Ejipiti Lɩʋ 21:1-36
21 «Tɔm hʋʋ paɣtʋ tʋnɛ pɩwɛɛ se ŋheyi-wɛ:+
2 «Ye ŋyabɩ yom weyi ɛkɛ Ebree tʋ yɔ,+ ɛkaɣ-ŋ lɩm ɖʋʋ pɩnzɩ 6, ɛlɛ pɩnaɣ 7 ñɩŋga taa lɛ, ŋkaɣ-ɩ yebu nɛ ɛwɛɛ ɛ-tɩ yɔɔ, ɛɛhɛyɩɣ nabʋyʋ.+
3 Ye ɛkɔm e-ɖeke yɔ, e-ɖeke ɛkaɣnɩ ɖɛʋ. Ye ɛwɛnɩ halʋ yɔ, pʋbʋ lɛ ɛ nɛ ɛ-halʋ pɩwɛɛ se pɛɖɛɛ.
4 Ye ɛ-tʋ ɛha-ɩ halʋ nɛ halʋ ɛnʋ ɛlʋlɩ-ɩ abalɩbiya yaa halɩbiya yɔ, halʋ ɛnʋ nɛ e-piya pakaɣ pɩsʋʋ ɛ-tʋ pʋyʋ, nɛ e-ɖeke ɛkaɣnɩ ɖɛʋ.+
5 Ɛlɛ ye yom ɛnʋ ɛyɔɔdaa nɛ ɛtɛ ɛ-taa se: “Mɔnsɔɔlɩ man-tʋ, ma-halʋ, nɛ men-piya;* mantɩsɔɔlɩ se mɛwɛɛ man-tɩ yɔɔ” yɔ,+
6 pɩwɛɛ se ɛ-tʋ ewoni-i Ɛsɔ toovenim tʋ ɛsɩndaa. Pʋwayɩ lɛ ewoni-i nɛ ɛmalɩsɩnɩ nɔnɔɔ yaa nɔnɔɔ tilimiye, nɛ ɛkpaɣ ɛjɔʋ nɛ ɛtʋlɩ ɛ-nɩŋgbaŋʋʋ, nɛ ɛkaɣ kɛʋ e-yom e-wezuu caɣʋ kpeekpe.
7 «Ye abalʋ nɔɔyʋ ɛpɛdɩ ɛ-pɛlɛ nɛ ɛlɛ pɩsɩ yom yɔ, pɛlɛ ɛnʋ ɛɛkaɣ lɩʋ yomiye taa nɛ ɛwɛɛ ɛ-tɩ yɔɔ ɛzɩ yom abalɩñɩnʋ lɩʋ yomiye taa yɔ.
8 Ye pɛlɛ ɛnʋ ɛ-tɔm ɛtɩkɛdɩnɩ ɛ-tʋ nɛ ɛlɛ tɩlɩzɩ-ɩ se ɛkɛ ɛ-ɖaŋ ɛlɛ ɛ-tʋ ɛnʋ eyele se ɛyʋ lɛlʋ ɛyabɩ-ɩ* yɔ, ɛfɛyɩnɩ waɖɛ se ɛpɛdɩ-ɩ nɛ agɔma, mbʋ pʋyɔɔ yɔ ɛlɩ ɛ-wayɩ.
9 Ye ɛlɩzɩ-ɩ se ɛkɛ ɛ-pɩyalʋ halʋ yɔ, pɩwɛɛ se ɛha-ɩ wala wena pɛlɛ wɛna yɔ.
10 Ye ɛkpaɣ halʋ lɛlʋ yɔ, pɩtɩpɔzɩ se ɛpasɩ ɛ-kajalaɣ halʋ tɔɔnaɣ, e-wondu kususutu, nɛ ɛ nɛ ɩ pa-caɣʋ ɛzɩ halʋ nɛ abalʋ yɔ.+
