Roma mba 14:1-23
14 Ɩmʋ ɛyʋ weyi e-tisuu wɛnɩ ɛjandʋ yɔ camɩyɛ,+ ɛlɛ ɩtaahʋʋnɩ-ɩ tɔm se ɛ-lɩmaɣza wɛ ndɩ nɛ mɩ-ñɩna.*
2 Nɔɔyʋ wɛnɩ tisuu se ɛtɔɔ pɩtɩŋa, ɛlɛ ɛyʋ weyi ɛkɛ ɛjam yɔ ɖozi hatʋ ɖeke ɛtɔkɩ.
3 Weyi ɛtɔkɩ yɔ, etaani weyi ɛɛtɔkɩ yɔ; nɛ weyi ɛɛtɔkɩ yɔ, ɛtaahʋʋnɩ tɔm weyi ɛtɔkɩ yɔ,+ mbʋ pʋyɔɔ yɔ Ɛsɔ mʋ-ɩ nɛ sɔɔlɩm.
4 Anɩ ŋkɛnaa nɛ ŋhʋʋnɩ lɛlʋ lɩmɖʋyʋ tɔm?+ Ye ɛsɩŋaa yaa ɛtɔlaa yɔ, ɛ-caa naɣna.+ Toovenim taa lɛ, ɛkaɣ sɩŋʋʋ; mbʋ pʋyɔɔ yɔ Yehowa* pɩzɩɣ ɛla nɛ ɛsɩŋ.
5 Ɛyʋ nɔɔyʋ maɣzɩɣ se kɩyakʋ nakʋyʋ kɩlɩ lɛɛkʋ;+ lɛlʋ ñamaɣzɩɣ se kɩyakɩŋ tɩŋa wɛ kɩmaŋ;+ paa weyi lɛ, ɛ-taa ɛtɛmnɩ ndʋ ɛmaɣzɩɣ yɔ kiya.
6 Weyi ɛkpakɩɣ kɩyakʋ nakʋyʋ se kɩwɛ ŋgee yɔ, Yehowa* yɔɔ ɛlakɩ mbʋ. Pɩtasɩ lɛ, weyi ɛtɔkɩ yɔ, Yehowa* yɔɔ ɛtɔkɩ, mbʋ pʋyɔɔ yɔ ɛsɛɣ Ɛsɔ se ɛlabaɣ lɛ;+ nɛ weyi ɛɛtɔkɩ yɔ, Yehowa* yɔɔ ɛɛtɔkɩ; paa mbʋ yɔ ɛsɛɣ Ɛsɔ se ɛlabaɣ lɛ.+
7 Toovenim taa lɛ, ɖa-taa nɔɔyʋ ɛɛcakɩ wezuu e-ɖeke ɛ-tɩ yɔɔ,+ nɛ nɔɔyʋ ɛɛsɩkɩ e-ɖeke ɛ-tɩ yɔɔ.
8 Mbʋ pʋyɔɔ yɔ ye ɖɩwɛ wezuu yɔ, Yehowa* yɔɔ ɖɩwɛ wezuu;+ nɛ ye ɖɩsɩba yɔ, Yehowa* yɔɔ ɖɩsɩba. Ye mbʋ, paa ɖɩwɛ wezuu yaa ɖɩsɩba yɔ, Yehowa* tɩnɩ-ɖʋ.+
9 Pʋyɔɔ Krɩstʋ sɩba nɛ ɛɖaɣnɩ fem, se pɩsa nɛ ɛkɛ Kɩbaɣlʋ sɩɖaa nɛ ɛsadɩnaa pɔ-yɔɔ.+
10 Ɛlɛ ɛbɛ yɔɔ ŋhʋʋnɩ ño-koobu tɔm?+ Yaa ɛbɛ yɔɔ ɖɔɖɔ ŋniŋ ño-koobu? Mbʋ pʋyɔɔ yɔ ɖa-tɩŋa ɖɩkaɣ sɩŋʋʋ Ɛsɔ tɔm hʋʋ kpelaɣ ɛsɩndaa.+
11 Mbʋ pʋyɔɔ yɔ pamawa se: «Mañɩtʋʋ nɛ mɛwɛɛ wezuu yɔ,+ paa nʋmbɔɖɛ nɖɩ lɛ ɖɩkaɣ luŋuu mɛn-tɛɛ, nɛ paa nzʋlʋmɩyɛ nɖɩ lɛ ɖɩkaɣ yɔɔdʋʋ kaɣlaa se ma yɔ Ɛsɔ;+ Yehowa* tɔŋna.»
