Roma mba 4:1-25
4 Ye pɩkɛ mbʋ, ɖɩkaɣ yɔɔdʋʋ se Abraham weyi ɛkɛ ɖɔ-cɔzɔ tomnaɣ taa yɔ ɛbɛ ehiɣaa?
2 Ye paaya Abraham se siɣsiɣ tʋ tʋma yɔɔ yɔ, ɛɛwɛnɩ mbʋ pɩ-yɔɔ ɛpɩzɩɣ nɛ ɛkʋndɩ yɔ, ɛlɛ pɩɩkɛɣnɩ Ɛsɔ ɛsɩndaa.
3 Mbʋ pʋyɔɔ yɔ suwe mayaɣ yɔɔdʋʋ? «Abraham kaawɛnɩ tisuu Yehowa* yɔɔ, nɛ pakpaɣ-ɩ se ɛkɛ ɛyʋ siɣsiɣ tʋ.»+
4 Ɛyʋ weyi ɛlakɩ tʋmɩyɛ yɔ, paakpakɩɣ ɛ-kɩhɛyʋʋ ɛzɩ lootiye palabɩ-ɩ yɔ, ɛlɛ ɛzɩ mbʋ pɩmʋnaa se pɛhɛyɩ-ɩ yɔ.*
5 Ɛlɛ alɩwaatʋ ndʋ ɛyʋ wɛɣnɩ tisuu Ɛsɔ yɔɔ nɛ ɛɛtaɣ tʋma liu yɔ, e-tisuu yɔɔ lɛ, Ɛsɔ kpakɩɣ-ɩ se ɛkɛ siɣsiɣ tʋ. Ɛsɔ pɩzɩɣna nɛ ɛkpaɣ kɩwɛɛkɩm laɖaa se pɛkɛ siɣsiɣ tɩnaa.+
6 Mbʋ ɖɔɖɔ ɛyʋ weyi Ɛsɔ kpakɩɣ-ɩ se ɛkɛ siɣsiɣ tʋ ɛlɛ pɩtɩkɛ ɛ-tʋma yɔɔ yɔ, koboyaɣ ŋga ehikiɣ yɔ, Daviid yɔɔdɩ kɔ-tɔm; ɛyɔɔdaa se:
7 «Koboyaɣ tɩnaa lɛ mba pamanɩ paɣtʋ yɔɔ ɛlɛ pekpeɣ-wɛ yɔ, nɛ mba pa-kɩdɛkɛdɩm yɔɔ pohuuzaa yɔ;*
8 koboyaɣ tʋ lɛ ɛyʋ weyi Yehowa* ɛɛkaɣ kpaɣʋ ɛ-kɩwɛɛkɩm nɛ ɛlabɩnɩ tʋmɩyɛ kaaʋ yɔ.»+
9 Ye mbʋ, ɛzɩ koboyaɣ ŋga, ɛyaa mba pɛpɛlɩ-wɛ yɔ pe-ɖeke pehikiɣni-kɛ, yaa ɛyaa mba patɩpɛlɩ-wɛ yɔ pehikiɣ-kɛ ɖɔɖɔ?+ Mbʋ pʋyɔɔ yɔ ɖɩtɔŋ se: «Abraham tisuu yeba nɛ pakpaɣ-ɩ se ɛkɛ ɛyʋ siɣsiɣ tʋ.»+
10 Wɛtʋ ndʋ tɩ-taa ɛɛwɛɛ nɛ pakpaɣ-ɩ se ɛkɛ ɛyʋ siɣsiɣ tʋ? Alɩwaatʋ ndʋ pɛpɛlɩ-ɩ yɔ yaa alɩwaatʋ ndʋ pataapɛlɩ-ɩ yɔ? Pɩtɩkɛ alɩwaatʋ ndʋ pɛpɛlɩ-ɩ yɔ, ɛlɛ alɩwaatʋ ndʋ pataatɩɩpɛlɩtɩ-ɩ yɔ.
