Ezekɩyɛɛlɩ 33:1-33
33 Nɛ Yehowa tɔm talɩ-m se:
2 «Ɛyʋ pɩyalʋ, yɔɔdɩnɩ ña-samaɣ taa mba+ nɛ ŋheyi-wɛ se:
«“Ðɩkpaɣ se mɔnkɔŋnɩ laɣɖɛ ɛjaɖɛ naɖɩyɛ yɔɔ,+ nɛ ɛjaɖɛ nɖɩ ɖɩ-taa ɛyaa tɩŋa kpaɣ ɛyʋ nɔɔyʋ se ɛkɛ pɔ-yɔɔ feŋiyu,
3 nɛ ɛna laɣɖɛ ɖiɣni kɔm ɛjaɖɛ yɔɔ nɛ ɛhʋlɩ nɔndɔʋ nɛ ɛpaɣ ɛyaa.+
4 Ye nɔɔyʋ ɛnɩ nɔndɔʋ taŋ ɛlɛ ɛtɩkpaɣ paɣʋ mbʋ nɛ ɛlabɩnɩ tʋmɩyɛ,+ nɛ laɣɖɛ kɔɔ nɛ ɖɩlɩzɩ e-wezuu* yɔ, ɛ-calɩm kaɣ caɣʋ ɛ-maɣmaɣ ɛ-ñʋʋ taa.+
5 Ɛnɩ nɔndɔʋ taŋ, ɛlɛ ɛtɩkpaɣ paɣʋ mbʋ nɛ ɛlabɩnɩ tʋmɩyɛ. Ɛ-calɩm kaɣ caɣʋ ɛ-maɣmaɣ ɛ-yɔɔ. Ye ɛɛkpaɣ paɣʋ mbʋ nɛ ɛlabɩnɩ tʋmɩyɛ yɔ, pɩɩyabɩ e-wezuu* ñʋʋ.
6 «“Ɛlɛ ye feŋiyu ɛnʋ ɛna laɣɖɛ ɖiɣni kɔm nɛ ɛtɩhʋlɩ nɔndɔʋ+ nɛ samaɣ tɩnɩɩ paɣʋ taŋ, nɛ laɣɖɛ kɔɔ nɛ ɖɩlɩzɩ pa-taa nɔɔyʋ wezuu* yɔ, ɛyʋ ɛnʋ ɛkaɣ sɩbʋ ɛ-maɣmaɣ ɛ-kɩwɛɛkɩm yɔɔ, ɛlɛ mankaɣ pɔzʋʋ ɛyʋ ɛnʋ ɛ-calɩm feŋiyu nesi tɛɛ.”*+
7 «Piyele nɛ ña yɔ, ɛyʋ pɩyalʋ, malɩzɩ-ŋ se ŋkɛ feŋiyu Izrayɛɛlɩ ɖɩɣa yɔɔ; nɛ alɩwaatʋ ndʋ ŋnɩɣ tɔm natʋyʋ mɔ-nɔɔ taa yɔ, pɩwɛɛ se ŋpaɣ-wɛ nɛ mɔ-nɔɔ.+
8 Alɩwaatʋ ndʋ meheyiɣ kañatʋ tʋ nɔɔyʋ se: “Kañatʋ tʋ, paa ŋŋlabɩ ɛzɩma ŋkaɣ sɩbʋ!”+ ɛlɛ ŋtɩyɔɔdɩnɩ-ɩ se ŋpaɣ-ɩ nɛ ɛlɛɣzɩ ɛ-lakasɩ yɔ, kañatʋ tʋ ɛnʋ ɛkaɣ sɩbʋ ɛ-maɣmaɣ ɛ-kɩwɛɛkɩm yɔɔ,+ ɛlɛ mankaɣ pɔzʋʋ ɛ-calɩm ñe-nesi tɛɛ.
