Aduwa 13:1-25
13 Pɩɣa ŋga kɛwɛnɩ lɔŋsɩnɖɛ yɔ, kamʋʋ ka-caa lɔŋ sɩɣzʋʋ,+Ɛlɛ weyi ɛkɛ ɛyaa woŋiyu yɔ, pakalɩɣ-ɩ* lɛ eewelisiɣ.+
2 Mbʋ ɛyʋ yɔɔdaɣ* lʋlʋʋ yɔ, pɩ-taa ɛkaɣ tɔɔʋ mbʋ pɩwɛ ɖeu yɔ,+Ɛlɛ puuyaɣ kɛnɩnɩ mbʋ pɩ-tɛɛ nɛ pɩ-yɔɔ tʋ liu wɛɛ yɔ.*
3 Weyi ɛɖɔkʋʋ ɛ-nɔɔ yɔ,* ɛkandɩyɩɣ e-wezuu* yɔɔ,+Ɛlɛ weyi ɛhaɣ ɛ-nɔɔ haaa yɔ, asɛyʋʋ kaɣ-ɩ talʋʋ.+
4 Feendu tʋ liu wɛ wondu sakɩyɛ, ɛlɛ ɛfɛyɩnɩ* nabʋyʋ;+Ɛlɛ ɛyʋ* weyi ɛwɛ kpekpeka yɔ, ɛkaɣ wɛnʋʋ pɩtɩŋa.*+
5 Ɛyʋ siɣsiɣ tʋ paɖɩɣ cɛtɩm,+Ɛlɛ kañatʋ tʋ lakasɩ kɔŋnɩ fɛyɛ nɛ tɛtɛ pɛŋɩyɛ.
6 Siɣsiɣ wɛtʋ kandɩyɩɣ weyi kɩwɛɛkɩtʋ natʋyʋ fɛyɩ ɛ-ɖɔnɛ taa yɔ ɛ-yɔɔ,+Ɛlɛ kañatʋ lakasɩ ɖʋzʋʋ kɩwɛɛkɩm laɖʋ.
7 Nabɛyɛ lakɩ ɛzɩ pɛkɛ ñɩm tɩnaa yɔ, ɛlɛ pɛfɛyɩnɩ nabʋyʋ;+Lalaa lakɩ ɛzɩ pɛkɛ kʋñɔndɩnaa yɔ, ɛlɛ pɛwɛnɩ ñɩm sakɩyɛ.
8 Ñɩm tʋ hɛyɩɣ ñɩm mbʋ ɛwɛna yɔ e-wezuu* yɔɔ,+Ɛlɛ kʋñɔndɩnaa lɛ, nɔɔyʋ ñaakpɛzɩɣ-wɛ* paa ññɩɩ.+
9 Ɛyaa siɣsiɣ tɩnaa ñalɩmɩyɛ ñandɩɣ camɩyɛ,*+Ɛlɛ kañatʋ tɩnaa kanɖʋ kaɣ ɖɩm.+
10 You ɖeke tɩ kpazʋʋ kɔŋna,+Ɛlɛ mba pɔpɔzʋʋ lɔŋ tasʋʋ yɔ,* mba tɩnɩ lɔŋsɩnɖɛ.+
11 Ñɩm mbʋ ɛyʋ hikiɣ lɛɛ lɛɛ yɔ,* pɩkaɣ pasʋʋ pazɩ pazɩ nɛ pɩmʋʋ,+Ɛlɛ ñɩm mbʋ ɛyʋ cazɩɣ pazɩ pazɩ yɔ,* pɩkaɣ ɖɔʋ ɖɔʋ yɔɔ.
