Aduwa 29:1-27
29 Ɛyʋ weyi pakalɩ-ɩ tam sakɩyɛ, ɛlɛ ɛlakɩ ñʋʋ taa ɖoŋ* yɔ,+Pakaɣ-ɩ tɔyɩtʋʋ tuda nɛ paapɩzɩɣ nɛ pawaa-ɩ.+
2 Ɛyaa siɣsiɣ tɩnaa ɩɖɔwa yɔ, samaɣ mɛyɩɣ,Ɛlɛ kañatʋ tʋ tɔkɩ kewiyitu lɛ, samaɣ mɔlʋʋ.+
3 Ɛyʋ weyi ɛsɔɔlɩ lɔŋsɩnɖɛ yɔ, eyeki nɛ ɛ-caa taa lakɩ leleŋ,+Ɛlɛ weyi ɛɖʋʋ taabalɩyɛ nɛ hayitu laɖaa yɔ, ɛwɛɛkɩɣ ɛ-ñɩm.+
4 Siɣsiɣ wɛtʋ wiyaʋ cɛyɩsɩɣnɩ ɛjaɖɛ,+Ɛlɛ weyi ɛñɩnɩɣ se pataa ɛ-nɔɔ num yɔ ɛyɔkʋʋ-ɖɩ.
5 Weyi epeɣziɣ e-koobu nɛ nɔɔ leleŋ tɔm yɔ,Eposuu piyuu ɛ-nɩŋgbanzɩ tɛɛ.+
6 Ɛyʋ kɩdɛkɛdʋ kɩdɛkɛdɩm kɛnɩ kpaca ŋgʋ kɩkpaɣ ɛ-maɣmaɣ yɔ,+Ɛlɛ ɛyʋ siɣsiɣ tʋ makɩ taa leleŋ kubusi nɛ ɛmɛyɩɣ.+
7 Ɛyʋ siɣsiɣ tʋ maɣzɩɣ kʋñɔndɩnaa wala yɔɔ,+Ɛlɛ kañatʋ tʋ paa fɛyɩnɩ-yɛ.+
8 Abɛlɛɛ tʋ ñaɣzɩɣ tɛtʋ miŋ,+Ɛlɛ lɔŋsɩnɖaa hɛzɩɣ pana.+
9 Ye lɔŋsɩnɖʋ nɛ kɩmɛlɛŋ pɔhɔŋnɩ ɖama tɔm yɔ,Hola nɛ nimtu pɩtɛŋna, nɛ pʋyʋ kɩbanʋ nɔɔyʋ ɛɛlɩɣ pɩ-taa.+
10 Mba pɔsɔɔlɩ calɩm kpɛdʋʋ yɔ, papaɖɩɣ mba patɩɖɔɔ wɛɛ naayɛ yɔ,*+Nɛ pañɩnɩɣ se palɩzɩ ɛyaa siɣsiɣ tɩnaa weziŋ.*
11 Kɩmɛlɛŋ hutuu kɩ-pana* tɩŋa,+Ɛlɛ lɔŋsɩnɖʋ ɖɔkʋʋ ɛ-tɩ kpam.+
12 Ye ɖiyiyu ewelisiɣ cɛtɩm tɔm yɔ,Ɛ-lɩmɖʋyaa tɩŋa kaɣ kɛʋ kañatʋ tɩnaa.+
13 Nɔɔ kʋɖʋmaɣ ŋga kɛwɛ kʋñɔndʋ nɛ ɛyaa nazɩyʋ pɛ-hɛkʋ taa yɔ ŋga yɔ:
Yehowa hanɩ ñalɩmɩyɛ pa-naalɛ pɛ-ɛsa.*
14 Ye wiyaʋ ɛhʋʋ kʋñɔndʋ tɔm siɣsiɣ yɔ,+E-kewiyaɣ kpelaɣ kaɣ cɛyɩsʋʋ tam.+
15 Ðaʋ* nɛ nɩŋgbaŋʋʋ hɔmtʋ haɣ lɔŋsɩnɖɛ,+Ɛlɛ pɩɣa ŋga peyebi-kɛ nɛ kalakɩ mbʋ kɔsɔɔlaa yɔ, kaɖʋʋ ko-ɖoo fɛyɛ.
