Ɛzɩ Luka kɛdʋʋ yɔ 10:1-42
10 Pʋwayɩ lɛ, Kɩbaɣlʋ lɩzɩ ɛyaa 70 lalaa nɛ etiyi-wɛ naalɛ naalɛ+ se pɛɖɛɛ-ɩ nɔɔ tɛtʋ nɛ lona ndɩ ndɩ wena a-taa ɛ-maɣmaɣ ɛkaɣ wobu yɔ.
2 Nɛ eheyi-wɛ se: «Ɛɛɛ, kʋmtʋ ɖɔwa, ɛlɛ tʋmlaɖaa wɛ ññɩɩ. Pʋyɔɔ lɛ, itendi hayɩm Tʋ se etiyini tʋmlaɖaa ɛ-hayɩm taa.+
3 Iwolo! Mentiyiɣ-mɩ ɛzɩ heŋ yɔ ñɩtʋ taa hasɩ* hɛkʋ taa.+
4 Ɩtaakpɛndɩnɩ liidiye huyuu yaa tɔɔnaɣ huyuu yaa naataŋgbala,+ nɛ ɩtaasɛɛ nɔɔyʋ* nʋmɔʋ taa.
5 Ɩsʋ ɖɩɣa nakɛyɛ taa lɛ, ɩcalɩ yɔɔdʋʋ se: “Laŋhɛzɩyɛ ɛwɛɛ ɖɩɣa kanɛ kɔ-yɔɔ.”+
6 Nɛ ye laŋhɛzɩyɛ taabalʋ nɔɔyʋ ɛwɛ peeɖe yɔ, mɩ-laŋhɛzɩyɛ kaɣ wɛʋ ɛ-yɔɔ. Ɛlɛ ye laŋhɛzɩyɛ taabalʋ nɔɔyʋ ɛfɛyɩ yɔ, mɩ-laŋhɛzɩyɛ kaɣ pɩsʋʋ mɩ-yɔɔ.
7 Ɩcaɣ ɖɩɣa ŋga ka-taa,+ ɩtɔkɩ nɛ ɩñɔʋ mbʋ pɛcɛlɩɣ-mɩ yɔ,+ mbʋ pʋyɔɔ yɔ tʋmlaɖʋ mʋnɩ ɛ-kɩhɛyʋʋ.+ Ɩtaawɛɛ nɛ ɩkɛɣ ɖɩsɩ ndɩ ndɩ taa.
8 «Pɩtasɩ lɛ, ye ɩsʋ tɛtʋ natʋyʋ taa nɛ pamʋ-mɩ yɔ, ɩtɔɔ mbʋ pasɩɣ mɩ-ɛsɩndaa yɔ
9 nɛ ɩwaa kʋdɔndɩnaa mba pɛwɛ peeɖe yɔ pa-kʋdɔmɩŋ nɛ iheyi-wɛ se: “Ɛsɔ Kewiyaɣ ñɔtɩnɩ-mɩ.”+
10 Ɛlɛ ye ɩsʋ tɛtʋ natʋyʋ taa nɛ patɩmʋ-mɩ yɔ, ɩlɩɩ tɛtʋ ndʋ tɩ-habɛɛ sɔsɔna yɔɔ nɛ ɩtɔ se:
11 “Ðikpiziɣ mɩ-yɔɔ halɩ pɩkpɛndɩnɩ mʋzʋʋ ŋgʋ kɩkpa ɖa-nɩŋgbanzɩ yɔɔ mɩ-tɛtʋ taa yɔ,+ ɛlɛ ɩtɩlɩ se Ɛsɔ Kewiyaɣ ñɔtaa.”
