Ejipiti Lɩʋ 9:1-35
9 Nɛ Yehowa heyi Moyizi se: «Wolo Farawɔɔ cɔlɔ nɛ ŋheyi-i se: “Tɔm tʋnɛ Ebree mba tɛ Ɛsɔ Yehowa yɔɔdaa: ‘Yele man-samaɣ nɛ kɛɖɛɛ nɛ pɩsa nɛ kɛsɛ-m.+
2 Ɛlɛ ye ŋkizaa se ŋŋyeki-kɛ nɛ kɛɖɛɛ nɛ ŋɖɔkɩ-kɛ mbʋ yɔ,
3 na! Yehowa nesi+ kaɣ mabʋ ña-kpɩna hayɩm taa. Kʋdɔŋ sɔsɔʋ nakʋyʋ+ kaɣ tibu kpaŋnaŋ, kpaŋasɩ, aɖaaɖaanaa, naŋ nɛ heŋ pɔ-yɔɔ.
4 Nɛ pɩtʋʋ fɛyɩ se Yehowa kaɣ ɖʋʋ tʋkaɣ Izrayɛɛlɩ mba kpɩna nɛ Ejipiti mba kpɩna pɛ-hɛkʋ taa, nɛ Izrayɛɛlɩ mba kpɩnɛ naɖɩyɛ ɛɛkaɣ sɩbʋ.’”»+
5 Pɩtasɩ lɛ, Yehowa ɖʋ alɩwaatʋ nɛ ɛyɔɔdɩ se: «Cee Yehowa kaɣ labʋ mbʋ ɛjaɖɛ taa.»
6 Nɛ tɛʋ fem kpaagbaa lɛ, Yehowa la mbʋ, nɛ Ejipiti mba kpɩna ndɩ ndɩ tɩŋa paɣzɩ sɩbʋ,+ ɛlɛ Izrayɛɛlɩ mba kpɩnɛ naɖɩyɛ tɩsɩ.
7 Farawɔɔ pɔzaa lɛ, ɛnɩɩ se Izrayɛɛlɩ mba kpɩna taa paa kʋɖʋmɖɩyɛ tɩsɩ! Paa mbʋ yɔ, Farawɔɔ laŋɩyɛ wɛ kpɩzɩŋ mbʋ, nɛ etiyele samaɣ se kɛɖɛɛ.+
8 Peeɖe Yehowa heyi Moyizi nɛ Aarɔɔnɩ se: «Ikuu miŋ kpou nakʋyʋ taa miiditina mi-nesi 2 taa nɛ pisu ɖo, nɛ pɩwɛɛ se Moyizi ɛlɔ-yɛ helim taa, Farawɔɔ ɛsɩndaa.
9 Nɛ akaɣ pɩsʋʋ mʋzʋʋ ɖɔfɩɩ ñɩŋgʋ Ejipiti ɛjaɖɛ kpeekpe taa, nɛ kɩkaɣ pɩsʋʋ mʋya sɔsɔna wena alɩɣ lɩm yɔ ɛyaa nɛ kpɩna yɔɔ Ejipiti ɛjaɖɛ kpeekpe taa.»
10 Peeɖe poku miiditina miŋ kpou nakʋyʋ taa nɛ powolo pasɩŋ Farawɔɔ ɛsɩndaa, nɛ Moyizi mɩzɩ-yɛ ɛsɔdaa nɛ apɩsɩ mʋya sɔsɔna wena alɩɣ lɩm yɔ ɛyaa nɛ kpɩna yɔɔ nɛ ayɔkʋʋ.
11 Mʋya sɔsɔna ana a-yɔɔ lɛ, cɔjɔnaa mba pɛkɛ maajiki laɖaa yɔ pataapɩzɩɣ se pasɩŋ Moyizi ɛsɩndaa, mbʋ pʋyɔɔ yɔ aalɩ cɔjɔnaa mba pɛkɛ maajiki laɖaa yɔ nɛ Ejipiti mba tɩŋa yɔɔ.+
12 Ɛlɛ Yehowa yele nɛ Farawɔɔ laŋɩyɛ sʋʋ kpɩzɩŋ, nɛ etiwelisini-wɛ, ɛzɩ Yehowa kaaheyuu Moyizi yɔ.+
13 Nɛ Yehowa heyi Moyizi se: «Kʋyɩ tanaŋ tɛɛ cu nɛ ŋwolo ŋsɩŋ Farawɔɔ ɛsɩndaa, nɛ ŋheyi-i se: “Tɔm tʋnɛ Ebree mba tɛ Ɛsɔ Yehowa yɔɔdaa: ‘Yele man-samaɣ nɛ kɛɖɛɛ nɛ pɩsa nɛ kɛsɛ-m.
