Izaayii 65:1-25
65 «Meyeba nɛ mba patɩpɔzɩ mɔ-yɔɔ yɔ, pañɩnɩ-m;Meyeba nɛ mba pataañɩnɩɣ-m yɔ, pana-m.+
Meheyi ɛjaɖɛ nɖɩ ɖɩtaayaɣ ma-hɩɖɛ yɔ se: “Ma yɔ, ma yɔ!”+
2 Monposi me-nesi evemiye kpeekpe samaɣ ŋga ka-ñʋʋ taa wɛ ɖoŋ yɔ kɔ-yɔɔ kiŋ,+Mba pɛwɛɛ nɛ pɔɖɔŋ nʋmɔʋ ŋgʋ kɩtɩkɛ kɩbaŋʋ yɔ kɩ-taa,+Nɛ patɩŋɩɣ pa-maɣmaɣ pa-maɣzɩm yɔ;+
3 Samaɣ ŋga kaɖʋʋ-m ɖɩwɩzɩyɛ kaɣlaa tam yɔ,+Nɛ kalaɣ kɩlaŋ kaɖasɩ taa+ nɛ kalaɣ filikinaa yɔɔ kɩlaŋ nɛ ñɔsɩ kpaɣ yɔ.
4 Pacakɩ pɩlaŋ hɛkʋ taa,+Nɛ ɖoo taa lɛ pasʋʋ mɛsaɣ tɛɛ lona taa,*Nɛ pɔtɔkɩ afa nandʋ,+Nɛ mbʋ pɩkɛ azuluma pʋyʋ yɔ* pi-yom* wɛ pa-ñanzɩ taa.+
5 Pɔyɔɔdʋʋ se: “Caɣ ɖenɖe ŋwɛɛ yɔ; taañɔtɩnɩ-m,Mbʋ pʋyɔɔ yɔ mankpaɖɩ-ŋ wɛʋ kele kele.”*
Pɛkɛ ñɔsɩ mɔ-mɔɔŋ tɛɛ, miŋ weyi ɩwɛɛ nɛ ɩmʋʋ evemiye kpeekpe yɔ.
6 Ɩna! Pama-tʋ mɛ-ɛsɩndaa;Maakaɣ sum,Ɛlɛ mankaɣ-wɛ hɛyʋʋ,+Mankaɣ-wɛ hɛyʋʋ mbʋ payɩ palaba yɔ pɩ-yɔɔ*
7 Pa-maɣmaɣ pa-kɩwɛɛkɩm yɔɔ nɛ pɔ-cɔzɔnaa kɩwɛɛkɩm yɔɔ ɖɔɖɔ.+
Mbʋ pʋyɔɔ yɔ palaɣaɣ kɩlaŋ pʋŋ yɔɔ nɛ ɩ-ñɔsɩ kpaɣNɛ paɖʋ-m fɛyɛ piyisi yɔɔ,+Mankaɣ calɩnʋʋ pa-nɩŋgbaŋʋʋ hɔm pa-lakasɩ kɩdɛkɛdɩsɩ kpeekpe yɔɔ,»* Yehowa yɔɔdʋʋna.
8 Tɔm tʋnɛ Yehowa yɔɔdʋʋ:
«Ɛzɩ panaɣʋ vɛɛ kɩfalʋʋ viiñi tiku taaNɛ nɔɔyʋ yɔɔdʋʋ se: “Taawɛɛkɩ-kʋ, mbʋ pʋyɔɔ yɔ kɩbam nabʋyʋ* wɛ kɩ-taa” yɔ,Mbʋ ɖɔɖɔ mankaɣ labʋ, ma-lɩmɖʋyaa yɔɔ;Maakaɣ pa-tɩŋa ɖɩzʋʋ.+
9 Mankaɣ lɩzʋʋ Yakɔɔb lʋlʋʋ taa pɩɣa* nakɛyɛNɛ Yuuda lʋlʋʋ taa weyi ɛkaɣ mʋʋ man-pʋŋ nɛ ɛpɩsɩ-ɩ ɛ-ñɩm yɔ;+Mba malɩzaa yɔ, ɛjaɖɛ kaɣ pɩsʋʋ pa-pʋyʋ,Nɛ ma-lɩmɖʋyaa kaɣ caɣʋ peeɖe.+
10 Sarɔɔnɩ+ kaɣ pɩsʋʋ heŋ ñɩtʋ ɖɩdɔɔyɛNɛ Akɔɔrɩ Fɛɛʋ*+ pɩsɩ naŋ ɖɩhɛzɩyɛ,Mbʋ mankaɣ labʋ se pɩwazɩ man-samaɣ ŋga kañɩnɩɣ-m yɔ.
11 Ɛlɛ ɩwɛ mba pɔlɔʋ Yehowa yɔ pɛ-hɛkʋ taa,+Mba pɔsɔʋ man-pʋʋ kiɖeɖeu yɔɔ yɔ,+
Mba pɔñɔɔzʋʋ taabɩlɩ Ñʋʋ Leleŋ tɛ ɛsɔ yɔ,
Nɛ mba papɩyɩɣ vɛɛ ŋgʋ pesidi-kʋ yɔ* Kʋɖʋɖʋm tɛ ɛsɔ* kɔpʋnaa taa nɛ pisuu yɔ.
