Ejipiti Lɩʋ 20:1-26
20 Pʋwayɩ lɛ, Ɛsɔ yɔɔdɩ tɔm tʋnɛ tɩ-tɩŋa:+
2 «Mɛkɛnɩ ñɛ-Ɛsɔ Yehowa, weyi ɛlɩzɩ-ŋ Ejipiti ɛjaɖɛ taa, yomiye ɖɩɣa taa yɔ.+
3 Pɩfɛyɩ se ŋwɛɛnɩ ɛsɔnaa lalaa nɛ pɩtasɩnɩ-m.*+
4 «Pɩfɛyɩ se ŋsaɣ ña-tɩ sɩʋ kpeliɣa nakɛyɛ yaa nabʋyʋ mbʋ pɩnɩɣzɩnɩ mbʋ pɩwɛ ɛsɔdaa, yaa tɛtʋ yɔɔ, yaa lɩm taa* yɔ pɩ-taa nabʋyʋ.+
5 Pɩfɛyɩ se ŋluŋ pɩ-tɛɛ yaa ŋyele nɛ pɩhɔmɩ-ŋ nɛ ŋsɛɛ-pʋ,+ mbʋ pʋyɔɔ yɔ ma ñɛ-Ɛsɔ Yehowa lɛ, mɛnkɛ Ɛsɔ weyi ɛñɩnɩɣ se pɔñɔɔnɩ e-ɖeke koŋ yɔ,+ weyi caanaa kɩwɛɛkɩm yɔɔ lɛ, ɛkɔŋnɩ nɩŋgbaŋʋʋ hɔm pɩyalaa yɔɔ yɔ, mba papaɖɩɣ-m yɔ pa-kpaɖʋʋ 3 ñɩŋgʋ nɛ pa-kpaɖʋʋ 4 ñɩŋgʋ yɔɔ yɔ,
6 ɛlɛ mawɩlɩɣ sɔɔlɩm siɣsiɣ ñɩmbʋ mba pɔsɔɔlɩ-m nɛ pɔɖɔŋ man-paɣtʋ yɔɔ yɔ pa-kpaɖʋʋ 1 000 ñɩŋgʋ.+
7 «Pɩfɛyɩ se ŋlabɩnɩ tʋmɩyɛ ñɛ-Ɛsɔ Yehowa hɩɖɛ ɛzɩma pɩtɩpɔzɩ yɔ,+ mbʋ pʋyɔɔ yɔ Yehowa ɛɛkaɣ yebu weyi ɛlakɩnɩ ɛ-hɩɖɛ tʋmɩyɛ ɛzɩma pɩtɩpɔzɩ yɔ ɛ-nɩŋgbaŋʋʋ hɔm.+
8 «Tɔzɩ Sabaatɩ kɩyakʋ yɔɔ nɛ ŋyele nɛ kɩkɛ kiɖeɖeu.+
9 Kɩyakɩŋ 6 pɩwɛɛ se ŋla tʋmɩyɛ nɛ mbʋ payɩ ŋwɛna se ŋlakɩ yɔ,+
10 ɛlɛ kɩyakʋ 7 ñɩŋgʋ kɛ sabaatɩ ñɛ-Ɛsɔ Yehowa. Pɩfɛyɩ se ŋla tʋmɩyɛ naɖɩyɛ, paa pɩtɩɩkɛ ña, yaa ña-pɩyalʋ, yaa ñɛ-pɛlɛ, yaa ño-yom abalɩñɩnʋ, yaa ño-yom halɩñɩnʋ, yaa ña-ɖɩɣa kpɩnɛ, yaa ɛgɔm weyi ɛwɛ ña-ɖɩjaɣyɛ* taa yɔ.+
11 Mbʋ pʋyɔɔ yɔ kɩyakɩŋ 6 Yehowa lɩzɩnɩ ɛsɔdaa nɛ tɛtʋ nɛ teŋgu nɛ mbʋ payɩ pɩwɛ pa-taa yɔ, nɛ ɛpaɣzɩ hɛzʋʋ kɩyakʋ 7 ñɩŋgʋ wiye.+ Pʋyɔɔ yɔɔ Yehowa wazɩ Sabaatɩ kɩyakʋ nɛ ɛpɩsɩ-kʋ kiɖeɖeu.
