Pɩyɛɛrɩ takayaɣ kajalaɣ ñɩŋga 3:1-22
3 Mbʋ ɖɔɖɔ, mɩ halaa, iluzi mɩ-tɩ mɩ-walaa tɛɛ,+ se pɩsa nɛ ye pa-taa nabɛyɛ ɩɩñaŋ Ɛsɔ tɔm yɔ, pa-halaa ɖɔnɛ wabɩ-wɛ, pɩtaakɛ yɔɔdaɣ,+
2 mbʋ pʋyɔɔ yɔ, panaɣnɩ pɛ-ɛsa mɩ-ɖɔnɛ kele kele ñɩnɖɛ+ nɛ mɩ-ñamtʋ sɔsɔtʋ.
3 Itaayele nɛ mɩ-tɩ sandʋʋ kɛ mbʋ pɩnaɣ ɛsa yɔɔ yem yɔ—ñɔsɩ lʋʋ, nɛ sika ajana wondu lɛʋ+ yaa wondu kɩbandʋ suu—
4 ɛlɛ pɩkɛ mbʋ pɩmɛlɩ laŋɩyɛ taa yɔ, maɣzɩm* mbʋ pɩwɛ ɖiɣ ɖiɣ nɛ pɩwɛɛ hɛɛɛ yɔ+ pɩ-tɩ sandʋʋ mbʋ pɩɩwɛɛkɩɣ yɔ, nɛ pɩwɛ wazaɣ siŋŋ Ɛsɔ ɛsɩndaa.
5 Mbʋ pʋyɔɔ yɔ, mbʋ caanaʋ taa halaa kiɖeɖema mba pataɣaɣ Ɛsɔ liu yɔ pasandaɣ pa-tɩ nɛ poluzuu pa-tɩ pa-walaa tɛɛ,
6 ɛzɩ Saara ñam Abraham, nɛ ɛyaa-ɩ se kɩbaɣlʋ yɔ.+ Nɛ ɩpɩsɩ e-piya, ye ɩñɩtaa nɛ iwolo pɩ-yɔɔ nɛ ɩlakɩ mbʋ pɩwɛ ɖeu yɔ nɛ iiyeki se sɔɔndʋ ɛkpa-mɩ yɔ.+
7 Mbʋ ɖɔɖɔ, mɩ walaa, iwolo pɩ-yɔɔ nɛ mɩ nɛ mɩ-halaa ɩwɛɛ nɛ pɩla nɔɔ kʋɖʋmaɣ nɛ sɩmtʋ.* Ɩɖʋ-wɛ hɩɖɛ+ ɛzɩ ñanaɣ ŋga kɛwɛnɩ ɛjandʋ nɛ pɩkɩlɩ yɔ, pʋ-tɔbʋʋ se halʋ, mbʋ pʋyɔɔ yɔ mɩ nɛ wɛ ɖɔɖɔ ɩkaɣ kaʋ wezuu lootiye,+ se pɩsa nɛ nabʋyʋ ɛtaakaɣdɩ mɩ-adɩma.
8 Kɛdɛzaɣ lɛ, mɩ-tɩŋa ɩwɛɛnɩ maɣzɩm kʋɖʋmʋm,+ ɩnɩɩ ɖama siziŋ, ɩwɛɛnɩ koobiye sɔɔlɩm, pʋtɔdɩyɛ naʋ siŋŋ,+ nɛ tɩ luzuu.+
9 Ɩtaahɛyɩ kɩdɛkɛdɩm kɩdɛkɛdɩm lone taa+ yaa tʋtʋ tʋtʋ lone taa.+ Ɛlɛ ɩwazɩ kɩwazʋ,+ mbʋ pʋyɔɔ yɔ, nʋmɔʋ ŋgʋ kɩ-taa paya-mɩ, se pɩsa nɛ ɩpɩzɩ nɛ ɩmʋ wazaɣ.
10 Mbʋ pʋyɔɔ yɔ «weyi ɛñɩnɩɣ se ɛsɔɔlɩ wezuu nɛ ɛna kɩyakɩŋ kɩbaŋ yɔ, pɩwɛɛ se ɛkpa ɛ-nzʋlʋmɩyɛ nɛ mbʋ pɩfɛyɩ ɖeu yɔ+ nɛ ɛkpa e-ndomee nɛ pɔbɔtʋ tɔm yɔɔdʋʋ.
