Ejipiti Lɩʋ 29:1-46
29 «Pʋnɛ pɩwɛɛ se ŋla nɛ ŋpɩsɩ-wɛ kiɖeɖema nɛ palabɩ-m cɔjɔtʋ tʋmɩyɛ: Kpaɣ nɔ* abalɩñɩnʋ, ɛyaŋ 2 weyi ɩfɛyɩnɩ ɛjandʋ natʋyʋ yɔ,+
2 kpɔnɔ ŋgʋ kɩ-taa patɩɖʋ lɔlɔm yɔ, kpɔnɔnaa mba palabɩ-wɛ nɛ num nɛ patɩɖʋ pa-taa lɔlɔm nɛ pɛwɛ kulukulu kokoo tɩyɛ yɔ, nɛ kpɔnɔnaa tatayaa tatayaawaa mba pamɩzɩ pɔ-yɔɔ num nɛ patɩɖʋ pa-taa lɔlɔm yɔ.+ Pɩwɛɛ se ŋkpaɣ blee mʋlʋm mbʋ pɩkpɩzɩ camɩyɛ yɔ nɛ ŋlabɩnɩ-wɛ
3 nɛ ŋɖʋ-wɛ ɖɔkʋ nakʋyʋ taa nɛ ŋkɔnɩ-wɛ mɛ-ɛsɩndaa ɖɔkʋ ŋgʋ kɩ-taa,+ pɩ nɛ nɔ abalɩñɩnʋ ɛnʋ nɛ ɛyaŋ ɛnɩ ɩ-naalɛ.
4 «Ŋkaɣ kɔnʋʋ Aarɔɔnɩ nɛ ɛ-pɩyalaa kediɣzaɣ kizinziku nɔnɔɔ taa+ nɛ ŋsɔ-wɛ lɩm.+
5 Pʋwayɩ lɛ pɩwɛɛ se ŋkpaɣ wondu+ nɛ ŋsuu Aarɔɔnɩ toko kɩɖaɣlʋʋ, efoodɩ toko kɩtɩnʋʋ ŋgʋ kɩfɛyɩnɩ nɩŋgbɛɛnzɩ yɔ, efoodɩ, laŋɩyɛ taa kabʋa, nɛ ŋta efoodɩ tambaɖɛ nɖɩ palʋ-ɖɩ kɩlʋʋ yɔ* ɛ-tɩnaɣ taa nɛ pɩcɛyɩ camɩyɛ.+
6 Ŋkaɣ-ɩ tem ŋgee ñʋʋ kitemuu nɛ ŋɖʋ tɩ haʋ yʋsaɣ kiɖeɖeɣa* ŋgee ñʋʋ kitemuu yɔɔ;+
7 nɛ ŋkpaɣ ŋgee num+ nɛ ŋpɩyɩ-pʋ ɛ-ñʋʋ taa nɛ ŋtaa-ɩ num.+
8 «Pʋwayɩ lɛ, ŋkɔnɩ ɛ-pɩyalaa nɛ ŋsuu-wɛ tokonaa kɩɖaɣlaa+
9 nɛ ŋtam-wɛ kɩtamɩŋ, Aarɔɔnɩ nɛ ɛ-pɩyalaa, nɛ ŋtem-wɛ ñʋʋ kitemiŋ; nɛ cɔjɔtʋ tʋmɩyɛ kaɣ pɩsʋʋ pa-tʋmɩyɛ, nɛ pɩkɛ tamtam paɣtʋ.+ Mbʋ pɩwɛɛ se ŋla nɛ ŋsɩɩnɩ Aarɔɔnɩ nɛ ɛ-pɩyalaa cɔjɔtʋ tʋmɩyɛ taa.*+
10 «Nɛ pɩwɛɛ se ŋkɔnɩ nɔ abalɩñɩnʋ ɛnʋ kediɣzaɣ kizinziku ɛsɩndaa, nɛ Aarɔɔnɩ nɛ ɛ-pɩyalaa patɩnɩ pe-nesi nɔ abalɩñɩnʋ ɛnʋ ɛ-ñʋʋ yɔɔ.+
11 Kʋ nɔ abalɩñɩnʋ ɛnʋ Yehowa ɛsɩndaa, kediɣzaɣ kizinziku nɔnɔɔ taa.+
12 Lii ñe-niye nɔ abalɩñɩnʋ ɛnʋ ɛ-calɩm taa nɛ ŋtaa-pʋ altaaru hɩŋ yɔɔ,+ nɛ ŋpɩyɩ calɩm mbʋ pɩkazaa yɔ pɩtɩŋa altaaru tɛɛ.+
13 Pʋwayɩ lɛ, ŋkpaɣ num mbʋ payɩ+ pɩpɔ lotu yɔɔ yɔ, nɛ num mbʋ pɩwɛ hɔyɛ yɔɔ yɔ, nɛ tɩzɩsɩ nzɩ sɩ-naalɛ nɛ num mbʋ pɩwɛ sɩ-yɔɔ yɔ, nɛ ŋñaɣzɩ-wɛ miŋ se pɩsa nɛ pɔ-ñɔsɩ ñɛyɩ altaaru yɔɔ.+
14 Ɛlɛ nɔ abalɩñɩnʋ ɛnʋ ɛ-nandʋ nɛ ɛ-tɔnɛ nɛ ɛ-pɩndʋ lɛ, ŋkaɣ-wɛ ñaɣzʋʋ miŋ maalika wayɩ. Pɩkɛ kɩwɛɛkɩm yɔɔ kɩlaʋ.
