Yɔɔb 42:1-17
42 Nɛ Yɔɔb cosi Yehowa se:
2 «Lɛɛlɛɛyɔ, manawa se ŋpɩzɩɣ nɛ ŋla pɩtɩŋa
Nɛ mbʋ payɩ ŋɖʋ ña-taa se ŋlakɩ yɔ, pɩ-taa nabʋyʋ fɛyɩ se ŋŋpɩzɩɣ pɩ-labʋ.+
3 Ŋyɔɔdaa se: “Awɛɛ nɛ ehuuzuu mɔ-lɔŋ tasʋʋ yɔɔ nɛ ɛfɛyɩnɩ sɩmtʋ?”+
Toovenim taa lɛ mɔyɔɔdaa, ɛlɛ mantaanɩɣ wondu ndʋ tɩwɛ piti siŋŋ yɔ tɩ-taa,Wondu ndʋ maasɩŋ yɔ.+
4 Ŋyɔɔdaa se: “Mentendi-ŋ, welisi nɛ mɔyɔɔdɩ.
Mankaɣ-ŋ tɔm pɔzʋʋ nɛ ŋcosi-m.”+
5 Ma-nɩŋgbaaŋ kaanɩ ñɔ-yɔɔ tɔm,Ɛlɛ lɛɛlɛɛyɔ lɛ, manaɣ-ŋ nɛ mɛ-ɛsa.
6 Pʋyɔɔ menkpiɖiɣ tɔm ndʋ mɔyɔɔdaa yɔ tɩ-yɔɔ,+Mɛwɛ puuyuu taa nɛ tɔlɩma taa nɛ menkpiɖiɣ.»+
7 Yehowa heyi Yɔɔb tɔm ndʋ nɛ pɩtɛ lɛ, Yehowa heyi Temaanɩ tʋ Eliifaazɩ se:
«Man-taa wɩnɩ ña nɛ ña-taabalaa+ mba pa-naalɛ siŋŋ, mbʋ pʋyɔɔ yɔ ɩtɩyɔɔdɩ toovenim tɔm mɔ-yɔɔ,+ ɛzɩ ma-lɩmɖʋyʋ Yɔɔb labʋ yɔ.
8 Lɛɛlɛɛyɔ lɛ, ɩkpaɣ naŋ abalɩñɩŋ 7 nɛ ɛyaŋ 7 nɛ iwolo ma-lɩmɖʋyʋ Yɔɔb cɔlɔ, nɛ ɩlaa kɩlaʋ kɩñaɣzʋʋ mɩ-yɔɔ. Nɛ ma-lɩmɖʋyʋ Yɔɔb kaɣ tɩmʋʋ mɩ-yɔɔ.+ Paa pɩɩlabɩ ɛzɩma yɔ, mankaɣ mʋʋ ɛ-adɩma, maalakɩ-mɩ ɛzɩ mɩ-kɩmɛlɛndʋ pɔzʋʋ yɔ; mbʋ pʋyɔɔ yɔ ɩtɩyɔɔdɩ toovenim tɔm mɔ-yɔɔ, ɛzɩ ma-lɩmɖʋyʋ Yɔɔb labʋ yɔ.»
9 Ðɩnɛ ɛlɛ, Temaanɩ tʋ Eliifaazɩ, Suwaa tʋ Bilɩdaadɩ nɛ Naama tʋ Zofaarɩ pɛɖɛɛ nɛ pala mbʋ Yehowa heyi-wɛ se pala yɔ. Nɛ Yehowa mʋ Yɔɔb adɩma.
10 Yɔɔb tɩmɩ ɛ-taabalaa yɔɔ nɛ pɩtɛ lɛ,+ Yehowa lɩzɩ Yɔɔb kʋñɔŋ+ nɛ ɛpɩsɩnɩ-ɩ ɛ-ñɩm.* Yehowa ha-ɩ mbʋ ɛɛwɛna yɔ nabʋlɛ.+
11 E-koobiya abalɩñɩma nɛ halɩñɩma kpeekpe nɛ ɛ-taabalaa kɩbɩma+ kpeekpe kɔɔ ɛ-cɔlɔ nɛ pa nɛ ɩ pɔtɔɔ tɔɔnaɣ ɛ-ɖɩɣa taa. Pewii ɛ-kʋñɔŋ nɛ pɛhɛzɩ ɛ-laŋɩyɛ asɛyɩŋ weyi payɩ Yehowa yeba nɛ ɩtalɩ-ɩ yɔ ɩ-yɔɔ. Pa-taa paa weyi ha-ɩ liidiye pɔɔyaɣ nɛ sika kokooye.
12 Nɛ Yehowa wazɩ Yɔɔb wezuu caɣʋ ɖɩdɛnɖɛ nɛ pɩkɩlɩ ɖɩbazɩyɛ,+ nɛ Yɔɔb kɔɔ nɛ ɛwɛɛnɩ heŋ 14 000, aɖaaɖaanaa 6 000, naŋ agbaka naalɛ naalɛ 1 000 nɛ kpaŋasɩ halɩñɩnzɩ 1 000.+
13 Ɛkɔm nɛ ɛtasɩ wɛnʋʋ abalɩbiya 7 nɛ halɩbiya 3.+
14 Ɛya kajalaɣ halɩbɩɣa se Yemima, 2 ñɩŋga se Keziya nɛ tozo ñɩŋga se Kerɛɛnɩ-Hapukɩ.
15 Ɛjaɖɛ kpeekpe taa, halʋ nɔɔyʋ taaɖe nɛ ɛtalɩ Yɔɔb pɛlaa; Yɔɔb tayɩ pa nɛ ɛ-pɩyalaa ɛ-ñɩm.
16 Pʋwayɩ lɛ, Yɔɔb tasɩ wezuu caɣʋ pɩnzɩ 140, nɛ ɛna e-piya nɛ ɛ-sayɩnaa—kpaɖɩŋ naanza.
17 Pʋwayɩ lɛ Yɔɔb sɩ, ɛɛcaɣ wezuu nɛ pɩɖaɣlɩ nɛ ɛnɩɩ wezuu leleŋ.*
Pɩ-tɛɛ tɔm
^ Piye piye, «Yehowa pɩsɩnɩ Yɔɔb yomiye kiŋgiɖe.»
^ Piye piye, «ɛɛkpadɩyaa nɛ ɛ-kɩyakɩŋ ɖɔɔ.»