12 Meheyiɣ-mɩ se pɩkaɣ wɛʋ Sodom tɛtʋ weewee kɩyakʋ ŋgʋ ki-wiye nɛ pɩkɩlɩ tɛtʋ ndʋ.+
13 «Pɩtɔɔ-ŋ, Koraaziini! Pɩtɔɔ-ŋ, Bɛtɩsayidaa! mbʋ pʋyɔɔ yɔ, maamaaci lakasɩ nzɩ palabɩ mɩ-tɛ yɔ, ye Tiirɩ nɛ Siidɔɔ taa paalabɩ-sɩ yɔ, pa-taa mba kaakpiɖi pa-kɩwɛɛkɩm yɔɔ ɖooo lɔŋ, paasu fɔlɔtɔnaa nɛ pacaɣ tɔlɩma taa.+
14 Pʋyɔɔ lɛ, pɩkaɣ wɛʋ Tiirɩ nɛ Siidɔɔ weewee tɔm hʋʋ taa nɛ pɩkɩlɩ-mɩ.
15 Piyele nɛ ña Kapɛrɩnawum, ŋmaɣzɩɣ se pakaɣ-ŋ kpazʋʋ ɛsɔdaa? Ðooo Pɩlaʋ* taa ŋkaɣ tibu!
16 «Weyi ewelisiɣni-mɩ yɔ, ewelisiɣni-m.+ Nɛ weyi ekiziɣ-mɩ yɔ ekiziɣ-m ɖɔɖɔ. Pɩtasɩ lɛ, weyi ekiziɣ-m yɔ, ekiziɣ ɖɔɖɔ Weyi etiyi-m yɔ.»+
17 Nɛ 70 pɩsɩ pɔkɔmnɩ taa leleŋ nɛ pɔtɔŋ se: «Kɩbaɣlʋ, halɩ aleewaa luzi pa-tɩ ɖɛ-tɛɛ alɩwaatʋ ndʋ ɖɩlabɩnɩ ña-hɩɖɛ tʋmɩyɛ yɔ.»+
18 Ðɩnɛ ɛlɛ eheyi-wɛ se: «Mana Sataŋ, ɛtɛm lɩnʋʋ ɛsɔdaa nɛ ɛtɔlɩ+ ɛzɩ tɛʋ ñɩlɩsʋʋ yɔ.
19 Ɩna! Maha-mɩ ɖoŋ se ɩfɛyɩ ɖʋmaa nɛ pɩjɩsɩ, nɛ maha-mɩ ɖoŋ koyindu ɖoŋ tɩŋa yɔɔ,+ nɛ nabʋyʋ ɛɛkaɣ-mɩ kɔnʋʋ kaɖɛ kpa.
20 Paa mbʋ yɔ, mɩ-taa ɛtaala leleŋ se feziŋ luzi ɩ-tɩ mɩ-tɛɛ, ɛlɛ mɩ-taa ɛla leleŋ se pama mɩ-hɩla ɛsɔdaa.»+
21 Ñɩɣyʋʋ ŋgʋ kɩ-yɔɔ ɖeyi ɖeyi lɛ, Yesu mɛyɩ amɛya fezuu kiɖeɖeu taa nɛ ɛtɔ se: «Mansaŋɩ-ŋ ɛyaa ɛsɩndaa, Caa, ɛsɔdaa nɛ tɛtʋ pa-Kɩbaɣlʋ, mbʋ pʋyɔɔ yɔ ŋmɛsɩ pʋnɛ camɩyɛ lɔŋsɩnɖaa nɛ lɛɣtʋ tɩnaa,+ nɛ ŋkuli pɩ-yɔɔ nɛ ŋwɩlɩ piya ajamaa. Ɛɛɛ, hayɩ Caa, mbʋ pʋyɔɔ yɔ mbʋ pɩkɛdɩnɩ-ŋ lɛ lɛ.+
22 Man-Caa ɖʋzɩ pɩtɩŋa payɩ me-nesi tɛɛ, nɛ nɔɔyʋ ɛɛsɩŋ weyi Pɩyalʋ kɛnaa yɔ ye pɩtɩkɛ Caa yɔ, nɛ nɔɔyʋ ɛɛsɩŋ weyi Caa kɛnaa yɔ ye pɩtɩkɛ Pɩyalʋ+ nɛ weyi Pɩyalʋ sɔɔlaa se ekuli Caa yɔɔ nɛ ɛwɩlɩ-ɩ yɔ.»+
23 Ðɩnɛ ɛlɛ, ɛpɩsɩnɩ tɔmkpɛlɩkɩyaa yɔɔ nɛ eheyi pe-ɖeke se: «Koboyaɣ tɩnaa kɛlɛ mba pɛ-ɛsa naɣ mbʋ iɖiɣni naʋ yɔ.+
24 Mbʋ pʋyɔɔ yɔ, meheyiɣ-mɩ se nayaa nɛ awiya sakɩyɛ kaasɔɔlaa se pana mbʋ iɖiɣni naʋ yɔ, ɛlɛ patɩna-pʋ;+ nɛ paasɔɔlaa ɖɔɖɔ se panɩɩ tɔm ndʋ iɖiɣni nɩʋ yɔ, ɛlɛ patɩnɩɩ-tʋ.»
