Aduwa 25:1-28
25 Salomɔɔ aduwa lɛɛna yɔ,+ wena Yuuda wiyaʋ Ezekiyaasɩ+ ɛyaa mawa yɔ:*
2 Samtʋ pɩkɛnɩ Ɛsɔ se ɛmɛsɩ tɔm natʋyʋ,+Nɛ samtʋ pɩkɛnɩ awiya se atazɩ tɔm natʋyʋ taa tete.
3 Ɛzɩ ɛsɔdaa kʋyʋʋ liɣ liɣ nɛ tɛtʋ wɛɛ cukaŋ yɔ,Mbʋ ɖɔɖɔ ɛyʋ ɛɛpɩzɩɣ nɛ ɛtazɩ awiya laŋa taa.
4 Lɩzɩ kʋzɔɔtʋ liidiye ñɩɣtʋ taa,Nɛ tɩkaɣ lɩʋ camɩyɛ kele kele.+
5 Kʋsɩ kañatʋ tʋ wiyaʋ ɛsɩndaa,Nɛ e-kewiyaɣ kpelaɣ kaɣ kam camɩyɛ siɣsiɣ wɛtʋ taa.+
6 Taaɖʋ ña-tɩ hɩɖɛ wiyaʋ ɛsɩndaa,+Nɛ taañɩnɩ ɖɩjaɣyɛ mba pa-hɩla sɛwa yɔ pɛ-hɛkʋ taa,+
7 Mbʋ pʋyɔɔ yɔ pɩwɛ weewee se eheyi-ŋ se: «Kʋyɩ ŋkpa nɛ ŋcaɣ cɩnɛ,»Nɛ pɩkɩlɩ se ɛɖʋ-ŋ fɛyɛ ɛyʋ sɔsɔ nɔɔyʋ ɛsɩndaa.+
8 Taakpedisi nɛ ŋyaa ño-koobu tɔm;Pɩtɩkɛ mbʋ yɔ, ɛzɩma ŋkaɣ labʋ pʋwayɩ ye ɛɖʋ-ŋ fɛyɛ yɔ?+
9 Lʋ ña-tɩ yɔɔ ño-koobu cɔlɔ,+Ɛlɛ taakuli mɛsaɣ tɛɛ tɔm ndʋ peheyi-ŋ yɔ tɩ-yɔɔ,*+
10 Se pɩsa nɛ weyi ewelisiɣ-tʋ yɔ ɛtaaɖʋ-ŋ fɛyɛ,Nɛ ŋtaayɛlɩnɩ tɔm kɩdɛkɛdɩtʋ* ndʋ paapɩzɩɣ nɛ pahɩzɩ-tʋ yɔ.
11 Tɔm ndʋ pɔyɔɔdɩ-tʋ alɩwaatʋ kɩbandʋ yɔɔ yɔ,Tɩwɛ ɛzɩ sika tɩŋ pee* wena awɛ ñanaɣ ŋga palabɩ-kɛ nɛ liidiye yɔ ka-taa yɔ.+
12 Lɔŋsɩnɖʋ weyi ɛkalɩɣ ɛyʋ yɔ,Ɛwɛ ɛzɩ sika naŋgbacaɣla nɛ ajana wonuu ŋgʋ palabɩ-kʋ nɛ sika kɩbaŋa yɔ nɩŋgbaŋʋʋ ŋgʋ kiwelisiɣni-i yɔ kɩ-ɛsɩndaa.+
13 Ðɔmbɛɛ niɣdiɣ ɛyʋ niɣduu mbʋ kʋmtʋ alɩwaatʋ taa yɔ,Mbʋ ɖɔɖɔ tiyiyu siɣsiɣ tʋ wɛ mba petiyi-i yɔ pɛ-ɛsɩndaa,Mbʋ pʋyɔɔ yɔ ɛhɛzɩɣ ɛ-tʋ laŋɩyɛ.*+
14 Ɛyʋ weyi ɛkʋndʋʋ se ɛlakɩ nɔɔyʋ kʋjɔʋ nakʋyʋ, ɛlɛ ɛɛlakɩ-kʋ kpa yɔ,*Ɛwɛ ɛzɩ mɩndʋ nɛ helim mbʋ pɩɩkɔŋnɩ tɛʋ yɔ.+
15 Suuɖu pawakɩnɩ ñʋʋdʋ,Nɛ nzʋlʋmɩyɛ nɖɩ ɖɩwɛ hɛɛɛ yɔ, ɖɩpɩzɩɣ nɛ ɖɩyɔkɩ* mɔɔyɛ,+
16 Ye ŋhiɣ tʋŋ num yɔ, nezi mbʋ pɩmakɩnɩ-ŋ yɔ;Mbʋ pʋyɔɔ yɔ ye ŋkɩlɩ nezuu yɔ, ŋpɩzɩɣ nɛ ŋhoo-pʋ nɛ ŋtɔ.+
17 Taawoki ño-koobu tɛ ɖoŋ ɖoŋ;Pɩtɩkɛ mbʋ yɔ, ñɔ-tɔm lɩɣ-ɩ sɔŋ nɛ ɛpaɖɩ-ŋ.
18 Weyi ɛlɩzɩɣ cɛtɩm aseɣɖe e-koobu yɔɔ yɔƐwɛ ɛzɩ pɛɖɩyɛ, sɩɣa nɛ tɔʋ ñɩmɩyɛ lɔŋ ñɩnɖɛ yɔ.+
19 Ye ɛyʋ ɛsɩ e-lidaʋ weyi paapɩzɩɣ nɛ pataa-ɩ liu yɔ* ɛ-yɔɔ kʋñɔŋ alɩwaatʋ taa yɔ,Pɩwɛ ɛzɩ ɛyʋ taɣʋ liu keɖe nɖɩ ɖɩpɛlaa yɔ yaa nɩŋgbaŋaɣ ŋga pɩcam-kɛ yɔ.