12 Mbʋ ɖɔɖɔ manɖʋwa se laɣɖɛ pɩkaɣ-mɩ tɛmnʋʋ,+
Nɛ mɩ-tɩŋa ɩkaɣ luŋuu se pakʋ-mɩ,+Mbʋ pʋyɔɔ yɔ mayawa, ɛlɛ iticosi,Mɔyɔɔdaa, ɛlɛ itiwelisi;+Iwobi pɩ-yɔɔ nɛ ɩlakɩ mbʋ pɩfɛyɩ ɖeu mɛ-ɛsɩndaa yɔ,Nɛ ɩlɩzɩ mbʋ pɩtɩkɛdɩnɩ-m yɔ.»+
13 Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ:
«Ɩna! Ma-lɩmɖʋyaa kaɣ tɔɔʋ, ɛlɛ mɩ lɛ ɩkaɣ sɩbʋ ñɔɔsɩ.+
Ɩna! Ma-lɩmɖʋyaa kaɣ ñɔʋ,+ ɛlɛ mɩ lɛ lɔkɔtʋ kaɣ-mɩ kʋʋ.
Ɩna! Ma-lɩmɖʋyaa kaɣ wɛʋ amɛya taa,+ ɛlɛ mɩ lɛ fɛyɛ kaɣ-mɩ kpaʋ.+
14 Ɩna! Ma-lɩmɖʋyaa kaɣ mabʋ kubusi nɛ taa leleŋ mbʋ pʋyɔɔ yɔ pa-laŋa wɛ laŋhʋlʋmɩyɛ taa,Ɛlɛ mɩ lɛ, ɩkaɣ mabʋ kubusi mbʋ pʋyɔɔ yɔ mɩ-laŋa wɛ siziŋ taaNɛ ɩkaɣ wiu mi-fezuu wɩzasɩ yɔɔ.
15 Ɩkaɣ yebu hɩɖɛ naɖɩyɛ nɛ mɩ-wayɩ, nɛ mba malɩzaa yɔ pakaɣ-ɖɩ labɩnʋʋ tʋmɩyɛ nɛ pɔlɔʋ nɔɔ kɩdɛkɛdaɣ,Nɛ Kɩbaɣlʋ Kɩlɩm Yehowa kaɣ kʋʋ mɩ-taa paa weyi,Ɛlɛ ɛ-maɣmaɣ ɛ-lɩmɖʋyaa lɛ, ɛkaɣ-wɛ yaʋ nɛ hɩɖɛ lɛɛɖɛ;+
16 Se pɩsa nɛ weyi ɛñɩnɩɣ ɛ-tɩ wazaɣ nakɛyɛ tɛtʋ yɔɔ yɔToovenim* tɛ Ɛsɔ wazɩ-ɩ,Nɛ weyi eɖuki ɖuutu natʋyʋ tɛtʋ yɔɔ yɔEɖuuni toovenim* tɛ Ɛsɔ.+
Mbʋ pʋyɔɔ yɔ pakaɣ sɔʋ caanaʋ taa kʋñɔmɩŋ* yɔɔ;Ɩkaɣ mʋʋʋ mɛ-ɛsɩndaa.+
17 Mbʋ pʋyɔɔ yɔ, ɩna! Menɖiɣni lɩzʋʋ ɛsɔdaa kɩfalʋʋ nɛ tɛtʋ kɩfatʋ;+Nɛ paakaɣ tɔzʋʋ mbʋ pɩɖɛwa yɔ pɩ-yɔɔ,Nɛ pɩɩkaɣ ɖɔɖɔ tasʋʋ kpaʋ laŋɩyɛ taa.+
18 Pʋyɔɔ lɛ, ɩmɛyɩ nɛ ɩwɛɛ taa leleŋ taa tam mbʋ menɖiɣni lɩzʋʋ yɔ pɩ-yɔɔ.
Mbʋ pʋyɔɔ yɔ, ɩna! Menɖiɣni labʋ* Yeruzalɛm se kɩkɛ mbʋ pɩhaɣ taa leleŋ yɔ,Nɛ menɖiɣni labʋ kɩ-samaɣ se kɛkɛ mbʋ pɩhaɣ amɛya yɔ.+
19 Nɛ man-taa kaɣ labʋ leleŋ nɛ Yeruzalɛm nɛ mɛmɛyɩnɩ man-samaɣ;+Paakaɣ tasʋʋ nɩʋ kɩ-taa wiu taŋ yaa kʋñɔŋ kubusi taŋ.»+
20 «Pɩɣa cɩɩɩ nakɛyɛ ɛɛkaɣ tasʋʋ wɛʋ lone nɖɩ ɖɩ-taa se kɩyakɩŋ pazɩ ɖeke kacakɩ wezuu,Nɛ akpadɩyʋ nɔɔyʋ ɛɛkaɣ wɛʋ ɖɔɖɔ se ɛɛtɛŋ ɛ-kɩyakɩŋ.
