Roma mba 9:1-33
9 Toovenim menɖiɣni yɔɔdʋʋ Krɩstʋ taa; maacɛtɩɣ, ɛzɩ mɛ-ɛhʋyɛ tɩnʋʋ mɔ-yɔɔ nɛ ɖɩlɩzɩɣ aseɣɖe fezuu kiɖeɖeu taa yɔ,
2 se mɛwɛnɩ laŋwɛɛkɩyɛ sɔsɔɖɛ nɛ manɩɣ siziŋ kaahɛzaɣ ma-laŋɩyɛ taa.
3 Mbʋ pʋyɔɔ yɔ mɔnsɔɔlɩ faaa se pɩtayɩ ma nɛ Krɩstʋ ɖɛ-hɛkʋ taa ɛzɩ weyi pɔlɔ ɛ-yɔɔ nɔɔ kɩdɛkɛdaɣ yɔ se pɩsa nɛ mansɩnɩ mon-koobiya, ma-ñɩma tomnaɣ taa,
4 mba pɛkɛ Izrayɛɛlɩ mba yɔ. Mba Ɛsɔ kpaɣaa ɛzɩ ɛ-pɩyalaa yɔ, nɛ ɛha-wɛ samtʋ, nɛ ɛɖʋ-wɛ nɛ agbaa, nɛ ɛcɛlɩ-wɛ Paɣtʋ nɛ tʋmɩyɛ kiɖeɖee nɛ lidaʋ tɔm.
5 Palɩnɩ cɔzɔnaa liɖe taa, nɛ pe-liɖe taa Krɩstʋ lɩnɩ tomnaɣ taa. Pasa Ɛsɔ weyi ɛkɩlɩ pɩtɩŋa yɔ tamtam. Amɛn.
6 Ɛlɛ, pɩtɩwɩlɩ se Ɛsɔ tɔm tɩla. Mbʋ pʋyɔɔ yɔ pɩtɩkɛ mba payɩ palɩnɩ Izrayɛɛlɩ liɖe taa yɔ, mba kɛnɩ “Izrayɛɛlɩ” piya toovenim taa.
7 Nɛ pɩtɩkɛ ɛzɩma palɩnɩ Abraham liɖe taa yɔ, pʋyɔɔ pa-tɩŋa pɛkɛ piya; ɛlɛ, “Mbʋ pakaɣ yaʋ se ñe-liɖe yɔ, Izaakɩ yɔɔ pɩkaɣ tɩŋnʋʋ nɛ pɩwɛɛ.”
8 Pʋ-tɔbʋʋ se mba pɛkɛ piya tomnaɣ taa yɔ, patɩkɛ Ɛsɔ piya toovenim taa, ɛlɛ mba pɛkɛ piya pɩtɩŋnɩ lidaʋ tɔm yɔɔ yɔ pakpaɣ-wɛ ɛzɩ liɖe yɔ.
9 Mbʋ pʋyɔɔ yɔ lidaʋ tɔm ndʋ paayɔɔdaa yɔ, ndʋ yɔ: “Alɩwaatʋ tʋnɛ tɩ-yɔɔ, mankaɣ kɔm nɛ Saara kaɣ wɛnʋʋ pɩyalʋ.”
10 Pɩtɩkɛ alɩwaatʋ ndʋ tɩ-taa ɖeke, ɛlɛ alɩwaatʋ ndʋ ɖɔɖɔ Rebeka kaahaɣ ɖomaa hoɣa nɛ abalʋ kʋɖʋm yɔ, ɛnʋ lɛ ɖɔ-cɔzɔ Izaakɩ;
11 mbʋ pʋyɔɔ yɔ alɩwaatʋ ndʋ pataatɩɩlʋlɩtɩ-wɛ nɛ pataatɩɩlabɩtɩ kɩbandʋ yaa kɩdɛkɛdɩm nabʋyʋ yɔ, Ɛsɔ tɛm ɖʋʋ weyi ɛkaɣ lɩzʋʋ yɔ; mbʋ pʋyɔɔ yɔ Ɛsɔ lɩzɩɣ ɛyʋ weyi ɛsɔɔlaa yɔ, nɛ ɛɛtɩŋɩɣnɩ ɛyʋ ɛnʋ ɛ-tʋma yɔɔ,
12 pʋyɔɔ eheyi Rebeka se: “Sɔsɔ kaɣ kɛʋ neu yom.”