20 Weyi eteɣ hendu ɛyʋ weyi ɛwɛ laŋwɛɛkɩyɛ taa siŋŋ yɔ,Ɛwɛ ɛzɩ weyi ɛhɔzʋʋ toko nikaɣ taa yɔ;Ɛwɛ ɛzɩ vɛɛ ñɩmɩŋ ñɩŋgʋ ŋgʋ papɩyɩ kaŋwa yɔɔ yɔ.+
21 Ye ñɔɔsɩ ɛwɩɣ ño-koyindu* yɔ, ha-ɩ tɔɔnaɣ nɛ ɛtɔɔ;Ye lɔkɔtʋ ɛɖɛ-ɩ yɔ, ha-ɩ lɩm nɛ ɛñɔɔ,+
22 Mbʋ pʋyɔɔ yɔ ŋŋlakɩ mbʋ lɛ, ŋɖiɣni kpeɣluu miŋ mamala ɛ-ñʋʋ taa,*+Nɛ Yehowa kaɣ-ŋ hɛyʋʋ pɩ-yɔɔ.
23 Hayo kiŋ helim kɔŋnɩ tɛʋ,Nɛ nzʋlʋmɩyɛ nɖɩ ɖɩlakɩ kɔlɔmɔtʋ yɔ ɖɩkɔŋnɩ pana.+
24 Pɩwɛ weewee se ɛyʋ ɛwɛɛ kuduyuu ñʋʋ taa kʋlɔmʋʋ nakʋyʋ taaNɛ pɩkɩlɩ se ɛ nɛ halʋ ñaɖʋʋ tʋ* pɛwɛɛ ɖɩɣa kʋɖʋmaɣ taa.+
25 Tɔm kɩbandʋ ndʋ tɩlɩnɩ poliŋ ɛjaɖɛ naɖɩyɛ taa yɔ,Tɩwɛ ɛzɩ nikaɣ lɩm yɔ kalɩzaɣ* ŋga pɩnɩ-kɛ yɔ.+
26 Ɛyʋ siɣsiɣ tʋ weyi eyeki ɛ-tɩ nɛ kañatʋ tʋ yɔ,*Ɛwɛ ɛzɩ hiɖe nɖɩ ɖɩ-taa wɛ ahɔya yɔ yaa lɔkɔ ŋgʋ kɩ-taa lɩm fɛyɩ ɖeu yɔ.
27 Pɩfɛyɩ ɖeu se ɛyʋ ɛkɩlɩ tʋŋ num nezuu,+Nɛ pɩtɩkɛnɩ ɛyʋ samtʋ se ɛñɩnɩ ɛ-maɣmaɣ ɛ-samtʋ.+
28 Ɛyʋ weyi ɛɛpɩzɩɣ ɖɔkʋʋ ɛ-pana* yɔ,Ɛwɛ ɛzɩ tɛtʋ ndʋ pɔyɔkɩ ti-kolonzi yɔ.+
Pɩ-tɛɛ tɔm
^ Yaa «ɛyaa ɖaɣnɩ-yɛ maʋ nɛ pekpeɣli yɔ.»
^ Yaa «taakuli lalaa mɛsaɣ tɛɛ tɔm yɔɔ.»
^ Yaa «ŋtaayɛlɩnɩ seeseewaa.»
^ Piye piye, «sika pɔɔmwaa.»
^ Yaa «ɛkpazɩɣ ɛ-tʋ kalɩzaɣ ɖoŋ.»
^ Piye piye, «ɛkʋndʋʋ cɛtɩm kʋjɔʋ yɔɔ yɔ.»
^ Yaa «Nɛ tɔm ndʋ pɔyɔɔdʋʋnɩ nɔɔ kɩbaŋa yɔ tɩpɩzɩɣ nɛ tɩyɔkɩ.»
^ Pɩpɩzɩɣ pɩkɛ, «weyi ɛkɛ pɩ-tɛɛ nɛ pɩ-yɔɔ tʋ yɔ.»
^ Piye piye, «weyi ɛpaɖɩɣ-ŋ yɔ.»
^ Pʋ-tɔbʋʋ se piyeki nɛ ɛhɛzɩ ɛ-tɩ nɛ ɛlɛɣzɩ ɛ-lakasɩ.
^ Yaa «halʋ weyi ɛhɔŋ tɔm tam yɔ.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, «weyi pɩcɛŋɛsɩɣ-ɩ kañatʋ tʋ ɛsɩndaa yɔ.»
^ Yaa «e-fezuu.»
