Ejipiti Lɩʋ 38:1-31
38 Ɛkpaɣ akasɩya ɖaŋ nɛ ɛlabɩnɩ kɩlaŋ kɩñaɣzɩŋ altaaru. Kɩ-hɔɔlɩŋ 4 tɩŋa wɛ kɩmaŋ, kɩ-ɖaɣlɩkɩŋ kɛ nuŋgolonzi* 5, kɩ-walanzɩ kɛ nuŋgolonzi 5 nɛ kɩ-kʋkʋyɩŋ kɛ nuŋgolonzi naadozo.+
2 Nɛ ɛla kɩ-hɩŋ kɩ-kɔnanaa 4 taa. Kɩ nɛ kɩ-hɩŋ pɩkɛ pʋyʋ kʋɖʋm. Pʋwayɩ lɛ, ɛkpaɣ ñɩɣyʋʋ kɩsɛɛmʋʋ nɛ ɛpɔ kɩ-yɔɔ.+
3 Pʋbʋ wayɩ lɛ, ɛla altaaru ŋgʋ ki-wondu tɩŋa: tɔkasɩ, pɛɛlɩnaa, ñanzɩ, kela lɔɔyɩsɩ, nɛ miŋ ñanzɩ. Ñɩɣyʋʋ kɩsɛɛmʋʋ ɛlabɩnɩ ki-wondu ndʋ tɩ-tɩŋa.
4 Ɛlabɩ ɖɔɖɔ altaaru ŋgʋ giriyaazɩ, kɩkɛ ñɩɣyʋʋ kɩsɛɛmʋʋ giriyaazɩ, nɛ ɛɖʋ-kʋ kɩ-kpɛnzɩ tɛɛ, kɩ-hɛkʋ taa kiŋ.
5 Ɛla kokoo 4 kɔnanaa 4 mba pa-taa, ñɩɣyʋʋ kɩsɛɛmʋʋ giriyaazɩ cɔlɔ, nɛ akɛ ɖɩɖɔkɩyɛ nɖɩ ɖɩ-taa pɛlɛkɩɣ ɖaŋ yɔ.
6 Pʋwayɩ lɛ, ɛkpaɣ akasɩya ɖaŋ nɛ ɛñɔɔzɩ-ɩ nɛ ɛpɔ ɩ-yɔɔ ñɩɣyʋʋ kɩsɛɛmʋʋ.
7 Ɛsʋzɩ ɖaŋ ɛnɩ kokoo taa, altaaru hɔɔlɩŋ yɔɔ se pakpakɩɣnɩ-kʋ. Ɛlabɩ altaaru ŋgʋ nɛ kɩwɛɛ ɛzɩ kpoŋgbolonaa aɖakaɣ ŋga kɛwɛ haaa yɔ.