11 Ɛha siɣye mbʋ pɩfɛyɩ ɖeu yɔ+ nɛ ɛla mbʋ pɩwɛ ɖeu yɔ;+ ɛñɩnɩ laŋhɛzɩyɛ nɛ ese ɖɩ-wayɩ.+
12 Mbʋ pʋyɔɔ yɔ Yehowa* ɛsa wɛ siɣsiɣ tɩnaa yɔɔ, nɛ ɛ-nɩŋgbaaŋ welisiɣ pe-tenduu;+ ɛlɛ Yehowa* paŋ ɛsa nɛ mba palakɩ mbʋ pɩfɛyɩ ɖeu yɔ.»+
13 Toovenim taa lɛ, ye ɩwɛ kpekpeka mbʋ pɩwɛ ɖeu yɔ pɩ-labʋ taa yɔ, akaɣ-mɩ labʋ kɩdɛkɛdɩm?+
14 Ɛlɛ paa pɩwɛɛ se ɩtɔɔ kʋñɔŋ siɣsiɣ wɛtʋ yɔɔ yɔ, ɩkɛ koboyaɣ tɩnaa.+ Ɛlɛ, itaase sɔɔndʋ mbʋ pɩkpaɣ-wɛ sɔɔndʋ yɔ,* nɛ mɩ-laŋɩyɛ ɛtaamaa.+
15 Ɛlɛ ɩla nɛ Krɩstʋ weyi ɛkɛ Kɩbaɣlʋ yɔ ɛpɩsɩ kiɖeɖeu mɩ-laŋa taa; paa ɛzɩmtaa lɛ, ɩɖaŋ kpam se ɩlʋ lidaʋ ŋgʋ ɩwɛna yɔ kɩ-yɔɔ weyi ɛpɔzʋʋ-mɩ mbʋ pʋyɔɔ ɩwɛnɩ-kʋ yɔ ɛ-ɛsɩndaa; ɛlɛ ɩlakɩ mbʋ nɛ hɛɛɛ wɛtʋ+ nɛ ñamtʋ sɔsɔtʋ.+
16 Ɩwɛɛnɩ ɛhʋyɛ kɩbanɖɛ tam,+ se pɩsa nɛ mbʋ pɩ-taa payɩ pɔyɔɔdʋʋ mɩ-yɔɔ tɔm kɩdɛkɛdɩtʋ yɔ, fɛyɛ kpa mba pɔyɔɔdʋʋ mɩ-yɔɔ tɔm kɩdɛkɛdɩtʋ yɔ;+ mbʋ pʋyɔɔ yɔ ɩɖɔŋ ɖɔnɛ kɩbanɖɛ ɛzɩ Krɩstʋ wayɩ tɩŋɩyaa yɔ.+
17 Mbʋ pʋyɔɔ yɔ ye pɩkɛ Ɛsɔ sɔɔlɩm yɔ, pɩwɛ ɖeu se ɩtɔɔ kʋñɔŋ kɩbandʋ labʋ yɔɔ+ nɛ pɩkɩlɩ se ɩtɔɔ kʋñɔŋ kɩdɛkɛdɩm labʋ yɔɔ.+
18 Mbʋ pʋyɔɔ yɔ, Krɩstʋ sɩbɩ kɩwɛɛkɩm yɔɔ tam kʋɖʋm nɛ pɩkpaɣ pɩɖɛɛ,+ ɛyʋ siɣsiɣ tʋ sɩbɩ ɛyaa mba pɛfɛyɩ siɣsiɣ yɔ pɔ-yɔɔ,+ se pɩsa nɛ eɖiyi-mɩ nɛ ewoni Ɛsɔ cɔlɔ.+ Pakʋ-ɩ tomnaɣ taa,+ ɛlɛ pefezi-i fezuu taa.+
19 Nɛ wɛtʋ ndʋ tɩ-taa ɛwɛɛ nɛ ewolo esusi tɔm feziŋ salaka taa,+
20 feziŋ weyi ɩtaaña, alɩwaatʋ ndʋ Ɛsɔ ɖaŋaɣnɩ suuɖu* Noowa alɩwaatʋ taa yɔ,+ alɩwaatʋ ndʋ pasakaɣ aɖakaɣ,+ ŋga ka-taa ɛyaa pazɩ, pʋ-tɔbʋʋ se kalɩzasɩ* 8, hiɣ ñʋʋ yabʋ lɩm yɔɔ yɔ.+
21 Lɩm mɩyɩsʋʋ mbʋ pɩnɩɣzɩnɩ lakasɩ nzɩ yɔ, pɩyakɩ mɩ-ñʋʋ ɖɔɖɔ lɛɛlɛɛyɔ (pɩɩhɩzɩɣ tomnaɣ yɔɔ azuluma, ɛlɛ pɩkɛ ɛhʋyɛ kɩbanɖɛ pɔzʋʋ Ɛsɔ),+ pɩtɩŋnɩ Yesu Krɩstʋ femtu yɔɔ.
22 Ɛwɛ Ɛsɔ nesi kɩbanzɩ yɔɔ,+ mbʋ pʋyɔɔ yɔ ɛkpa ɛsɔdaa, nɛ poluzi Ɛsɔ tiyiyaa nɛ ñʋndɩnaa nɛ ɖoŋ tɩnaa ɛ-tɛɛ.+
Pɩ-tɛɛ tɔm
^ Piye piye, «fezuu.»
^ Yaa «iwolo pɩ-yɔɔ nɛ ɩmaɣzɩ mɩ-halaa yɔɔ; iwolo pɩ-yɔɔ nɛ ɩnɩɩ mɩ-halaa tɔm taa.»
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Pɩpɩzɩɣ pɩkɛ, «Ɛlɛ, sɔɔndʋ ɛtaakpa-mɩ nɛ pa-nazɩm.»
^ Piye piye, «Ɛsɔ suuɖu ɖaŋaɣ.»
^ Yaa «ɛyaa.»