15 «Pʋwayɩ lɛ, ŋkpaɣ ɛyaʋ kʋɖʋmʋʋ, nɛ Aarɔɔnɩ nɛ ɛ-pɩyalaa patɩnɩ pe-nesi ɛyaʋ ŋgʋ kɩ-ñʋʋ yɔɔ.+
16 Kʋ ɛyaʋ ŋgʋ nɛ ŋkpaɣ kɩ-calɩm nɛ ŋmɩzɩ-pʋ altaaru kpɛnzɩ tɩŋa yɔɔ.+
17 Hizi ɛyaʋ ŋgʋ nɛ ŋlɩzɩ kɩ-hɔɔlɩŋ, nɛ ŋñalɩ ki-lotu+ nɛ kɩ-nɩŋgbanzɩ, nɛ ŋkpɛndɩ kɩ-hɔɔlɩŋ ɛnɩ ɖama yɔɔ, pɩkpɛndɩnɩ kɩ-ñʋʋ.
18 Pɩwɛɛ se ŋñaɣzɩ miŋ ɛyaʋ ŋgʋ kɩ-tɩŋa, nɛ ŋyele nɛ kɩ-ñɔsɩ ñɛyɩ altaaru yɔɔ. Pɩkɛ kɩlaʋ kɩñaɣzʋʋ Yehowa, sɔzɩŋ weyi ɛkɛdɩnɩ-ɩ yɔ.*+ Pɩkɛ kɩlaʋ ŋgʋ pañaɣzɩɣ-kʋ miŋ Yehowa yɔ.
19 «Pʋwayɩ lɛ, pɩwɛɛ se ŋkpaɣ ɛyaʋ lɛɛkʋ, nɛ Aarɔɔnɩ nɛ ɛ-pɩyalaa patɩnɩ pe-nesi ɛyaʋ ŋgʋ kɩ-ñʋʋ yɔɔ.+
20 Kʋ ɛyaʋ ŋgʋ nɛ ŋkpaɣ kɩ-calɩm pazɩ nɛ ŋɖʋ-pʋ Aarɔɔnɩ nɩwaŋ naŋgbaɖɛɣtʋ* yɔɔ nɛ ɛ-pɩyalaa nɩwaŋ naŋgbaɖɛɣtʋ yɔɔ, nɛ pa-nɩwaŋ niye abalɩñɩnɖɛ yɔɔ nɛ pa-nɩwaŋ nimbiye abalɩñɩnɖɛ yɔɔ, nɛ ŋmɩzɩ calɩm mbʋ altaaru kpɛnzɩ tɩŋa yɔɔ.
21 Nɛ ŋcozi calɩm mbʋ pɩwɛ altaaru yɔɔ yɔ pazɩ nɛ ŋgee num+ pazɩ nɛ ŋmɩzɩ-pʋ Aarɔɔnɩ nɛ e-wondu nɛ ɛ-pɩyalaa nɛ po-wondu yɔɔ, se pɩsa nɛ ɛ nɛ ɛ-pɩyalaa papɩsɩ kiɖeɖema nɛ pɩkpɛndɩnɩ po-wondu.+
22 «Pʋwayɩ lɛ, ŋkpaɣ ɛyaʋ num, suu num ñɩŋgʋ, nɛ num mbʋ pɩpɔ lotu yɔɔ yɔ, nɛ num mbʋ pɩwɛ hɔyɛ yɔɔ yɔ, nɛ tɩzɩsɩ nzɩ sɩ-naalɛ nɛ num mbʋ pɩwɛ sɩ-yɔɔ yɔ,+ nɛ nɩwaŋ nɩŋgbaŋaɣ, mbʋ pʋyɔɔ yɔ pɩkɛ cɔjɔtʋ tʋmɩyɛ paɣzʋʋ ɛyaʋ.+
23 Pɩtasɩ lɛ, lɩzɩ ɖɔkʋ ŋgʋ kɩ-taa wɛ kpɔnɔnaa mba pa-taa patɩɖʋ lɔlɔm nɛ pɛwɛɛ Yehowa ɛsɩndaa yɔ kɩ-taa kpɔnɔ ŋgʋ kɩwɛ kulukulu yɔ nɛ ŋgʋ kɩwɛ kulukulu kokooye tɩyɛ nɛ palabɩ-kʋ nɛ num yɔ nɛ kpɔnɔ ŋgʋ kɩwɛ tatayaa yɔ.