25 Nɛ na, Paɣtʋ sɩnɖʋ nɔɔyʋ kʋyɩ se ɛtakɩ-ɩ, nɛ ɛpɔzɩ-ɩ se: «Wɩlɩyʋ, ɛbɛ pɩwɛɛ se mala nɛ mehiɣ wezuu maatɛŋ?»+
26 Yesu pɔzɩ-ɩ se: «Suwe pama Paɣtʋ taa? Ɛzɩma ŋnɩɣ tɔm ndʋ ŋkalaa yɔ tɩ-taa?»
27 Ecosi se: «“Sɔɔlɩ ñɛ-Ɛsɔ Yehowa* nɛ ña-laŋɩyɛ pilim nɛ ña-kalɩzaɣ* pilim nɛ ño-ɖoŋ pilim nɛ ña-maɣzɩm pilim”+ nɛ ŋsɔɔlɩ “ɛyʋ lɛlʋ* ɛzɩ ña-maɣmaɣ yɔ.”»+
28 Eheyi-i se: «Ŋcosi camɩyɛ; wɛɛ nɛ ŋlakɩ mbʋ nɛ ŋkaɣ hiɣu wezuu.»+
29 Ɛlɛ abalʋ ɛnʋ ɛñɩnaɣ se ɛwɩlɩ se ɛwɛ siɣsiɣ lɛ,+ ɛpɔzɩ Yesu se: «Anɩ ɖeyi ɖeyi lɛ man-taabalʋ?»*
30 Yesu cosi-i se: «Abalʋ nɔɔyʋ lɩnɩ Yeruzalɛm nɛ etiki Yeriikoo nɛ ɛtɔlɩ mɩlaa sɔsaa nabɛyɛ nesi tɛɛ, pɛlɛɣ e-wondu kpeekpe, pamabɩ-ɩ nɛ efiɣni nɛ pɛɖɛɛ peyebi-i.
31 Nɛ pɩla se cɔjɔ nɔɔyʋ ɖɔŋaɣ nʋmɔʋ ŋgʋ kɩ-taa nɛ etiki, nɛ ɛna-ɩ lɛ, ɛkɛɛ nʋmɔʋ hɔɔlʋʋ lɛɛkʋ yɔɔ nɛ ɛɖɛɛ.
32 Mbʋ ɖɔɖɔ Leevi tʋ nɔɔyʋ talɩ lone nɖɩ ɖɩ-taa nɛ ɛna-ɩ lɛ, ɛkɛɛ nʋmɔʋ hɔɔlʋʋ lɛɛkʋ yɔɔ nɛ ɛɖɛɛ.
33 Ɛlɛ Samaarii tʋ nɔɔyʋ+ ɖɔŋaɣ nʋmɔʋ ŋgʋ kɩ-taa nɛ ɛlɩɩ ɛ-yɔɔ; nɛ ɛna-ɩ lɛ, pɩlabɩ-ɩ pʋtɔdɩyɛ.
34 Peeɖe ɛñɔtɩnɩ-ɩ nɛ ɛɖʋ num nɛ vɛɛ e-heŋ taa nɛ ɛhɔkɩ. Nɛ ɛkpaɣ-ɩ nɛ ɛcaɣzɩ-ɩ ɛ-maɣmaɣ ɛ-kpɩnɛ yɔɔ nɛ ewoni-i agɔma ɖɩɣa nakɛyɛ taa nɛ ɛcɔnɩ ɛ-yɔɔ.
35 Tɛʋ fema lɛ, ɛlɩzɩ dinaarɩwaa* 2, ɛcɛlɩ-wɛ agɔma ɖɩɣa yɔɔ cɔnɩyʋ nɛ ɛtɔ se: “Cɔnɩ ɛ-yɔɔ, nɛ mbʋ payɩ ŋlakɩ nɛ pɩɖɛɛ liidiye ɖɩnɛ ɖɩ-yɔɔ yɔ, mankaɣ-ŋ pʋ hɛyʋʋ alɩwaatʋ ndʋ manpɩsɩɣ yɔ.”