11 Nɛ ɛɛmʋ yʋsaɣ nakɛyɛ,+ pʋ-tɔbʋʋ se pɛlɩtʋ, nɛ kɛkɛ siɣsiɣ wɛtʋ mayaɣ;* pakpaɣ-ɩ se ɛkɛ siɣsiɣ tʋ mbʋ pʋyɔɔ yɔ ɛɛwɛnɩ tisuu alɩwaatʋ ndʋ ɛɛkɛ kɩdɩbɛlʋʋ yɔ, se pɩsa nɛ ɛkɛ mba payɩ pɛwɛnɩ tisuu ɛlɛ patɩpɛlɩ-wɛ yɔ pa-caa,+ nɛ papɩzɩ nɛ pakpaɣ-wɛ se pɛkɛ ɛyaa siɣsiɣ tɩnaa;
12 nɛ pɩsa ɖɔɖɔ nɛ ɛkɛ mba pɛpɛlɩ-wɛ yɔ pa-caa, pɩtɩkɛ mba pɔñɔnɩ pɛlɩtʋ yɔ pe-ɖeke pa-caa ɛlɛ mba pɔɖɔŋ ɖɔnɛ nɖɩ ɖɩtʋʋzaa nɛ pamaɣzɩɣnɩ tisuu mbʋ ɖa-caa Abraham+ kaawɛna alɩwaatʋ ndʋ ɛɛkɛ kɩdɩbɛlʋʋ yɔ.
13 Mbʋ pʋyɔɔ yɔ pɩtɩkɛ paɣtʋ yɔɔ pɩtɩŋnaa nɛ pala Abraham yaa ɛ-lʋlʋʋ taa mba* tamaɣ se pakaɣ-ɩ cɛlʋʋ ɛjaɖɛ naɖɩyɛ nɛ ɖɩpɩsɩ ɛ-ñɩm;+ ɛlɛ siɣsiɣ wɛtʋ yɔɔ pɩtɩŋnaa, tisuu yɔɔ.+
14 Mbʋ pʋyɔɔ yɔ ye mba pɔñɔʋnɩ paɣtʋ yɔ mba pɛcɛlɩɣ ñɩm yɔ, pɩwɩlɩɣ se tisuu tɩtasɩ wɛnʋʋ wazaɣ nakɛyɛ nɛ tamaɣ ŋga Ɛsɔ laba yɔ kɛkɛ falaa.
15 Toovenim taa lɛ, Paɣtʋ kɔŋnɩ pana;+ ɛlɛ ɖenɖe paɣtʋ natʋyʋ fɛyɩ yɔ, nɔɔyʋ ɛɛmaɣnɩ paɣtʋ yɔɔ ɖɔɖɔ.+
16 Pʋyɔɔ lɛ, tisuu yɔɔ pɩtɩŋnaa nɛ palabɩ-ɩ tamaɣ ŋga, se pɩsa nɛ pɩla nɔɔ kʋɖʋmaɣ nɛ lootiye,+ nɛ piyele nɛ ɛ-lʋlʋʋ taa mba* tɩŋa na se lidaʋ tɔm kɛ toovenim;+ pɩtɩkɛ mba pɔñɔʋnɩ Paɣtʋ yɔ pe-ɖeke panaɣna se tɩkɛ toovenim ɛlɛ mba pɔñɔʋnɩ ɖɔɖɔ Abraham tisuu yɔ, ɛnʋ weyi ɛkɛ ɖa-tɩŋa ɖa-caa yɔ.+
17 (Ɛzɩ pamaʋ yɔ: «Malɩzɩ-ŋ se ŋkɛ ajɛɛ sakɩyɛ caa.»)+ Ɛsɔ weyi ɛ-yɔɔ ɛɛwɛnɩ tisuu yɔ, ɛ-ɛsɩndaa pɩɩlabɩ mbʋ, Ɛsɔ weyi eyeki se sɩɖaa ɩwɛɛ wezuu nɛ ɛyɔɔdʋʋ mbʋ pɩtɩtɩɩwɛta yɔ pɩ-tɔm ɛzɩ pɩtɛm wɛʋ yɔ.*