24 Pɩwɛɛ se ŋɖʋ wondu ndʋ tɩ-tɩŋa Aarɔɔnɩ nesi tɛɛ nɛ ɛ-pɩyalaa nesi tɛɛ, nɛ pɩwɛɛ se ŋfiɣdi-tʋ nɛ pɩkɛ kɩlaʋ kifiɣduu Yehowa ɛsɩndaa.
25 Pʋwayɩ lɛ, ŋmʋ-tʋ pe-nesi tɛɛ nɛ ŋñaɣzɩ-tʋ miŋ altaaru yɔɔ, kɩlaʋ kɩñaɣzʋʋ ñʋʋ yɔɔ, nɛ pɩkɛ sɔzɩŋ weyi ɛkɛdɩnɩ Yehowa yɔ.* Pɩkɛ kɩlaʋ ŋgʋ pañaɣzɩɣ-kʋ miŋ Yehowa yɔ.
26 «Pʋwayɩ lɛ, kpaɣ cɔjɔtʋ tʋmɩyɛ paɣzʋʋ ɛyaʋ laŋɩyɛ,+ nɖɩ palaɣ Aarɔɔnɩ yɔɔ yɔ, nɛ ŋfiɣdi-ɖɩ nɛ pɩkɛ kɩlaʋ kifiɣduu Yehowa ɛsɩndaa, nɛ pɩkaɣ pɩsʋʋ ñe-ɖeɖe.
27 Kɩlaʋ kifiɣduu laŋɩyɛ nɛ nɩŋgbaŋaɣ ŋga kɛwɛ hɔɔlʋʋ kiɖeɖeu ŋgʋ paafiɣdaa yɔ kɩ-taa yɔ, ŋgʋ paakpaɣ cɔjɔtʋ tʋmɩyɛ paɣzʋʋ ɛyaʋ+ yɔɔ alɩwaatʋ ndʋ paala Aarɔɔnɩ nɛ ɛ-pɩyalaa yɔɔ yɔ, pɩwɛɛ se ŋla nɛ papɩsɩ wondu kiɖeɖetu.
28 Pɩkaɣ pɩsʋʋ Aarɔɔnɩ nɛ ɛ-pɩyalaa pa-pʋyʋ nɛ pɩkɛ tamtam paɣtʋ ndʋ tɩ-yɔɔ pɩwɛɛ se Izrayɛɛlɩ mba ɩɖɔ yɔ, mbʋ pʋyɔɔ yɔ pɩkɛ hɔɔlʋʋ kiɖeɖeu, nɛ pɩkaɣ pɩsʋʋ hɔɔlʋʋ kiɖeɖeu ŋgʋ pɩwɛɛ se Izrayɛɛlɩ mba ɩha yɔ.+ Pɩkɛ pɔ-hɔɔlʋʋ kiɖeɖeu ŋgʋ pakpaɣ pa-laŋhɛzɩyɛ kɩlaŋ+ yɔɔ nɛ paha Yehowa yɔ.
29 «Wondu kususutu kiɖeɖetu+ ndʋ Aarɔɔnɩ suu yɔ, ɛ-wayɩ lɛ ɛ-pɩyalaa kaɣ-tʋ labɩnʋʋ tʋmɩyɛ+ alɩwaatʋ ndʋ pataɣ-wɛ num nɛ pasɩɩ-wɛ cɔjɔtʋ tʋmɩyɛ taa yɔ.
