Ɛzɩ Luka kɛdʋʋ yɔ 23:1-56
23 Ðɩnɛ ɛlɛ, ɛyaa samaɣ tɩŋa kʋyɩ nɛ kowoni-i Pilaatɩ cɔlɔ.+
2 Nɛ papaɣzɩ ɛ-tɔm kʋʋ+ nɛ pɔtɔŋ se: «Ðɩna abalʋ ɛnɛ ɛwɛɛ nɛ ɛɖʋzʋʋ ɖɛ-ɛjaɖɛ, ekiziɣni ɛyaa se pataahɛyɩ Sezaarɩ lambuu,+ nɛ ɛtɔŋ se ɛ-maɣmaɣ ɛkɛ Krɩstʋ, wiyaʋ.»+
3 Ðɩnɛ ɛlɛ Pilaatɩ pɔzɩ-ɩ se: «Ñɛkɛnɩ Yuuda mba Wiyaʋ yaa we?» Ecosi-i nɛ ɛtɔ se: «Ña-maɣmaɣ ñɔtɔŋnɩ mbʋ.»+
4 Nɛ Pilaatɩ heyi cɔjɔnaa sɔsaa nɛ ɛyaa samaɣ se: «Maanaɣ kɩdɛkɛdɩm nabʋyʋ abalʋ ɛnɛ ɛ-yɔɔ.»+
5 Ɛlɛ pañɩŋ nɛ pɔtɔŋ se: «Ɛwɩlɩɣ tɔm Yuudee tɩŋa taa nɛ eseɣtiɣ ɛyaa samaɣ se kala ñam ñam lakasɩ, ɛpaɣzɩnɩ Galilee nɛ halɩ ɛkɔɔ ɛtalɩ cɩnɛ.»
6 Pilaatɩ nɩ-tʋ lɛ, ɛpɔzɩ se ɛna se abalʋ ɛnʋ ɛkɛ Galilee tʋ na.
7 Ɛñɩnaa nɛ ɛna se ɛlɩnɩ egeetiye nɖɩ ɖɩ-yɔɔ Eroodi tɔkaɣ kewiyitu yɔ ɖɩ-taa lɛ,+ etiyini-i Eroodi; nɛ ɛlɛ kaawɛ ɖɔɖɔ Yeruzalɛm alɩwaatʋ ndʋ tɩ-taa.
8 Eroodi na Yesu lɛ, ɛ-taa la leleŋ pɩdɩɩfɛyɩ. Mbʋ pʋyɔɔ yɔ pɩlabɩ alɩwaatʋ sakɩyɛ, ɛñɩnaɣ se ɛna Yesu, mbʋ pʋyɔɔ yɔ ɛnɩ tɔm sakɩyɛ ɛ-yɔɔ,+ nɛ ɛɛɖaŋaa se ɛla maamaaci lakasɩ nasɩyɩ nɛ ɛna.
9 Pʋyɔɔ ɛpaɣzɩ-ɩ tɔm sakɩyɛ pɔzʋʋ, ɛlɛ Yesu ticosi-i natʋyʋ.+
10 Paa mbʋ yɔ, cɔjɔnaa sɔsaa nɛ takayɩsɩ mayaa paawɛɛ pakʋyʋʋ nɛ pakʋʋ ɛ-tɔm nɛ pana.
11 Nɛ Eroodi nɛ ɛ-sɔɔjanaa penimi-i,+ nɛ esuu-i toko kɩbaŋʋ nakʋyʋ nɛ ewoŋi-i;+ nɛ pʋwayɩ lɛ, ɛpɩsɩnɩ-ɩ Pilaatɩ cɔlɔ.
12 Eroodi nɛ Pilaatɩ papɩsɩ taabalaa kɩyakʋ ŋgʋ ki-wiye maɣmaɣ, mbʋ pʋyɔɔ yɔ ɖooo lɛ, paakɛ koyindinaa.
13 Nɛ Pilaatɩ yaa cɔjɔnaa sɔsaa, ñʋndɩnaa nɛ ɛyaa samaɣ nɛ pekpeɣli
14 nɛ eheyi-wɛ se: «Ɩkɔnɩ-m abalʋ ɛnɛ se ɛwɛɛ nɛ eseɣtiɣ ɛyaa se pala ñam ñam lakasɩ. Ɛlɛ ɩna! Mɔnpɔzɩ-ɩ tɔm mɩ-ɛsɩndaa, nɛ mantɩna mbʋ ɩtɔŋ se abalʋ ɛnɛ ɛwɛɛkaa yɔ.+