16 Kañatʋ tɩnaa ihuwaa yɔ, kɩdɛkɛdɩm ɖɔɖɔ hukuu,Ɛlɛ ɛyaa siɣsiɣ tɩnaa kaɣ naʋ pɔ-tɔlʋʋ taa.+
17 Sɩɣzɩ ña-pɩɣa lɔŋ nɛ kakaɣ-ŋ kɔnʋʋ hɛzɩyɛ;Nɛ kakaɣ-ŋ haʋ* taa leleŋ sɔsɔŋ.+
18 Ðenɖe natʋ natʋyʋ fɛyɩ yɔ, samaɣ lakɩ mbʋ kɔsɔɔlaa yɔ,+Ɛlɛ koboyaɣ tɩnaa kɛlɛ mba pɔɖɔŋ paɣtʋ yɔɔ yɔ.+
19 Lɩmɖʋyʋ eeyeki se patɩŋnɩ tɔm pee yɔɔ nɛ pɔñɔɔzɩ-ɩ,Mbʋ pʋyɔɔ yɔ paa ɛnɩɣ tɔm tɔbʋʋ yɔ, ɛɛñaŋ.+
20 Ŋna ɛyʋ weyi ekpedisiɣ ɛ-yɔɔdaɣ taa yɔ?+
Kɩmɛlɛŋ wɛnɩ lidaʋ nɛ pɩkɩlɩ ɛyʋ ɛnʋ.+
21 Ye pɛhɛndɩnɩ lɩmɖʋyʋ kpaɣnɩ ɛ-pɩjatʋ taa yɔ,Ɛɛkaɣ wɛnʋʋ ɛsɩmɩyɛ pʋwayɩ.
22 Ɛyʋ weyi ɛkɔʋ pana lɛɛ lɛɛ yɔ, eseɣtiɣ you;+Nɛ weyi ɛ-hɔyɛ ɛɛlaɣzɩɣ pɩsʋʋ yɔ, ɛlakɩ kɩdɛkɛdɩm sakɩyɛ.+
23 Ɛyʋ tɩ kpazʋʋ kaɣ-ɩ luzuu,+Ɛlɛ weyi ɛwɛnɩ tɩ luzuu yɔ,* ɛkaɣ hiɣu samtʋ.+
24 Weyi ɛkɛ mɩlʋ taabalʋ yɔ ɛpaɖɩɣ ɛ-tɩ.*
Ɛpɩzɩɣ nɛ ɛnɩɩ se pañɩnɩɣ aseɣɖe tʋ,* ɛlɛ ɛɛlɩzɩɣ aseɣɖe naɖɩyɛ.+
25 Ɛyʋ sɔɔndʋ seu kɛ* kpaca,*+Ɛlɛ weyi ɛtaɣ Yehowa liu yɔ, pɩkaɣ ɛ-yɔɔ kandɩyʋʋ.+
26 Ɛyaa sakɩyɛ ñɩnɩɣ se powolo wiyaʋ ɛsɩndaa,*Ɛlɛ Yehowa yekina nɛ pahʋʋ ɛyʋ tɔm siɣsiɣ.+
27 Ɛyʋ siɣsiɣ tʋ paɖɩɣ weyi ɛfɛyɩ siɣsiɣ yɔ,+Ɛlɛ kañatʋ tʋ paɖɩɣ weyi ɛ-ɖɔnɛ tʋʋzaa yɔ.+
Pɩ-tɛɛ tɔm
^ Piye piye, «ɛlɛ e-liu wɛ canjanaa.»
^ Yaa «papaɖɩɣ mba pɛfɛyɩnɩ kɩwɛɛkɩtʋ natʋyʋ yɔ.»
^ Yaa «kalɩzasɩ.» Pɩpɩzɩɣ pɩkɛ, «Ɛlɛ ɛyʋ siɣsiɣ tʋ ñɩnɩɣ se ɛkandɩyɩ pe-weziŋ yɔɔ.»
^ Piye piye, «ki-fezuu.»
^ Pʋ-tɔbʋʋ se ɛnʋ hanɩ-wɛ wezuu.
^ Yaa «Lɔŋ sɩɣzʋʋ.»
^ Yaa «kakaɣ haʋ ña-kalɩzaɣ.»
^ Piye piye, «tɩ luzuu fezuu yɔ.»
^ Yaa «ɛ-maɣmaɣ ɛ-kalɩzaɣ.»
^ Yaa «ɛnɩɩ ɖuutu ndʋ tɩ-taa wɛ nɔɔ kɩdɛkɛdaɣ lɔʋ yɔ.»
^ Yaa «ñɩkɩ.»
^ Yaa «Ɛyʋ eseliɣ ɛyaa ɛsɩndaa yɔ pɩkɛ kpaca.»
^ Pɩpɩzɩɣ pɩkɛ, «ñɩnɩɣ se wiyaʋ ɛna pa-pʋtɔdɩyɛ.» Piye piye, «ñɩnɩɣ se pana wiyaʋ ɛsɩndaa.»