12 «Ðʋ ña-caa nɛ ño-ɖoo hɩɖɛ,+ nɛ ŋpɩzɩ ŋcaɣ wezuu ɛjaɖɛ nɖɩ ñɛ-Ɛsɔ Yehowa cɛlɩɣ-ŋ yɔ ɖɩ-taa nɛ pileɖi.+
13 «Taakʋ ɛyʋ.+
14 «Taala acɛyɛ.+
15 «Taamɩlɩ.+
16 «Taalɩzɩ cɛtɩm aseɣɖe ɛyʋ lɛlʋ yɔɔ.+
17 «Ñe-liu tɛɛ ɛtaakɔtɩnɩ ɛyʋ lɛlʋ ɖɩɣa. Ñe-liu tɛɛ ɛtaakɔtɩnɩ ɛyʋ lɛlʋ halʋ,+ yaa e-yom abalɩñɩnʋ, yaa e-yom halɩñɩnʋ, yaa ɛ-nɔ abalɩñɩnʋ, yaa ɛ-kpaŋaɣ, yaa mbʋ payɩ pɩkɛ ɛyʋ lɛlʋ pʋyʋ yɔ.»+
18 Nɛ samaɣ kpeekpe kaawɛɛ nɛ kanaɣ ɛzɩma tɛʋ nazaɣ nɛ kɩñɩlɩsɩɣ yɔ, nɛ kanɩɣ nɔndɔʋ wiu, nɛ kanaɣ ɛzɩma ñɔsɩ ñɛyɩ pʋʋ yɔɔ yɔ; nɛ kana mbʋ lɛ kɛwɛɛ keseliɣ nɛ kasɩŋ poliŋ taa.+
19 Peeɖe keheyi Moyizi se: «Yɔɔdɩnɩ-ɖʋ, ɖɩkaɣ-ŋ welisinuu, ɛlɛ Ɛsɔ ɛtaayɔɔdɩnɩ-ɖʋ, nɛ ɖɩtaakɔɔ nɛ ɖɩsɩ.»+
20 Nɛ Moyizi heyi samaɣ se: «Sɔɔndʋ ɛtaakpa-mɩ, mbʋ pʋyɔɔ yɔ Ɛsɔ toovenim tʋ kɔm se ɛtakɩ-mɩ,+ se pɩsa nɛ iwolo pɩ-yɔɔ nɛ iseɣ-i sɔɔndʋ nɛ ɩtaala kɩwɛɛkɩm.»+
21 Nɛ samaɣ sɩŋ poliŋ taa mbʋ, ɛlɛ Moyizi ñɔñɔtɩnɩ mɩndʋ ndʋ tiyu kpimm yɔ, ɖenɖe Ɛsɔ toovenim tʋ kaawɛɛ yɔ.+
22 Peeɖe Yehowa heyi Moyizi se: «Tɔm tʋnɛ pɩwɛɛ se ŋheyi Izrayɛɛlɩ mba: “Mɩ-maɣmaɣ ɩnawa se mɔyɔɔdɩnɩ-mɩ nɛ ɛsɔdaa kiŋ.+
23 Pɩtɩpɔzɩ se ilu liidiye ñɩɣtʋ ɛsɔnaa nɛ ɩtasɩnɩ-m, nɛ pɩtɩpɔzɩ se ilu mɩ-tɩ sika ɛsɔnaa.+
24 Tɛtʋ altaaru pɩwɛɛ se ŋlabɩ-m, nɛ ŋkaɣ kɩ-yɔɔ laʋ ña-kɩlaŋ kɩñaɣzɩŋ, ña-laŋhɛzɩyɛ kɩlaŋ, ñe-heŋ nɛ ña-naŋ. Lona wena a-taa payɩ mankaɣ yebu se pɔtɔzɩ ma-hɩɖɛ yɔɔ yɔ,+ mankaɣ kɔm ñɔ-cɔlɔ a-taa nɛ mankaɣ-ŋ wazʋʋ.
25 Ye ŋmaɣ-m pɛɛ altaaru yɔ, pɩtɩpɔzɩ se ŋmanɩ pɛɛ wena pasaɣnɩ wonuu nakʋyʋ yɔ.+ Mbʋ pʋyɔɔ yɔ ye ŋlabɩnɩ tʋmɩyɛ wonuu ŋgʋ pasakɩnɩ pɛɛ yɔ, ŋkaɣ altaaru ŋgʋ pisuu.
26 Nɛ pɩtɩpɔzɩ se ŋtɩŋnɩ tendemee yɔɔ nɛ ŋkpa ma-altaaru yɔɔ, se pɩtaakɔɔ nɛ pɩna ña-ndaakpeɖe.”*
Pɩ-tɛɛ tɔm
^ Yaa «lalaa nɛ ŋkaɖɩnɩ-m.» Piye piye, «lalaa mɛ-ɛsɩndaa.»
^ Piye piye, «lɩm taa tɛtɛɛ.»
^ Piye piye, «ñɔ-nɔnɔsɩ.»
^ Yaa «ña-kʋzʋʋ pilinzi.»
