Aduwa 16:1-33
16 Ɛyʋ maɣzɩɣ ndʋ pɩwɛɛ se ɛyɔɔdɩ yɔ tɩ-yɔɔ,*Ɛlɛ tɔm ndʋ ecosuu yɔ* Yehowa cɔlɔ tɩlɩɣna.*+
2 Ɛyʋ ɛsɩndaa lɛ, ɛ-nʋmɔŋ tɩŋa tʋʋzaa,*+Ɛlɛ Yehowa tazɩɣ mbʋ piseɣtiɣ ɛyʋ yɔ pɩ-taa.*+
3 Ðʋzɩ mbʋ payɩ ŋlakɩ yɔ Yehowa nesi taa,*+Nɛ mbʋ ŋɖʋwa se ŋlakɩ yɔ pɩkaɣ ɖɔm camɩyɛ.
4 Yehowa lakɩ se pɩtɩŋa pɩɖʋ nesi ɛ-tamaɣ,Halɩ ɛlakɩ mbʋ se paɖɩzɩ kañatʋ tɩnaa asɛyʋʋ wiye.+
5 Yehowa paɖɩɣ weyi ɛkpazɩɣ ɛ-tɩ ɛ-laŋɩyɛ taa yɔ.+
Nɛ paa pɩɩlabɩ ɛzɩma yɔ, ɛkaɣ ɛyʋ ɛnʋ ɛ-nɩŋgbaŋʋʋ hɔm.
6 Sɔɔlɩm siɣsiɣ ñɩmbʋ nɛ siɣsiɣ wɛtʋ yɔɔ lɛ, pekpeɣu kɩwɛɛkɩm,*+Nɛ Yehowa sɔɔndʋ seu yɔɔ lɛ, ɛyʋ haɣ siɣye kɩdɛkɛdɩm.+
7 Ye ɛyʋ nɔɔyʋ ɖɔnɛ ɛkɛdɩnɩ Yehowa yɔ,Ɛlakɩ nɛ halɩ laŋhɛzɩyɛ wɛɛ ɛyʋ ɛnʋ nɛ e-koyindinaa pɛ-hɛkʋ taa.+
8 Pɩwɛ weewee se ɛyʋ ɛwɛɛnɩ wondu pazɩ yem ɛlɛ ɛwɛɛ siɣsiɣ+Nɛ pɩkɩlɩ se ɛwɛɛnɩ wondu sakɩyɛ ɛlɛ ɛfɛyɩ siɣsiɣ.+
9 Ɛyʋ pɩzɩɣ nɛ ɛmaɣzɩ nʋmɔʋ ŋgʋ ɛtɩŋ yɔ kɩ-yɔɔ ɛ-laŋɩyɛ taa,Ɛlɛ Yehowa ɖiyiɣni ɛ-nɩŋgbanzɩ.+
