Timootee takayaɣ naalɛ ñɩŋga 4:1-22
4 Manɖʋʋ-ŋ paɣtʋ Ɛsɔ ɛsɩndaa nɛ Krɩstʋ Yesu, weyi ɛkaɣ hʋnʋʋ ɛsadɩnaa nɛ sɩɖaa+ tɔm+ yɔ ɛ-ɛsɩndaa, nɛ pɩtɩŋnɩ ɛ-yɔɔ kuluu+ nɛ e-Kewiyaɣ+ pɔ-yɔɔ:
2 Susi tɔm;+ la tʋmɩyɛ nɖɩ kpɛdɛyɛ alɩwaatʋ kɩbandʋ taa nɛ alɩwaatʋ kaɖɛ ñɩndʋ taa; kizini ɛyaa tɔm,+ kalɩ-wɛ, seɣti-wɛ; la mbʋ nɛ suuɖu tɩŋa nɛ tɔm wɩlʋʋ lɛɣtʋ tɩŋa.+
3 Mbʋ pʋyɔɔ yɔ alɩwaatʋ natʋyʋ kaɣ kɔm nɛ paakaɣ sɔɔlʋʋ wɩlɩtʋ kɩbandʋ,*+ ɛlɛ ɛzɩ pa-maɣmaɣ pe-liu wɛʋ yɔ, pakaɣ pa-tɩ ñɩnʋʋ wɩlɩyaa se paba ɩsaɣyɩ pa-nɩŋgbaaŋ taa.*+
4 Pakaɣ kizuu se paawelisiɣ toovenim tɔm nɛ pekemsiɣni mʋya.
5 Ɛlɛ ña lɛ, ɖɔkɩ ña-maɣzɩm camɩyɛ pɩtɩŋa pɩ-taa, ɖɔkɩ ña-laŋɩyɛ kʋñɔŋ taa,+ la tɔm kɩbandʋ susuyu tʋmɩyɛ,* la ñɛ-Ɛsɔ sɛtʋ tʋmɩyɛ kiya.+
6 Mbʋ pʋyɔɔ yɔ pɛtɛmɩ-m paɣzʋʋ pɩyʋʋ ɛzɩ kilizaɣ yɔ,+ nɛ mo-holuu alɩwaatʋ+ ñɔtaa.
7 Moyo you kɩbaŋʋ,+ mense seya nɛ mɛntɛm-yɛ,+ mɔnɖɔkɩ tisuu.
8 Kpaɣnɩ lɛɛlɛɛyɔ lɛ, pɔñɔɔzɩ siɣsiɣ wɛtʋ wabɩtʋ hulaɣ nɛ pasɩ-m,+ ŋga Kɩbaɣlʋ, weyi ɛkɛ tɔm hʋyʋ siɣsiɣ tʋ yɔ+ ɛkaɣ-m cɛlʋʋ kɩyakʋ ŋgʋ ki-wiye se pɩkɛ-m kɩhɛyʋʋ yɔ,+ paa mbʋ yɔ pɩtɩkɛ men-ɖeke, ɛlɛ mba ɖɔɖɔ pa-tɩŋa pɔsɔɔlɩ alɩwaatʋ ndʋ pokuluu ɛ-yɔɔ nɛ pawɩlɩ yɔ.
9 La mbʋ payɩ ŋpɩzɩɣ yɔ nɛ ŋkɔɔ mɔn-cɔlɔ lɔŋ.
10 Mbʋ pʋyɔɔ yɔ Demaasɩ+ yebi-m, mbʋ pʋyɔɔ yɔ ɛsɔɔlɩ ɛjaɖɛ ɖɩnɛ,* nɛ ɛɖɛɛ ewolo Tesalooniiki; Krɛɛsansɩ ñowobi Galaatii, nɛ Tiiti ñowolo Dalɩmaasii.
11 Luka ɖeke wɛnɩ mɔn-cɔlɔ. Ŋŋkɔŋ lɛ, kpɛndɩnɩ Maarɩkɩ, mbʋ pʋyɔɔ yɔ ɛwɛ-m wazaɣ Ɛsɔ sɛtʋ tʋmɩyɛ taa.
12 Ɛlɛ mentiyi Tisiiki+ Efɛɛzɩ.