13 Ɛzɩ pamaʋ yɔ se: “Mɔnsɔɔlɩ Yakɔɔb, ɛlɛ manpaɖɩ Ezaawuu.”
14 Ye mbʋ ɖɩyɔɔdɩ suwe yɔ? Ɛzɩ Ɛsɔ lakɩ mbʋ pɩfɛyɩ siɣsiɣ yɔ? Kpa!
15 Mbʋ pʋyɔɔ yɔ eheyi Moyizi se: “Weyi mɔnsɔɔlaa se manaɣ ɛ-pʋtɔdɩyɛ yɔ, mankaɣ naʋ ɛ-pʋtɔdɩyɛ, nɛ weyi mɔnsɔɔlaa se manɩɣ e-siziŋ yɔ, mankaɣ nɩʋ e-siziŋ.”
16 Ye mbʋ, pɩɩlɩɣnɩ ɛyʋ sɔɔlɩm yaa ɛ-pana ñaɣʋ cɔlɔ,* ɛlɛ pɩlɩɣnɩ Ɛsɔ weyi ɛnaɣ pʋtɔdɩyɛ yɔ ɛ-cɔlɔ na.
17 Mbʋ pʋyɔɔ yɔ mayaɣ heyiɣ Farawɔɔ se: “Pʋnɛ pʋyɔɔ ɖeyi ɖeyi meyebi-ŋ se ŋwɛɛ: se mawɩlɩ mon-ɖoŋ pɩtɩŋnɩ ñɔ-yɔɔ nɛ meyele nɛ posusi ma-hɩɖɛ tɛtʋ kpeekpe yɔɔ.”
18 Ye mbʋ, weyi ɛsɔɔlaa se ɛnaɣ ɛ-pʋtɔdɩyɛ yɔ, ɛnaɣ ɛ-pʋtɔdɩyɛ, ɛlɛ weyi ɛsɔɔlaa se eyeki-i nɛ ɛla ñʋʋ taa ɖoŋ yɔ, eyeki-i nɛ ɛla ñʋʋ taa ɖoŋ.
19 Pʋyɔɔ lɛ, ŋkaɣ-m pɔzʋʋ se: “Ɛbɛ yɔɔ ɛtasɩɣ kʋʋ ɛyaa tɔm yɔ? Mbʋ pʋyɔɔ yɔ akaɖɩnɩ ɛ-sɔɔlɩm?”
20 Ɛlɛ, hayɩ ɛyʋ, anɩ ŋkɛnaa nɛ ŋkɛzɩɣ Ɛsɔ? Ɛzɩ wonuu ŋgʋ pamawa yɔ, kiheyiɣ weyi ɛma-kʋ yɔ se: “Ɛbɛ yɔɔ ŋlabɩ-m ɛzʋnɔ?”
21 Suwe? Ɛzɩ cʋʋ mayʋ fɛyɩnɩ ɖoŋ cʋʋ yɔɔ se ɛkpaɣ cʋʋ ŋgʋ enuutaa yɔ nɛ ɛlabɩnɩ ñanaɣ ŋga palakɩnɩ mbʋ pɩwɛ wazaɣ siŋŋ yɔ, nɛ ɛkpaɣ cʋʋ kʋɖʋmʋʋ ŋgʋ nɛ ɛlabɩnɩ ñanaɣ ŋga palakɩnɩ mbʋ pɩfɛyɩ wazaɣ siŋŋ yɔ?
22 Nɛ ye Ɛsɔ ɛsɔɔlaa se ɛwɩlɩ ɛ-pana nɛ eyele nɛ patɩlɩ e-ɖoŋ, nɛ pʋyɔɔ lɛ, ɛwɩlɩ e-suuɖu pana ñanzɩ nzɩ sɩmʋnaa se paɖɩzɩ-sɩ yɔ?
