Roma mba 1:1-32
1 Ma Pɔɔlɩ, Krɩstʋ Yesu yom weyi paya-ɩ se ɛpɩsɩ apostoloo yɔ, weyi palɩzɩ-ɩ nɛ hɔɔlʋʋ se esusi Ɛsɔ tɔm kɩbandʋ yɔ,+
2 tɔm kɩbandʋ ndʋ Ɛsɔ kaatɩŋnɩ ɛ-nayaa yɔɔ nɛ ɛlɛyɩ labʋ tɩ-tamaɣ Masɩ kiɖeɖesi taa yɔ,
3 tɔm kɩbandʋ ndʋ titukuuni ɛ-Pɩyalʋ, weyi ɛɛkɛ Daviid lʋlʋʋ taa tʋ+ tomnaɣ taa,
4 ɛlɛ fezuu kiɖeɖeu ɖoŋ taa lɛ, paya-ɩ se Ɛsɔ Pɩyalʋ+ alɩwaatʋ ndʋ pefezi-i nɛ sɩɖaa taa yɔ,+ ɛɛɛ, ɛnʋ lɛ ɖa-Kɩbaɣlʋ Yesu Krɩstʋ.
5 Ɛ-yɔɔ pɩtɩŋnaa nɛ ɖihiɣ lootiye nɛ apostoloo tʋmɩyɛ+ se ɛyaa ɩpɩzɩ nɛ pɛwɛɛnɩ tisuu nɛ paña ajɛɛ tɩŋa taa+ nɛ pɩsa ɛ-hɩɖɛ.
6 Ajɛɛ ana a-taa payanɩ-mɩ ɖɔɖɔ se ɩkɛ Yesu Krɩstʋ pʋyʋ—
7 mamaɣnɩ takayaɣ kanɛ mba payɩ pɛwɛ Roma nɛ pɛkɛ Ɛsɔ ɛyaa kʋsɔɔlaa yɔ, mba paya-wɛ se pɛkɛ ɛyaa kiɖeɖema yɔ:
Ɩwɛɛnɩ lootiye nɛ laŋhɛzɩyɛ nɖɩ ɖɩlɩnɩ ɖa-Caa Ɛsɔ nɛ Kɩbaɣlʋ Yesu Krɩstʋ pɔ-cɔlɔ yɔ.
8 Kajalaɣ lɛ, mantɩŋɩɣnɩ Yesu Krɩstʋ yɔɔ nɛ mɛnsɛɣ mɛ-Ɛsɔ mɩ-tɩŋa mɩ-yɔɔ se ɛlabaɣ lɛ, mbʋ pʋyɔɔ yɔ pɔyɔɔdʋʋ mi-tisuu tɔm ɛjaɖɛ kpeekpe yɔɔ.
9 Mbʋ pʋyɔɔ yɔ Ɛsɔ weyi malakɩ-ɩ tʋmɩyɛ kiɖeɖeye nɛ ma-laŋɩyɛ pilim* alɩwaatʋ ndʋ monsusuu ɛ-Pɩyalʋ yɔɔ tɔm kɩbandʋ yɔ, ɛkɛ-m aseɣɖe tʋ se paa ɛzɩmtaa lɛ, maayeki mɩ-yɔɔ tɔzʋʋ ma-adɩma taa;+
10 nɛ mentendiɣ Ɛsɔ se lɛɛlɛɛyɔ lɛ, ye pɩkɛ ɛ-sɔɔlɩm yɔ manpɩzɩ nɛ mɔnkɔɔ mɩ-cɔlɔ.
11 Mbʋ pʋyɔɔ yɔ, me-liu wɛɛ pɩŋŋ se mana-mɩ, nɛ manpɩzɩ nɛ maha-mɩ fezuu taa kʋjɔʋ nakʋyʋ se pɩsa nɛ ɩka camɩyɛ;
12 yaa se ɖɩpɩzɩ nɛ ɖɩkpazɩ ɖama ɖoŋ,+ nɛ mi-tisuu kpazɩ-m ɖoŋ nɛ men-tisuu kpazɩ-mɩ ɖoŋ ɖɔɖɔ.
13 Ɛlɛ koobiya, mɔnsɔɔlaa se ɩtɩlɩ se malabɩ lɩmaɣzɩyɛ tam sakɩyɛ se mɔnkɔŋ mɩ-cɔlɔ nɛ mehiɣ pee kɩbana naayɛ mɩ-hɛkʋ taa ɖɔɖɔ ɛzɩ mehiɣu-yɛ ajɛɛ lɛɛna taa yɔ (ɛlɛ pɩtɩha-m nʋmɔʋ halɩ nɛ sɔnɔ).