30 Ɛ-pɩyalaa taa weyi ɛpɩsɩɣ cɔjɔ e-lone taa nɛ ɛkɔɔ kediɣzaɣ kizinziku tɛɛ se ɛla lɩm ɖʋʋ tʋmɩyɛ lone kiɖeɖeye taa yɔ, ɛkaɣ wondu ndʋ suu kɩyakɩŋ 7.+
31 «Ŋkaɣ kpaɣʋ cɔjɔtʋ tʋmɩyɛ paɣzʋʋ ɛyaʋ nɛ ŋtɩzɩ kɩ-nandʋ lone kiɖeɖeye taa.+
32 Aarɔɔnɩ nɛ ɛ-pɩyalaa pakaɣ tɔɔʋ+ ɛyaʋ ŋgʋ kɩ-nandʋ nɛ kpɔnɔnaa mba pɛwɛ ɖɔkʋ taa kediɣzaɣ kizinziku nɔnɔɔ taa yɔ.
33 Pɩwɛɛ se pɔtɔɔ mbʋ palawa se pihuuzi pa-kɩwɛɛkɩm yɔɔ yɔ se pɩsa nɛ pasɩɩ-wɛ cɔjɔtʋ tʋmɩyɛ taa* nɛ papɩsɩ-wɛ kiɖeɖema. Ɛlɛ ɛyʋ weyi pɩtɩha-ɩ nʋmɔʋ yɔ* ɛɛpɩzɩɣ nɛ ɛtɔɔ-pʋ, mbʋ pʋyɔɔ yɔ pɩkɛ pʋyʋ kiɖeɖeu.+
34 Ye cɔjɔtʋ tʋmɩyɛ paɣzʋʋ kɩlaʋ nandʋ natʋyʋ nɛ kpɔnɔnaa pakazaa nɛ tɛʋ kɔɔ kife yɔ, pʋbʋ lɛ, mbʋ pɩkazaa yɔ pɩwɛɛ se ŋñaɣzɩ-pʋ miŋ.+ Pɩtɩpɔzɩ se pɔtɔɔ-pʋ, mbʋ pʋyɔɔ yɔ pɩkɛ pʋyʋ kiɖeɖeu.
35 «Pɩwɛɛ se ŋla mbʋ Aarɔɔnɩ nɛ ɛ-pɩyalaa, ɛzɩ manɖʋʋ-ŋ paɣtʋ yɔ. Ŋkaɣ kpaɣʋ kɩyakɩŋ 7 nɛ ŋsɩɩnɩ-wɛ cɔjɔtʋ tʋmɩyɛ taa.*+
36 Ŋkaɣ kpaɣʋ nɔ abalɩñɩnʋ weyi palaɣ kɩwɛɛkɩm yɔɔ yɔ nɛ ŋlaa paa evemiye nɖɩ, nɛ pɩkɛ kɩwɛɛkɩm yɔɔ huuzuu kɩlaʋ, nɛ pɩwɛɛ se ŋlaa altaaru yɔɔ kɩwɛɛkɩm yɔɔ huuzuu kɩlaʋ nɛ pɩsa nɛ kɩpɩsɩ kiɖeɖeu, nɛ pɩwɛɛ se ŋpɩyɩ kɩ-yɔɔ ŋgee num nɛ ŋpɩsɩ-kʋ kiɖeɖeu.+
37 Ŋkaɣ kpaɣʋ kɩyakɩŋ 7 nɛ ŋlaa altaaru yɔɔ kɩwɛɛkɩm yɔɔ huuzuu kɩlaŋ, nɛ pɩwɛɛ se ŋpɩsɩ-kʋ kiɖeɖeu nɛ pɩsa nɛ kɩpɩsɩ altaaru kiɖeɖeu ŋgʋ kɩkpaɖaa yɔ.+ Weyi etukuuni altaaru ŋgʋ yɔ, pɩwɛɛ se ɛkɛ kiɖeɖeu.
38 «Pʋnɛ ŋkaɣ laʋ altaaru yɔɔ: ɛyaŋ 2 weyi ɩwɛnɩ pɩnaɣ kʋɖʋmaɣ yɔ paa evemiye nɖɩ, nɛ ŋlakɩ mbʋ tam.+
39 Laa ɛyaʋ kʋɖʋmʋʋ tanaŋ tɛɛ, nɛ wɩsɩ ɖʋʋ* lɛ+ ŋlaa ɛyaʋ lɛɛkʋ.
40 Ŋkaɣ kpaɣʋ mʋlʋm mbʋ pɩkpɩzɩ camɩyɛ yɔ efa* hɔɔlʋʋ 10 ñɩŋgʋ nɛ ŋsidini oliivi num mbʋ pɔsɔbɩ oliivi kɩsɔbʋ nɛ palɩzɩ-pʋ yɔ hiini* hɔɔlʋʋ 4 ñɩŋgʋ, nɛ kilizaɣ tɛ vɛɛ hiini hɔɔlʋʋ 4 ñɩŋgʋ, nɛ ŋlaanɩ kajalaɣ ɛyaʋ.