18 Paa nabʋyʋ ɛtaawɛɛ nɛ piyeki se ɛwɛɛnɩ lidaʋ yɔ, ɛta liu nɛ ɛwɛɛnɩ tisuu se ɛkaɣ kɛʋ ajɛɛ sakɩyɛ caa ɛzɩ paayɔɔdʋʋ yɔ se: «Mbʋ ña-lʋlʋʋ taa mba* kaɣ wɛʋ.»+
19 Nɛ paa e-tisuu ɛtaahɛɛ yɔ, ɛcɔŋnaɣ e-tomnaɣ alɩwaatʋ ndʋ tɩ-taa ɛzɩ kɛtɛm sɩbʋ yɔ (mbʋ pʋyɔɔ yɔ ɛɛwɛnɩ pɩnzɩ 100 mbʋ yɔ),+ nɛ ɛcɔŋnaɣ Saara lʋlʋʋ ɖɔɖɔ ɛzɩ pɩtɛm sɩbʋ yɔ.*+
20 Ɛlɛ tamaɣ ŋga Ɛsɔ labɩ-ɩ yɔ kɔ-yɔɔ lɛ, e-tisuu tɩhɛɛ nɛ ɛpɩtɩ; ɛlɛ e-tisuu yeba nɛ ɛkpa ɖoŋ nɛ ɛsa Ɛsɔ
21 nɛ ɛ-taa tɛ siŋŋ se tamaɣ ŋga Ɛsɔ labɩ-ɩ yɔ, ɛpɩzɩɣ ɖɔɖɔ nɛ ɛɖɔ kɔ-yɔɔ.+
22 Mbʋ yebina nɛ «pakpaɣ-ɩ se ɛkɛ ɛyʋ siɣsiɣ tʋ.»+
23 Ɛlɛ, pɩtɩkɛ e-ɖeke ɛ-yɔɔ pama tɔm pee «pakpaɣ-ɩ;»+
24 ɛlɛ ɖa ɖɔɖɔ ɖɔ-yɔɔ pama-yɛ, ɖa mba pakaɣ-ɖʋ kpaɣʋ se ɖɩkɛ ɛyaa siɣsiɣ tɩnaa yɔ; mbʋ pʋyɔɔ yɔ ɖitisiɣ Weyi efezi ɖa-Kɩbaɣlʋ Yesu nɛ sɩɖaa taa yɔ ɛ-yɔɔ.+
25 Pakpaɣ-ɩ nɛ pɛcɛlɩ ɖa-kɩwɛɛkɩm yɔɔ,+ nɛ pefezi-i se pɩsa nɛ payaa-ɖʋ se siɣsiɣ tɩnaa.+
Pɩ-tɛɛ tɔm
^ Cɔnɩ Tɔm kɩsɔzɩtʋ A5.
^ Yaa «ɛzɩ kɩmɩyɛ nɖɩ pɩwɛɛ se pɛhɛyɩ-ɩ yɔ.»
^ Yaa «mba pekpeɣ-wɛ pa-kɩdɛkɛdɩm yɔ.»
^ Cɔnɩ Tɔm kɩsɔzɩtʋ A5.
^ Yaa «kɛkɛ mbʋ pɩñɩkɩɣ niye se ɛwɛ siɣsiɣ yɔ.»
^ Piye piye, «e-ɖomaɣ.»
^ Piye piye, «e-ɖomaɣ.»
^ Pɩpɩzɩɣ pɩkɛ, «nɛ eyeki se mbʋ pɩfɛyɩ yɔ, pɩwɛɛ yɔ.»
^ Piye piye, «ño-ɖomaɣ.»
^ Yaa «ɛcɔŋnaɣ Saara se ɛkɛ kaalʋlaɣ.»
