Aduwa 8:1-36
8 Pɩtɩkɛ lɔŋsɩnɖɛ yaɣnɩ mbʋ yɔ?
Pɩtɩkɛ lɛɣtʋ kouni mbʋ yɔ?+
2 Ðɩsɩŋɩɣ lona wena akʋyaa yɔ a-taa+ nʋmɔʋ nɔɔ,Ðɩsɩŋɩɣ nʋmayasa taa.
3 Ðɩwɛ nɔnɔsɩ nzɩ siwokini tɛtʋ taa yɔ sɩ-cɔlɔ,Tɛtʋ pɔɔyɩŋ cɔlɔ,Nɛ ɖɩwɛ kubusi mabʋ yɔɔ ɖoŋ se:+
4 «Oo ɛyaa mɩ, mɩ mayaɣ;Paa anɩ* mamakɩ kubusi nɛ mayaɣ.
5 Mɩ mba ɩfɛyɩnɩ lɛɣtʋ yɔ, ɩkpɛlɩkɩ lɛɣtʋ;+Mɩ kɩmɛlɛmɩŋ, ɩñaɣ pana nɛ ɩwɛɛnɩ laŋɩyɛ nɖɩ ɖɩwɛnɩ tɔm taa nɩʋ lɛɣtʋ yɔ.
6 Iwelisi, mbʋ pʋyɔɔ yɔ tɔm ndʋ mɔyɔɔdʋʋ yɔ tɩcɛyaa,Mo-ndomee yɔɔdʋʋ tɔm ndʋ tɩtʋʋzaa yɔ;
7 Mbʋ pʋyɔɔ yɔ mɔ-nɔɔ midiɣ toovenim tɔm,Nɛ mo-ndomee paɖɩɣ tɔm kɩdɛkɛdɩtʋ yɔɔdʋʋ.
8 Tɔm ndʋ payɩ tɩlɩɣnɩ mɔ-nɔɔ taa yɔ tɩwɛ siɣsiɣ.
Tɩ-taa natʋyʋ tɩkɛ cɛtɩm tɔm yaa pɩ-tɛɛ nɛ pɩ-yɔɔ tɔm.
9 Tɩ-tɩŋa payɩ tɩ-taa nɩʋ wɛ kɛlɛʋ mba pɛwɛnɩ lɛɣtʋ yɔ,Nɛ tɩwɛ siɣsiɣ mba pehiɣ sɩmtʋ yɔ pɛ-ɛsɩndaa.
10 Ɩmʋ mɔ-lɔŋ sɩɣzʋʋ, pɩtaakɛ liidiye,Nɛ ɩmʋ sɩmtʋ, pɩtaakɛ sika kɩbaŋa,+
11 Mbʋ pʋyɔɔ yɔ lɔŋsɩnɖɛ kɩlɩ ɖeu ñɩɣlɩm;*Paapɩzɩɣ nɛ pakpaɣ wondu lɛɛtʋ ndʋ payɩ tɩmʋ ñɩm yɔ nɛ pamaɣzɩnɩ-ɖɩ.
12 Ma, lɔŋsɩnɖɛ, ma nɛ lɛɣtʋ ɖɩcakɩna;Mehiɣ sɩmtʋ nɛ lɛɣtʋ ndʋ tɩsɩɣnɩ ɛyʋ se ɛmaɣzɩ camɩyɛ yɔ.+
13 Yehowa sɔɔndʋ seu tɔbʋʋ lɛ se ɛyʋ ɛpaɖɩ kɩdɛkɛdɩm.+
Manpaɖɩɣ tɩ kpazʋʋ, agʋnda,+ ɖɔnɛ kɩdɛkɛdɩyɛ nɛ yɔɔdaɣ kɩdɛkɛdaɣ.+
14 Mɛwɛnɩ lɔŋ tasʋʋ kɩbam nɛ lɔŋsɩnɖɛ nɖɩ ɖɩwazɩɣ yɔ;+Matɩnɩ tɔm taa nɩʋ lɛɣtʋ+ nɛ ɖoŋ.+
15 Mɔ-yɔɔ yɔɔ awiya wɛ kewiyitu tɔɔʋ yɔɔ,Nɛ mɔ-yɔɔ yɔɔ kaɖɩsɩ sɔsɔsɩ ɖʋʋ paɣtʋ ndʋ tɩwɛ siɣsiɣ yɔ.+
16 Mɔ-yɔɔ yɔɔ awumbiya wɛ kewiyitu tɔɔʋ yɔɔ,Nɛ mɔ-yɔɔ yɔɔ sɔsaa hʋʋ tɔm siɣsiɣ.
17 Mɔnsɔɔlɩ mba pɔsɔɔlɩ-m yɔ,Mba pañɩnɩɣ-m yɔ pakaɣ-m naʋ.+
18 Mɔn-cɔlɔ ñɩm nɛ samtʋ pɛwɛɛ,Mɔn-cɔlɔ ɖɔɖɔ ñɩm mbʋ pɩɩtɛŋ yɔ* nɛ siɣsiɣ wɛtʋ pɛwɛɛ.
19 Pee wena malʋlʋʋ yɔ, akɩlɩ ɖeu sika; halɩ akɩlɩ ɖeu sika kele kele ñɩŋga,Nɛ mbʋ mahaɣ yɔ, pɩkɩlɩ ɖeu liidiye ñɩɣtʋ ndʋ tɩ-wayɩ fɛyɩ yɔ.+
