Ejipiti Lɩʋ 25:1-40
25 Nɛ Yehowa heyi Moyizi se:
2 «Heyi Izrayɛɛlɩ mba se palabɩ-m haɖɛ; weyi ɛ-laŋɩyɛ seɣtiɣ-i se ɛla mbʋ yɔ, pɩwɛɛ se ɩmʋ ɛ-cɔlɔ ma-haɖɛ.+
3 Haɖɛ nɖɩ pɩwɛɛ se ɩmʋ pɔ-cɔlɔ yɔ nɖɩ yɔ: sika,+ liidiye,+ ñɩɣyʋʋ kɩsɛɛmʋʋ,+
4 pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee,* pɩsatʋ kɩsɛɛmtʋ cɩɩɩ, pɩsatʋ fɛlɛ fɛlɛ ñɩndʋ, pʋnʋ hʋndʋ,
5 ɛyaŋ tɔna wena pata-yɛ tɔlɩm kɩsɛɛmɩm yɔ, kpɩnɛ nɖɩ payaɣ se fɔɔkɩ yɔ ɖɩ-tɔnɛ, akasɩya* ɖaŋ,+
6 kanɖʋnaa taa num,+ balɩsam ŋgʋ palakɩnɩ ŋgee num yɔ+ nɛ ŋgʋ palakɩnɩ ŋgee tɩlaaɖɩ sɔzɩŋ ñɩŋgʋ yɔ,+
7 nɛ onikisi pɛɛ nɛ pɛɛ lɛɛna wena paɖʋʋ efoodɩ+ nɛ laŋɩyɛ taa kabʋa yɔɔ yɔ.+
8 Pɩwɛɛ se palabɩ-m kooka kiɖeɖeɣa, nɛ mankaɣ wɛʋ* pɛ-hɛkʋ taa.+
9 Pɩwɛɛ se ɩla Ɛsɔ sɛtʋ kɩɖanɖʋʋ nɛ kɩ-taa wondu kpeekpe nɛ pɩwɛɛ ɖeyi ɖeyi ɛzɩ ŋgʋ mawɩlɩɣ-ŋ yɔ.+
10 «Pɩwɛɛ se pakpaɣ akasɩya ɖaŋ nɛ palabɩnɩ aɖakaɣ, ka-ɖaɣlɩkɩŋ ɛkɛ nuŋgolonzi* naalɛ nɛ hɔɔlʋʋ, nɛ ka-walanzɩ kɛ nuŋgoloŋa kʋɖʋmaɣ nɛ hɔɔlʋʋ, nɛ ka-kʋkʋyɩŋ kɛ nuŋgoloŋa kʋɖʋmaɣ nɛ hɔɔlʋʋ.+
11 Pʋwayɩ lɛ, ŋtaa kɔ-yɔɔ sika kele kele ñɩŋga.+ Pɩwɛɛ se ŋtaa ka-taa nɛ ka-wayɩ, nɛ ŋkpaɣ sika nɛ ŋlabɩnɩ kɔ-nɔɔ nɛ pɩcɔɔ pɩta.+
12 Nɛ ŋkaɣ aɖakaɣ ŋga labʋ sika kokoo 4 nɛ ŋtam-yɛ ka-nɩŋgbanzɩ 4 ñʋʋ yɔɔ; kokoo 2 ɩwɛɛ hɔɔlʋʋ kʋɖʋmʋʋ yɔɔ, nɛ kokoo 2 wɛɛ hɔɔlʋʋ lɛɛkʋ yɔɔ.
13 Nɛ ŋkaɣ caʋ akasɩya ɖaŋ nɛ ŋñɔɔzɩ-ɩ nɛ ŋtaa ɩ-yɔɔ sika.+
14 Ŋkaɣ sʋzʋʋ ɖaŋ ɛnɩ Aɖakaɣ hɔɔlɩŋ yɔɔ kokoo taa se pɩsa nɛ pakpakɩɣnɩ Aɖakaɣ ŋga.
15 Ðaŋ ɛnɩ, ɩkaɣ wɛʋ Aɖakaɣ kokoo taa tam; pɩtɩpɔzɩ se palɩzɩ-ɩ a-taa.+
16 Ŋkaɣ ɖʋʋ Aɖakaɣ taa Aseɣɖe Lɩzʋʋ mbʋ mankaɣ-ŋ cɛlʋʋ yɔ.+
17 «Ŋkaɣ kpaɣʋ sika kele kele ñɩŋga nɛ ŋlabɩnɩ sulaɣ, ka-ɖaɣlɩkɩŋ ɛkɛ nuŋgolonzi naalɛ nɛ hɔɔlʋʋ, nɛ ka-walanzɩ kɛ nuŋgoloŋa kʋɖʋmaɣ nɛ hɔɔlʋʋ.+
