Ejipiti Lɩʋ 39:1-43
39 Pakpaɣ pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, nɛ pɩsatʋ kɩsɛɛmtʋ cɩɩɩ+ nɛ palabɩnɩ wondu kususutu ndʋ palʋ-tʋ camɩyɛ se palabɩnɩ tʋmɩyɛ lone kiɖeɖeye taa yɔ. Palabɩ wondu kususutu kiɖeɖetu Aarɔɔnɩ,+ ɛzɩ Yehowa kaapɔzʋʋ Moyizi yɔ.
2 Ɛkpaɣ sika, pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ, nɛ pɩsatʋ* fɛlɛ fɛlɛ ñɩndʋ ndʋ pamɩlɩtɩ camɩyɛ yɔ nɛ ɛlabɩnɩ efoodɩ.+
3 Pakpaɣ hama nɛ pama sika nɛ kapɩsɩ hɔɔlasɩ tatayaa tatayaa, nɛ pɛsɛtɩ-sɩ nɛ pɩla sika nimasɩ lɩɩ lɩɩ nɛ palʋʋnɩ pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ, nɛ pɩsatʋ fɛlɛ fɛlɛ ñɩndʋ, nɛ pakpaɣ sika nimasɩ lɩɩ lɩɩ nzɩ nɛ pacanɩnɩ efoodɩ.
4 Palabɩ-kʋ haŋ nɛ patamnɩ ki-hayo kiŋ nɔsɩ naalɛ.
5 Nɛ tambaɖɛ nɖɩ palʋ-ɖɩ kɩlʋʋ yɔ,* nɖɩ patam-ɖɩ efoodɩ yɔɔ se kɩcaɣ ki-lone taa camɩyɛ yɔ,+ palabɩ-ɖɩ nɛ wondu kʋɖʋmtʋ ndʋ, pʋ-tɔbʋʋ se sika, pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ, nɛ pɩsatʋ fɛlɛ fɛlɛ ñɩndʋ ndʋ pamɩlɩtɩ camɩyɛ yɔ, ɛzɩ Yehowa kaapɔzʋʋ Moyizi se ɛla yɔ.
6 Pʋwayɩ lɛ, pakpaɣ onikisi pɛɛ nɛ paɖʋ sika pɔŋ taa, nɛ pama a-yɔɔ Izrayɛɛlɩ pɩyalaa hɩla, ɛzɩ pamaɣʋ tɔm tambɔŋ yɔɔ yɔ.+
7 Ɛɖʋ-yɛ efoodɩ haŋ yɔɔ nɛ pɩkɛ Izrayɛɛlɩ pɩyalaa kɩtɔzɩm pɛɛ,+ ɛzɩ Yehowa kaapɔzʋʋ Moyizi se ɛla yɔ.
8 Pʋwayɩ lɛ, ɛla laŋɩyɛ taa kabʋa+ nɛ ɛcanɩ-kɛ, ɛzɩ paakpaɣʋ sika, pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ, nɛ pɩsatʋ fɛlɛ fɛlɛ ñɩndʋ ndʋ pamɩlɩtɩ camɩyɛ yɔ+ nɛ pacanɩnɩ efoodɩ yɔ.
9 Kɔ-hɔɔlɩŋ 4 tɩŋa wɛ kɩmaŋ alɩwaatʋ ndʋ pekpiyiɣ-kɛ nabʋlɛ yɔ. Palabɩ laŋɩyɛ taa kabʋa, nɛ alɩwaatʋ ndʋ pekpiyiɣ-kɛ nabʋlɛ yɔ ka-ɖaɣlɩkɩŋ nɛ ka-walanzɩ kɛ nandaka kʋɖʋmaɣ.*
10 Paɖʋ kɔ-yɔɔ pɛɛ canzɩ 4. Kajalaɣ caŋa yɔ: rubii, toopaazɩ, nɛ emeroodi.
11 Caŋa 2 ñɩŋga yɔ: turikuwaazɩ, saafiirɩ, nɛ yaasɩpɩ.
12 Caŋa 3 ñɩŋga yɔ: lesɛm pɩyɛ,* agaatɩ, nɛ ameetiistɩ.
13 Nɛ caŋa 4 ñɩŋga yɔ: krizooliitɩ, onikisi, nɛ yaadɩ. Paɖʋ-yɛ sika pɔŋ taa.
14 Pɛɛ ana asɩŋnɩ Izrayɛɛlɩ pɩyalaa 12 hɩla, nɛ pama hɩla ana ɛzɩ pamaɣʋ tɔm tambɔŋ yɔɔ yɔ, paa hɩɖɛ nɖɩ lɛ ɖɩsɩŋnɩ Izrayɛɛlɩ cejewe 12 taa naɖɩyɛ.