15 Toovenim taa lɛ, Eroodi ɖɔɖɔ tɩna mbʋ ɛwɛɛkaa yɔ, mbʋ pʋyɔɔ yɔ ɛpɩsɩnɩ-ɩ ɖɔ-cɔlɔ; ɛtɩla nabʋyʋ nɛ pɩpɔzɩ se ɛsɩ.
16 Pʋyɔɔ lɛ, mɔhɔŋ ɛ-nɩŋgbaŋʋʋ+ nɛ meyebi-i.»
17 *——
18 Ɛlɛ ɛyaa samaɣ tɩŋa ma kubuka se: «Kʋ abalʋ ɛnɛ,* nɛ ŋyele-ɖʋ Baraabaasɩ!»+
19 (Paatɔ Baraabaasɩ salaka, mbʋ pʋyɔɔ yɔ ɛɛɖʋ nesi nɛ pala ñam ñam lakasɩ tɛtʋ taa nɛ ɛtɛ ɛkʋ ɛyʋ.)
20 Pilaatɩ tasɩ-wɛ yɔɔdɩnʋʋ, mbʋ pʋyɔɔ yɔ ɛñɩnaɣ se eyele Yesu.+
21 Peeɖe papaɣzɩ kubusi mabʋ nɛ pɔtɔŋ se: «Kamɩ-ɩ sizika yɔɔ! Kamɩ-ɩ sizika yɔɔ!»+
22 Ɛpɔzɩ-wɛ nabudozo ɖeɖe se: «Ɛbɛ yɔɔ? Kɩdɛkɛdɩm mbʋ abalʋ ɛnɛ ɛlaba? Mantɩna nabʋyʋ ɛ-yɔɔ nɛ pɩpɔzɩ se ɛsɩ. Pʋyɔɔ lɛ, mɔhɔŋ ɛ-nɩŋgbaŋʋʋ nɛ meyebi-i.»
23 Ɛyɔɔdɩ mbʋ lɛ pañɩŋ, nɛ pamakɩ kubusi nɛ pɔtɔŋ se ɛkʋ-ɩ,* nɛ pɔ-nɔsɩ tɛzɩ kpaʋ ɖoŋ nɛ pawa.+
24 Piyeba nɛ Pilaatɩ kpaɣ lɩmaɣzɩyɛ se ɛlakɩ-wɛ mbʋ pɔpɔzʋʋ yɔ.
25 Eyele abalʋ weyi pɔpɔzaa yɔ, weyi paaɖʋ-ɩ salaka mbʋ pʋyɔɔ yɔ ɛɛɖʋ nesi nɛ pala ñam ñam lakasɩ tɛtʋ taa nɛ ɛtɛ ɛkʋ ɛyʋ yɔ, ɛlɛ ɛɖʋzɩ Yesu pe-nesi tɛɛ se palabɩ-ɩ mbʋ pɔsɔɔlaa yɔ.
26 Pakpaɣ-ɩ nɛ pɛɖɛɣ lɛ, pakpa Siirɛɛnɩ abalʋ nɔɔyʋ nɛ pasʋʋ-ɩ nazɩm sizika* se ɛhɔɔlɩ-kɛ nɛ ɛtɩŋ Yesu wayɩ, ɛɛlɩnɩ kɔfɩ taa, payaɣ-ɩ se Siimɔɔ.+
27 Ɛyaa samaɣ sɔsɔɔ nakɛyɛ wɛɛ nɛ katɩŋɩɣ-ɩ, pɩkpɛndɩnɩ halaa mba paawɛɛ nɛ panɩɣ siziŋ nɛ pamakɩ pa-laŋa taa nɛ pepeendiɣ ɛ-yɔɔ yɔ.
28 Yesu kɛzɩ ɛ-tɩ nɛ halaa mba pɔ-yɔɔ nɛ ɛtɔ se: «Yeruzalɛm pɛlaa, iyele wiu mɔ-yɔɔ. Ɛlɛ iwii mɩ-maɣmaɣ mɩ-yɔɔ nɛ mi-piya yɔɔ;+
29 mbʋ pʋyɔɔ yɔ ɩna, kɩyakɩŋ kaɣ kɔm, nɛ ɛyaa kaɣ yɔɔdʋʋ se: “Koboyaɣ tɩnaa kɛlɛ kaalʋlɩsɩ, nɛ halaa mba patɩlʋlɩ piya nɛ mba patɩha pɩɣa hɩɖɛ yɔ!”+
30 Ðɩnɛ ɛlɛ pakaɣ paɣzʋʋ heyuu pʋŋ se: “Ɩtɔlɩ ɖɔ-yɔɔ,” nɛ peheyi piyisi se: “Ihuuzi ɖɔ-yɔɔ!”+