11 Ye ɛɛlakɩ-ɩ mbʋ hɔɔlɩŋ ɛnɩ ɩ-naadozo ɩ-taa yɔ, pʋbʋ lɛ pɩwɛɛ se halʋ ɛnʋ ɛɖɛɛ, ɛɛhɛyɩɣ liidiye naɖɩyɛ.
12 «Weyi ɛmabɩ ɛyʋ nɛ ɛlɛ sɩ yɔ, pɩwɛɛ se pakʋ-ɩ.+
13 Ɛlɛ ye ɛtɩɖʋna nɛ pʋcɔ pɩla mbʋ, nɛ Ɛsɔ toovenim tʋ ha nʋmɔʋ nɛ pɩla mbʋ yɔ, mankaɣ-ŋ wɩlʋʋ lone nɖɩ ɖɩ-taa ɛpɩzɩɣ ese nɛ ewolo yɔ.+
14 Ye nɔɔyʋ ɛmʋ pana siŋŋ nɛ e-koobu nɛ ɛkʋ-ɩ faɖaɖa yɔ,+ pɩwɛɛ se pakʋ ɛyʋ ɛnʋ, paa pɩwɛɛ se ŋwolo ma-altaaru cɔlɔ nɛ ŋkpa-ɩ kɔyɔ.+
15 Weyi ɛmakɩ ɛ-caa yaa e-ɖoo yɔ pɩwɛɛ se pakʋ-ɩ.+
16 «Ye nɔɔyʋ ɛkpa ɛyʋ+ nɛ ɛpɛdɩ-ɩ, yaa pakpa pʋdʋ nɛ ɛyʋ weyi ɛkpawa yɔ ɛwɛ ɛ-cɔlɔ mbʋ yɔ,+ pɩwɛɛ se pakʋ-ɩ.+
17 «Weyi ɛlɔʋ nɔɔ kɩdɛkɛdaɣ* ɛ-caa yaa e-ɖoo yɔɔ yɔ, pɩwɛɛ se pakʋ-ɩ.+
18 «Pʋnɛ pɩwɛɛ se pala ye abalaa iyou nɛ lɛlʋ yaɣ ɛ-taabalʋ pɩyɛ yaa ɛmabɩ-ɩ ŋgulumiye* nɛ ɛtɩsɩ ɛlɛ pɩcamɩ-ɩ nɛ ɛwɛɛ kaɖʋ yɔɔ yɔ:
19 Ye ɛpɩzɩɣ se ɛkʋyɩ nɛ ɛɖɔmnɩ ɖaʋ nɛ ɛlɩɩ yɔ, weyi ɛmabɩ-ɩ yɔ pɩtɩpɔzɩ se pɔhɔ ɛ-nɩŋgbaŋʋʋ. Ɛlɛ pɩwɛɛ se ɛhɛyɩ alɩwaatʋ ndʋ weyi pɩkʋ-ɩ yɔ ɛtɩpɩzɩ nɛ ɛla tʋmɩyɛ yɔ tɩ-nɔɔ taa nɛ pɩkɔɔ pɩsɩɩnɩ alɩwaatʋ ndʋ ɛlɛ yɔɔ cɛbɩ caɣ caɣ yɔ.
20 «Ye abalʋ nɔɔyʋ ɛmabɩ e-yom abalɩñɩnʋ yaa halɩñɩnʋ nɛ ɖaʋ nɛ ɛlɛ sɩ e-nesi tɛɛ yɔ, pɩwɛɛ se pakpa yom ɛnʋ ɛ-kɩmɩyɛ.+
21 Ɛlɛ ye yom ɛnʋ ɛwɛnɩ ɛ-ɛsa nɛ pɩla kɩyakʋ kʋɖʋmʋʋ yaa kɩyakɩŋ 2 yɔ, pɩfɛyɩ se pakpa ɛ-kɩmɩyɛ, mbʋ pʋyɔɔ yɔ ɛkɛ ɛyʋ weyi ɛ-tʋ yabɩ-ɩ nɛ e-liidiye yɔ.