9 Ɛlɛ ye ŋpaɣ kañatʋ tʋ nɔɔyʋ se eyele ɛ-lakasɩ nɛ ekizi lɛɣzʋʋ yɔ, ɛkaɣ sɩbʋ ɛ-kɩwɛɛkɩm yɔɔ;+ ɛlɛ ña lɛ, pɩtʋʋ fɛyɩ se ŋkaɣ yabʋ ñe-wezuu* ñʋʋ.+
10 «Nɛ ña yɔ, ɛyʋ pɩyalʋ, heyi Izrayɛɛlɩ ɖɩɣa se: “Ɩyɔɔdaa se: ‘Ða-kaañamtʋ lakasɩ nɛ ɖa-kɩwɛɛkɩm caɣ ɖɔ-yɔɔ siŋŋ, piyeba nɛ ɖo-ɖoŋ tɛŋ;+ pʋyɔɔ lɛ ɛzɩma ɖɩpɩzɩɣ nɛ ɖɩtasɩ wɛʋ wezuu?’”+
11 Heyi-wɛ se: “Mañɩtʋʋ nɛ mɛwɛɛ wezuu yɔ, man-taa ɛɛlakɩ leleŋ nɛ kañatʋ tʋ sɩm,+ ɛlɛ mɔnsɔɔlaa se kañatʋ tʋ eyele ɛ-nʋmɔʋ+ nɛ ɛwɛɛ wezuu.+ Hayɩ Izrayɛɛlɩ ɖɩɣa, iyele mɩ-nʋmɔŋ kɩdɛkɛdɩŋ,+ iyebi-i, ɛbɛ yɔɔ pɩwɛɛ se ɩsɩ?,”+ Kɩbaɣlʋ Kɩlɩm Yehowa yɔɔdʋʋna.
12 «Nɛ ña yɔ, ɛyʋ pɩyalʋ, heyi ña-samaɣ taa mba se: “Ɛyʋ siɣsiɣ tʋ siɣsiɣ wɛtʋ ɛɛkaɣ ɛ-ñʋʋ yabʋ alɩwaatʋ ndʋ ɛlakɩ kaañamtʋ lakasɩ yɔ;+ mbʋ ɖɔɖɔ kañatʋ tʋ kañatʋ lakasɩ ɩɩkaɣ-ɩ tuuluu se ɛtɔlɩ alɩwaatʋ ndʋ eyeki ɛ-kañatʋ lakasɩ yɔ;+ nɛ mbʋ ɖɔɖɔ ɛyʋ siɣsiɣ tʋ ɛɛpɩzɩɣ nɛ ɛwɛɛ wezuu e-siɣsiɣ wɛtʋ yɔɔ kɩyakʋ ŋgʋ ɛlakɩ kɩwɛɛkɩm yɔ.+
13 Ye meheyi ɛyʋ siɣsiɣ tʋ se: ‘Ŋkaɣ wɛʋ wezuu,’ nɛ ɛtaa ɛ-maɣmaɣ e-siɣsiɣ wɛtʋ liu nɛ ɛla mbʋ pɩfɛyɩ ɖeu* yɔ,+ paakaɣ tɔzʋʋ ɛ-lakasɩ siɣsiɣ ñɩnzɩ taa paa kʋɖʋmsɩ yɔɔ, ɛlɛ ɛkaɣ sɩbʋ kɩwɛɛkɩm mbʋ ɛlaba yɔ pɩ-yɔɔ.+
14 «“Nɛ ye meheyi kañatʋ tʋ se: ‘Ŋkaɣ sɩbʋ,’ nɛ eyele labʋ ɛ-kɩwɛɛkɩm nɛ ɛla mbʋ pɩtʋʋzaa nɛ pɩwɛɛ siɣsiɣ yɔ,+
15 nɛ kañatʋ tʋ ɛnʋ ɛpɩsɩnɩ mbʋ ɛɛmʋ kɩmɩyɛ nɖɩ nɔɔyʋ kaatɔɔ-ɩ yɔ ɖɩ-yɔɔ,+ nɛ ɛtɛ ɛhɛyɩ mbʋ ɛɛmɩlaa yɔ pi-lone taa,+ nɛ ɛɖɔŋ wezuu paɣtʋ yɔɔ nɛ ɛɛlakɩ mbʋ pɩfɛyɩ ɖeu yɔ, paa pɩɩlabɩ ɛzɩma yɔ, ɛkaɣ wɛʋ wezuu.+ Ɛɛkaɣ sɩbʋ.
16 Kɩwɛɛkɩm mbʋ ɛɛlaba yɔ paakaɣ-ɩ pɔzʋʋ akɔnta* pɩ-taa nabʋyʋ yɔɔ.+ Paa pɩɩlabɩ ɛzɩma yɔ, ɛkaɣ wɛʋ wezuu+ mbʋ pʋyɔɔ yɔ ɛlabɩ mbʋ pɩtʋʋzaa nɛ pɩwɛɛ siɣsiɣ yɔ.”
17 «Ɛlɛ ña-samaɣ yɔɔdaa se: “Yehowa nʋmɔʋ fɛyɩ siɣsiɣ,” ŋgʋ toovenim taa lɛ ka-nʋmɔʋ fɛyɩnɩ siɣsiɣ.
