɩyɔɔdɩ suwe? Pɩwɛɛ se ɖɩwɛɛ kɩwɛɛkɩm labʋ yɔɔ nɛ lootiye huu yaa we?
2 Aayɩ kpa! Ðɩsɩbɩ kɩwɛɛkɩm labʋ hɔɔlʋʋ taa kɛlɛ,+ ɛzɩma ɖɩpɩzɩɣ nɛ ɖɩtasɩ caɣʋ wezuu pɩ-taa?+
3 Yaa ɩɩsɩŋ se ɖa mba payɩ pamɩyɩsɩ-ɖʋ Krɩstʋ Yesu taa yɔ,+ pamɩyɩsɩ-ɖʋ ɖɔɖɔ ɛ-sɩm taa yaa we?+
4 Pʋyɔɔ lɛ, ɛzɩma pamɩyɩsɩ-ɖʋ ɛ-sɩm taa yɔ pepim ɖa nɛ ɩ,+ se pɩsa nɛ ɛzɩ pefezuu Krɩstʋ nɛ sɩɖaa taa pɩtɩŋnɩ Caa samtʋ yɔɔ yɔ, ɖa ɖɔɖɔ ɖɩɖɔ wezuu kɩfalʋʋ nʋmɔʋ taa.+
5 Ye ɖa nɛ ɩ ɖɩkpɛndɩ kʋɖʋm nɛ ɖɩsɩ sɩm mbʋ ɛsɩba yɔ pɩ-ɖɔndɩ yɔ,+ pɩtʋʋ fɛyɩ se ɖa nɛ ɩ ɖɩkaɣ kpɛndʋʋ kʋɖʋm nɛ ɖife femtu ndʋ efema yɔ tɩ-ɖɔndɩ.+
6 Mbʋ pʋyɔɔ yɔ ɖɩnawa se pakam ɛ nɛ ɖɛ-ɛyʋtʋ kɩbɩndʋ sizika yɔɔ,+ se ɖo-tomnaɣ ŋga kɛwɛ kɩwɛɛkɩm taa yɔ kataakpa ɖoŋ+ nɛ ɖɩtaatasɩ kɛʋ kɩwɛɛkɩm yomaa.+
7 Mbʋ pʋyɔɔ yɔ ɛyʋ weyi ɛsɩba yɔ, ɛlɩ ɛ-kɩwɛɛkɩm taa.*
8 Pɩtasɩ lɛ, ye ɖa nɛ Krɩstʋ ɖɩsɩba yɔ, ɖitisiɣ se ɖa nɛ ɩ ɖɩkaɣ ɖɔɖɔ wezuu caɣʋ.
9 Mbʋ pʋyɔɔ yɔ ɖɩnawa se lɛɛlɛɛyɔ pefezi Krɩstʋ nɛ sɩɖaa taa;+ pʋyɔɔ lɛ, ɛɛtasɩɣ sɩbʋ;+ sɩm tɩtasɩ wɛnʋʋ ɖoŋ ɛ-yɔɔ.
10 Mbʋ pʋyɔɔ yɔ sɩm mbʋ ɛsɩba yɔ, ɛsɩbɩ-pʋ kɩwɛɛkɩm yɔɔ* tam kʋɖʋm nɛ pɩkpaɣ pɩɖɛɛ;+ ɛlɛ wezuu ŋgʋ ɛcakɩ yɔ, ɛcakɩ-kʋ Ɛsɔ yɔɔ.
11 Mɩ ɖɔɖɔ, pɩwɛɛ se ɩcɔnɩ mɩ-tɩ se ɩsɩbɩ kɩwɛɛkɩm labʋ hɔɔlʋʋ taa, ɛlɛ ɩwɛ wezuu Ɛsɔ hɔɔlʋʋ taa Krɩstʋ Yesu yɔɔ.+
12 Pʋyɔɔ lɛ, itaayele nɛ kɩwɛɛkɩm wɛɛ kewiyitu tɔɔʋ yɔɔ mi-tomnasɩ kɩsɩbasɩ taa+ nɛ ɩla sɩ-sɔɔlɩm.
13 Pɩtasɩ lɛ, ɩtaatasɩ kpaɣʋ mi-tomnasɩ* nɛ ɩcɛlɩ kɩwɛɛkɩm ɛzɩ you wondu ndʋ palakɩnɩ mbʋ pɩfɛyɩ siɣsiɣ yɔ; ɛlɛ ɩkpaɣ mɩ-tɩ nɛ ɩcɛlɩ Ɛsɔ ɛzɩ ɛyaa mba pefezi-wɛ nɛ sɩɖaa taa yɔ; ɩkpaɣ ɖɔɖɔ mi-tomnasɩ* nɛ ɩcɛlɩ Ɛsɔ ɛzɩ you wondu ndʋ palakɩnɩ mbʋ pɩwɛ siɣsiɣ yɔ.+
14 Pɩfɛyɩ se kɩwɛɛkɩm ɛwɛɛnɩ ɖoŋ mɩ-yɔɔ, mbʋ pʋyɔɔ yɔ ɩfɛyɩ paɣtʋ tɛɛ,+ ɛlɛ lootiye tɛɛ ɩwɛɛ.+
15 Ye mbʋ, ɖɩyɔɔdɩ suwe? Pɩwɛɛ se ɖɩla kɩwɛɛkɩm mbʋ pʋyɔɔ yɔ ɖɩfɛyɩ paɣtʋ tɛɛ, ɛlɛ ɖɩwɛ lootiye tɛɛ yaa we?+ Pɩfɛyɩ se pɩla mbʋ kpa!