13 Ŋŋkɔŋ lɛ, kpɛndɩnɩ toko sɔsɔʋ ŋgʋ meyebi Trowaasɩ, Karpuusi tɛ yɔ, nɛ takayɩsɩ kikpiyisi, kɔzɩ kɔzɩ tɔna takayɩsɩ.*
14 Alɛkɩsandrɩ, weyi ɛkɛ ñɩɣyʋʋ kɩsɛɛmʋʋ wondu luɖu yɔ, ɛlabɩ-m kɩdɛkɛdɩm siŋŋ. Yehowa* kaɣ-ɩ hɛyʋʋ ɛ-lakasɩ yɔɔ.+
15 Pɩwɛɛ se ña ɖɔɖɔ ŋkpa ña-tɩ nɛ ɩ, mbʋ pʋyɔɔ yɔ ɛkaɖɩnɩ ɖɔ-tɔm pɩdɩɩfɛyɩ.
16 Mancalɩ man-tɩ yɔɔ lʋbʋ lɛ, nɔɔyʋ tɩkɔɔ mɔn-cɔlɔ, ɛlɛ pa-tɩŋa pesewa nɛ peyebi-m—tɛtɛ nɛ Ɛsɔ ɛtaakpaɣ mbʋ palaba yɔ nɛ ɛlabɩnɩ tʋmɩyɛ.
17 Ɛlɛ Kɩbaɣlʋ kaasɩŋ mɔn-cɔlɔ kpam nɛ ɛha-m ɖoŋ, se pɩsa nɛ monsusi tɔm kiya nɛ ajɛɛ kpeekpe nɩɩ-tʋ;+ nɛ poholi-m mʋʋzʋʋ nɔɔ taa.+
18 Kɩbaɣlʋ kaɣ-m holuu lakasɩ kɩdɛkɛdɩsɩ tɩŋa taa nɛ ɛkaɣ ma-ñʋʋ yabʋ se mehiɣ e-Kewiyaɣ ŋga kɛwɛ ɛsɔdaa yɔ.+ Ɛnʋ tɩnɩ samtʋ tam. Amɛn.
19 Cɛlɩ mɛn-sɛtʋ Prisɩka nɛ Akiila+ nɛ Onezifɔɔrɩ ɖɩɣa taa mba.+
20 Eraasɩtɩ+ caɣ Kɔrɛntɩ, ɛlɛ pɩwɩɣaɣ Trofim+ nɛ meyebi-i Milɛɛ.
21 La mbʋ payɩ ŋpɩzɩɣ yɔ nɛ ŋkɔɔ pʋcɔ nɛ nikaɣ alɩwaatʋ talɩ.
Ebuluusi tiyiɣni-ŋ ɛ-sɛtʋ; Pudɛnsɩ nɛ Linuusi nɛ Kloodiya nɛ koobiya tɩŋa ɖɔɖɔ tiyiɣni-ŋ pɛ-sɛtʋ.
22 Kɩbaɣlʋ ɛwɛɛ fezuu ŋgʋ ŋlɩzɩɣ nɛ ŋwɩlɩɣ yɔ kɩ-cɔlɔ. Ɛlabɩ-mɩ lootiye.
Pɩ-tɛɛ tɔm
^ Yaa «wɩlɩtʋ ndʋ tɩwazɩɣ yɔ.»
^ Yaa «se paba iheyi-wɛ tɔm ndʋ pɔsɔɔlaa se panɩɩ yɔ.»
^ Yaa «wolo pɩ-yɔɔ nɛ ŋsusuu tɔm kɩbandʋ.»
^ Yaa «ɛjaɖɛ yɔɔ ɖʋtʋ tʋnɛ; pɩnzɩ sɩnɛ.» Cɔnɩ Tɔm pee sɔsɔna tɔbʋʋ lɩzʋʋ (Ɛjaɖɛ yɔɔ ɖʋtʋ).
^ Pʋ-tɔbʋʋ se tɔna takayɩsɩ kikpiyisi.
^ Cɔnɩ Tɔm kɩsɔzɩtʋ A5.