20 Mɔnɖɔŋ siɣsiɣ wɛtʋ nʋmɔsɔka taa,Tɔm hʋʋ siɣsiɣ ñɩmbʋ nʋmɔŋ hɛkɩŋ taa.
21 Mahaɣ ñɩm sɔsɔm mba pɔsɔɔlɩ-m yɔ,Nɛ mahaɣzɩɣ po-kpoŋ.
22 Yehowa ma-m nɛ mɛnkɛ ɛ-nʋmɔʋ ɖɩbazɩyɛ,+Mbʋ ɛlabɩ ɖooo lɔŋ yɔ pɩ-taa kajalaɣ ñɩmbʋ.+
23 Kpaɣnɩ ɖooo caanaʋ* taa ɛɛsɩ-m mo-lone taa,+Kpaɣnɩ ɖɩbazɩyɛ, ɖooo pitihiɣ pʋcɔ nɛ palɩzɩɣ tɛtʋ.+
24 Paalʋlɩ-m* alɩwaatʋ ndʋ lɩm cukaŋ ñɩmbʋ nabʋyʋ taawɛɛ yɔ,+Alɩwaatʋ ndʋ lɩm hiɖe naɖɩyɛ taawɛɛ se lɩm ɛwadɩnɩ ɖɩ-taa yɔ.
25 Paalʋlɩ-m pʋcɔ nɛ pasɩɣ pʋŋ i-lona taa,Pʋcɔ nɛ piyisi wɛɣ,
26 Alɩwaatʋ ndʋ ɛtaatɩɩlɩzɩtɩ tɛtʋ nɛ tɩ-yɔɔ hayɩmYaa tɛtʋ kajalaɣ tambaɣ yɔ.
27 Alɩwaatʋ ndʋ ɛñɔɔzaɣ ɛsɔdaa yɔ,+ maawɛ peeɖe;Alɩwaatʋ ndʋ ɛɛhɛ caŋa nɛ ɛɖʋnɩ kamaɣ teŋgu nɛ ɛsɔdaa pɛ-hɛkʋ taa yɔ,*+
28 Alɩwaatʋ ndʋ ɛsɩ mɩndʋ ti-lona taa* ɛsɔdaa yɔ,Alɩwaatʋ ndʋ ɛlɩzɩ lɩm cukaŋ ñɩmbʋ hila yɔ,
29 Alɩwaatʋ ndʋ ɛɖʋ paɣtʋ teŋguSe kɩ-taa lɩm ɛtaamaanɩ ɛ-paɣtʋ yɔɔ yɔ,+Alɩwaatʋ ndʋ ɛsɩ tɛtʋ tigila yɔ,
30 Maawɛ ɛ-cɔlɔ ɛzɩ tʋmlaɖʋ weyi ɛwɛ niye yɔ.+
Maakɛ weyi ɛ-tɔm kaakɩlɩ-ɩ kɛdɩnʋʋ yɔ+ paa evemiye nɖɩ;Manɩɣaɣ leleŋ ɛ-ɛsɩndaa alɩwaatʋ tɩŋa;+
31 Man-taa kaalabɩ leleŋ nɛ tɛtʋ ndʋ ɛlaba se pacaɣ tɩ-yɔɔ yɔ,Nɛ kɔzɩ kɔzɩ lɛ, man-taa kaahʋlʋmɩnɩ ɛyaa* siŋŋ.
32 Nɛ lɛɛlɛɛyɔ, man-pɩyalaa, iwelisini-m;Ɛɛɛ, koboyaɣ tɩnaa lɛ mba pɔɖɔŋ ma-nʋmɔŋ taa yɔ.
33 Welisi lɔŋ sɩɣzʋʋ+ nɛ ŋpɩsɩ lɔŋsɩnɖʋ,Taanim-pʋ kaaʋ.
34 Koboyaɣ tʋ lɛ ɛyʋ weyi paa evemiye nɖɩ lɛ,Ɛkɔŋ tanaŋ tɛɛ cu* mɔ-nɔnɔɔ tɛɛ,Ɛɖaŋɩɣ man-ɖɩɣa nɔnɔɔ tɛɛ kpam nɛ ewelisiɣni-m yɔ;
35 Mbʋ pʋyɔɔ yɔ weyi ehikiɣ-m yɔ, ehiɣ wezuu;+Nɛ ɛ-tɔm kɛdɩɣnɩ Yehowa.
36 Ɛlɛ weyi ɛ-paa fɛyɩnɩ-m yɔ, ɛkɔŋnɩ ɛ-tɩ* kaɖɛ;Nɛ mba papaɖɩɣ-m yɔ, pɔsɔɔlɩ sɩm.»+
Pɩ-tɛɛ tɔm
^ Piye piye, «Ɛyaa pɩyalaa.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa «ñɩm kɩɖɛzɩm.»
^ Yaa «ɖooo lɔŋ.»
^ Yaa «Paalʋlɩ-m ɛzɩ palʋlʋʋnɩ wɩzasɩ yɔ.»
^ Yaa «Alɩwaatʋ ndʋ ɛɛɖʋ kamaɣ ŋga kɛwɛ kulukulu yɔ lɩm yɔɔ yɔ.»
^ Piye piye, «ɛkam mɩndʋ camɩyɛ.»
^ Yaa «ɛyaa pɩyalaa.»
^ Yaa «Ɛcakɩnɩ ɛ-ɛsa.»
^ Yaa «ɛ-kalɩzaɣ.»