22 «Ye abalaa iyou nɛ potuzi halʋ hoɣa tʋ nɔɔyʋ nɛ ɛlɛ lʋlɩ ɛ-kɩyakɩŋ tɩtalɩta*+ ɛlɛ pɩtɩkɔnɩ sɩm* yɔ, weyi ɛɖɔ wɛɛ yɔ, pɩwɛɛ se ɛhɛyɩ mbʋ halʋ ɛnʋ ɛ-walʋ pɔzʋʋ-ɩ se ɛhɛyɩ yɔ; nɛ pɩwɛɛ se ɛtɩŋnɩ tɔm hʋyaa yɔɔ nɛ ɛhɛyɩ-pʋ.+
23 Ɛlɛ ye pɩkɔnɩ sɩm yɔ, pʋbʋ lɛ pɩwɛɛ se ŋhɛyɩ wezuu wezuu lone taa,*+
24 ɛsɩyɛ ɛsɩyɛ lone taa, keɖe keɖe lone taa, nesi nesi lone taa, nɩŋgbaŋaɣ nɩŋgbaŋaɣ lone taa,+
25 miŋ ñaɣʋ miŋ ñaɣʋ lone taa, heŋ heŋ lone taa, mabʋ mabʋ lone taa.
26 «Ye abalʋ nɔɔyʋ ɛmabɩ e-yom abalɩñɩnʋ ɛsɩyɛ yaa e-yom halɩñɩnʋ ɛsɩyɛ nɛ ɛyɔkɩ-ɖɩ yɔ, pɩwɛɛ se eyele yom ɛnʋ nɛ ɛɖɛɛ nɛ pɩlɛɣzɩ ɛ-ɛsɩyɛ lone taa.+
27 Nɛ ye ɛpɛlɩ e-yom abalɩñɩnʋ yaa e-yom halɩñɩnʋ keɖe yɔ, pɩwɛɛ se eyele yom ɛnʋ nɛ ɛɖɛɛ nɛ pɩlɛɣzɩ e-keɖe lone taa.
28 «Ye nɔ abalɩñɩnʋ ɛyɔkɩ abalʋ nɔɔyʋ yaa halʋ nɔɔyʋ nɛ ɛlɛ sɩ yɔ, pɩwɛɛ se payaɣ nɔ abalɩñɩnʋ ɛnʋ pɛɛ nɛ ɛsɩ+ nɛ pɩtɩpɔzɩ se pɔtɔɔ ɛ-nandʋ; ɛlɛ pɩfɛyɩ se pɔhɔ nɔ ɛnʋ ɛ-tʋ nɩŋgbaŋʋʋ.
29 Ɛlɛ ye nɔ abalɩñɩnʋ ɛnʋ ɛtɩɩyɔkʋʋ ɛyaa nɛ peheyi ɛ-tʋ ɛlɛ ɛtɩcɔnɩ e-ɖeɖe nɛ nɔ ɛnʋ ɛkʋ abalʋ nɔɔyʋ yaa halʋ nɔɔyʋ yɔ, pɩwɛɛ se payaɣ nɔ abalɩñɩnʋ ɛnʋ pɛɛ, nɛ pakʋ ɖɔɖɔ ɛ-tʋ.