36 Pa-naadozo pa-taa anɩ ŋmaɣzɩɣ se ɛkɛ weyi ɛtɔlɩ mɩlaa sɔsaa nesi tɛɛ yɔ ɛ-taabalʋ?»*+
37 Ecosi-i se: «Weyi ɛna ɛ-pʋtɔdɩyɛ yɔ.»+ Peeɖe Yesu heyi-i se: «Wolo nɛ ña-ɖɔɖɔ ŋla mbʋ.»+
38 Nɛ pɛwɛɛ nɛ pɔɖɔŋ pa-nʋmɔʋ lɛ, Yesu talɩ tɛtʋ cikpetu natʋyʋ taa. Nɛ halʋ nɔɔyʋ mʋ-ɩ ɛgɔndʋ ɛ-ɖɩɣa taa, payaɣ-ɩ se Maarta.+
39 Ɛɛwɛnɩ ɖɔɖɔ neu halɩñɩnʋ nɔɔyʋ, payaɣ-ɩ se Maarɩɩ; nɛ ɛlɛ kaacaɣ Kɩbaɣlʋ nɩŋgbanzɩ tɛɛ nɛ ɛwɛɛ nɛ ewelisiɣ tɔm ndʋ Kɩbaɣlʋ yɔɔdaɣ yɔ.*
40 Piyele nɛ Maarta ɛsɩyɛ ñaasɛnɩ tʋma sakɩyɛ labʋ. Pʋyɔɔ ɛñɔtɩnɩ Yesu nɛ ɛtɔ se: «Kɩbaɣlʋ, piiheyiɣ-ŋ natʋyʋ se me-neu yebini men-ɖeke tʋma na? Heyi-i se ɛkɔɔ nɛ ɛsɩnɩ-m.»
41 Kɩbaɣlʋ cosi-i nɛ ɛtɔ se: «Maarta, Maarta, ŋnɩɣzɩɣ nɛ ŋyɔkʋʋ ña-ñʋʋ wondu sakɩyɛ yɔɔ.
42 Wondu pazɩ yem tɔm cɛyɩna, yaa pʋyʋ kʋɖʋm ɖeke. Piyele nɛ Maarɩɩ yɔ, ɛlɩzɩ kɩbam ɖeɖe*+ nɛ paakaɣ-pʋ mʋʋ ɛ-cɔlɔ.»
Pɩ-tɛɛ tɔm
^ Ñɩtʋ taa hasɩ kɛ kpɩna wena awɛ patʋ siŋŋ nɛ atɔkɩ kpɩna lɛɛna yɔ.
^ Yaa «nɛ itaakpiikini nɔɔyʋ se ɩsɛɣ-ɩ.»
^ Yaa «Hadɛɛsɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Cɔnɩ Tɔm kɩsɔzɩtʋ A5.
^ Cɔnɩ Tɔm pee sɔsɔna tɔbʋʋ lɩzʋʋ.
^ Tɔm piye nɖɩ palabɩnɩ tʋmɩyɛ Grɛɛkɩ taa yɔ ɖɩpɩzɩɣ nɛ ɖɩwɩlɩ se pɩkɛ ñɔ-cɔlɔ tʋ.
^ Tɔm piye nɖɩ palabɩnɩ tʋmɩyɛ Grɛɛkɩ taa yɔ ɖɩpɩzɩɣ nɛ ɖɩwɩlɩ se pɩkɛ ñɔ-cɔlɔ tʋ yaa ɛyʋ lɛlʋ.
^ Cɔnɩ Tɔm kɩsɔzɩtʋ B14.
^ Tɔm piye nɖɩ palabɩnɩ tʋmɩyɛ Grɛɛkɩ taa yɔ ɖɩpɩzɩɣ nɛ ɖɩwɩlɩ se pɩkɛ ñɔ-cɔlɔ tʋ yaa ɛyʋ lɛlʋ.
^ Piye piye, «ewelisiɣ ɛ-tɔm.»
^ Yaa «hɔɔlʋʋ ŋgʋ kɩkɩlɩ ɖeu yɔ.»