14 Mɔntɔɔ kɩmɩyɛ Grɛɛkɩ mba nɛ agɔma,* lɔŋsɩnɖaa nɛ kɩmɛlɛmɩŋ;
15 pʋyɔɔ lɛ, me-liu wɛɛ siŋŋ se monsusi tɔm kɩbandʋ mɩ mba ɩwɛ ɖɔɖɔ Roma peeɖe yɔ.+
16 Mbʋ pʋyɔɔ yɔ fɛyɛ ɛɛkpaɣ-m nɛ tɔm kɩbandʋ;+ toovenim taa lɛ, tɩkɛ Ɛsɔ ɖoŋ weyi ɩ-yɔɔ ɛtɩŋɩɣna se ɛya mba payɩ pɛwɛɣnɩ tisuu yɔ pa-ñʋʋ yɔ;+ kajalaɣ lɛ Yuuda mba,+ nɛ pʋwayɩ lɛ Grɛɛkɩ mba.+
17 Mbʋ pʋyɔɔ yɔ mba pɛwɛnɩ tisuu yɔ, panaɣ se Ɛsɔ tɩŋɩɣnɩ tɔm kɩbandʋ yɔɔ nɛ ɛlɩzɩɣ e-siɣsiɣ wɛtʋ nɛ ɛwɩlɩɣ; nɛ pɩkpazɩɣ pe-tisuu ɖoŋ,+ ɛzɩ pamaʋ yɔ se: «Ɛlɛ ɛyʋ siɣsiɣ tʋ kaɣ wɛʋ wezuu e-tisuu yɔɔ.»+
18 Mbʋ pʋyɔɔ yɔ, Ɛsɔ wɛɛ nɛ ɛlɩzɩɣ ɛ-pana+ nɛ ɛsɔdaa kiŋ nɛ ɛwɩlɩɣ ɛyaa mba payɩ paañaŋɩ-ɩ nɛ mba palakɩ mbʋ pɩfɛyɩ siɣsiɣ nɛ patɩŋɩɣnɩ nʋmɔʋ ŋgʋ kɩfɛyɩ siɣsiɣ yɔ kɩ-yɔɔ nɛ paɖɩkɩ toovenim nʋmɔʋ yɔ;+
19 mbʋ pʋyɔɔ yɔ mbʋ pɩɩwɛɛ se patɩlɩ Ɛsɔ yɔɔ yɔ, panaɣ-pʋ pɛ-hɛkʋ taa kpayɩ kpayɩ, mbʋ pʋyɔɔ yɔ Ɛsɔ lɩzɩ-pʋ nɛ ɛwɩlɩ-wɛ kaɣlaa.+
20 Mbʋ pʋyɔɔ yɔ ɛ-wɛtʋ kɩbandʋ ndʋ tɩɩnaɣnɩ ɛsa yɔ, pɩnaɣ-tʋ kpayɩ kpayɩ kpaɣnɩ alɩwaatʋ ndʋ palɩzɩ ɛjaɖɛ yɔ; mbʋ pʋyɔɔ yɔ panaɣ-tʋ wondu ndʋ ɛlɩzaa yɔ tɩ-taa,+ halɩ panaɣ ɛ-tamtam ɖoŋ+ nɛ panaɣ se ɛnʋ kɛnɩ Ɛsɔ,+ nɛ pʋyɔɔ lɛ pɛfɛyɩnɩ kawanaɣ nakɛyɛ.
21 Mbʋ pʋyɔɔ yɔ paa pasɩm Ɛsɔ yɔ, patɩsamɩ-ɩ ɛzɩ pɩmʋnʋʋ se pasa Ɛsɔ yɔ, nɛ patɩsɛɛ-ɩ ɖɔɖɔ se ɛlabaɣ lɛ; ɛlɛ papɩsɩ kɩmɛlɛmɩŋ pa-maɣzɩm taa, nɛ pa-laŋa wena awɛ kpɩzɩŋ yɔ ayu cɩkpɛndʋʋ.+
22 Paa pɔyɔɔdʋʋ se pɛwɛ lɔŋ yɔ, papɩsɩ kɩmɛlɛmɩŋ
23 nɛ peyele sam Ɛsɔ weyi ɛɛsɩkɩ* yɔ nɛ pasaŋ sɩʋ kpelisi nzɩ palabɩ-sɩ ɛyʋ sɩkʋʋ lɛzʋʋ yɔ, nzɩ palabɩ-sɩ sumasɩ nɛ kpɩna wena awɛnɩ nɩŋgbanzɩ 4 nɛ wena atuu yɔ a-lɛzʋʋ yɔ.+
24 Pɔsɔɔlɩ labʋ pa-laŋa sɔɔlɩm, pʋyɔɔ Ɛsɔ yebi-wɛ nɛ azuluma, se pɩsa nɛ paɖʋ pa-maɣmaɣ po-tomnasɩ fɛyɛ.
25 Pakpaɣ cɛtɩm nɛ pɛlɛɣzɩ Ɛsɔ yɔɔ toovenim tɔm lone taa, nɛ poluŋ* wondu kɩlɩzɩtʋ tɛɛ nɛ pɛsɛɛ-tʋ* nɛ peyele wondu Lɩzɩyʋ, weyi pɩwɛɛ se pasamɩ-ɩ tam tam yɔ. Amɛn.