15 Nɛ pakpaɣ sika kele kele ñɩŋga nɛ palabɩnɩ kpasɩ laŋɩyɛ taa kabʋa yɔɔ, palʋ-sɩ ɛzɩ nimee yɔ.+
16 Nɛ pahʋyɩ sika pɔŋ 2 nɛ pala sika kokoo 2 nɛ pata kokoo ana a-naalɛ laŋɩyɛ taa kabʋa kɔnanaa 2 taa.
17 Pʋwayɩ lɛ, patʋʋ sika nimee ana a-naalɛ kokoo 2 wena awɛ laŋɩyɛ taa kabʋa kɔnanaa taa yɔ a-taa.
18 Nɛ patʋʋ nimee ana a-naalɛ a-nɔsɩ pɔŋ 2 ɛnɩ ɩ-taa, nɛ pɔhɔkɩ-yɛ nɛ efoodɩ haŋ nɛ ɛsɩndaa kiŋ.
19 Pʋbʋ wayɩ lɛ, pala sika kokoo 2 nɛ paɖʋ-yɛ laŋɩyɛ taa kabʋa kpɛnzɩ 2 nzɩ sɩwɛnɩ pɩ-taa kiŋ yɔ sɩ-yɔɔ, efoodɩ yɔɔ kiŋ.+
20 Nɛ patasɩ labʋ sika kokoo 2 nɛ paɖʋ-yɛ efoodɩ ɛsɩndaa, kɩ-haŋ ɛnɩ ɩ-naalɛ ɩ-tɛɛ, ɖenɖe patam-kʋ yɔ pɩ-cɔlɔ, efoodɩ tambaɖɛ nɖɩ palʋ-ɖɩ kɩlʋʋ yɔ* ɖɩ-ñʋʋ yɔɔ.
21 Kɛdɛzaɣ ɖeɖe lɛ, pakpaɣ nimiye nɖɩ ɖɩwɛ pʋlɔɔ yɔ nɛ pasʋzɩ-ɖɩ laŋɩyɛ taa kabʋa yɔɔ kokoo taa nɛ patamnɩ-ɖɩ efoodɩ yɔɔ kokoo, se pɩsa nɛ laŋɩyɛ taa kabʋa wɛɛ ke-ɖeɖe camɩyɛ efoodɩ yɔɔ, tambaɖɛ nɖɩ palʋ-ɖɩ kʋlʋʋ yɔ* ɖɩ-ñʋʋ yɔɔ, ɛzɩ Yehowa kaapɔzʋʋ Moyizi se ɛla yɔ.
22 Pʋwayɩ lɛ, ɛla efoodɩ tɛ toko kɩtɩnʋʋ ŋgʋ kɩfɛyɩnɩ nɩŋgbɛɛnzɩ yɔ, ɛzɩ pɩsaŋ lʋyʋ lakʋʋ yɔ, pɩsatʋ ndʋ tɩwɛ pʋlɔɔ yɔ ti-ɖeke ɛlʋnɩ-kʋ.+
23 Toko kɩtɩnʋʋ ŋgʋ kɩfɛyɩnɩ nɩŋgbɛɛnzɩ yɔ kɩwɛnɩ pɔʋ kɩ-hɛkʋ taa, ɛzɩ ñɩɣyʋʋ toko pɔʋ yɔ. Pɛñɛyɩ kɩ-pɔʋ nɔsɩ yɔɔ nɛ pɩcɔɔ pɩta se pɩsa nɛ kɩtaacɩyɩ.
24 Pʋwayɩ lɛ, pakpaɣ pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, nɛ pɩsatʋ kɩsɛɛmtʋ cɩɩɩ, nɛ pɛkpɛndɩ nɛ palʋʋ nɛ pala ajana pee wena awɛ ɛzɩ girenaadɩ pee yɔ nɛ pɩcɔɔ toko kɩtɩnʋʋ ŋgʋ kɩfɛyɩnɩ nɩŋgbɛɛnzɩ yɔ kɩ-nɔɔ hadɛ ñɩŋga nɛ pɩta.