18 «Ye ɛyʋ siɣsiɣ tʋ nɔɔyʋ eyebi e-siɣsiɣ wɛtʋ nɛ ɛlakɩ mbʋ pɩfɛyɩ ɖeu yɔ, pʋyɔɔ lɛ pɩwɛɛ se ɛsɩ.+
19 Ɛlɛ ye kañatʋ tʋ nɔɔyʋ eyebi labʋ ɛ-kañatʋ lakasɩ nɛ ɛlakɩ mbʋ pɩtʋʋzaa nɛ pɩwɛɛ siɣsiɣ yɔ, ɛkaɣ wɛʋ wezuu mbʋ pʋyɔɔ yɔ ɛlakɩ mbʋ.+
20 «Ɛlɛ ɩyɔɔdaa se: “Yehowa nʋmɔʋ fɛyɩ siɣsiɣ.”+ Oo Izrayɛɛlɩ ɖɩɣa, mankaɣ hʋnʋʋ mɩ-taa paa weyi tɔm ɛzɩ ɛ-lakasɩ mʋnʋʋ yɔ.»
21 Nɛ pɩkɔɔ pɩla se pɩnaɣ 12 ñɩŋga taa, fenaɣ 10 ñɩŋga taa, fenaɣ ŋga ka-taa pɛkɛzɩ-ɖʋ tɛtʋ yɔ ka-kɩyakʋ 5 ñɩŋgʋ wiye, abalʋ nɔɔyʋ, weyi eese Yeruzalɛm nɛ ɛtʋlɩ yɔ, ɛkɔɔ mɔn-cɔlɔ+ nɛ eheyi-m se: «Pɔyɔkɩ tɛtʋ!»+
22 Ðanaɣ yɔɔ, pʋcɔ nɛ tɛʋ feŋ nɛ weyi eese Yeruzalɛm nɛ ɛtʋlɩ yɔ ɛtalɩɣ lɛ, Yehowa nesi kaatibi mɔ-yɔɔ nɛ ekuli mɔ-nɔɔ pʋcɔ nɛ abalʋ ɛnʋ ɛtalɩɣ mɔn-cɔlɔ tanaŋ tɛɛ. Mbʋ pɩlaba nɛ mɔ-nɔɔ kuli, nɛ mantɩtasɩ kɛʋ kaayɔɔdaɣ.+
23 Nɛ Yehowa tɔm talɩ-m se:
24 «Ɛyʋ pɩyalʋ, njaa anɛ a-taa ñɩma+ yɔɔdʋʋ Izrayɛɛlɩ ɛjaɖɛ tɔm se: “Abraham kaawɛ e-ɖeke, paa mbʋ yɔ ɛɛmʋ ɛjaɖɛ nɖɩ nɛ ɖɩpɩsɩ ɛ-pʋyʋ.+ Ɛlɛ ɖa lɛ ɖɩɖɔwa; pɩtʋʋ fɛyɩ se pɛcɛlɩ-ɖʋ ɛjaɖɛ nɖɩ se ɖɩpɩsɩ ɖa-pʋyʋ.”
25 «Pʋyɔɔ lɛ heyi-wɛ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Ɩtɔkɩ tɔɔnaɣ nɛ calɩm,+ nɛ ɩkpazɩɣ mɩ-ɛsa mɩ-sɩʋ kpelisi nzɩ sɩwɛ kiniŋ yɔ* sɩ-cɔlɔ kiŋ, nɛ ɩwɛ calɩm kpɛdʋʋ yɔɔ.+ Ye mbʋ, ɛzɩma ɛjaɖɛ pɩzɩɣ nɛ ɖɩpɩsɩ mɩ-pʋyʋ?
26 Ɩta mɩ-laɣɖɛ liu,+ ɩlakɩ lakasɩ kɩdɛkɛdɩsɩ, nɛ mɩ-taa paa weyi lɛ episi ɛ-taabalʋ halʋ.+ Ye mbʋ, ɛzɩma ɛjaɖɛ pɩzɩɣ nɛ ɖɩpɩsɩ mɩ-pʋyʋ?’”+
27 «Tɔm tʋnɛ pɩwɛɛ se ŋheyi-wɛ: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Mañɩtʋʋ nɛ mɛwɛɛ wezuu yɔ, mba pɛwɛ njaa taa yɔ pakaɣ-wɛ kʋʋ nɛ laɣɖɛ; mba pɛwɛ ñɩtʋ taa yɔ mankaɣ-wɛ cɛlʋʋ tɛtɛgbɩna nɛ pɛkɛ a-tɔɔnaɣ; nɛ mba pɛwɛ tɛtʋ ɖoŋ ñɩndʋ taa nɛ kaaŋ pɔŋ taa yɔ, kʋdɔŋ kaɣnɩ-wɛ kʋʋ.+
28 Mankaɣ labʋ nɛ ɛjaɖɛ pɩsɩ kañɩmbusuu ŋgʋ kɩ-taa nɔɔyʋ tɩtɩɩfɛyɩ yɔ,+ nɛ mankaɣ labʋ nɛ ɖɩ-tɩ kpazʋʋ nɛ ɖɩ-cajayɛ sɩɩ tɩnaɣ, nɛ Izrayɛɛlɩ pʋŋ kaɣ wɛʋ kpɛɖɛ+ nɛ nɔɔyʋ ɛɛtɩŋɩɣnɩ peeɖe.