8 Nɛ ɛkpaɣ ñɩɣyʋʋ kɩsɛɛmʋʋ nɛ ɛlabɩnɩ ñanaɣ sɔsɔɔ+ nɛ ka-ɖɩdɩnɩyɛ; ɛlabɩnɩ tʋmɩyɛ halaa mba paañɔɔzɩ-wɛ se pala tʋmɩyɛ kediɣzaɣ kizinziku nɔnɔɔ taa yɔ pa-ñɩnɩŋ.*
9 Pʋwayɩ lɛ, ɛla kadaɣ.+ Ɛkpaɣ pɩsatʋ fɛlɛ fɛlɛ ñɩndʋ ndʋ pamɩlɩtɩ camɩyɛ yɔ nɛ ɛlabɩnɩ pɩsaŋ kikendiŋ weyi popuzuu yɔ kadaɣ ŋga ka-hadɛ kiŋ, pʋ-tɔbʋʋ se hɔɔlʋʋ ŋgʋ kɩha ɛsa nɛ hadɛ kiŋ yɔ, ɖaɣlɩkɩŋ kɛ nuŋgolonzi 100.+
10 Kaawɛnɩ tilima 20 nɛ ɖɩdɩnɩyɛ lona 20 wena palabɩnɩ ñɩɣyʋʋ kɩsɛɛmʋʋ yɔ, nɛ liidiye ñɩɣtʋ ɛkpaɣaa nɛ ɛlabɩnɩ tilima ana a-kokoo wena a-nɔsɩ howa yɔ nɛ mbʋ pataŋnɩ-yɛ yɔ.*
11 Pɩtasɩ lɛ, hayo kiŋ hɔɔlʋʋ yɔɔ lɛ, popuzi pɩsaŋ kikendiŋ, ɩ-ɖaɣlɩkɩŋ kɛ nuŋgolonzi 100. Ɛkpaɣ ñɩɣyʋʋ kɩsɛɛmʋʋ nɛ ɛlabɩnɩ i-tilima 20 nɛ a-ɖɩdɩnɩyɛ lona 20. Ɛkpaɣ liidiye ñɩɣtʋ nɛ ɛlabɩnɩ tilima kokoo wena a-nɔsɩ howa yɔ nɛ mbʋ pataŋnɩ-yɛ yɔ.*
12 Ɛlɛ wɩsɩ ɖɩɖʋyɛ taa hɔɔlʋʋ yɔɔ lɛ, popuzi pɩsaŋ kikendiŋ, ɩ-ɖaɣlɩkɩŋ kɛ nuŋgolonzi 50. Ɩɩwɛnɩ tilima 10 nɛ ɖɩdɩnɩyɛ lona 10, nɛ ɛkpaɣ liidiye ñɩɣtʋ nɛ ɛlabɩnɩ tilima kokoo wena a-nɔsɩ howa yɔ nɛ mbʋ pataŋnɩ-yɛ yɔ.*
13 Hɔɔlʋʋ ŋgʋ kɩwɛnɩ wɩsɩ ɖɩlɩyɛ taa yɔ, kɩ-walanzɩ kɛ nuŋgolonzi 50.
14 Popuzi pɩsaŋ kikendiŋ nuŋgolonzi 15 hɔɔlʋʋ kʋɖʋmʋʋ yɔɔ, pɩ nɛ tilima 3 nɛ ɖɩdɩnɩyɛ lona 3.
15 Nɛ kadaɣ nɔnɔɔ hɔɔlʋʋ lɛɛkʋ yɔɔ lɛ, popuzi pɩsaŋ kikendiŋ, nuŋgolonzi 15, pɩ nɛ tilima 3 nɛ ɖɩdɩnɩyɛ lona 3.
16 Pɩsaŋ kikendiŋ weyi popuzi-i nɛ ɩcɔɔ kadaɣ nɛ ɩta yɔ, palabɩ ɩ-tɩŋa nɛ pɩsaŋ fɛlɛ fɛlɛ ñɩŋ weyi palʋ-ɩ camɩyɛ yɔ.
17 Ɛkpaɣ ñɩɣyʋʋ kɩsɛɛmʋʋ nɛ ɛlabɩnɩ tilima ɖɩdɩnɩyɛ lona, nɛ ɛkpaɣ liidiye ñɩɣtʋ nɛ ɛlabɩnɩ tilima kokoo wena a-nɔsɩ howa yɔ nɛ mbʋ pataŋnɩ-yɛ yɔ,* nɛ ɛpɔ ñʋʋ taa liidiye ñɩɣtʋ, nɛ kadaɣ tilima tɩŋa wɛnɩ kɩhɔkɩŋ weyi palabɩnɩ liidiye ñɩɣtʋ yɔ.+
18 Palʋ kadaɣ nɔnɔɔ yɔɔ pɩsaʋ kikenduu nɛ pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ, nɛ pɩsatʋ fɛlɛ fɛlɛ ñɩndʋ ndʋ pamɩlɩtɩ camɩyɛ yɔ. Kɩ-ɖaɣlɩkɩŋ kɛ nuŋgolonzi 20 nɛ kɩ-kʋkʋyɩŋ kɛ nuŋgolonzi 5, kɩ-kʋkʋyɩŋ nɛ kadaɣ taa pɩsaŋ kikendiŋ weyi popuzi-i yɔ pɛwɛ kɩmaŋ.+
19 Ñɩɣyʋʋ kɩsɛɛmʋʋ ɛlabɩnɩ i-tilima 4 nɛ a-ɖɩdɩnɩyɛ lona 4. Liidiye ñɩɣtʋ ɛlabɩnɩ a-kokoo wena a-nɔsɩ howa yɔ nɛ mbʋ pataŋnɩ-yɛ yɔ,* nɛ ɛkpaɣ liidiye ñɩɣtʋ nɛ ɛtaa a-ñʋʋ taa.