23 Nɛ ye ɛlabɩ mbʋ se patɩlɩ ɛ-samtʋ sɔsɔtʋ ndʋ ɛwɩlɩ pʋtɔdɩyɛ naʋ ñanzɩ, nzɩ ɛlɛyɩ-sɩ ñɔɔzʋʋ nɛ ɛsɩɩ se ɛsam-sɩ yɔ,
24 pʋ-tɔbʋʋ se ɖa mba ɛya-ɖʋ Yuuda mba hɛkʋ taa nɛ ajɛɛ taa ɖɔɖɔ yɔ, ɖɩyɔɔdʋʋ pɩ-tɔm suwe?
25 Pɩwɛ ɛzɩ ɛyɔɔdʋʋ ɖɔɖɔ Ozee takayaɣ taa yɔ se: “Ɛyaa mba patɩkɛ man-samaɣ yɔ, mankaɣ-wɛ yaʋ se ‘man-samaɣ,’ nɛ halʋ weyi patɩsɔɔlɩ-ɩ yɔ se, ‘kʋsɔɔlʋ’;
26 nɛ ɖenɖe paaheyi-wɛ se: ‘Ɩtɩkɛ man-samaɣ’ yɔ, peeɖe pakaɣ-wɛ yaʋ se ‘Ɛsɔ ɛsadʋ pɩyalaa.’”
27 Pɩtasɩ lɛ, Izaayii mabɩ kubuka Izrayɛɛlɩ yɔɔ nɛ ɛtɔ se: “Paa Izrayɛɛlɩ piya ɩɖɔwa ɛzɩ teŋgu taa kañɩŋa yɔ, mba pɩkazaa yɔ pe-ɖeke pakaɣnɩ hiɣu ñʋʋ yabʋ.
28 Mbʋ pʋyɔɔ yɔ Yehowa* kaɣ pɔzʋʋ akɔnta tɛtʋ yɔɔ, nɛ ɛtɛŋ-kʋ nɛ ɛpɔzʋʋ-kʋ lɛɛ lɛɛ.”
29 Pɩtasɩ lɛ, ɛzɩ Izaayii kaayɔɔdʋʋ yɔ: “Ye yoyaa tɛ Yehowa* ɛtaakazɩ-ɖʋ liɖe naɖɩyɛ yɔ, ɖɩɩpɩsɩ ɛzɩ Sodom yɔ, nɛ ɖɩɩnɩɣzɩnɩ Gomɔɔrɩ.”
30 Ye mbʋ, ɖɩyɔɔdɩ suwe yɔ? Se paa ajɛɛ taa mba ɩtɩñɩnɩ siɣsiɣ wɛtʋ yɔ, pehiɣ siɣsiɣ wɛtʋ, siɣsiɣ wɛtʋ ndʋ tɩlɩɣnɩ tisuu taa yɔ;
31 ɛlɛ Izrayɛɛlɩ mba yɔ, paa pañɩnɩ siɣsiɣ wɛtʋ paɣtʋ natʋyʋ yɔ, petihiɣ paɣtʋ ndʋ.
32 Ɛbɛ yɔɔ? Mbʋ pʋyɔɔ yɔ patɩñɩnɩ-tʋ nɛ tisuu, ɛlɛ pañɩnɩ-tʋ pɩtɩŋnɩ tʋma yɔɔ. “Pɩyɛ nɖɩ ɖituuluu yɔ,” ɖituuli-wɛ;
33 ɛzɩ pamaʋ yɔ se: “Ɩna! Menɖiɣni sɩʋ Siyɔŋ taa pɩyɛ nɖɩ ɖituuluu yɔ nɛ ɛwaɣ ŋga kapadɩɣ yɔ, ɛlɛ weyi ɛwɛɣnɩ tisuu kɔ-yɔɔ yɔ, fɛyɛ ɛɛkaɣ-ɩ kpaʋ.”*
Pɩ-tɛɛ tɔm
^ Piye piye, “pɩɩlɩɣnɩ weyi ɛsɔɔlaa yɔ yaa weyi eseɣ yɔ ɛ-cɔlɔ.”
^ Cɔnɩ Tɔm pee sɔsɔna tɔbʋʋ lɩzʋʋ.
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa “pɩɩkaɣ-ɩ tibu yɔɔɔ.”
