Ejipiti Lɩʋ 35:1-35
35 Pʋwayɩ lɛ, Moyizi kpeɣli Izrayɛɛlɩ mba samaɣ kpeekpe nɛ eheyi-kɛ se: «Pʋnɛ Yehowa pɔzaa se pala:+
2 Papɩzɩɣ nɛ pala tʋmɩyɛ kɩyakɩŋ 6, ɛlɛ kɩyakʋ 7 ñɩŋgʋ kaɣ-mɩ pɩsʋʋ pʋyʋ kiɖeɖeu, hɛzʋʋ kiya sabaatɩ pɩkɛnɩ Yehowa.+ Ye nɔɔyʋ ɛlabɩ tʋmɩyɛ ki-wiye yɔ, pɩwɛɛ se pakʋ-ɩ.+
3 Pɩtɩpɔzɩ se ipuzi miŋ lona wena a-taa ɩwɛɛ yɔ a-taa naɖɩyɛ taa Sabaatɩ wiye.»
4 Pʋwayɩ lɛ, Moyizi heyi Izrayɛɛlɩ mba samaɣ kpeekpe se: «Pʋnɛ Yehowa pɔzaa se pala:
5 “Ɩha Yehowa haɖɛ.+ Weyi ɛ-laŋɩyɛ seɣtiɣ-i yɔ+ ɛha Yehowa haɖɛ ɖɩnɛ: sika, liidiye ñɩɣtʋ, ñɩɣyʋʋ kɩsɛɛmʋʋ,
6 pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ, pɩsatʋ fɛlɛ fɛlɛ ñɩndʋ, pʋnʋ hʋndʋ,+
7 ɛyaŋ tɔna wena pata-yɛ tɔlɩm kɩsɛɛmɩm yɔ, kpɩnɛ nɖɩ payaɣ se fɔɔkɩ yɔ ɖɩ-tɔnɛ, akasɩya ɖaŋ,
8 kanɖʋnaa taa num, balɩsam ŋgʋ palakɩnɩ ŋgee num yɔ nɛ ŋgʋ palakɩnɩ ŋgee tɩlaaɖɩ sɔzɩŋ ñɩŋgʋ yɔ,+
9 onikisi pɛɛ, nɛ pɛɛ lɛɛna wena paɖʋʋ efoodɩ+ nɛ laŋɩyɛ taa kabʋa+ yɔɔ yɔ.
10 «“Mba payɩ pɛwɛ niye*+ mɩ-hɛkʋ taa yɔ, pɔkɔɔ nɛ pala mbʋ payɩ Yehowa pɔzaa yɔ,
11 pʋ-tɔbʋʋ se Ɛsɔ sɛtʋ kɩɖanɖʋʋ nɛ ki-kizinziku nɛ mbʋ pohuuzuu kɩ-yɔɔ yɔ, kɩ-kpasɩ nɛ ki-kpoŋgbolonaa,* kɩ-ɖaŋ, ki-tilima, kɩ-ɖɩdɩnɩyɛ lona;
12 Aɖakaɣ+ nɛ ka-ɖaŋ,+ ko-sulaɣ,+ nɛ pɩsaʋ kikenduu+ ŋgʋ kɩtayɩɣ hɛkʋ taa yɔ;
13 taabɩlɩ+ nɛ kɩ-ɖaŋ nɛ kɩ-yɔɔ wondu tɩŋa nɛ Ɛsɔ ɛsɩndaa kpɔnɔnaa;+
14 kanɖʋnaa ɖɩzɩyɛ+ nɛ ɖɩ-yɔɔ wondu nɛ ɖɩ-kanɖʋnaa nɛ num mbʋ paɖʋʋ pa-taa se pɩñandɩ yɔ;+
15 ŋgee tɩlaaɖɩ altaaru+ nɛ kɩ-ɖaŋ; ŋgee num nɛ ŋgee tɩlaaɖɩ sɔzɩŋ ñɩŋgʋ;+ Ɛsɔ sɛtʋ kɩɖanɖʋʋ nɔnɔɔ yɔɔ pɩsaʋ kikenduu;