14 Mbʋ pʋyɔɔ yɔ lɛɛlɛɛyɔ lɛ mɔnkɔŋnɩ asɛyɩŋ kpeekpe ñɔ-yɔɔ, ña-lɩmɖʋyaa yɔɔ nɛ ña-samaɣ yɔɔ se pɩsa nɛ ŋtɩlɩ se nɔɔyʋ fɛyɩ ɛzɩ ma yɔ tɛtʋ kpeekpe yɔɔ.+
15 Mbʋ pʋyɔɔ yɔ pɩtalʋʋnɩ sɔnɔ yɔ, maapɩzaa se mankpazɩ me-nesi nɛ mantɩŋnɩ kʋdɔŋ sɔsɔʋ nakʋyʋ yɔɔ nɛ mɔhɔ ña nɛ ña-samaɣ mɩ-nɩŋgbaŋʋʋ nɛ ɩmʋʋ* tɛtʋ yɔɔ.
16 Ɛlɛ lɩmaɣzɩyɛ nɖɩ ɖɩ-yɔɔ ɖeyi ɖeyi meyebi-ŋ se ŋwɛɛ yɔ, nɖɩ yɔ: mancaɣ se mawɩlɩ-ŋ mon-ɖoŋ nɛ meyele nɛ posusi ma-hɩɖɛ tɛtʋ kpeekpe yɔɔ.+
17 Ŋwɛɛ nɛ ŋkpazɩɣ ña-tɩ mbʋ nɛ ŋŋyeki man-samaɣ se kɛɖɛɛ?
18 Na, mankaɣ yebu nɛ ɖɔmbɛɛ sɔsɔna tɔlɩ cee alɩwaatʋ tʋnɛ tɩ-yɔɔ, nɛ wiɖiyi ɖɔmbɛɛ tɩtɔlɩ mbʋ Ejipiti ɛjaɖɛ taa kpaɣnɩ alɩwaatʋ ndʋ ɖɩñɔwa yɔ nɛ pɩkɔɔ pɩtalɩ sɔnɔ.
19 Pʋyɔɔ lɛ, tiyi nɛ pɔkɔnɩ ña-kpɩna tɩŋa nɛ mbʋ payɩ ŋwɛnɩ hayɩm taa yɔ nɛ pɩwɛɛ ɖɩjɔzɩyɛ taa. Alɩwaatʋ ndʋ ɖɔmbɛɛ ana atɔlʋʋ yɔ, ye ɛyʋ nɔɔyʋ yaa kpɩnɛ naɖɩyɛ ɛwɛ hayɩm taa nɛ pataakɔnɩ-ɖɩ ɖɩɣa yɔ ɖɩsɩkɩ.’”»
20 Farawɔɔ lɩmɖʋyaa taa mba pañam Yehowa tɔm yɔ, pala lɛɛ lɛɛ nɛ pɔkɔnɩ pa-lɩmɖʋyaa nɛ pa-kpɩna ɖɩsɩ,
21 ɛlɛ mba patɩkpaɣ Yehowa tɔm nɛ palabɩnɩ tʋmɩyɛ yɔ, peyele pa-lɩmɖʋyaa nɛ pa-kpɩna hayɩm taa.
22 Nɛ Yehowa heyi Moyizi se: «Kpazɩ ñe-nesi nɛ ɛsɔdaa kiŋ nɛ piyele nɛ ɖɔmbɛɛ tɔlɩ Ejipiti ɛjaɖɛ kpeekpe yɔɔ,+ ɛyaa nɛ kpɩna nɛ hayɩm taa ñɩtʋ kpeekpe pɔ-yɔɔ Ejipiti ɛjaɖɛ taa.»+
23 Peeɖe Moyizi kpazɩ ɛ-ɖaʋ nɛ ɛsɔdaa kiŋ, nɛ Yehowa yele nɛ tɛʋ nazɩ nɛ ɖɔmbɛɛ tii, nɛ miŋ* tii tɛtʋ yɔɔ, nɛ Yehowa yele nɛ ɖɔmbɛɛ wɛɛ tibu yɔɔ Ejipiti ɛjaɖɛ taa.
