Yohanɛɛsɩ takayaɣ kajalaɣ ñɩŋga 4:1-21
4 Man-kʋsɔɔlaa, itaatisi paa fezuu taa tɔm ndʋ* lɛ tɩ-yɔɔ,+ ɛlɛ ɩtakɩ fezuu taa tɔm* nɛ ɩna se tɩlɩnɩ Ɛsɔ cɔlɔ yaa we,+ mbʋ pʋyɔɔ yɔ cɛtɩm nayaa sakɩyɛ lɩ ɛjaɖɛ yɔɔ.+
2 Pʋnɛ ɩnaɣna se fezuu taa tɔm natʋyʋ lɩnɩ Ɛsɔ cɔlɔ: Fezuu taa tɔm ndʋ payɩ titisiɣ se Yesu Krɩstʋ kɔm tomnaɣ taa yɔ, ndʋ lɩnɩnɩ Ɛsɔ cɔlɔ.+
3 Ɛlɛ fezuu taa tɔm ndʋ tiitisiɣ Yesu yɔɔ yɔ, tɩtɩlɩɩnɩ Ɛsɔ cɔlɔ.+ Pɩtasɩ lɛ, pɩkɛ fezuu taa tɔm ndʋ tɩlɩnɩ Krɩstʋ koyindu cɔlɔ yɔ, tɔm ndʋ ɩnɩwa se tɩkɔŋ yɔ,+ nɛ lɛɛlɛɛyɔ tɩtɛm wɛʋ ɛjaɖɛ yɔɔ.+
4 Piya cikpesi, ɩlɩnɩ Ɛsɔ cɔlɔ, nɛ ɩwabɩ-wɛ,*+ mbʋ pʋyɔɔ yɔ weyi mɩ nɛ ɩ ɩwɛ nɔɔ kʋɖʋmaɣ yɔ,+ ɛkɩlɩ weyi ɛ nɛ ɛjaɖɛ pɛwɛ nɔɔ kʋɖʋmaɣ yɔ.+
5 Palɩnɩ ɛjaɖɛ yɔɔ;+ pʋyɔɔ pɔyɔɔdʋʋ tɔm ndʋ tɩlɩnɩ ɛjaɖɛ yɔɔ yɔ, nɛ ɛjaɖɛ welisiɣni-wɛ.+
6 Ða lɛ, ɖɩlɩnɩ Ɛsɔ cɔlɔ. Weyi ɛkpɛlɩkaa nɛ ɛtɩlɩ Ɛsɔ yɔ, ewelisiɣni-ɖʋ;+ weyi ɛtɩlɩɩnɩ Ɛsɔ cɔlɔ yɔ, eewelisiɣni-ɖʋ.+ Mbʋ ɖɩɖʋʋnɩ tʋkaɣ fezuu taa tɔm ndʋ tɩkɛ toovenim yɔ nɛ fezuu taa tɔm ndʋ tɩkɛ cɛtɩm yɔ pɛ-hɛkʋ taa.+
7 Man-kʋsɔɔlaa, ɖitaayele ɖama sɔɔlʋʋ,+ mbʋ pʋyɔɔ yɔ Ɛsɔ cɔlɔ sɔɔlɩm lɩnaa, nɛ weyi ɛwɛnɩ sɔɔlɩm yɔ, Ɛsɔ lʋlɩnɩ-ɩ nɛ ɛsɩm Ɛsɔ.+
8 Weyi ɛfɛyɩnɩ sɔɔlɩm yɔ, ɛtɩkpɛlɩkɩ nɛ ɛtɩlɩ Ɛsɔ, mbʋ pʋyɔɔ yɔ Ɛsɔ kɛ sɔɔlɩm.+
9 Ɛzʋnɔ Ɛsɔ lɩzɩ ɛ-sɔɔlɩm nɛ ɛwɩlɩ-ɖʋ: Ɛsɔ tiyi ɛ-Pɩyalʋ ɛgbamɩyɛ+ ɛjaɖɛ yɔɔ se pɩtɩŋnɩ ɛ-yɔɔ nɛ ɖihiɣ wezuu.+
10 Sɔɔlɩm mbʋ, mbʋ yɔ: pɩtɩkɛ se ɖɔsɔɔlɩnɩ Ɛsɔ, ɛlɛ ɛnʋ sɔɔlɩnɩ-ɖʋ nɛ etiyi ɛ-Pɩyalʋ se ɛkɛ ceɣu kɩlaʋ*+ ɖa-kɩwɛɛkɩm yɔɔ.+
11 Man-kʋsɔɔlaa, ye mbʋ Ɛsɔ ɛsɔɔlɩ-ɖʋ yɔ, ɖɩnɛ ɛlɛ pɩkɛnɩ-ɖʋ ɖɔɖɔ kɩjɛyʋʋ se ɖɩsɔɔlɩ ɖama.+
12 Nɔɔyʋ tɩna Ɛsɔ wiɖiyi nɛ ɛna.+ Ye ɖɩsɔɔlʋʋ ɖama yɔ, Ɛsɔ wɛɣ ɖa-taa, nɛ ɛ-sɔɔlɩm talɩ pilim ɖa-taa.+
13 Pʋnɛ ɖɩtɩlɩɣna se ɖiyeba nɛ ɖa nɛ ɩ ɖɩwɛɛ nɔɔ kʋɖʋmaɣ nɛ ɛnʋ ɖɔɖɔ eyeba nɛ ɖa nɛ ɩ ɖɩwɛɛ nɔɔ kʋɖʋmaɣ, mbʋ pʋyɔɔ yɔ ɛha-ɖʋ e-fezuu.