16 kɩlaʋ kɩñaɣzʋʋ altaaru+ nɛ kɩ-ñɩɣyʋʋ kɩsɛɛmʋʋ giriyaazɩ, kɩ-ɖaŋ nɛ kɩ-yɔɔ wondu tɩŋa; ñanaɣ sɔsɔɔ nɛ ka-ɖɩdɩnɩyɛ;+
17 pɩsaŋ kikendiŋ weyi popuzuu kadaɣ taa yɔ,+ i-tilima nɛ a-ɖɩdɩnɩyɛ lona; kadaɣ nɔnɔɔ yɔɔ pɩsaʋ kikenduu;
18 Ɛsɔ sɛtʋ kɩɖanɖʋʋ kaŋgamasɩ nɛ kaŋgamasɩ nzɩ sɩwɛ kadaɣ taa yɔ nɛ si-nimee;+
19 wondu kususutu ndʋ palʋ-tʋ camɩyɛ+ se palabɩnɩ tʋmɩyɛ kooka kiɖeɖeɣa taa yɔ, cɔjɔ Aarɔɔnɩ wondu kususutu kiɖeɖetu,+ nɛ ɛ-pɩyalaa wondu ndʋ posuu se pala cɔjɔtʋ tʋmɩyɛ yɔ.”»
20 Nɛ Izrayɛɛlɩ mba samaɣ kpeekpe kʋyɩ Moyizi ɛsɩndaa nɛ kalɩɩ.
21 Nɛ mba payɩ pa-laŋɩyɛ seɣtaɣ-wɛ+ nɛ mba payɩ pa-maɣzɩm seɣtaɣ-wɛ yɔ pɔkɔɔ, nɛ pɔkɔnɩ pa-haɖɛ Yehowa se palabɩnɩ-ɖɩ tʋmɩyɛ nɛ pala kediɣzaɣ kizinziku, kɩ-tʋmɩyɛ kpeekpe, nɛ wondu kususutu kiɖeɖetu.
22 Abalaa nɛ halaa pɛwɛɛ kɔm yɔɔ, paa weyi lɛ, ɛkɔŋaɣnɩ laŋɩyɛ faaa, nɛ pɔkɔŋnɩ ñɩɣlɩm wondu ndʋ paɖʋʋ tokonaa yɔɔ yɔ, naŋgbacaɣlanaa, kokoo, nɛ ajana wondu lɛɛtʋ, pɩkpɛndɩnɩ sika wondu ndɩ ndɩ. Pa-tɩŋa pɔkɔnɩ sika nɛ paha haɖɛ* Yehowa.+
23 Nɛ mba payɩ paawɛnɩ pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ, pɩsatʋ fɛlɛ fɛlɛ ñɩndʋ, pʋnʋ hʋndʋ, ɛyaŋ tɔna wena pata-yɛ tɔlɩm kɩsɛɛmɩm yɔ, nɛ kpɩnɛ nɖɩ payaɣ se fɔɔkɩ yɔ ɖɩ-tɔnɛ yɔ, pɔkɔnɩ-wɛ.
24 Mba payɩ pahaɣaɣ liidiye ñɩɣtʋ nɛ ñɩɣyʋʋ kɩsɛɛmʋʋ yɔ, pɔkɔnɩ Yehowa haɖɛ, nɛ mba payɩ paawɛnɩ akasɩya ɖaŋ yɔ, pɔkɔnɩ-ɩ se palabɩnɩ tʋma ndɩ ndɩ.
25 Halaa mba payɩ pɛwɛ niye yɔ+ palʋ wondu nɛ pe-nesi, nɛ pɔkɔnɩ mbʋ palʋwa yɔ: pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ, pɩsatʋ fɛlɛ fɛlɛ ñɩndʋ.