31 Ye palakɩ mbʋ alɩwaatʋ ndʋ tɩʋ wɛnɩ kɩ-lɛŋ yɔ, ɛbɛ kaɣ labʋ alɩwaatʋ ndʋ kɩwɩlɩɣ yɔ?»
32 Powoni ɖɔɖɔ abalaa 2 mba paakɛ kɩdɛkɛdɩm laɖaa yɔ, se pɛkpɛndɩ ɛ nɛ wɛ nɛ pakʋ.+
33 Nɛ patalɩ lone nɖɩ payaɣ se Ñʋmbɔɔyaɣ yɔ ɖɩ-taa lɛ,+ pakamɩ-ɩ sizika yɔɔ, ɛ nɛ kɩdɛkɛdɩm laɖaa mba, kʋɖʋm e-nesi kɩbanzɩ yɔɔ nɛ lɛlʋ ɛ-nɩmɩyɛ yɔɔ.+
34 Ɛlɛ Yesu tɔŋaɣ se: «Caa, kpeɣ-wɛ, mbʋ pʋyɔɔ yɔ paasɩŋ mbʋ peɖiɣni labʋ yɔ.» Pɩtasɩ lɛ, pɔtɔ piye nɛ patayɩ e-tokonaa.+
35 Nɛ ɛyaa samaɣ sɩŋ nɛ kɔcɔŋna. Ɛlɛ ñʋndɩnaa wɛɛ nɛ powoŋuu nɛ pɔtɔŋ se: «Ɛyabɩ lalaa ñʋʋ; ye ɛkɛ Krɩstʋ, weyi Ɛsɔ lɩzaa yɔ yɔ, ɛya ɛ-maɣmaɣ ɛ-ñʋʋ.»+
36 Halɩ sɔɔjanaa woŋi-i, nɛ powolo nɛ paha-ɩ vɛɛ ŋgʋ kɩwɛ ñɩmɩŋ yɔ+
37 nɛ pɔtɔŋ se: «Ye ŋkɛ Yuuda mba Wiyaʋ yɔ, ya ña-maɣmaɣ ña-ñʋʋ.»
38 Pama ɖɔɖɔ tɔm natʋyʋ nɛ paka ɛ-ñʋʋ yɔɔ, ndʋ yɔ: «Yuuda mba Wiyaʋ kɔyɔ.»+
39 Kɩdɛkɛdɩm laɖaa mba paakam peeɖe yɔ, pa-taa kʋɖʋm paɣzɩ-ɩ yɔɔdʋʋ tɔm kɩdɛkɛdɩtʋ+ nɛ ɛtɔŋ se: «Ŋkɛ Krɩstʋ, yaa we? Ya ña-maɣmaɣ ña-ñʋʋ nɛ ŋya ɖa ɖɔɖɔ ɖa-ñɩŋgʋ!»
40 Lɛlʋ kalɩ-ɩ nɛ ɛtɔ se: «Pɔhɔm ña-nɩŋgbaŋʋʋ ɖɔɖɔ ɛzɩ ɛnʋ yɔ, ɛlɛ ŋŋseɣ Ɛsɔ sɔɔndʋ paa ññɩɩ?
41 Ða lɛ, ɖɩmʋnɩ nɩŋgbaŋʋʋ hɔm pʋnɛ, mbʋ pʋyɔɔ yɔ mbʋ ɖɩlaba yɔ, pɩ-kɩhɛyʋʋ ɖɩwɛɛ nɛ ɖɩmʋʋ; ɛlɛ abalʋ ɛnɛ ɛtɩla kɩdɛkɛdɩm nabʋyʋ.»