20 Ñɩɣyʋʋ kɩsɛɛmʋʋ ɛlabɩnɩ Ɛsɔ sɛtʋ kɩɖanɖʋʋ kaŋgamasɩ tɩŋa nɛ nzɩ sɩcɔ kadaɣ nɛ sɩta yɔ sɩ-tɩŋa.+
21 Wondu ndʋ palabɩnɩ Ɛsɔ sɛtʋ kɩɖanɖʋʋ, Aseɣɖe Lɩzʋʋ+ Ɛsɔ sɛtʋ kɩɖanɖʋʋ yɔ tɩ-tɛ akɔnta yɔ, akɔnta ŋgʋ Moyizi ɖʋ paɣtʋ se cɔjɔ Aarɔɔnɩ pɩyalʋ Itamaarɩ+ ɛɖɛɛ Leevi mba+ nɔɔ nɛ pala yɔ.
22 Bezaalɛɛlɩ,+ Uri pɩyalʋ, weyi ɛlɛ kɛ Yuuda cejewiye taa tʋ Huuri pɩyalʋ yɔ, ɛlabɩ mbʋ payɩ Yehowa kaapɔzɩ Moyizi se ɛla yɔ.
23 Ɛ nɛ Oholiyaabɩ,+ Ahisamaakɩ pɩyalʋ weyi ɛkɛ Daanɩ cejewiye taa tʋ yɔ, ɛkɛ nesi tɛɛ tʋmlaɖʋ nɛ wondu kususutu canɩyʋ nɛ weyi ɛlʋʋ pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ, nɛ pɩsatʋ fɛlɛ fɛlɛ ñɩndʋ yɔ.
24 Sika ŋga payɩ palabɩnɩ tʋmɩyɛ lone kiɖeɖeye taa tʋma kpeekpe labʋ taa yɔ kamaɣnɩ kɩlaʋ kifiɣduu sika,+ talaŋwaa* 29 nɛ siklinaa* 730, pamʋnɩ lone kiɖeɖeye taa sikli.*
25 Nɛ samaɣ taa ñɩma mba paakalɩ-wɛ yɔ pe-liidiye ñɩɣtʋ kaakɛ talaŋwaa 100 nɛ siklinaa 1 775, pamʋnɩ lone kiɖeɖeye taa sikli.*
26 Mba pɛwɛnɩ pɩnzɩ 20 yaa pɩcɛzɩ mbʋ, nɛ pakalɩ-wɛ yɔ pa-taa paa weyi ha sikli hɔɔlʋʋ, kɩmʋnɩ lone kiɖeɖeye taa sikli* hɔɔlʋʋ,+ nɛ pa-tɩŋa pɛkpɛndɩ ɛyaa 603 550.+
27 Mbʋ pakpaɣaa nɛ palabɩnɩ lone kiɖeɖeye taa ɖɩdɩnɩyɛ lona nɛ pɩsaʋ kikenduu ɖɩdɩnɩyɛ lona yɔ, pɩlɩ talaŋwaa 100; ɖɩdɩnɩyɛ lona 100 kɛ talaŋwaa 100, paa ɖɩdɩnɩyɛ lone+ nɖɩ lɛ talaŋ kʋɖʋmʋʋ.