41 Wɩsɩ ɖʋʋ* lɛ, ŋkaɣ laʋ ɛyaʋ 2 ñɩŋgʋ, pɩ nɛ tɔɔnaɣ pee kɩlaʋ nɛ kilizasɩ ɛzɩ tanaŋ tɛɛ yɔ. Ŋkaɣ labʋ nɛ pɩkɛ sɔzɩŋ weyi ɛkɛdɩnɩ Yehowa yɔ,* kɩlaʋ ŋgʋ pañaɣzɩɣ-ɩ kʋ miŋ yɔ.
42 Pɩwɛɛ se pɩkɛ kɩlaʋ kɩñaɣzʋʋ ŋgʋ palakɩ tam yɔ mɩ-kpaɖɩŋ kpeekpe taa kediɣzaɣ kizinziku nɔnɔɔ taa Yehowa ɛsɩndaa, ɖenɖe mankaɣ man-tɩ lɩzʋʋ se mawɩlɩ-mɩ nɛ mɔyɔɔdɩnɩ-ŋ yɔ.+
43 «Mankaɣ man-tɩ lɩzʋʋ peeɖe nɛ mawɩlɩ Izrayɛɛlɩ mba, nɛ man-samtʋ kaɣ yebu nɛ lone nɖɩ ɖɩpɩsɩ kiɖeɖeye.+
44 Mankaɣ yebu nɛ kediɣzaɣ kizinziku nɛ altaaru papɩsɩ pʋyʋ kiɖeɖeu, nɛ mankaɣ pɩsʋʋ Aarɔɔnɩ nɛ ɛ-pɩyalaa kiɖeɖema+ se pɩsa nɛ palabɩ-m cɔjɔtʋ tʋmɩyɛ.
45 Mankaɣ wɛʋ* Izrayɛɛlɩ samaɣ hɛkʋ taa, nɛ mankaɣ kɛʋ pɛ-Ɛsɔ.+
46 Nɛ pɩtʋʋ fɛyɩ se pakaɣ tɩlʋʋ se ma lɛ Yehowa pɛ-Ɛsɔ, weyi ɛlɩzɩ-wɛ Ejipiti ɛjaɖɛ taa se pɩsa nɛ mɛwɛɛ pɛ-hɛkʋ taa yɔ.+ Ma lɛ Yehowa pɛ-Ɛsɔ.
Pɩ-tɛɛ tɔm
^ Nɔ weyi ɛ nɛ e-ɖoŋ nɛ ɛtɩkpadɩyɩ yɔ ɛ-tɔm pɔyɔɔdʋʋ.
^ Yaa «tɩnaɣ taa kɩtamʋʋ.»
^ Yaa «nɛ ŋɖʋ kiɖe taa ñɩɣlɩm kɩtamʋʋ kiɖeɖeu.»
^ Yaa «nɛ ŋɖʋ Aarɔɔnɩ nɛ ɛ-pɩyalaa pe-nesi tɛɛ ɖoŋ nɛ pisu.»
^ Yaa «weyi ɛhɛzɩɣ ɛ-laŋɩyɛ yɔ.»
^ Pɩkɛ nɩŋgbaŋʋʋ hɔɔlʋʋ pɩ-tɛɛ ñɩŋgʋ ŋgʋ kɩ-yɔɔ paɖʋʋ naŋgbacaɣla yɔ.
^ Yaa «weyi ɛhɛzɩɣ Yehowa laŋɩyɛ yɔ.»
^ Yaa «nɛ paɖʋ pe-nesi tɛɛ ɖoŋ nɛ pisu.»
^ Piye piye, «Ɛlɛ ɛgɔm,» pʋ-tɔbʋʋ se weyi ɛtɩkɛ Aarɔɔnɩ hɔʋ taa tʋ yɔ.
^ Yaa «nɛ ŋɖʋnɩ pe-nesi tɛɛ ɖoŋ nɛ pisu.»
^ Piye piye, «nɛ ɖanasɩ 2 hɛkʋ taa.»
^ Efa kʋɖʋmʋʋ kɛ litrinaa 22. Cɔnɩ Tɔm kɩsɔzɩtʋ B14.
^ Hiini kʋɖʋmʋʋ maɣnɩ ɛzɩ litrinaa 3 nɛ hɔɔlʋʋ mbʋ yɔ (litrinaa 3,67). Cɔnɩ Tɔm kɩsɔzɩtʋ B14.
^ Piye piye, «Ðanasɩ 2 hɛkʋ taa.»
^ Yaa «weyi ɛhɛzɩɣ Yehowa laŋɩyɛ yɔ.»
^ Yaa «caɣʋ.»
