Koloosi mba 4:1-18
4 Mɩ ñʋndɩnaa, ɩla mi-yomaa mbʋ pɩwɛ siɣsiɣ nɛ pɩmʋna yɔ, ɩsɩm mbʋ se mɩ ɖɔɖɔ ɩwɛnɩ Ñʋʋdʋ nɔɔyʋ ɛsɔdaa.
2 Ɩwɛɛ adɩma yɔɔ tam, ɩcaɣnɩ mɩ-ɛsa adɩma taa nɛ ɩwɛɛ sɛtʋ yɔɔ.
3 Alɩwaatʋ kʋɖʋmtʋ ndʋ tɩ-taa lɛ, ɩtɩmɩ ɖɔɖɔ ɖɔ-yɔɔ se Ɛsɔ ɛtʋlɩ-ɖʋ nɔnɔɔ nakɛyɛ nɛ ɖɩpɩzɩ ɖisusi Krɩstʋ yɔɔ mɛsaɣ tɛɛ tɔm kiɖeɖetu, ndʋ tɩ-yɔɔ mɛwɛ salaka kpasɩ taa yɔ,
4 nɛ manpɩzɩ monsusi-tʋ kpayɩ kpayɩ ɛzɩ pɩpɔzʋʋ se mala yɔ.
5 Iwolo pɩ-yɔɔ nɛ ɩɖɔmnɩ lɔŋsɩnɖɛ awayɩ mba cɔlɔ, ɩlabɩnɩ mɩ-alɩwaatʋ tʋmɩyɛ camɩyɛ.*
6 Iyele nɛ mɩ-yɔɔdaɣ wɛɛ leleŋ paa ɛzɩmtaa, nɛ ɖɔm wɛɛ ka-taa, se pɩsa nɛ ɩtɩlɩ ɛzɩma pɩwɛɛ se icosi paa ɛyʋ weyi lɛ yɔ.
7 Tisiiki, weyi ɛkɛ mon-koobu kʋsɔɔlʋ nɛ lɩmɖʋyʋ siɣsiɣ tʋ nɛ ɛkɛ yom Kɩbaɣlʋ taa ɛzɩ ma yɔ, ɛkaɣ-mɩ kɛdʋʋ mɔ-yɔɔ tɔm tɩŋa.
8 Mentiyiɣ-i mɩ-cɔlɔ se pɩsa nɛ ɩtɩlɩ ɛzɩma ɖɩwɛɛ yɔ nɛ ɛhɛzɩ ɖɔɖɔ mɩ-laŋa.
9 Ɛ nɛ Onezim, weyi ɛkɛ mon-koobu siɣsiɣ tʋ nɛ kʋsɔɔlʋ nɛ ɛkɛ mɩ-tɛ tʋ yɔ pɔkɔŋna; pakaɣ-mɩ kɛdʋʋ mbʋ payɩ pɩwɛɛ nɛ pɩlakɩ cɩnɛ yɔ.
10 Aristaarkɩ, weyi ɛkɛ salaka tʋ ɛzɩ ma ɖɔɖɔ yɔ, etiyiɣni-mɩ ɛ-sɛtʋ, nɛ Barnaabaasɩ ɖɛdʋ Maarkɩ ɖɔɖɔ (weyi ɛ-tɔm paaheyi-mɩ se ye ɛkɔm mɩ-tɛ yɔ ɩmʋ-ɩ camɩyɛ yɔ),
11 nɛ Yesu weyi payaɣ se Yustuusi yɔ, pɛkɛ mba pɛpɛlɩ-wɛ yɔ. Pe-ɖeke pɛkɛnɩ mba ma nɛ wɛ ɖɩlakɩ tʋmɩyɛ Ɛsɔ Kewiyaɣ yɔɔ yɔ, nɛ papɩsɩ mba pɛhɛzɩ ma-laŋɩyɛ siŋŋ yɔ.*
12 Epafraasɩ, weyi ɛkɛ Krɩstʋ Yesu yom nɛ ɛkɛ mɩ-tɛ tʋ yɔ, etiyiɣni-mɩ ɛ-sɛtʋ. Ɛwɛɛ nɛ ɛlʋkɩ mɩ-yɔɔ ɛ-adɩma taa paa ɛzɩmtaa, se pɩsa nɛ ɩtɛzɩ ɖɔkʋʋ kpam ɛzɩ ɛyaa mba papɩwa yɔ nɛ ɩwɛɛnɩ lidaʋ siŋŋ Ɛsɔ sɔɔlɩm tɩŋa taa.
13 Mbʋ pʋyɔɔ yɔ, malɩzɩɣ aseɣɖe ɛ-yɔɔ se ɛñakɩ pana siŋŋ mɩ nɛ mba pɛwɛ Lawodisee nɛ Iyerapoliisi yɔ, mɩ-yɔɔ.
14 Fɛɖʋ kʋsɔɔlʋ Luka tiyiɣni-mɩ ɛ-sɛtʋ, nɛ Demaasɩ ɖɔɖɔ.
15 Ɩcɛlɩ mɛn-sɛtʋ koobiya mba pɛwɛ Lawodisee yɔ, nɛ Nimfaa nɛ ɛgbɛyɛ nɖɩ ɖɩwɛ ɛ-ɖɩɣa taa yɔ.
16 Nɛ pɛtɛŋ kalʋʋ takayaɣ kanɛ mɩ-tɛ lɛ, iyele nɛ pakalɩ-kɛ ɖɔɖɔ Lawodisee mba ɛgbɛyɛ taa, nɛ mɩ ɖɔɖɔ ɩkalɩ Lawodisee ñɩŋga.
17 Pɩtasɩ lɛ, iheyi Arɩsiipu se: “Cɔnɩ lɩm ɖʋʋ tʋmɩyɛ nɖɩ ŋmʋ Kɩbaɣlʋ taa yɔ ɖi-ɖeɖe camɩyɛ, se pɩsa nɛ ŋlabɩ-ɖɩ.”
18 Ma Pɔɔlɩ, mɛn-sɛtʋ yɔ, ma-maɣmaɣ me-nesi tɛɛ sɛtʋ. Ɩtɔzɩ man-salaka kpasɩ yɔɔ. Lootiye ɛwɛɛ mɩ-cɔlɔ.