12 Ye ɛyʋ ɛɖaŋ nabʋyʋ nɛ pɩɩkɔŋ lɔŋ yɔ, pɩhaɣ-ɩ* laŋwɛɛkɩyɛ,+Ɛlɛ ye ɛyʋ ehiɣ mbʋ e-liu wɛɛ yɔ yɔ, pɩkɛnɩ-ɩ wezuu tɩʋ.+
13 Weyi eniŋ lɔŋ sɩɣzʋʋ yɔ,* ɛkaɣ hiɣu pɩ-kɛzɛɣa,+Ɛlɛ weyi ɛñaŋ paɣtʋ yɔ, pakaɣ-ɩ hɛyʋʋ.+
14 Lɔŋsɩnɖʋ wɩlɩtʋ* kɛ wezuu hiɖe,+Nɛ tiyeki se ɛyʋ ɛtaatɔlɩ sɩm kaamɩŋ taa.
15 Tɔm taa nɩʋ lɛɣtʋ siŋŋ yeki nɛ ɛyʋ tɔm kɛdɩɣnɩ lalaa,Ɛlɛ pɩ-tɛɛ nɛ pɩ-yɔɔ tʋ nʋmɔʋ wɛ kaɖɛ.
16 Lɔŋsɩnɖʋ kpɛzɩɣ nɩŋgbanzɩ nɛ lɔŋsɩnɖɛ,+Ɛlɛ kɩmɛlɛŋ wɩlɩɣ kɩ-kɩmɛlɛndʋ kaɣlaa.+
17 Tiyiyu kañatʋ tʋ tɔlʋʋ kʋñɔŋ taa,+Ɛlɛ tiyiyu weyi ɛwɛ siɣsiɣ yɔ ɛwaɣ kɩwaʋ.+
18 Weyi eniŋ lɔŋ weyi pasɩɣzɩɣ-ɩ yɔ, kʋñɔndʋtʋ nɛ fɛyɛ pɩtɛŋnɩ-ɩ,Ɛlɛ weyi etisiɣ se pɔhɔ ɛ-nɩŋgbaŋʋʋ yɔ* pakaɣ-ɩ hɩɖɛ ɖʋʋ.+
19 Ye ɛyʋ* ehiɣ mbʋ e-liu wɛɛ yɔ yɔ, pɩlakɩ-ɩ leleŋ;+Ɛlɛ kɩmɛlɛŋ tɩsɔɔlɩ se kɩha siɣye kɩdɛkɛdɩm.+
20 Weyi ɛ nɛ lɔŋsɩnɖaa pɔɖɔŋ yɔ, ɛkaɣ pɩsʋʋ lɔŋsɩnɖʋ,+Ɛlɛ weyi ɛ nɛ kɩmɛlɛmɩŋ paɖʋʋ taabalɩyɛ yɔ, pɩkaɣ-ɩ kɔnʋʋ kaɖɛ.+
21 Asɛyʋʋ taŋ kɩwɛɛkɩm laɖaa,+Ɛlɛ wazasɩ sakɩyɛ pɛhɛyɩɣnɩ ɛyaa siɣsiɣ tɩnaa.+
22 Ɛyʋ kɩbanʋ yekini ɛ-sayɩnaa ɛ-ñɩm,Ɛlɛ pakaɣ ñɔɔzʋʋ kɩwɛɛkɩm laɖʋ ñɩm nɛ pasɩɩ ɛyʋ siɣsiɣ tʋ.+
23 Kʋñɔndʋ hayɩm lʋlʋʋ tɔɔnaɣ sakɩyɛ,Ɛlɛ mulum lakasɩ pɩzɩɣ nɛ pɩhazɩ-kɛ* nɛ pɩɖɛna.
24 Weyi ɛɛkpakɩɣ ɖaʋ ɛ-pɩɣa yɔɔ yɔ* ɛpaɖɩɣ-kɛ,+Ɛlɛ weyi ɛsɔɔlɩ ɛ-pɩɣa yɔ, ɛɛlakɩ kaakendu nɛ ka-nɩŋgbaŋʋʋ hɔm.*+
25 Ɛyʋ siɣsiɣ tʋ tɔkɩ nɛ ɛhakɩ camɩyɛ,*+Ɛlɛ kañatʋ tʋ lotu wɛ ndaakpasɩ.+
Pɩ-tɛɛ tɔm
^ Yaa «pɔñɔɔzʋʋ-ɩ.»
^ Piye piye, «nɔɔ.»
^ Yaa «kɛnɩnɩ pɩ-tɛɛ nɛ pɩ-yɔɔ tʋ kalɩzaɣ.»
^ Yaa «Weyi ɛcɔŋnɩ ɛ-yɔɔdaɣ yɔɔ yɔ.»
^ Yaa «ɛ-kalɩzaɣ.»
^ Yaa «ɛ-kalɩzaɣ fɛyɩnɩ.»
^ Yaa «kalɩzaɣ.»
^ Piye piye, «ɛkaɣ ɖʋʋ num.»
^ Yaa «ɛ-kalɩzaɣ.»
^ Piye piye, «nɔɔyʋ ñaakalɩɣ-wɛ.»
^ Piye piye, «ñalɩmɩyɛ wɛɣ laŋhʋlʋmɩyɛ taa.»
^ Yaa «mba pa nɛ lalaa pacakɩ nɛ pakpakɩɣ lɩmaɣza yɔ.»
^ Piye piye, «ɛyʋ kpeɣliɣ-pʋ nɛ e-nesi yɔ.»
^ Yaa «hikiɣ falaa nɛ ɛtɩtɔɔ kʋñɔŋ yɔ.»
^ Yaa «Lidaʋ ŋgʋ kɩɩkɔŋ lɔŋ yɔ kɩhaɣ ɛyʋ.»
^ Yaa «tɔm ndʋ pawɩlɩɣ-ɩ yɔ.»
^ Yaa «paɣtʋ.»
^ Yaa «se pakalɩ-ɩ yɔ.»
^ Yaa «kalɩzaɣ.»
^ Yaa «pɩhazɩ-ɩ.»
^ Yaa «ɛɛsɩɣzɩɣ ɛ-pɩɣa lɔŋ yɔ; ɛɛhɔŋ ɛ-pɩɣa nɩŋgbaŋʋʋ yɔ.»
^ Pɩpɩzɩɣ pɩkɛ, «ɛkʋyʋʋ kpaka nɛ ɛhɔ ka-nɩŋgbaŋʋʋ.»
^ Yaa «nɛ ɛ-kalɩzaɣ ñɩɣzɩ.»