25 Nɛ pala sika kele kele ñɩŋga agaŋgala nɛ paɖʋ-yɛ girenaadɩ pee hɛkɩŋ taa nɛ pɩcɔɔ toko kɩtɩnʋʋ ŋgʋ kɩfɛyɩnɩ nɩŋgbɛɛnzɩ yɔ kɩ-nɔɔ hadɛ ñɩŋga nɛ pɩta, girenaadɩ pee hɛkɩŋ taa;
26 sika ɛgaŋgaɖɛ nɛ girenaadɩ piye pɛlɛdɩ ɖama, sika ɛgaŋgaɖɛ nɛ girenaadɩ piye pɛlɛdɩ ɖama, nɛ pɩcɔɔ toko kɩtɩnʋʋ ŋgʋ kɩfɛyɩnɩ nɩŋgbɛɛnzɩ yɔ kɩ-nɔɔ hadɛ ñɩŋga nɛ pɩta, ŋgʋ posuwaɣ nɛ palakɩnɩ tʋmɩyɛ yɔ, ɛzɩ Yehowa kaapɔzʋʋ Moyizi se ɛla yɔ.
27 Nɛ pakpaɣ pɩsatʋ fɛlɛ fɛlɛ ñɩndʋ nɛ palabɩnɩ tokonaa kɩɖaɣlaa mba pɩsaŋ lʋyʋ lʋwa yɔ Aarɔɔnɩ nɛ ɛ-pɩyalaa,+
28 nɛ ŋgee ñʋʋ kitemuu+ ŋgʋ palabɩnɩ pɩsatʋ fɛlɛ fɛlɛ ñɩndʋ yɔ, ajana ñʋʋ kitemiŋ+ weyi palabɩnɩ pɩsatʋ fɛlɛ fɛlɛ ñɩndʋ yɔ, pɩsatʋ cokodonaa*+ mba palabɩnɩ pɩsatʋ fɛlɛ fɛlɛ ñɩndʋ ndʋ pamɩlɩtɩ camɩyɛ yɔ,
29 nɛ kɩtamʋʋ ŋgʋ palabɩnɩ pɩsatʋ fɛlɛ fɛlɛ ñɩndʋ ndʋ pamɩlɩtɩ camɩyɛ yɔ, pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, nɛ pɩsatʋ kɩsɛɛmtʋ cɩɩɩ ndʋ pɛkpɛndaa nɛ palʋʋ yɔ, ɛzɩ Yehowa kaapɔzʋʋ Moyizi se ɛla yɔ.
30 Kɛdɛzaɣ lɛ, pakpaɣ sika kele kele ñɩŋga nɛ pala wonuu ŋgʋ kɩwɛ tayɩ nɛ kɩñɩlɩsɩɣ yɔ, tɩ haʋ yʋsaɣ kiɖeɖeɣa,* nɛ pama kɩ-yɔɔ tɔm tʋnɛ, ɛzɩ pamaɣʋ tɔm tambɔŋ yɔɔ yɔ: «Yehowa tɩnɩ kele kele wɛtʋ.»+
31 Pɔhɔkɩ kɩ-yɔɔ nimiye nɖɩ palabɩnɩ pɩsatʋ ndʋ tɩwɛ pʋlɔɔ yɔ se pɩsa nɛ paɖʋ-kʋ ŋgee ñʋʋ kitemuu yɔɔ, ɛzɩ Yehowa kaapɔzʋʋ Moyizi se ɛla yɔ.
32 Nɛ pala Ɛsɔ sɛtʋ kɩɖanɖʋʋ, kediɣzaɣ kizinziku tʋma tɩŋa nɛ pɛtɛm-yɛ, nɛ Izrayɛɛlɩ mba la mbʋ payɩ Yehowa kaapɔzɩ Moyizi se ɛla yɔ.+ Palabɩ mbʋ ɖeyi ɖeyi.