16 Ɩɩsɩŋ se ye ɩcɛlɩ mɩ-tɩ nɔɔyʋ nɛ ɩñaŋɩ-ɩ ɛzɩ yomaa yɔ, ɩkɛ weyi ɩñaŋɩ-ɩ yɔ e-yomaa na?+ Ye mbʋ, ye ɩkɛ kɩwɛɛkɩm yomaa yɔ,+ piwokini-mɩ sɩm taa;+ ɛlɛ ye ɩkɛ Ɛsɔ yomaa nɛ ɩñaŋɩ-ɩ yɔ, piwokini-mɩ siɣsiɣ wɛtʋ taa.
17 Ɛlɛ ɖɩsɛɣ Ɛsɔ se ɛlabaɣ lɛ, mbʋ pʋyɔɔ yɔ paa ɖooo lɛ ɩɩkɛ kɩwɛɛkɩm yomaa yɔ, ɩpɩsɩ mba pañaŋnɩ pa-laŋɩyɛ wɩlɩtʋ ndʋ paɖʋzɩ mi-nesi tɛɛ yɔ.
18 Ɛɛɛ, poholi-mɩ kɩwɛɛkɩm nesi tɛɛ,+ pʋyɔɔ lɛ ɩpɩsɩ siɣsiɣ wɛtʋ yomaa.+
19 Mi-tomnaɣ ɛjandʋ yɔɔ lɛ, malakɩnɩ tʋmɩyɛ tɔm pee wena ɛyaa sɩm-yɛ camɩyɛ yɔ; mbʋ pʋyɔɔ yɔ ɛzɩ ɩɩcɛlʋʋ mi-tomnaɣ pilinzi nɛ sɩkɛ azuluma nɛ paɣtʋ yɔɔ maʋ mbʋ piwokini paɣtʋ yɔɔ maʋ taa yɔ pi-yomaa yɔ, lɛɛlɛɛyɔ lɛ, ɩcɛlɩ ɖɔɖɔ mi-tomnaɣ pilinzi nɛ sɩkɛ siɣsiɣ wɛtʋ ndʋ tiwokini lakasɩ kiɖeɖesi taa yɔ ti-yomaa.+
20 Mbʋ pʋyɔɔ yɔ alɩwaatʋ ndʋ ɩɩkɛ kɩwɛɛkɩm yomaa yɔ, mɩ-paa taawɛɛnɩ siɣsiɣ wɛtʋ.
21 Nɛ pee wena ɩlʋlaɣ alɩwaatʋ ndʋ tɩ-taa? Lakasɩ nzɩ sɩkpaɣ-mɩ fɛyɛ lɛɛlɛɛyɔ yɔ. Mbʋ pʋyɔɔ yɔ lakasɩ nzɩ, sɩm sɩtɛŋna.+
22 Ɛlɛ lɛɛlɛɛyɔ lɛ, poholi-mɩ kɩwɛɛkɩm nesi tɛɛ nɛ ɩpɩsɩ Ɛsɔ yomaa; pʋyɔɔ lɛ, ɩwɛɛ nɛ ɩlʋlʋʋ pee kele kele wɛtʋ nʋmɔʋ taa,+ nɛ wezuu maatɛŋ pɩkaɣ tɛmnʋʋ.+
23 Mbʋ pʋyɔɔ yɔ kɩwɛɛkɩm kɩhɛyʋʋ lɛ sɩm,+ ɛlɛ kʋjɔʋ ŋgʋ Ɛsɔ tɩŋɩɣnɩ ɖa-Kɩbaɣlʋ Krɩstʋ Yesu yɔɔ+ nɛ ɛhaɣ yɔ, ŋgʋ lɛ wezuu maatɛŋ.+
Pɩ-tɛɛ tɔm
^ Yaa «poholi-i ɛ-kɩwɛɛkɩm taa; pekpeɣ-i ɛ-kɩwɛɛkɩm.»
^ Pʋ-tɔbʋʋ se ɛsɩbɩ-pʋ se ɛhɩzɩ kɩwɛɛkɩm.
^ Piye piye, «mi-pilinzi.»
^ Piye piye, «mi-pilinzi.»