10 Tɔm ndʋ tɩlabɩ nɔɔ kʋɖʋmaɣ nɛ Ɛsɔ lɩmaɣza yɔ, ndʋ pɩwɛɛ se wiyaʋ ɛyɔɔdɩ;+Pɩfɛyɩ se emuli tɔm hʋʋ taa.+
11 Kɩmaɣzɩŋ weyi ɩwɛ siɣsiɣ yɔ, Yehowa cɔlɔ ɩlɩnaa;Ɛnʋ labɩnɩ yuŋ kɩmaɣzɩŋ weyi payɩ ɩwɛ huyuu taa yɔ.+
12 Awiya paɖɩɣ kañatʋ lakasɩ,+Mbʋ pʋyɔɔ yɔ siɣsiɣ wɛtʋ pacaɣzɩɣnɩ kewiyaɣ kpelaɣ camɩyɛ.+
13 Tɔm ndʋ tɩwɛ siɣsiɣ yɔ tɩkɛdɩɣnɩ awiya.
Awiya sɔɔlɩ weyi ɛyɔɔdʋʋ toovenim yɔ.+
14 Wiyaʋ pana wɛ ɛzɩ sɩm tiyiyu yɔ,+Ɛlɛ lɔŋsɩnɖʋ hɛzɩɣ-yɛ.*+
15 Ye wiyaʋ ɛhɛɖɩ ɛ-ɛsɩndaa nɛ nɔɔyʋ yɔ, ɛyʋ ɛnʋ ehikiɣ koboyaɣ e-wezuu caɣʋ taa;Wiyaʋ ɛna ɛyʋ pʋtɔdɩyɛ yɔ pɩwɛ ɛzɩ mɩndʋ ndʋ tɩkɔŋnɩ tɛʋ alɩwaatʋ kɩbandʋ yɔɔ yɔ.*+
16 Ye ɛyʋ ɛñaɣ pana nɛ ɛwɛɛnɩ lɔŋsɩnɖɛ yɔ, pɩwɛ ɖeu kpem nɛ pɩkɩlɩ sika!+
Ye ɛyʋ ɛwɛnɩ tɔm taa nɩʋ lɛɣtʋ yɔ, pɩwɛ ɖeu kpem nɛ pɩkɩlɩ liidiye.+
17 Ɛyaa siɣsiɣ tɩnaa seɣ kɩdɛkɛdɩm nʋmɔʋ.
Weyi ɛcɔŋnɩ ɛ-ɖɔnɛ yɔɔ yɔ, ɛkandɩyɩɣ e-wezuu* yɔɔ.+
18 Tɩ kpazʋʋ kɔŋ lɛ asɛyʋʋ tɩŋɩɣna,Nɛ ye ɛyʋ ɛwɛnɩ cajayɛ lɩmaɣza yɔ pɩkaɣ-ɩ tuuluu.+
19 Pɩwɛ ɖeu se ɛyʋ eluzi ɛ-tɩ* hɛɛɛ tɩnaa hɛkʋ taa+Nɛ pɩkɩlɩ se ɛ nɛ tɩ kpazɩyaa patayɩ lalaa ñɩm mbʋ paba lazaa yɔ.
20 Weyi ɛwɩlɩɣ se ɛwɛnɩ lɛɣtʋ tɔm natʋyʋ ɖeɖe yɔ, pɩkaɣ-ɩ ɖɔmnʋʋ camɩyɛ,*Nɛ koboyaɣ tʋ lɛ weyi ɛtaɣ Yehowa liu yɔ.
21 Weyi ɛkɛ lɔŋsɩnɖʋ yɔ pakaɣ-ɩ yaʋ se tɔm taa nɩʋ lɛɣtʋ tʋ,+Nɛ weyi ɛyɔɔdʋʋnɩ nɔɔ kɩbaŋa yɔ, ɛ-tɔm* pakaɣ tisuu.+
22 Lɛɣtʋ kɛ wezuu hiɖe mba pɛwɛnɩ-tʋ yɔ,Ɛlɛ kɩmɛlɛmɩŋ maɣmaɣ kɩmɛlɛndʋ hɔŋnɩ ɩ-nɩŋgbaaŋ.
23 Lɔŋsɩnɖʋ laŋɩyɛ haɣ ɛ-nɔɔ lɛɣtʋ+Nɛ ɖiyeki nɛ petisiɣ ɛ-tɔm yɔɔ.
24 Tɔm kɩbandʋ kɛ tʋŋ sɛŋɛlɛtʋ,Tɩwɛ kalɩzaɣ leleŋ* nɛ tɩwaɣ mɔɔ.+
25 Nʋmɔʋ nakʋyʋ pɩzɩɣ nɛ kɩtʋʋzɩ nɔɔyʋ ɛsɩndaa,Ɛlɛ pɩtɛŋna se kiwokini sɩm taa.+
26 Tʋmlaɖʋ lotu* tuyuuni-i nɛ ɛlakɩ tʋmɩyɛ nɛ kpekpeka,Mbʋ pʋyɔɔ yɔ ɛ-ñɔɔsɩ* seɣtiɣni-i nɛ ɛlakɩ mbʋ.+
27 Weyi ɛɛwazɩɣ pʋyʋ yɔ, ehuyuu mbʋ pɩfɛyɩ ɖeu yɔ;+Ɛ-nɔɔ taa tɔm wɛ ɛzɩ miɖeɖeŋ yɔ.+
28 Ñaɖʋʋ tʋ* kɔŋnɩ you,+Nɛ kɔlɔmɔtʋ tʋ yasɩɣ taabalaa kɩbama.+
29 Puuyaɣ tʋ peɣziɣ e-koobuNɛ ewokini-i nʋmɔʋ kɩdɛkɛdʋʋ taa.
30 Ɛɛtaŋ tamasɩ kɩdɛkɛdɩsɩ lɛ ɛcɩbɩyɩɣ ɛ-ɛsa.