33 Nɛ pɔkɔnɩ Ɛsɔ sɛtʋ kɩɖanɖʋʋ+ Moyizi cɔlɔ, kizinziku+ nɛ ki-wondu kpeekpe: kɩ-kpasɩ,+ ki-kpoŋgbolonaa,*+ kɩ-ɖaŋ sɔsɔŋ,+ ki-tilima nɛ kɩ-ɖɩdɩnɩyɛ lona;+
34 ki-kuhuuzuu ŋgʋ palabɩnɩ ɛyaŋ tɔna wena pata-yɛ tɔlɩm kɩsɛɛmɩm yɔ,+ ki-kuhuuzuu ŋgʋ palabɩnɩ kpɩnɛ nɖɩ payaɣ se fɔɔkɩ yɔ ɖɩ-tɔnɛ yɔ, pɩsaʋ kikenduu ŋgʋ kɩtayɩɣ hɛkʋ taa yɔ;+
35 Aseɣɖe Lɩzʋʋ aɖakaɣ nɛ ka-ɖaŋ+ nɛ sulaɣ;+
36 taabɩlɩ nɛ ki-wondu tɩŋa+ nɛ Ɛsɔ ɛsɩndaa kpɔnɔnaa;
37 kanɖʋnaa ɖɩzɩyɛ nɖɩ palabɩnɩ sika kele kele ñɩŋga yɔ, ɖɩ-kanɖʋnaa,+ kanɖʋnaa canzɩ nɛ ɖi-wondu tɩŋa+ nɛ num mbʋ paɖʋʋ pa-taa se pɩñandɩ yɔ;+
38 sika altaaru,+ ŋgee num,+ ŋgee tɩlaaɖɩ sɔzɩŋ ñɩŋgʋ,+ kizinziku nɔnɔɔ yɔɔ pɩsaʋ kikenduu;+
39 ñɩɣyʋʋ kɩsɛɛmʋʋ altaaru+ nɛ kɩ-ñɩɣyʋʋ kɩsɛɛmʋʋ giriyaazɩ, kɩ-ɖaŋ,+ ki-wondu tɩŋa,+ ñanaɣ sɔsɔɔ nɛ ka-ɖɩdɩnɩyɛ;+
40 kadaɣ pɩsaŋ kikendiŋ weyi popuzuu yɔ, ke-tilima nɛ ka-ɖɩdɩnɩyɛ lona,+ kadaɣ nɔnɔɔ yɔɔ pɩsaʋ kikenduu,+ ke-nimee nɛ ka-kaŋgamasɩ+ nɛ wondu ndʋ palakɩnɩ tʋmɩyɛ Ɛsɔ sɛtʋ kɩɖanɖʋʋ, kediɣzaɣ kizinziku tɛɛ yɔ tɩ-tɩŋa;
41 wondu kususutu ndʋ palʋ-tʋ camɩyɛ se palabɩnɩ tʋmɩyɛ kooka kiɖeɖeɣa taa yɔ, cɔjɔ Aarɔɔnɩ wondu kususutu kiɖeɖetu,+ nɛ ɛ-pɩyalaa wondu ndʋ posuu se pala cɔjɔtʋ tʋmɩyɛ yɔ.
42 Izrayɛɛlɩ mba labɩ tʋmɩyɛ tɩŋa, ɛzɩ Yehowa kaaɖʋʋ Moyizi paɣtʋ yɔ.+
43 Alɩwaatʋ ndʋ Moyizi cɔnɩ tʋmɩyɛ nɖɩ payɩ palaba yɔ lɛ, ɛna se palabɩ-ɖɩ ɖeyi ɖeyi ɛzɩ Yehowa kaaɖʋʋ paɣtʋ yɔ; nɛ Moyizi wazɩ-wɛ.
Pɩ-tɛɛ tɔm
^ Yaa «pɩsatʋ ndʋ payaɣ se lɛɛ yɔ.» Lɛɛ kɛ ñɩtʋ ndʋ pahayaɣ-tʋ ɖooo caanaʋ taa nɛ palakɩnɩ-tʋ tʋmɩyɛ nɛ palʋʋnɩ wondu kususutu yɔ.
^ Yaa «tɩnaɣ taa kɩtamʋʋ.»
^ Yaa «kɛ ampaŋ kʋɖʋmʋʋ.» Ampaŋ kʋɖʋmʋʋ maɣnɩ ɛzɩ santimɛtawaa 22 mbʋ yɔ (santimɛtawaa 22,2). Cɔnɩ Tɔm kɩsɔzɩtʋ B14.
^ Pɩkɛ pɩyɛ kɩbanɖɛ naɖɩyɛ, paasɩŋ-ɖɩ ɖeyi ɖeyi; pɩkɛɣnɩ ambɩrɩ, yaasɛntɩ, opaalɩ, yaa turimaaliini.
^ Yaa «efoodɩ tɩnaɣ taa kɩtamʋʋ.»
^ Yaa «tɩnaɣ taa kɩtamʋʋ.»
^ Yaa «pɩ-tɛɛ wondu.»
^ Yaa «kiɖe taa ñɩɣlɩm kɩtamʋʋ kiɖeɖeu.»
^ Cɔnɩ Tɔm pee sɔsɔna tɔbʋʋ lɩzʋʋ nɛ Tɔm kɩsɔzɩtʋ B5.