29 Nɛ toovenim taa lɛ pakaɣ tɩlʋʋ se ma lɛ Yehowa alɩwaatʋ ndʋ lakasɩ kɩdɛkɛdɩsɩ nzɩ payɩ palaba yɔ sɩ-yɔɔ lɛ,+ malakɩ nɛ ɛjaɖɛ pɩsɩ kañɩmbusuu ŋgʋ kɩ-taa nɔɔyʋ tɩtɩɩfɛyɩ yɔ.’”+
30 «Piyele nɛ ña yɔ, ɛyʋ pɩyalʋ, ña-samaɣ taa ñɩma wɛɛ nɛ pɔyɔɔdʋʋ ñɔ-tɔm kolonzi cɔlɔ nɛ ɖɩsɩ nɔnɔsɩ taa.+ Pɛwɛɛ nɛ pɔyɔɔdʋʋnɩ ɖama, paa weyi lɛ eheyiɣ e-koobu se: “Kɔɔ nɛ ɖiwelisi tɔm ndʋ tɩlɩnɩ Yehowa cɔlɔ yɔ.”
31 Pakaɣ lɔtʋʋ nɛ pɔkɔɔ nɛ pacaɣ ñɛ-ɛsɩndaa ɛzɩ man-samaɣ yɔ; nɛ pakaɣ nɩʋ ñɔ-tɔm, ɛlɛ paakaɣ ɖɔm tɩ-yɔɔ.+ Mbʋ pʋyɔɔ yɔ pepeɣziɣ-ŋ nɛ pɔ-nɔsɩ, ɛlɛ pa-laŋa sɔɔlɩ mulum kɛzɛɣa pɩfɛyɩ yɔɔdʋʋ.
32 Na! Ŋwɛ pɛ-ɛsɩndaa ɛzɩ sɔɔlɩm hendu ndʋ peteni nɔɔ ŋga kɛwɛ leleŋ yɔ, ndʋ pete-tʋ camɩyɛ nɛ cɩmʋʋ wonuu ŋgʋ kɩ-yɔɔ wɛ nimasɩ yɔ. Pakaɣ nɩʋ ñɔ-tɔm, ɛlɛ pa-taa nɔɔyʋ ɛɛkaɣ ɖɔm tɩ-yɔɔ.
33 Nɛ alɩwaatʋ ndʋ tɩlakɩ yɔ—nɛ toovenim taa lɛ tɩkaɣ labʋ—pɩtʋʋ fɛyɩ se pakaɣ tɩlʋʋ se nayʋ nɔɔyʋ kaawɛ pɛ-hɛkʋ taa.»+
Pɩ-tɛɛ tɔm
^ Piye piye, «nɛ ɖɩkpaɣ-ɩ nɛ ɖɩɖɛna.»
^ Yaa «ɛ-kalɩzaɣ.»
^ Yaa «kalɩzaɣ.»
^ Yaa «mankaɣ pɔzʋʋ feŋiyu akɔnta ɛyʋ ɛnʋ ɛ-calɩm yɔɔ.»
^ Yaa «ña-kalɩzaɣ.»
^ Yaa «siɣsiɣ.»
^ Piye piye, «paakaɣ tɔzʋʋ.»
^ Ebree tɔm piye nɖɩ palabɩnɩ tʋmɩyɛ yɔ, pɩtɩla yɔ nɔɔ kʋɖʋmaɣ nakɛyɛ wɛ ɖɩ nɛ Ebree tɔm piye naɖɩyɛ, nɖɩ pɛɖɛzɩɣ se «pɩndʋ» yɔ pɛ-hɛkʋ taa, nɛ palakɩnɩ-ɖɩ tʋmɩyɛ se peni nabʋyʋ.