14 Pɩtasɩ lɛ, ɖa-maɣmaɣ ɖɩnawa, nɛ ɖɩwɛɛ ɖɩlɩzɩɣ aseɣɖe se Caa tiyi ɛ-Pɩyalʋ se ɛkɛ ɛjaɖɛ Ñʋʋ Yaɖʋ.+
15 Weyi etisiɣ kaɣlaa se Yesu kɛ Ɛsɔ Pɩyalʋ yɔ,+ Ɛsɔ yeki nɛ ɛ nɛ ɛyʋ ɛnʋ pɛwɛɛ nɔɔ kʋɖʋmaɣ tam, nɛ ɛyʋ ɛnʋ ɖɔɖɔ eyeki nɛ ɛ nɛ Ɛsɔ pɛwɛɛ nɔɔ kʋɖʋmaɣ tam.+
16 Nɛ ɖɩkpɛlɩkaa nɛ ɖɩtɩlɩ sɔɔlɩm mbʋ Ɛsɔ wɛnɩ ɖɔ-yɔɔ yɔ nɛ ɖitisi pɩ-yɔɔ.+
Ɛsɔ kɛ sɔɔlɩm,+ nɛ weyi ɛwɛ sɔɔlɩm taa tam yɔ, eyeki nɛ ɛ nɛ Ɛsɔ pɛwɛɛ nɔɔ kʋɖʋmaɣ tam, nɛ Ɛsɔ ɖɔɖɔ yeki nɛ ɛ nɛ ɛyʋ ɛnʋ pɛwɛɛ nɔɔ kʋɖʋmaɣ tam.+
17 Pʋyɔɔ sɔɔlɩm talɩ pilim ɖa-taa, se pɩsa nɛ ɖɩyɔɔdɩ tɔm kaalɛyɩtʋ*+ tɔm hʋʋ kɩyakʋ wiye, mbʋ pʋyɔɔ yɔ ɛzɩ ɛlɛ wɛʋ yɔ, mbʋ ɖɔɖɔ ɖa-maɣmaɣ ɖɩwɛ ɛjaɖɛ ɖɩnɛ ɖɩ-yɔɔ.
18 Sɔɔndʋ natʋyʋ fɛyɩ sɔɔlɩm taa,+ ɛlɛ sɔɔlɩm mbʋ pɩtalɩ pilim yɔ pɩlɔʋ sɔɔndʋ awayɩ,* mbʋ pʋyɔɔ yɔ sɔɔndʋ ɖɩkɩ-ɖʋ nʋmɔʋ. Toovenim taa lɛ, weyi ɛkɛ sɔɔndʋ tʋ yɔ, ɛtɩtalɩ pilim sɔɔlɩm taa.+
19 Ðɩsɔɔlʋʋ, mbʋ pʋyɔɔ yɔ ɛnʋ calɩnɩ-ɖʋ sɔɔlʋʋ.+
20 Ye nɔɔyʋ ɛtɔŋ se: «Mɔnsɔɔlɩ Ɛsɔ,» ɛlɛ ɛpaɖɩɣ e-koobu yɔ, ɛkɛ cɛtɩyʋ.+ Mbʋ pʋyɔɔ yɔ weyi ɛɛsɔɔlʋʋ e-koobu+ weyi ɛnaɣ-ɩ yɔ, ɛɛpɩzɩɣ nɛ ɛsɔɔlɩ Ɛsɔ weyi ɛɛnaɣ-ɩ yɔ.+
21 Nɛ ɛɖʋ-ɖʋ paɣtʋ tʋnɛ: weyi ɛsɔɔlɩ Ɛsɔ yɔ, pɩwɛɛ ɖɔɖɔ se ɛsɔɔlɩ e-koobu.+