Ɛtɔkɩ e-ndomee alɩwaatʋ ndʋ ɛɖɔŋ ɛ-tamaɣ kɩdɛkɛdaɣ yɔɔ yɔ.
31 Ñʋʋ nɛ panzɩ kɛ keɖeɣa* awiya hulaɣ+Alɩwaatʋ ndʋ sɩwɛɣ siɣsiɣ wɛtʋ nʋmɔʋ taa yɔ.+
32 Weyi ɛɛkɔʋ pana lɛɛ lɛɛ yɔ,+ ɛwɛ weewee nɛ pɩkɩlɩ ɛyʋ ɖoŋ tʋ,Nɛ weyi ɛkpaɣ ɛ-pana yɔ,* ɛwɛ weewee nɛ pɩkɩlɩ weyi ɛwakɩ tɛtʋ natʋyʋ yɔ.+
33 Pɔtɔʋ piye toko* taa,+Ɛlɛ ndʋ payɩ tɩlɩɣ piye tɔʋ taa yɔ, Yehowa cɔlɔ tɩlɩɣna.+
Pɩ-tɛɛ tɔm
^ Yaa «tɔm cosuu kɩbambʋ lɩɣnɩ Yehowa cɔlɔ.»
^ Yaa «Ɛyʋ ñɔɔzʋʋ ɛ-laŋɩyɛ taa maɣzɩm.»
^ Piye piye, «tɔm ndʋ nzʋlʋmɩyɛ cosuu yɔ.»
^ Piye piye, «tɩŋa wɛ kele kele.»
^ Piye piye, «tazɩɣ feziŋ taa.»
^ Piye piye, «Pilisi ña-tʋma nɛ ŋwoni Yehowa.»
^ Yaa «pohuuzuu kɩwɛɛkɩm yɔɔ.»
^ Yaa «koluu-yɛ.»
^ Pɩkɛnɩ tɛʋ ŋgʋ kɩnɩɣ Ðomaɣ fenaɣ taa se pɩsa nɛ tɔɔnaɣ pɩzɩ nɛ kaɖʋ pee yɔ. Cɔnɩ Tɔm kɩsɔzɩtʋ B15.
^ Yaa «ɛ-kalɩzaɣ.»
^ Piye piye, «ɛyʋ ɛwɛɛnɩ maɣzɩm mbʋ pɩwɛ hɛɛɛ yɔ.»
^ Piye piye, «ɛkaɣ hiɣu kɩbandʋ.»
^ Yaa «weyi ɛ-yɔɔdaɣ wɛ leleŋ yɔ, ɛ-tɔm.» Piye piye, «Nɛ ndomee leleŋ tɔm.»
^ Yaa «Ŋɖɩkɩ-tʋ yɔ tɩwɛ leleŋ.» Cɔnɩ Tɔm pee sɔsɔna tɔbʋʋ lɩzʋʋ (Kalɩzaɣ).
^ Yaa «kalɩzaɣ.»
^ Piye piye, «ɛ-nɔɔ.»
^ Yaa «Weyi ɛtaŋ tamasɩ kɩdɛkɛdɩsɩ yɔ.»
^ Yaa «samtʋ.»
^ Piye piye, «weyi ɛwɛnɩ ɖoŋ e-fezuu yɔɔ yɔ.»
^ Pɩkɛnɩ toko hɔɔlʋʋ ŋgʋ kihuuzuu ɛyʋ nɩŋgbanzɩ yɔɔ alɩwaatʋ ndʋ ɛcakɩ yɔ.