18 Pɩwɛɛ se ŋkpaɣ sika nɛ ŋlabɩnɩ kerebimwaa 2; ŋkaɣ kpaɣʋ hama nɛ ŋlabɩnɩ-wɛ sulaɣ walanzɩ hɔɔlɩŋ ɛnɩ ɩ-naalɛ ɩ-yɔɔ.+
19 La kerebimwaa hɔɔlɩŋ ɛnɩ ɩ-naalɛ ɩ-yɔɔ, kerebim kʋɖʋm paa sulaɣ walanzɩ hɔɔlʋʋ ŋgʋ lɛ kɩ-yɔɔ.
20 Pɩwɛɛ se kerebimwaa mba poposi pe-keŋ 2 nɛ ɛsɔdaa kiŋ, nɛ pe-keŋ kɩlɛmʋʋ huuzi sulaɣ yɔɔ,+ nɛ papa ɖama nɛ ɛsa. Pɩwɛɛ se kerebimwaa mba, paha pɛ-ɛsa nɛ sulaɣ.
21 Ŋkaɣ pam sulaɣ+ ŋga Aɖakaɣ yɔɔ, nɛ ŋkaɣ ɖʋʋ Aɖakaɣ taa Aseɣɖe Lɩzʋʋ mbʋ mankaɣ-ŋ cɛlʋʋ yɔ.
22 Mankaɣ-ŋ man-tɩ wɩlʋʋ peeɖe nɛ mɔyɔɔdɩnɩ-ŋ sulaɣ ñʋʋ yɔɔ.+ Kerebimwaa 2 mba pɛwɛ Aseɣɖe Lɩzʋʋ aɖakaɣ yɔɔ yɔ pɛ-hɛkʋ taa, mankaɣ yebu nɛ ŋtɩlɩ tɔm ndʋ payɩ mankaɣ-ŋ pɔzʋʋ se ŋheyi Izrayɛɛlɩ mba yɔ.
23 «Ŋkaɣ kpaɣʋ akasɩya ɖaŋ nɛ ŋlabɩnɩ ɖɔɖɔ taabɩlɩ,+ kɩ-ɖaɣlɩkɩŋ ɛkɛ nuŋgolonzi 2 nɛ kɩ-walanzɩ kɛ nuŋgoloŋa kʋɖʋmaɣ nɛ kɩ-kʋkʋyɩŋ kɛ nuŋgoloŋa kʋɖʋmaɣ nɛ hɔɔlʋʋ.+
24 Ŋkaɣ kpaɣʋ sika kele kele ñɩŋga nɛ ŋtaa kɩ-yɔɔ nɛ ŋkpaɣ sika nɛ ŋlabɩnɩ kɩ-nɔsɩ nɛ pɩcɔɔ pɩta.
25 Ŋkaɣ labʋ kpɛŋa nɛ pɩcɔɔ-kʋ nɛ pɩta nɛ ka-walanzɩ kɛ niwee 4 walanzɩ,* nɛ ŋkpaɣ sika nɛ ŋla kɔ-nɔɔ nɛ pɩcɔɔ-kɛ nɛ pɩta.
26 Ŋkaɣ kpaɣʋ sika nɛ ŋlabɩnɩ-kʋ kokoo 4 nɛ ŋɖʋ-yɛ kɩ-kɔnanaa 4 taa, ɖenɖe pakam kɩ-nɩŋgbanzɩ 4 yɔ.
27 Pɩwɛɛ se kokoo ana añɔtɩnɩ kpɛŋa nɛ akɛ ɖɩɖɔkɩyɛ nɖɩ ɖɩ-taa pakaɣ ɖaŋ lɛkʋʋ se pakpaɣnɩ taabɩlɩ yɔ.
28 Ŋkaɣ caʋ akasɩya ɖaŋ nɛ ŋñɔɔzɩ-ɩ nɛ ŋtaa ɩ-yɔɔ sika nɛ pakpakɩɣnɩ taabɩlɩ.
29 «Ŋkaɣ labʋ ɖɔɖɔ kɩ-tɛlɛmnaa, kɩ-kɔpʋnaa, nɛ ki-peeɣsi nɛ kɩ-ñanzɩ nzɩ papɩyɩɣnɩ kilizasɩ yɔ. Pɩwɛɛ se ŋkpaɣ sika kele kele ñɩŋga nɛ ŋlabɩnɩ wondu ndʋ.+
30 Nɛ ŋkaɣ sɩʋ taabɩlɩ yɔɔ Ɛsɔ ɛsɩndaa kpɔnɔnaa mɛ-ɛsɩndaa tam.+
31 «Ŋkaɣ kpaɣʋ sika kele kele ñɩŋga nɛ ŋlabɩnɩ kanɖʋnaa ɖɩzɩyɛ.+ Pɩwɛɛ se ŋkpaɣ hama nɛ ŋlabɩnɩ kanɖʋnaa ɖɩzɩyɛ nɖɩ. Ði-tigiɖe, ɖɩ-hɛkʋ taa ɖaʋ, ɖi-pilinzi, ɖɩ-kɔpʋnaa, ɖi-toma nɛ ɖɩ-hɛtʋ kaɣ kpɛndʋʋ nɛ pɩkɛ pʋyʋ kʋɖʋm.+