42 Ðɩnɛ ɛlɛ, ɛtɔ se: «Yesu, tɔzɩ mɔ-yɔɔ alɩwaatʋ ndʋ ŋsʋʋ ñe-Kewiyaɣ taa yɔ.»+
43 Nɛ Yesu heyi-i se: «Toovenim taa lɛ sɔnɔ meheyiɣ-ŋ se, ma nɛ ŋ ɖɩkaɣ wɛʋ Paradisuu taa.»+
44 Alɩwaatʋ ndʋ lɛ, pɩɩkɛ ɛzɩ wɩsɩ taa ñɩɣtʋ 12 yɔɔ mbʋ yɔ,* ɛlɛ cɩkpɛndʋʋ yu tɛtʋ tɩŋa taa nɛ pɩkɔɔ pɩtalɩ wɩsɩ wɛlʋʋ ñɩɣtʋ 3 yɔɔ mbʋ yɔ,*+
45 mbʋ pʋyɔɔ yɔ wɩsɩ ñalɩmɩyɛ ɖɩma; ɖɩnɛ ɛlɛ kooka kiɖeɖeɣa taa pɩsaʋ kikenduu+ cɩyɩ hɛkʋ taa hɔɔlɩŋ naalɛ.+
46 Nɛ Yesu ma kubuka sɔsɔɔ nakɛyɛ nɛ ɛtɔ se: «Caa, manɖʋzʋʋ men-fezuu ñe-nesi tɛɛ.»+ Ɛyɔɔdɩ mbʋ lɛ, ɛsɩ.*+
47 Sɔɔja sɔsɔ na mbʋ pɩlaba yɔ lɛ, ɛpaɣzɩ Ɛsɔ sam nɛ ɛtɔŋ se: «Toovenim taa lɛ, abalʋ ɛnɛ ɛɛwɛ siɣsiɣ.»+
48 Nɛ ɛyaa kpeekpe mba paakpeɣli peeɖe se pɔcɔnɩ mbʋ piɖiɣni labʋ yɔ, pana mbʋ pɩlaba yɔ lɛ, pɛwɛɛ nɛ pamakɩ pa-laŋa taa nɛ pekpeŋ pɛ-tɛ.
49 Nɛ mba payɩ paasɩmɩ-ɩ yɔ, pasɩŋ poliŋ taa. Pɩtasɩ lɛ, halaa mba paasɩ-ɩ kpaɣnɩ Galilee yɔ, paawɛ peeɖe nɛ pana mbʋ pɩlaba yɔ.+
50 Nɛ na, payaɣaɣ abalʋ nɔɔyʋ se Yosɛɛfʋ, ɛɛkɛ Ɛsɔ sɛtʋ tɔm ɖɩhʋyɛ* taa tʋ nɔɔyʋ, nɛ ɛɛkɛ ɖɔɖɔ ɛyʋ kɩbanʋ nɛ siɣsiɣ tʋ.+
51 (Abalʋ ɛnʋ, ɛtaaɖʋ ɛ-nɔɔ pa-tamaɣ nɛ pa-lakasɩ taa.) Ɛɛlɩnɩ Yuudee mba tɛtʋ ndʋ payaɣ se Ariimatee yɔ tɩ-taa, nɛ ɛɛɖaŋ Ɛsɔ Kewiyaɣ.
52 Abalʋ ɛnʋ, ewolo Pilaatɩ cɔlɔ nɛ ɛpɔzɩ se pɛcɛlɩ-ɩ Yesu tomnaɣ.
53 Nɛ etisi-kɛ+ nɛ ɛhɔkɩ-kɛ pɩsaʋ kɩbaŋʋ nakʋyʋ taa, nɛ ɛhɩzɩ-kɛ pɩlaʋ* nakʋyʋ taa; pohuyi pɩlaʋ ŋgʋ kaaʋ taa+ nɛ pataapimti nɔɔyʋ kɩ-taa.
54 Pɩɩkɛ Sabaatɩ Ñɔɔzʋʋ kɩyakʋ wiye,+ nɛ Sabaatɩ+ caɣaɣ paɣzʋʋ.
55 Ɛlɛ halaa mba paatɩŋ Yesu wayɩ kpaɣnɩ Galilee yɔ, powolo ɖɔɖɔ nɛ pana pɩlaʋ* nɛ ɛzɩma pahɩzɩ e-tomnaɣ yɔ,+
56 nɛ papɩsɩ se pɔñɔɔzɩ sɔzɩŋ kɔ nɛ sɔzɩŋ num. Ɛlɛ pɛhɛzɩ Sabaatɩ wiye,+ ɛzɩ paɣtʋ pɔzʋʋ yɔ.
Pɩ-tɛɛ tɔm
^ Cɔnɩ Tɔm kɩsɔzɩtʋ A3.
^ Piye piye, «Kʋsɩ abalʋ ɛnɛ.»
^ Yaa «ɛkamɩ-ɩ sizika yɔɔ.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, «ɛzɩ ñɩɣyʋʋ 6 ñɩŋgʋ yɔɔ mbʋ yɔ.»
^ Piye piye, «pɩtalɩ ñɩɣyʋʋ 9 ñɩŋgʋ yɔɔ.»
^ Yaa «etisi ɛ-kɛdɛzaɣ fezuu.»
^ Yaa «ɛɛkɛ Sahedrɛɛ.»
^ Yaa «pɩlaʋ ŋgʋ kɩ-yɔɔ pɔtɔzʋʋ yɔ.»
^ Yaa «pɩlaʋ ŋgʋ kɩ-yɔɔ pɔtɔzʋʋ yɔ.»