24 Ðɔmbɛɛ tikaɣ, nɛ tɛʋ ñɩlɩsɩɣ ɖɔmbɛɛ hɛkʋ taa. Aawɛ yuŋ siŋŋ; kpaɣnɩ alɩwaatʋ ndʋ Ejipiti pɩsɩ ɛjaɖɛ yɔ, wiɖiyi ɖɔmbɛɛ naayɛ titii mbʋ.+
25 Ðɔmbɛɛ wɛɛkɩ mbʋ payɩ pɩɩwɛ hayɩm taa yɔ Ejipiti ɛjaɖɛ kpeekpe taa, kpaɣnɩ ɛyaa nɛ piwolo kpɩna, nɛ apʋʋtɩ ñɩtʋ tɩŋa nɛ apɛlɩ hayɩm taa tɩŋ kpeekpe.+
26 Gosɛɛnɩ tɛtʋ taa ɖeke, ɖenɖe Izrayɛɛlɩ mba kaawɛɛ yɔ, peeɖe ɖɔmbɛɛ titii.+
27 Peeɖe Farawɔɔ tiyaa nɛ payaa Moyizi nɛ Aarɔɔnɩ nɛ eheyi-wɛ se: «Lɛɛlɛɛyɔ lɛ malabɩ kɩwɛɛkɩm. Yehowa wɛ siɣsiɣ, nɛ ma nɛ man-samaɣ lɛ ɖɔ-tɔm sɩba.
28 Itendi Yehowa nɛ pɩsa nɛ Ɛsɔ tɛ tɛʋ yele nazʋʋ nɛ ɖɔmbɛɛ yele tibu. Ðɩnɛ ɛlɛ mankaɣ tisuu nɛ meyebi-mɩ nɛ ɩɖɛɛ, nɛ ɩɩtasɩɣ cɩnɛ caɣʋ.»
29 Peeɖe Moyizi heyi-i se: «Mañɩtɩɣ nɛ malɩɩ tɛtʋ taa lɛ, mankaɣ me-nesi posuu Yehowa ɛsɩndaa. Tɛʋ kaɣ yebu nazʋʋ nɛ ɖɔmbɛɛ ɩɩkaɣ tasʋʋ tibu nɛ piyele nɛ ŋtɩlɩ se Yehowa tɩnɩ tɛtʋ.+
30 Ɛlɛ ña nɛ ña-lɩmɖʋyaa lɛ, mɛntɛm naʋ se paa pɩɩlabɩ mbʋ yɔ, ɩɩkaɣ Yehowa Ɛsɔ seu sɔɔndʋ.»
31 Pɩɩwɛɛkɩ pɩsatʋ* nɛ orjɩ, mbʋ pʋyɔɔ yɔ orjɩ pee kaatɛm pɩʋ nɛ pɩsatʋ ñaakpaɣ hɛtʋ.
32 Ɛlɛ pɩtaawɛɛkɩ blee nɛ blee lɛɛkʋ,* mbʋ pʋyɔɔ yɔ pɩɩkɛ tɔɔnasɩ nzɩ pahayɩɣ wayɩ wayɩ yɔ.
33 Nɛ Moyizi kʋyɩ Farawɔɔ cɔlɔ nɛ ɛlɩɩ tɛtʋ taa nɛ eposi e-nesi Yehowa ɛsɩndaa, nɛ tɛʋ yele nazʋʋ nɛ ɖɔmbɛɛ yele tibu, nɛ tɛʋ yele nɩʋ tɛtʋ yɔɔ.+
34 Farawɔɔ nawa se tɛʋ yebi nɩʋ, ɖɔmbɛɛ yebi tibu nɛ tɛʋ yebi nazʋʋ lɛ, ɛtasɩ labʋ kɩwɛɛkɩm nɛ ɛla laŋɩyɛ ɖoŋ,+ ɛ nɛ ɛ-lɩmɖʋyaa.
35 Nɛ Farawɔɔ laŋɩyɛ wɛɛ kpɩzɩŋ mbʋ, nɛ etiyele Izrayɛɛlɩ mba nɛ pɛɖɛɛ, ɛzɩ Yehowa kaatɩŋnʋʋ Moyizi yɔɔ nɛ ɛyɔɔdɩ yɔ.+
Pɩ-tɛɛ tɔm
^ Yaa «mahɩzɩ-mɩ.»
^ Pʋtɔma, ɛzɩma tɛʋ ñɩlɩsaɣ ɖoŋ siŋŋ yɔ mbʋ payawa se miŋ.
^ Pɩsatʋ ndʋ pahayaɣ caanaʋ taa yɔ. Palakaɣnɩ tɩ-mʋndɔndʋ pɩsaŋ.
^ Ebree tɔm piye nɖɩ palabɩnɩ tʋmɩyɛ yɔ, ɖɩwɩlɩɣ se pɩkɛ blee ŋgʋ kɩtaawɛɛ ɖeu nɛ pɩtalɩ blee maɣmaɣ nɛ pahayaɣ-kʋ caanaʋ taa Ejipiti taa yɔ.