32 Nɛ pilinzi 6 kaɣ lɩnʋʋ kanɖʋnaa ɖɩzɩyɛ hʋyɩŋ yɔɔ, pilinzi 3 hʋyʋʋ kʋɖʋmʋʋ yɔɔ nɛ pilinzi 3 hʋyʋʋ lɛɛkʋ yɔɔ.
33 Kɔpʋnaa 3 mba palabɩ-wɛ ɛzɩ amandɩ hɛtʋ yɔ pakaɣ wɛʋ hʋyʋʋ kʋɖʋmʋʋ pilinzi yɔɔ, nɛ toma nɛ hɛtʋ pɛlɛdɩɣ ɖama; nɛ kɔpʋnaa 3 mba palabɩ-wɛ ɛzɩ amandɩ hɛtʋ yɔ pɛwɛɛ hʋyʋʋ lɛɛkʋ pilinzi yɔɔ, nɛ toma nɛ hɛtʋ pɛlɛdɩɣ ɖama. Mbʋ pɩpɔzʋʋ se pilinzi 6 nzɩ sɩlɩɣnɩ kanɖʋnaa ɖɩzɩyɛ hɛkʋ taa ɖaʋ yɔɔ yɔ sɩwɛɛ.
34 Kɔpʋnaa 4 mba palabɩ-wɛ ɛzɩ amandɩ hɛtʋ yɔ, pɩwɛɛ se pɛwɛɛ kanɖʋnaa ɖɩzɩyɛ hɛkʋ taa ɖaʋ yɔɔ, nɛ ki-toma nɛ kɩ-hɛtʋ pɛlɛdɩɣ ɖama.
35 Tomiye kʋɖʋmɖɩyɛ kaɣ wɛʋ pilinzi 2 kajalaɣ ñɩnzɩ nzɩ sɩlɩnɩ hɛkʋ taa ɖaʋ yɔɔ yɔ sɩ-tɛɛ, nɛ tomiye lɛɛɖɛ ñɛwɛɛ pilinzi 2 nzɩ sɩtɩŋɩɣ yɔ sɩ-tɛɛ, nɛ tomiye lɛɛɖɛ ñɛwɛɛ ɖɔɖɔ pilinzi 2 lɛɛsɩ nzɩ pɩtɛzɩɣna yɔ sɩ-tɛɛ. Mbʋ pɩpɔzʋʋ se hɛkʋ taa ɖaʋ yɔɔ pilinzi 6 nzɩ sɩwɛɛ.
36 Pɩwɛɛ se toma nɛ pilinzi nɛ kanɖʋnaa ɖɩzɩyɛ tɩŋa pɩkpɛndɩ nɛ pɩkɛ pʋyʋ kʋɖʋm, mbʋ palabɩnɩ sika kele kele ñɩŋga ŋga pakpaɣ hama nɛ pɔñɔɔzɩna yɔ.+
37 Ŋkaɣ labʋ kanɖʋnaa 7 nɛ ŋsɩɩ ɖɩ-yɔɔ, nɛ alɩwaatʋ ndʋ pɔsɔkɩ kanɖʋnaa yɔ, pakaɣ ñandʋʋ kanɖʋnaa ɖɩzɩyɛ ɛsɩndaa.+
38 Pɩwɛɛ se pakpaɣ sika kele kele ñɩŋga nɛ palabɩnɩ ɖɩ-kpɩɖɩŋ* nɛ ɖi-miŋ ñanzɩ.+
39 Sika kele kele ñɩŋga talaŋ* kʋɖʋmʋʋ pɩwɛɛ se pakpaɣ nɛ palabɩnɩ ɖɩ-maɣmaɣ nɛ ɖɩ-yɔɔ wondu tɩŋa.
40 Pɩwɛɛ se ŋla wondu ndʋ ɛzɩ ndʋ mawɩlɩ-ŋ pʋʋ yɔɔ yɔ.+
Pɩ-tɛɛ tɔm
^ Yaa «heŋ hʋndʋ ndʋ pata-tʋ tɔlɩm kɩsɛɛmɩm yuulee yɔ.»
^ Tɩʋ nakʋyʋ payaɣ mbʋ.
^ Yaa «caɣʋ.»
^ Nuŋgoloŋa kʋɖʋmaɣ kɛ santimɛtawaa 44 nɛ hɔɔlʋʋ (santimɛtawaa 44,5). Cɔnɩ Tɔm kɩsɔzɩtʋ B14.
^ Yaa «kɛ palɩm kʋɖʋmʋʋ.» Palɩm kʋɖʋmʋʋ maɣnɩ ɛzɩ santimɛtawaa 7 nɛ hɔɔlʋʋ mbʋ yɔ (santimɛtawaa 7,4). Cɔnɩ Tɔm kɩsɔzɩtʋ B14.
^ Cɔnɩ Tɔm pee sɔsɔna tɔbʋʋ lɩzʋʋ.
^ Talaŋ kʋɖʋmʋʋ maɣnɩ ɛzɩ kilonaa 34 mbʋ yɔ (kilonaa 34,2). Cɔnɩ Tɔm kɩsɔzɩtʋ B14.