28 Ɛkpaɣ siklinaa 1 775 mba nɛ ɛlabɩnɩ tilima kokoo wena a-nɔsɩ howa yɔ nɛ ɛtaa a-ñʋŋ taa nɛ ɛkpɛndɩ-yɛ.
29 Ñɩɣyʋʋ kɩsɛɛmʋʋ haɖɛ* kaakpɛndɩ talaŋwaa 70 nɛ siklinaa 2 400.
30 Ɛkpaɣ-wɛ nɛ ɛlabɩnɩ kediɣzaɣ kizinziku nɔnɔɔ taa ɖɩdɩnɩyɛ lona, ñɩɣyʋʋ kɩsɛɛmʋʋ altaaru nɛ kɩ-tɛ giriyaazɩ ŋgʋ palabɩnɩ ñɩɣyʋʋ kɩsɛɛmʋʋ yɔ, altaaru wondu kpeekpe,
31 ɖɩdɩnɩyɛ lona wena acɔ kadaɣ nɛ ata yɔ, kadaɣ nɔnɔɔ taa ɖɩdɩnɩyɛ lona, nɛ Ɛsɔ sɛtʋ kɩɖanɖʋʋ kaŋgamasɩ tɩŋa nɛ kaŋgamasɩ+ nzɩ sɩcɔ kadaɣ nɛ sɩta yɔ sɩ-tɩŋa.
Pɩ-tɛɛ tɔm
^ Nuŋgoloŋa kʋɖʋmaɣ kɛ santimɛtawaa 44 nɛ hɔɔlʋʋ (santimɛtawaa 44,5). Cɔnɩ Tɔm kɩsɔzɩtʋ B14.
^ Pʋ-tɔbʋʋ se ñɩɣtʋ ndʋ pasayɩ-tʋ camɩyɛ nɛ tɩpɩsɩ ñɩnɩŋ yɔ.
^ Yaa «nɛ kokoo; nɛ nimee wena pokoti-yɛ ɛzɩ kokoo yɔ; nɛ kɩtamʋʋ» nɛ pɩkɛ mbʋ pɔhɔkʋʋna yɔ.
^ Yaa «nɛ kokoo; nɛ nimee wena pokoti-yɛ ɛzɩ kokoo yɔ; nɛ kɩtamʋʋ» nɛ pɩkɛ mbʋ pɔhɔkʋʋna yɔ.
^ Yaa «nɛ kokoo; nɛ nimee wena pokoti-yɛ ɛzɩ kokoo yɔ; nɛ kɩtamʋʋ» nɛ pɩkɛ mbʋ pɔhɔkʋʋna yɔ.
^ Yaa «nɛ kokoo; nɛ nimee wena pokoti-yɛ ɛzɩ kokoo yɔ; nɛ kɩtamʋʋ» nɛ pɩkɛ mbʋ pɔhɔkʋʋna yɔ.
^ Yaa «nɛ kokoo; nɛ nimee wena pokoti-yɛ ɛzɩ kokoo yɔ; nɛ kɩtamʋʋ» nɛ pɩkɛ mbʋ pɔhɔkʋʋna yɔ.
^ Talaŋ kʋɖʋmʋʋ maɣnɩ ɛzɩ kilonaa 34 mbʋ yɔ (kilonaa 34,2). Cɔnɩ Tɔm kɩsɔzɩtʋ B14.
^ Sikli kʋɖʋmʋʋ maɣnɩ ɛzɩ kɩɖamnaa 11 nɛ hɔɔlʋʋ mbʋ yɔ (kɩɖamnaa 11,4). Cɔnɩ Tɔm kɩsɔzɩtʋ B14.
^ Yaa «sikli kiɖeɖeu.»
^ Yaa «sikli kiɖeɖeu.»
^ Yaa «sikli kiɖeɖeu.»
^ Yaa «kɩlaʋ kifiɣduu.»
