Ejipiti Lɩʋ 11:1-10
11 Nɛ Yehowa heyi Moyizi se: «Mantasɩɣ kɔnʋʋ asɛyʋʋ kʋɖʋmʋʋ Farawɔɔ nɛ Ejipiti yɔɔ. Pʋwayɩ lɛ, ɛkaɣ-mɩ yebu nɛ ɩɖɛɛ cɩnɛ.+ Alɩwaatʋ ndʋ eyeki-mɩ se ɩɖɛɛ yɔ, ɛkaɣ-mɩ ɖɔɔnʋʋ cɩnɛ kʋɖɔɔnʋ.+
2 Lɛɛlɛɛyɔ lɛ, heyi samaɣ se paa abalʋ weyi nɛ paa halʋ weyi lɛ, pɩwɛɛ se ɛpɔzɩ ɛ-cɔlɔ tʋ liidiye wondu nɛ sika wondu.»+
3 Nɛ Yehowa yele nɛ Ejipiti mba la samaɣ kɩbandʋ. Pɩtasɩ lɛ, Moyizi maɣmaɣ kaapɩsɩ weyi Farawɔɔ lɩmɖʋyaa nɛ samaɣ pañaŋɩ-ɩ siŋŋ Ejipiti ɛjaɖɛ taa yɔ.
4 Nɛ Moyizi yɔɔdɩ se: «Tɔm tʋnɛ Yehowa yɔɔdaa: “Pɩmakɩ ɛzɩ ɖoo hɛkʋ mbʋ yɔ lɛ, mankaɣ lɩʋ nɛ mɔncɔɔ Ejipiti taa,+
5 nɛ paa Ejipiti kajalaɣ pɩɣa ŋga lɛ kakaɣ sɩbʋ,+ kpaɣnɩ Farawɔɔ weyi ɛcaɣ e-kewiyaɣ kpelaɣ yɔɔ yɔ ɛ-kajalaɣ pɩɣa nɛ piwolo pɩtalɩ yom halɩñɩnʋ weyi eɖiɣni tʋmɩyɛ labʋ namɩyɛ yɔɔ yɔ ɛ-kajalaɣ pɩɣa, nɛ kpɩna kajalaɣ piya kpeekpe.+
6 Pakaɣ mabʋ kʋñɔwiye kubuka sɔsɔɔ ŋga wiɖiyi patɩma nɛ pana nɛ wiɖiyi paakaɣ-kɛ tasʋʋ mabʋ yɔ Ejipiti ɛjaɖɛ kpeekpe taa.+
7 Ɛlɛ, halɩ haɣ maɣmaɣ ɛɛkaɣ kpezuu* Izrayɛɛlɩ mba, paa pɩtɩɩkɛ ɛyaa yaa pa-kpɩna yɔ, nɛ piyele nɛ ɩtɩlɩ se Yehowa pɩzɩɣ nɛ ɛɖʋ tʋkaɣ Ejipiti mba nɛ Izrayɛɛlɩ mba pɛ-hɛkʋ taa.”+
8 Nɛ pɩtʋʋ fɛyɩ se ña-lɩmɖʋyaa tɩŋa kaɣ tibu mɔn-cɔlɔ nɛ poluŋ mɛn-tɛɛ nɛ pɔtɔ se: “Ðɛɛ, ña nɛ samaɣ ŋga payɩ katɩŋɩɣ-ŋ yɔ.”+ Nɛ pʋwayɩ lɛ, mankaɣ lɩʋ.» Ɛyɔɔdɩ mbʋ lɛ, ɛkʋyɩ Farawɔɔ cɔlɔ nɛ ɛlɩɩnɩ pana sɔsɔna.
9 Nɛ Yehowa heyi Moyizi se: «Farawɔɔ ɛɛkaɣ-ŋ welisinuu,+ se pɩsa nɛ mala maamaaci lakasɩ sakɩyɛ Ejipiti ɛjaɖɛ taa.»+
10 Moyizi nɛ Aarɔɔnɩ palabɩ maamaaci lakasɩ nzɩ sɩ-tɩŋa Farawɔɔ ɛsɩndaa,+ ɛlɛ Yehowa yele nɛ Farawɔɔ laŋɩyɛ sʋʋ kpɩzɩŋ, nɛ etiyele Izrayɛɛlɩ mba se palɩɩ ɛ-ɛjaɖɛ taa nɛ pɛɖɛɛ.+
Pɩ-tɛɛ tɔm
^ Piye piye, «sɛyʋʋ ka-nzʋlʋmɩyɛ.»