12 Ye mbʋ, ɖa-taa paa weyi lɛ, ɛkaɣ labʋ Ɛsɔ akɔnta ɛ-maɣmaɣ ɛ-lakasɩ yɔɔ.+
13 Pʋyɔɔ lɛ, ɖɩtaatasɩ ɖama tɔm hʋnʋʋ,+ ɛlɛ ɖɩtɛ ɖa-taa se ɖɩɩsɩɣ pɩyɛ nɖɩ ɖituuluu yɔ yaa mbʋ pɩpadɩɣ ɛyʋ yɔ koobu nɔɔyʋ ɛsɩndaa.+
14 Mansɩm mbʋ nɛ man-taa tɛm Kɩbaɣlʋ Yesu taa se nabʋyʋ tɩkɛ azuluma pʋyʋ pɩ-tɩ yɔɔ;+ ɛlɛ ye nɔɔyʋ ɛmaɣzɩɣ se nabʋyʋ kɛ azuluma pʋyʋ yɔ, ɛ-ɛsɩndaa pɩkɛ azuluma pʋyʋ.
15 Mbʋ pʋyɔɔ yɔ ye ño-koobu ɛwɛ laŋwɛɛkɩyɛ taa tɔɔnaɣ yɔɔ yɔ, pʋbʋ ŋŋtasɩɣ ɖɔm sɔɔlɩm taa.+ Taayele nɛ ñɔ-tɔɔnaɣ ɖʋzɩ* ɛnʋ weyi Krɩstʋ sɩbɩ ɛ-yɔɔ yɔ.+
16 Pʋyɔɔ lɛ, itaayele nɛ kɩbandʋ ndʋ ɩlakɩ yɔ pɔyɔɔdɩ tɔm kɩdɛkɛdɩtʋ tɩ-yɔɔ.
17 Mbʋ pʋyɔɔ yɔ Ɛsɔ Kewiyaɣ tɩkɛ tɔkɩyɛ nɛ ñɔtʋ,+ ɛlɛ kɛkɛ siɣsiɣ wɛtʋ nɛ laŋhɛzɩyɛ nɛ taa leleŋ pɩtɩŋnɩ fezuu kiɖeɖeu yɔɔ.
18 Mbʋ pʋyɔɔ yɔ, weyi ɛkɛ Krɩstʋ yom nɛ ɛwɛɛnɩ wɛtʋ kɩbandʋ ndʋ yɔ, eɖe Ɛsɔ ɛsɩndaa nɛ ɛ-tɔm kɛdɩɣnɩ ɛyaa.
19 Ye mbʋ, iyele nɛ ɖɩñɩnɩ mbʋ pɩkɔŋnɩ laŋhɛzɩyɛ+ nɛ mbʋ pɩsɩɣnɩ-ɖʋ se ɖɩkpazɩ ɖama ɖoŋ yɔ.+
20 Yele wɛɛkʋʋ Ɛsɔ tʋmɩyɛ cɛɛkɛ tɔɔnaɣ yɔɔ.+ Toovenim taa lɛ, wondu tɩŋa wɛ kele kele, ɛlɛ ye nɔɔyʋ ɛtɔɔ tɔɔnaɣ nakɛyɛ, ŋgʋ keyeki se pituuli nɔɔyʋ yɔ pɩkɔŋnɩ-ɩ asɛyʋʋ.*+
21 Pɩkɩlɩɣ ɖeu se ŋtaatɔɔ nandʋ yaa ŋtaañɔɔ vɛɛ yaa ŋtaala nabʋyʋ mbʋ pituuluu ño-koobu yɔ.+
22 Tisuu mbʋ ŋwɛna yɔ, sɩɩ-pʋ ña-tɩ Ɛsɔ ɛsɩndaa. Koboyaɣ tʋ lɛ ɛyʋ weyi ɛɛhʋʋnɩ ɛ-tɩ tɔm mbʋ ɛlɩzaa se ɛlakɩ yɔ pɩ-yɔɔ yɔ.
23 Ɛlɛ ye ɛpɩtɩɣ yɔ, pɛtɛm ɛ-tɔm kʋʋ ye ɛtɔwaa yɔ, mbʋ pʋyɔɔ yɔ ɛɛtɔkɩnɩ tisuu. Toovenim taa lɛ, mbʋ payɩ ɛyʋ ɛɛlakɩnɩ tisuu yɔ, pɩkɛ kɩwɛɛkɩm.
Pɩ-tɛɛ tɔm
^ Pɩpɩzɩɣ pɩkɛ, «ɩtaahʋʋnɩ-ɩ tɔm tɔm ndʋ ɛpɔzʋʋ ɛ-tɩ yɔ tɩ-yɔɔ.»
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Yaa «ɖɩzɩ.»
^ Yaa «ŋgʋ keyeki se pituuli nɔɔyʋ yɔ pɩfɛyɩ ɖeu.»