Mbʋ pʋyɔɔ yɔ weyi ɛwɛɣnɩ pɩnzɩ 100 nɛ ɛsɩ yɔ, ɛkaɣ wɛʋ ɛyaa ɛsɩndaa ɛzɩ abalɩbɩɣa yem yɔ,Nɛ pakaɣ nɔɔ kɩdɛkɛdaɣ lɔʋ kɩwɛɛkɩm laɖʋ yɔɔ, paa ɛwɛnɩ pɩnzɩ 100 yɔ.*
21 Pakaɣ maʋ ɖɩsɩ nɛ pasʋʋ sɩ-taa,+Nɛ pakaɣ sɔʋ viiñi tɩŋ nɛ pɔtɔɔ i-pee.+
22 Paakaɣ maʋ ɖɩsɩ se nɔɔyʋ yem ɛsʋʋnɩ sɩ-taa,Nɛ paakaɣ sɔʋ ɖɔɖɔ viiñi tɩŋ se lalaa ɩtɔɔnɩ i-pee.
Mbʋ pʋyɔɔ yɔ man-samaɣ kɩyakɩŋ kaɣ wɛʋ ɛzɩ tɩʋ kɩyakɩŋ yɔ,+Nɛ mɛ-ɛyaa mba malɩzɩ-wɛ yɔ, pakaɣ nɩʋ pe-nesi tɛɛ tʋmɩyɛ leleŋ pilim.
23 Paakaɣ ñaɣʋ pana* falaa,+Nɛ paakaɣ ɖɔɖɔ lʋlʋʋ piya se sɩtɔɔ kʋñɔŋ,Mbʋ pʋyɔɔ yɔ pɛkɛ lʋlʋʋ taa ñɩma* mba Yehowa wazɩ-wɛ yɔ,+Nɛ pɩkpɛndɩnɩ pe-liɖe taa piya.+
24 Halɩ pʋcɔ nɛ payaa lɛ, mankaɣ cosuu;Alɩwaatʋ ndʋ peɖiɣni yɔɔdʋʋ nɛ patɩtɛmta yɔ, mankaɣ nɩʋ.
25 Ñɩtʋ taa haɣ* nɛ heɣa pakaɣ kpɛndʋʋ nɛ pɔtɔɔ,Mʋʋzʋʋ kaɣ tɔɔʋ ñɩtʋ* ɛzɩ nɔ abalɩñɩnʋ yɔ,+Nɛ mʋzʋʋ kaɣnɩ kɛʋ ɖʋm tɔɔnaɣ.
Paakaɣ labʋ kɩdɛkɛdɩm nabʋyʋ yaa paakaɣ kɔnʋʋ asɛyʋʋ nakʋyʋ man-pʋʋ kiɖeɖeu kpeekpe yɔɔ,»+ Yehowa yɔɔdʋʋna.
Pɩ-tɛɛ tɔm
^ Yaa «pi-yom tɔɔnasɩ.»
^ Yaa «mbʋ pɩfɛyɩ kele kele yɔ.»
^ Pɩpɩzɩɣ pɩkɛ, «pasʋʋ feŋuu coka tɛɛ.»
^ Pɩpɩzɩɣ pɩkɛ, «Mbʋ pʋyɔɔ yɔ mankaɣ-ŋ ɖɛzʋʋ men-kele kele wɛtʋ.»
^ Yaa «Mankaɣ-wɛ hɛyʋʋ pɔ-nɔkɔyʋʋ taa.»
^ Yaa «Mankaɣ-wɛ hɛyʋʋ pɔ-nɔkɔyʋʋ taa.»
^ Piye piye, «wazaɣ nakɛyɛ.»
^ Piye piye, «ɖomaɣ.»
^ Yaa «Kɛdɛɛŋa.»
^ Yaa «vɛɛ ŋgʋ kɩ-taa pesidi wondu ndɩ ndɩ yɔ.»
^ Yaa «ɛsɔ weyi ɛɖʋʋ mbʋ pɩkaɣ ɛyʋ talʋʋ e-wezuu caɣʋ taa yɔ.»
^ Yaa «Siɣsiɣ wɛtʋ.» Piye piye, «Amɛn.»
^ Yaa «siɣsiɣ wɛtʋ.» Piye piye, «Amɛn.»
^ Yaa «kala.»
^ Yaa «lɩzʋʋ.»
^ Pɩpɩzɩɣ pɩkɛ, «Nɛ weyi ɛtɩtalɩ pɩnzɩ 100 pʋcɔ nɛ ɛsɩ yɔ, ɛkaɣ wɛʋ ɛyaa ɛsɩndaa ɛzɩ weyi ɛ-yɔɔ pɔlɔ nɔɔ kɩdɛkɛdaɣ yɔ.»
^ Yaa «Paakaɣ labʋ tʋmɩyɛ nɛ kpekpeka.»
^ Piye piye, «ɖomaɣ.»
^ Ñɩtʋ taa haɣ kɛ kpɩnɛ nɖɩ ɖɩwɛ patʋ siŋŋ nɛ ɖɩtɔkɩ kpɩna lɛɛna yɔ.
^ Yaa «kesi.»