26 Pʋyɔɔ Ɛsɔ yebi-wɛ nɛ kʋzʋʋ kɔɖɛyɩ ŋgʋ kɩwɛ fɛyɛ yɔ,+ mbʋ pʋyɔɔ yɔ pa-halaa yebi labɩnʋʋ po-tomnasɩ tʋmɩyɛ ɛzɩ pɩmʋnʋʋ yɔ nɛ palakɩ mbʋ Ɛsɔ taaɖʋ se pala yɔ;+
27 mbʋ ɖɔɖɔ abalaa yebi sʋnʋʋ halaa ɛzɩ Ɛsɔ ɖʋʋ yɔ, nɛ pɛwɛɛnɩ kʋzʋʋ kɔɖɛyɩ siŋŋ ɖama yɔɔ, abalaa nɛ abalaa;+ nɛ palakɩ mbʋ pɩkɛ kʋzɔɔtʋ yɔ nɛ pa-maɣmaɣ pamʋʋ kɩhɛyʋʋ* pilim, ŋgʋ kɩmʋnɩ pa-lakasɩ kɩdɛkɛdɩsɩ yɔ.+
28 Pamaɣzaa se pɩtɩmʋna se patɩlɩ Ɛsɔ;* pʋyɔɔ lɛ, Ɛsɔ yebi-wɛ nɛ maɣzɩm mbʋ pɩtɩtʋʋzɩ yɔ, se pala lakasɩ nzɩ sɩtɩmʋna yɔ.+
29 Nɛ mbʋ payɩ pɩfɛyɩ siɣsiɣ yɔ,+ kañatʋ lakasɩ, ɛsa naɣ naɣ,*+ nɛ lakasɩ kɩdɛkɛdɩsɩ kaasu pa-taa. Ɛsɩsɛmɩyɛ,+ ɛyaa kʋʋ,+ you, ɛyaa peɣzuu,+ nɛ lɩmaɣza kɩdɛkɛda+ su pa-taa; pɛkɛ ɛyaa tɔm yɔɔdɩyaa,
30 kɔlɔmɔtʋ tɩnaa,+ mba papaɖɩɣ Ɛsɔ yɔ, mba paañaŋ ɛyaa yɔ, tɩ kpazɩyaa, mba pakʋndʋʋ yɔ, mba pataŋ tamasɩ kɩdɛkɛdɩsɩ yɔ, mba paañaŋ pa-lʋlɩyaa yɔ,+
31 mba pɛfɛyɩnɩ tɔm taa nɩʋ lɛɣtʋ yɔ,+ mba paaɖɔŋ pɔ-tɔm yɔɔ yɔ, mba pɛfɛyɩnɩ sɔɔlɩm yɔ, nɛ mba paanaɣ pʋtɔdɩyɛ yɔ.
32 Paa ɛyaa mba, pasɩm Ɛsɔ paɣtʋ siɣsiɣ ñɩndʋ camɩyɛ, se mba palakɩ lakasɩ nzɩ yɔ pamʋnɩ sɩm yɔ,+ pɩtɩsɩɩna se pɛwɛɛ nɛ palakɩ lakasɩ nzɩ, ɛlɛ pa-taa lakɩ leleŋ ɖɔɖɔ nɛ mba palakɩ-sɩ yɔ.
Pɩ-tɛɛ tɔm
^ Piye piye, «nɛ men-fezuu.»
^ Yaa «mba patɩkɛ Grɛɛkɩ mba yɔ.»
^ Piye piye, «ɛɛɖazɩɣ.»
^ Yaa «pɛsɛɛ.»
^ Yaa «nɛ palabɩ-tʋ tʋmɩyɛ kiɖeɖeye.»
^ Yaa «nɩŋgbaŋʋʋ hɔm.»
^ Yaa «Patitisi se pɛwɛɛnɩ Ɛsɔ sɩmtʋ toovenim ñɩndʋ.»
^ Yaa «ɛsɩyɛ ɖʋʋ.»