26 Nɛ halaa mba payɩ pɛwɛ niye nɛ pa-laŋa seɣtaɣ-wɛ yɔ, palʋʋ pʋnʋ hʋndʋ.
27 Nɛ ñʋndɩnaa kɔnɩ onikisi pɛɛ nɛ pɛɛ lɛɛna se paɖʋ-yɛ efoodɩ nɛ laŋɩyɛ taa kabʋa yɔɔ,+
28 nɛ balɩsam nɛ kanɖʋ taa num, nɛ num mbʋ palakɩnɩ ŋgee num+ nɛ ŋgee tɩlaaɖɩ sɔzɩŋ ñɩŋgʋ yɔ.+
29 Abalaa nɛ halaa mba payɩ pa-laŋa seɣtaɣ-wɛ yɔ, pɔkɔnɩ nabʋyʋ se palabɩnɩ tʋmɩyɛ nɖɩ Yehowa kaatɩŋnɩ Moyizi yɔɔ nɛ ɛpɔzɩ-wɛ se pala yɔ; Izrayɛɛlɩ mba kɔnɩ-pʋ nɛ pɩkɛ haɖɛ faaa nɖɩ paha Yehowa yɔ.+
30 Pʋwayɩ lɛ, Moyizi heyi Izrayɛɛlɩ mba se: «Ɩna, Yehowa lɩzɩ Bezaalɛɛlɩ, Uri pɩyalʋ, weyi ɛlɛ kɛ Yuuda cejewiye taa tʋ Huuri pɩyalʋ yɔ.+
31 Eyeba nɛ Ɛsɔ fezuu su ɛ-taa, nɛ ɛha-ɩ lɔŋsɩnɖɛ, tɔm taa nɩʋ lɛɣtʋ, nɛ sɩmtʋ ndʋ tiyeki se ɛwɛɛ niye nesi tɛɛ tʋma ndɩ ndɩ labʋ taa yɔ,
32 se ɛla lɛɣtʋ tʋma ndɩ ndɩ camɩyɛ, se ɛla tʋmɩyɛ sika yɔɔ, liidiye ñɩɣtʋ yɔɔ, nɛ ñɩɣyʋʋ kɩsɛɛmʋʋ yɔɔ,
33 se ɛsaɣ pɛɛ nɛ a-ɖɩɖʋyɛ, nɛ ɛsaɣ tɩŋ nɛ ɛlabɩnɩ wondu ndɩ ndɩ.
34 Nɛ ɛɖʋ ɛ-laŋɩyɛ taa se ɛwɩlɩ lalaa, ɛ nɛ Oholiyaabɩ,+ Ahisamaakɩ pɩyalʋ weyi ɛkɛ Daanɩ cejewiye taa tʋ yɔ.
35 Eyeba nɛ lɛɣtʋ* su pa-taa+ se pala nesi tɛɛ tʋmlaɖaa tʋma kpeekpe, wondu kususutu canɩyʋ tʋma, nɛ wondu lʋyʋ weyi ɛlakɩnɩ tʋmɩyɛ pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ, nɛ pɩsatʋ fɛlɛ fɛlɛ ñɩndʋ yɔ ɛ-tʋma, nɛ pɩsaŋ lʋyʋ tʋma. Ɛyaa mba, pakaɣ labʋ tʋma ndɩ ndɩ nɛ pɔñɔɔzɩ lɛɣtʋ tʋma ndɩ ndɩ.
Pɩ-tɛɛ tɔm
^ Piye piye, «pɛwɛnɩ laŋɩyɛ nɖɩ ɖɩwɛ lɔŋ yɔ.»
^ Cɔnɩ Tɔm pee sɔsɔna tɔbʋʋ lɩzʋʋ nɛ Tɔm kɩsɔzɩtʋ B5.
^ Yaa «nɛ palaa kɩlaŋ kifiɣdiŋ.»
^ Piye piye, «laŋɩyɛ nɖɩ ɖɩwɛ lɔŋ yɔ.»