30 Ye pɔpɔzɩ-ɩ se ɛhɛyɩ kɩhɛyʋʋ nakʋyʋ yɔ,* pɩwɛɛ se ɛhɛyɩ mbʋ payɩ pɔpɔzɩ-ɩ yɔ nɛ pɩkɛ ñʋʋ yabʋ kɩhɛyʋʋ e-wezuu* yɔɔ.
31 Paa abalɩbɩɣa yaa halɩbɩɣa nɔ abalɩñɩnʋ ɛnʋ ɛyɔkaa yɔ, pɩwɛɛ se pala ɛ-tʋ ɛzɩ tɔm hʋʋ paɣtʋ tʋnɛ tɩpɔzʋʋ yɔ.
32 Ye nɔ abalɩñɩnʋ ɛyɔkɩ yom abalɩñɩnʋ nɔɔyʋ yaa yom halɩñɩnʋ nɔɔyʋ yɔ, ɛ-tʋ kaɣ hɛyʋʋ liidiye siklinaa* 30 weyi ɛtɩnɩ yom ɛnʋ yɔ, nɛ pakaɣ nɔ abalɩñɩnʋ ɛnʋ yaɣʋ pɛɛ nɛ ɛsɩ.
33 «Ye abalʋ nɔɔyʋ eyebi pɔʋ nakʋyʋ nɛ etisuli kɩ-yɔɔ yaa ehuyi pɔʋ nɛ etisuli kɩ-yɔɔ nɛ nɔ abalɩñɩnʋ nɔɔyʋ yaa kpaŋaɣ nakɛyɛ tɔlɩ kɩ-taa yɔ,
34 weyi ɛtɩnɩ pɔʋ ŋgʋ yɔ, pɩwɛɛ se ɛhɛyɩ kpɩnɛ nɖɩ ɖɩ-yɔɔ.+ Pɩwɛɛ se ɛhɛyɩ kɩhɛyʋʋ kpɩnɛ tʋ, nɛ kpɩnɛ nɖɩ ɖɩsɩba yɔ ɖɩkaɣ pɩsʋʋ ɛ-pʋyʋ.
35 Ye nɔɔyʋ nɔ abalɩñɩnʋ ɛyɔkɩ ɛyʋ lɛlʋ nɔ abalɩñɩnʋ nɛ ɛlɛ sɩ yɔ, pɩwɛɛ se pɛpɛdɩ nɔ weyi ɛwɛnɩ ɛ-ɛsa yɔ nɛ patayɩ liidiye nɖɩ pɛhɛyɩ ɛ-yɔɔ yɔ, pɩwɛɛ ɖɔɖɔ se patayɩ kpɩnɛ nɖɩ ɖɩsɩba yɔ.
36 Ɛlɛ ye panawa se nɔ abalɩñɩnʋ nɔɔyʋ tɩɩyɔkʋʋ naŋ lɛɛŋ ɛlɛ ɛ-tʋ tɩcɔnɩ e-ɖeɖe yɔ, pɩwɛɛ se ɛhɛyɩ nɔ abalɩñɩnʋ yɔɔ nɔ abalɩñɩnʋ, nɛ kpɩnɛ nɖɩ ɖɩsɩba yɔ ɖɩpɩsɩ ɛ-pʋyʋ.
Pɩ-tɛɛ tɔm
^ Piye piye, «man-pɩyalaa.»
^ Piye piye, «eyele se paya ɛ-ñʋʋ.»
^ Yaa «Weyi ɛyaɣ kɩdɛkɛdɩm.»
^ Pɩpɩzɩɣ pɩkɛ, «ɛmabɩ-ɩ nɛ wonuu nakʋyʋ.»
^ Piye piye, «nɛ ɛlɛ piya lɩɩ.»
^ Yaa «ɛlɛ pɩtɩɖʋ nɔɔyʋ heŋ sɔsɔŋ.»
^ Yaa «kalɩzaɣ kalɩzaɣ lone taa.»
^ Yaa «se ɛhɛyɩ nabʋyʋ nɛ pɩñɔɔzɩ yɔ.»
^ Yaa «ɛ-kalɩzaɣ.»
^ Sikli kʋɖʋmʋʋ maɣnɩ ɛzɩ kɩɖamnaa 11 nɛ hɔɔlʋʋ mbʋ yɔ (kɩɖamnaa 11,4). Cɔnɩ Tɔm kɩsɔzɩtʋ B14.
